PERGUNTA HUSI JOVEN SIRA
Oinsá mak haʼu bele hetan privasidade?
Tanbasá mak inan-aman mete Ita-nia privasidade?
Dala ruma dalan neʼebé Ita-nia inan-aman hatudu interese mai Ita halo Ita sente hanesan inan-aman mete Ita-nia moris. Porezemplu:
Joven ida naran Erin dehan: “Haʼu-nia apá foti haʼu-nia telefone, husu haʼu-nia kode telefone, no lee haʼu-nia mensajen hotu.” Erin hatutan tan: “Se haʼu komesa hirus, haʼu-nia apá sei hanoin kedas katak haʼu subar buat ruma husi nia.”
Denise, neʼebé tinan maizumenus 20, hanoin-hetan ninia amá cek nia telefone, no dehan: “Amá haree númeru kontaktu ida-idak no husu haʼu, númeru neʼe sé-nian no koʼalia saida deʼit ho ema neʼe.”
Joven ida naran Kayla dehan katak nia amá lee ninia kadernu neʼebé nia hakerek loroloron. “Iha kadernu laran haʼu hakerek kona-ba haʼu-nia sentimentu sira no neʼe mós inklui kona ba haʼu-nia amá! Neʼe halo haʼu-nia amá laran-kanek, depois neʼe haʼu deside atu para hakerek kona ba haʼu-nia sentimentu.”
Pontu importante: Ita-nia inan-aman nia responsabilidade mak atu tau matan Ita, maibé Ita labele kontrola sira-nia dalan oinsá atu tau matan Ita. Dala ruma Ita sente Ita-nia inan-aman kontrola demais Ita ka lae? Karik. Maibé iha buat balu neʼebé bele ajuda Ita atu la sente hanesan neʼe beibeik.
Saida mak Ita bele halo
Koʼalia nakloke. Bíblia anima ita “atu hatudu laran-moos iha buat hotu”. (Ebreu 13:18) Hakaʼas an atu hatudu hahalok diʼak ba Ita-nia inan-aman. Kuandu Ita onestu no koʼalia nakloke ba sira, neʼe halo sira tau fiar ba Ita no Ita sente livre liután.
Hanoin toʼok: Ita mak ema neʼebé ema seluk bele tau fiar ka lae? Ita sempre tama uma kalan boot? Ita koʼalia nakloke ba Ita-nia inan-aman kona ba Ita-nia ransu no atividade neʼebé Ita halo ka lae?
“Haʼu tenke halo buat ruma se haʼu hakarak amá no apá tau fiar mai haʼu. Haʼu sempre koʼalia nakloke ba sira kona ba haʼu-nia atividade loroloron nian, rezultadu mak, sira tau fiar mai haʼu no respeitu haʼu-nia privasidade.”—Delia.
Hatudu pasiénsia. Bíblia dehan: “Hatudu nafatin hahalok diʼak.” (1 Pedro 2:12) Presiza tempu atu ema tau fiar mai Ita, maibé se Ita hakaʼas an hatudu hahalok diʼak, neʼe sei lori rezultadu ne’ebe diʼak no la saugati deʼit.
Hanoin toʼok: Uluk Ita-nia inan-aman mós joven hanesan ho Ita. Tan neʼe, sira hakarak hatene kona ba Ita-nia moris.
“Tuir haʼu-nia hanoin inan-aman sira lakohi sira-nia oan halo sala ne’ebe hanesan ho sira halo kuandu sei joven.”—Daniel.
Komprende inan-aman nia sentimentu. Koko tau Ita-nia an iha inan-aman nia pozisaun. Bíblia dehan inan neʼebé diʼak “tau matan didiʼak ba serbisu hotu iha ninia uma-laran” no aman neʼebé diʼak haboot ninia oan sira “ho dixiplina no ho hanorin neʼebé tuir Jeová nia hakarak”. (Provérbios 31:27; Éfeso 6:4, nota-rodapé) Atu kumpre ida-neʼe, Ita-nia inan-aman tenke halo tuir Bíblia nia matadalan, tan neʼe sira envolve iha Ita-nia moris.
Hanoin toʼok: Se Ita mak inan ka aman ida no Ita hatene tempu joven nian mak oinsá, Ita sei husik Ita-nia oan sira livre deʼit no la buka-hatene kona ba sira-nia atividade ka lae?
“Bainhira Ita sei joven, Ita sente hanesan Ita-nia inan-aman hakarak mete Ita-nia moris. Maibé bainhira haʼu sai boot, haʼu foin komprende katak haʼu-nia inan-aman halo nuneʼe, tanba sira hadomi haʼu.”—James.