Saida mak Terus Boot?

Bíblia nia resposta

Terus boot mak tempu neʼebé susar liu hotu iha ema nia istória. Tuir Bíblia nia profesia, neʼe sei akontese durante “loron ikus sira”, ka “tempu nia rohan”. (2 Timóteo 3:1; Daniel 12:4) Kona-ba tempu neʼe, Bíblia dehan: “Loron sira-neʼe mak loron terus nian. Husi tempu neʼebé Maromak kria mundu toʼo tempu neʼebá seidauk mosu terus hanesan neʼe, no depois neʼe mós sei la mosu fali.”​—Marcos 13:19; Daniel 12:1; Mateus 24:21, 22.

Buat neʼebé akontese durante terus boot

• Relijiaun falsu sei lakon. Relijiaun falsu sei lakon derrepente no lalais tebes. (Apokalipse 17:1, 5; 18:9, 10, 21) Maromak sei uza organizasaun polítiku neʼebé Nasoins Unidas mak reprezenta atu kumpre ida-neʼe hodi tuir Maromak nia hakarak.​—Apokalipse 17:3, 15-18.a

• Ataka relijiaun neʼebé loos. Grupu nasaun hotu, neʼebé Ezequiel nia vizaun temi nuʼudar “Gog husi rai-Magog”, sei koko atu halakon ema neʼebé halaʼo relijiaun loos. Maibé, Maromak sei proteje ninia povu.​—Ezequiel 38:1, 2, 9-12, 18-23.

• Ema hotu hetan tesi-lia. Jesus sei tesi-lia ba ema hotu iha mundu no “sei haketak ema, hanesan bibi-atan haketak bibi-malae husi bibi-timur”. (Mateus 25:31-33) Jesus sei tesi-lia ba ema ida-idak tuir sira-nia hahalok se sira apoia ka la apoia ninia “alin sira” neʼebé sei ukun hamutuk ho nia iha lalehan.​—Mateus 25:34-46.

• Halibur sira neʼebé sei ukun iha lalehan. Ema laran-metin neʼebé Maromak hili ona atu ukun hamutuk ho Jesus Kristu sei remata sira-nia moris iha rai no hetan moris-hiʼas ba lalehan.​—Mateus 24:31; 1 Korinto 15:50-53; 1 Tesalónika 4:15-17.

• Armagedon. Neʼe mak “funu iha Maromak neʼebé Kbiit Boot Liu Hotu nia loron boot”, neʼebé Bíblia mós bolu nuʼudar “Jeová nia loron”. (Apokalipse 16:14, 16; Isaias 13:9; 2 Pedro 3:12) Ema hotu neʼebé Jesus tesi-lia nuʼudar ema aat sei lakon mohu. (Sofonias 1:18; 2 Tesalónika 1:6-10) Sistema polítika iha mundu neʼebé Bíblia temi nuʼudar animál fuik neʼebé iha ulun hitu mós sei lakon ba nafatin.​—Apokalipse 19:19-21.

Buat neʼebé sei akontese depois terus boot

• Kesi metin Satanás no anju aat sira. Anju kbiit boot ida sei soe Satanás no anju aat sira “ba rai-kuak neʼebé kleʼan tebes”, neʼe mak fatin simbóliku neʼebé labele halo buat ida. (Apokalipse 20:1-3) Satanás nia kondisaun neʼe atu hanesan sulan metin iha komarka laran no nia labele fó influénsia tan.​—Apokalipse 20:7.

• Maromak nia Ukun ba tinan rihun ida hahú. Maromak nia governu sei hahú ninia ukun ba tinan rihun ida, no neʼe sei lori benefísiu furak oioin ba ema. (Apokalipse 5:9, 10; 20:4, 6) “Ema-lubun boot neʼebé sura labele” sei “liu terus boot” no haree oinsá ida-neʼe akontese iha mundu.​—Apokalipse 7:9, 14; Salmo 37:9-11.