Iha “sala hitu neʼebé lori ba mate” ka lae?

Bíblia nia resposta

Bíblia la temi espesífiku kona-ba “sala hitu neʼebé lori ba mate”. Maski nuneʼe, Bíblia hanorin duni katak bainhira ema halo sala sériu oioin neʼe bele hanetik sira atu hetan salvasaun. Porezemplu, Bíblia temi sala sériu sira hanesan sala seksuál, adora estátua, halo espiritizmu, hirus toʼo la kontrola an, no lanu-teen nuʼudar “hahalok sira neʼebé husi isin”, no tuirmai dehan: “Sira neʼebé halo beibeik buat sira-neʼe sei la simu Maromak nia Ukun nuʼudar liman-rohan.”​—Galásia 5:19-21.a

Bíblia dehan katak ‘iha buat hitu’ neʼebé Maromak hakribi, loos ka lae?

Sin. Iha Bíblia Kadi Kapasidade, Provérbios 6:16 dehan: “Iha buat neen neebe NAI odi, buat hitu neebe foer loos ba Nia.” Maibé, neʼe la dehan katak Provérbios 6:17-19 temi sala sériu hotu. Eskritura neʼe la temi sala iha dalan neʼebé espesífiku maibé temi buat neʼebé lori ema ba sala sériu inklui iha ema nia hanoin, liafuan no hahalok.b

Saida mak “sala neʼebé lori ba mate”?

Fraze mosu iha 1 João 5:16 iha tradusaun Bíblia balu. Porezemplu, Liafuan diak ba imi, segunda edisaun, dehan: “Iha sala neʼebé lori ba mate.” Saida mak diferensa entre “sala neʼebé lori ba mate” ho “sala neʼebé la lori ba mate”?​—1 João 5:16.

Bíblia fó sai klaru katak sala hotu lori ema ba mate. Maski nuneʼe, liuhusi Jesus Kristu nia sakrifísiu neʼebé kasu ema nia sala, ita bele hetan salvasaun hodi sai livre husi sala no mate. (Roma 5:12; 6:23) Tan neʼe, “sala neʼebé lori ba mate” mak sala neʼebé labele taka ho Kristu nia sakrifísiu. Ema neʼebé halo sala hanesan neʼe mak ema neʼebé deside metin atu kontinua halo sala no la troka ninia atitude ka hahalok. Bíblia mós fó sai katak sala hanesan neʼe sei “la hetan perdua”.​—Mateus 12:31; Lucas 12:10.