Jesus saʼe kuda-burru ida hodi tama Jeruzalein

Profesia kona-ba Mesias hatudu duni katak Jesus mak Mesias ka lae?

Bíblia nia resposta

Sin. Bainhira iha rai, Jesus kumpre profesia barak kona-ba “Mesias, Ulun-Naʼin”, ida neʼebé sei sai “Salvadór ba mundu”. (Daniel 9:25; 1 João 4:14) Depois Jesus mate, nia mós kontinua kumpre profesia kona-ba Mesias.—Salmo 110:1; Apóstolu 2:34-36.

Liafuan “Mesias” katak sá?

Liafuan Ebraiku Mashiah (Mesias) no mós liafuan Gregu Kristus (Kristu) signifika “Ida neʼebé Maromak hili ona”. Tan neʼe, liafuan “Jesus Kristu” signifika katak “Jesus, Ida neʼebé Maromak hili ona”, ka “Jesus, Mesias”.

Iha tempu Bíblia nian, baibain kuandu hili ema ida atu kaer pozisaun espesiál ruma, ema fui mina ba ema neʼe nia ulun. (Levítico 8:12; 1 Samuel 16:13) Maromak hili Jesus atu sai Mesias, neʼe mak pozisaun neʼebé espesiál tebes. (Apóstolu 2:36) Maibé, duké fui mina ba Jesus, Maromak hili Jesus liuhusi espíritu santu.—Mateus 3:16.

Ema barak mak kumpre profesia kona-ba Mesias ka lae?

Lae. Ita bele kompara neʼe ho ita-nia limafuan-fatin. Ema ida-idak nia limafuan-fatin la hanesan. Nuneʼe mós Bíblia nia profesia hatudu katak iha Mesias ka Kristu ida deʼit. Maibé, Bíblia fó avizu katak “Kristu falsu no profeta falsu sira sei mosu no sira sei halo sinál no milagre boot oioin tanba koko atu lohi mós ema sira neʼebé Maromak hili ona.”—Mateus 24:24.

Mesias bele mosu tan iha futuru ka lae?

Lae. Bíblia fó-hatene nanis katak Mesias mak jerasaun husi liurai Izraél ida naran David. (Salmo 89:3, 4) Maibé, ema Judeu nia lista jerasaun nian toʼo David lakon ona, karik lakon bainhira ema Roma manán sidade Jeruzalein iha tinan 70 EC.a Hahú husi tempu neʼebá, la iha ema ida mak bele prova katak nia mai husi Liurai David nia liña família. Maibé, iha Jesus nia tempu sei iha hela lista sira-neʼe, no ninia inimigu sira mós labele nega katak nia mai husi David nia jerasaun.—Mateus 22:41-46.

Iha Bíblia laran iha profesia hira kona-ba Mesias?

Susar atu hatene númeru espesífiku kona-ba profesia neʼebé refere ba Mesias. Porezemplu, métodu atu sura profesia sira mós la hanesan, maski neʼe mak profesia neʼebé koʼalia ho klaru kona-ba Mesias. Porezemplu iha Isaias 53:2-7 temi profesia oioin neʼebé refere ba Mesias. Ema balu karik sura ida-neʼe nuʼudar profesia ida deʼit, maibé ema seluk karik haree ida-neʼe nuʼudar profesia oioin neʼebé ketaketak.

Profesia balu kona-ba Mesias neʼebé Jesus kumpre

Profesia	Hakerek iha	Sai loos
Abraão nia bei-oan	Génesis 22:17, 18	Mateus 1:1
Jerasaun husi Abraão nia oan Isaac	Génesis 17:19	Mateus 1:2
Moris mai husi suku Judá	Génesis 49:10	Mateus 1:1, 3
Husi Liurai David nia liña jerasaun	Isaias 9:7	Mateus 1:1
Moris husi feto virjen ida	Isaias 7:14	Mateus 1:18, 22, 23
Moris iha Belein	Miqueias 5:2	Mateus 2:1, 5, 6
Ema hanaran nia Emanuelb	Isaias 7:14	Mateus 1:21-23
Moris iha família neʼebé kiak	Isaias 53:2	Lucas 2:7
Ema oho labarik-mane sira depois nia moris	Jeremias 31:15	Mateus 2:16-18
Sai husi rai-Ejitu	Oseias 11:1	Mateus 2:13-15
Ema bolu nia nuʼudar ema Nazaréc	Isaias 11:1	Mateus 2:23
Ema neʼebé lori lia-menon mosu uluk	Malaquias 3:1	Mateus 11:7-10
Sai nuʼudar Mesias iha tinan 29 EC.d	Daniel 9:25	Mateus 3:13-17
Maromak rekoñese nia nuʼudar ninia oan	Salmo 2:7	Apóstolu 13:33, 34
Laran-manas ba Maromak nia uma	Salmo 69:9	João 2:13-17
Haklaken liafuan diʼak	Isaias 61:1	Lucas 4:16-21
Serbisu haklaken iha Galileia mak hanesan naroman boot ida	Isaias 9:1, 2	Mateus 4:13-16
Halo milagre hanesan Moisés	Deuteronómio 18:15	Apóstolu 2:22
Hanesan Moisés, nia fó sai Maromak nia hanoin	Deuteronómio 18:18, 19	João 12:49
Kura ema barak nia moras	Isaias 53:4	Mateus 8:16, 17
La dada atensaun ba nia an rasik	Isaias 42:2	Mateus 12:17, 19
Hatudu laran-sadiʼa ba ema neʼebé terus	Isaias 42:3	Mateus 12:9-20; Marcos 6:34
Hatudu sai Maromak nia justisa	Isaias 42:1, 4	Mateus 12:17-20
Konsellu-Naʼin neʼebé Kmanek	Isaias 9:6, 7	João 6:68
Haklaken Maromak nia naran	Salmo 22:22	João 17:6
Koʼalia hodi uza ai-knanoik	Salmo 78:2	Mateus 13:34, 35
Ulun-Naʼin ida	Daniel 9:25	Mateus 23:10
Ema barak la fiar nia	Isaias 53:1	João 12:37, 38
Fatuk neʼebé halo ema sidi	Isaias 8:14, 15	Mateus 21:42-44
Ema la simu	Salmo 118:22, 23	Apóstolu 4:10, 11
Ema odi nia la ho razaun	Salmo 69:4	João 15:24, 25
Saʼe kuda-burru hodi tama Jeruzalein	Zacarias 9:9	Mateus 21:4-9
Labarik sira hahiʼi nia	Salmo 8:2	Mateus 21:15, 16
Mai hodi Jeová nia naran	Salmo 118:26	João 12:12, 13
Belun diʼak mak kontra nia	Salmo 41:9	João 13:18
Faʼan nia ho osan-mutin 30e	Zacarias 11:12, 13	Mateus 26:14-16; 27:3-10
Belun sira husik hela nia	Zacarias 13:7	Mateus 26:31, 56
Ema fó sasin falsu kontra nia	Salmo 35:11	Mateus 26:59-61
Nia la koʼalia liafuan ida ba ema neʼebé duun nia	Isaias 53:7	Mateus 27:12-14
Ema tafui kabeen ba nia	Isaias 50:6	Mateus 26:67; 27:27, 30
Ema baku nia ulun	Miqueias 5:1	Marcos 15:19
Ema baku nia ho xikote	Isaias 50:6	João 19:1
La kontra ema neʼebé baku nia	Isaias 50:6	João 18:22, 23
Ulun-naʼin sira halo planu aat kontra nia	Salmo 2:2	Lucas 23:10-12
Ema prega ninia liman no ain	Salmo 22:16	Mateus 27:35; João 20:25
Ema dada sorteiu atu fahe ninia roupa	Salmo 22:18	João 19:23, 24
Sura nia hamutuk ema sala-naʼin sira	Isaias 53:12	Mateus 27:38
Ema koʼalia aat no goza nia	Salmo 22:7, 8	Mateus 27:39-43
Hetan terus tanba ema sala-naʼin	Isaias 53:5, 6	1 Pedro 2:23-25
Haree hanesan Maromak husik hela nia	Salmo 22:1	Marcos 15:34
Ema fó tua-siin neʼebé kahur ona ho buat moruk	Salmo 69:21	Mateus 27:34
Sente hamrook antes nia mate	Salmo 22:15	João 19:28, 29
Entrega ninia moris ba Maromak	Salmo 31:5	Lucas 23:46
Nia iis kotu	Isaias 53:12	Marcos 15:37
Entrega nia moris nuʼudar sakrifísiu atu hamoos sala	Isaias 53:12	Mateus 20:28
Ema la hatohar ninia ruin	Salmo 34:20	João 19:31-33, 36
Ema sona nia ho diman	Zacarias 12:10	João 19:33-35, 37
Hakoi hamutuk ho ema riku	Isaias 53:9	Mateus 27:57-60
Moris-hiʼas husi mate	Salmo 16:10	Apóstolu 2:29-31
Troka pozisaun husi ema neʼebé kontra nia	Salmo 109:8	Apóstolu 1:15-20
Tuur iha Maromak nia liman sorin loos	Salmo 110:1	Apóstolu 2:34-36

a Livru ida (McClintock and Strong’s Cyclopedia) hatete: “Ita la dúvida katak lista ba ema Judeu nia suku sira no sira-nia família lakon durante tempu neʼebé Jeruzalein rahun, laʼós antes neʼe.”

b Naran Emanuel iha lian Ebraiku signifika “Maromak hamutuk ho ita”, hatudu sai kona-ba Jesus nia knaar nuʼudar Mesias. Serbisu neʼebé nia halo bainhira iha rai hatudu katak Maromak hamutuk ho Ninia atan sira.—Lucas 2:27-32; 7:12-16.

c Liafuan “Nazaré” karik mai husi liafuan Ebraiku nétser, signifika “ai-tubun”.

d Atu hetan informasaun liután kona-ba tinan 29 EC nuʼudar tinan neʼebé Mesias mosu mai, haree artigu “Daniel fó-hatene nanis bainhira mak Mesias sei mosu”.

e Profesia neʼe hakerek iha livru Zacarias, maibé Mateus dehan katak profeta Jeremias mak fó sai liafuan sira-neʼe. (Mateus 27:9) Karik livru Jeremias mak tau primeiru iha parte Eskritura neʼebé bolu nuʼudar “Profeta” sira. (Lucas 24:44) Tan neʼe karik Mateus uza liafuan “Jeremias” atu refere ba livru profeta nian tomak, neʼebé inklui mós Zacarias.