Maromak iha fatin hotu-hotu ka lae?
Bíblia nia resposta
Maromak bele haree buat hotu no bele halo buat ruma iha fatin naran deʼit neʼebé nia hili. (Provérbios 15:3; Ebreu 4:13) Maski nuneʼe, Bíblia la hanorin katak Maromak iha fatin hotu-hotu no iha buat hotu. Bíblia hanorin katak Maromak mak espíritu no nia iha hela-fatin.
Maromak mak hanesan saida? Maromak mak espíritu. (João 4:24) Ema labele haree nia. (João 1:18) Iha Bíblia, bainhira ema haree vizaun kona-ba Maromak, sira sempre haree nia iha fatin espesífiku. Bíblia nunka temi katak nia iha fatin hotu-hotu.—Isaias 6:1, 2; Apokalipse 4:2, 3, 8.
Maromak hela iha neʼebé? Bíblia hatete katak Maromak iha “hela-fatin iha lalehan”. (1 Reis 8:30) Neʼe katak Maromak la hela iha mundu ka iha universu maibé iha lalehan. Bíblia temi kona-ba tempu ida bainhira anju sira “halibur hamutuk no hamriik iha Jeová nia oin”.a Ida-neʼe hatudu katak Maromak hela iha fatin espesífiku.—Job 1:6.
Se Maromak la iha fatin hotu-hotu, nia hanoin duni haʼu ka lae?
Sin. Maromak hanoin tebes ema ida-idak. Maski Maromak hela iha lalehan, maibé nia haree ema iha mundu neʼebé hakarak halo nia kontente, no nia ajuda ema sira-neʼe. (1 Reis 8:39; 2 Krónikas 16:9) Hanoin toʼok kona-ba oinsá Maromak hatudu katak nia hanoin ema neʼebé adora nia ho laran:
Bainhira Ita halo orasaun: Maromak rona kedas bainhira ita halo orasaun.—2 Krónikas 18:31.
Bainhira Ita sente estrese: “Jeová besik ema sira neʼebé laran-kanek; nia salva sira neʼebé laran-triste.”—Salmo 34:18.
Bainhira Ita presiza matadalan: Jeová “sei fó ba ó kbiit atu komprende kleʼan no hanorin ó” liuhusi ninia Liafuan, Bíblia.—Salmo 32:8.
Hanoin neʼebé sala kona-ba Maromak iha fatin hotu-hotu
Hanoin neʼebé sala: Maromak iha kriasaun hotu-hotu.
Hanoin neʼebé loos: Maromak la hela iha mundu ka iha fatin ida iha universu. (1 Reis 8:27) Fitun sira no kriasaun seluk “fó sai Maromak nia glória”. (Salmo 19:1) Maibé, Maromak labele hela iha ninia kriasaun, hanesan ema neʼebé pinta dezeñu mós labele hela iha ninia dezeñu. Maski nuneʼe, ema nia dezeñu bele ajuda ita aprende buat ruma kona-ba ema neʼebé pinta dezeñu neʼe. Nuneʼe mós, kriasaun bele ajuda ita atu aprende buat ruma kona-ba Kriadór nia hahalok sira, hanesan ninia kbiit, matenek no domin.—Roma 1:20.
Hanoin neʼebé sala: Maromak tenke iha fatin hotu-hotu atu bele hatene buat hotu no iha kbiit boot liu hotu.
Hanoin neʼebé loos: Maromak nia espíritu santu mak Maromak nia forsa neʼebé nia uza atu kumpre ninia hakarak. Liuhusi ninia espíritu santu, Maromak bele hatene buat hotu no halo buat naran deʼit, iha fatin naran deʼit iha tempu naran deʼit, maski nia la iha fatin neʼe.—Salmo 139:7.
Hanoin neʼebé sala: Salmo 139:8 hanorin katak Maromak mak iha fatin hotu-hotu tanba hatete: “Se haʼu saʼe ba lalehan, Ita iha neʼebá, no se haʼu halo haʼu-nia kama iha rate, Ita mós iha neʼebá.”
Hanoin neʼebé loos: Eskritura neʼe la koʼalia kona-ba Maromak iha fatin naran deʼit. Hodi uza poezia, eskritura neʼe hanorin katak la iha fatin neʼebé dook liu ba Maromak atu ajuda ita.
a Jeová mak Maromak nia naran neʼebé temi iha Bíblia.