PERGUNTA HUSI JOVEN SIRA
Oinsá haʼu bele maneja haʼu-nia tempu?
Tanbasá presiza maneja Ita-nia tempu?
Tempu mak atu hanesan ho osan. Se Ita uza sala Ita-nia tempu, Ita sei la iha tan tempu atu halo buat neʼebé importante liu. Maibé se Ita maneja didiʼak Ita-nia tempu, Ita bele iha tempu atu halo buat neʼebé importante no mós buat neʼebé Ita gosta.
Bíblia nia prinsípiu: “Ema baruk-teen iha hakarak oioin, maski nuneʼe nia la iha buat ida, maibé ema badinas sei sai kontente tebes.”—Provérbios 13:4.
Lisaun importante: Se Ita maneja Ita-nia tempu, neʼe fó liberdade liután ba Ita atu halo buat barak, laʼós hanetik fali Ita.
Abilidade atu maneja tempu mak abilidade neʼebé Ita presiza bainhira sai boot. Neʼe sei ajuda Ita atu la lakon Ita-nia serbisu no Ita-nia patraun sei tau fiar ba Ita. Hanoin toʼok, se Ita mak iha negósiu rasik, Ita gosta ka lae kuandu Ita-nia serbisu-naʼin sempre tama serbisu tarde?
Bíblia nia prinsípiu: “Ema neʼebé laran-metin iha buat kiʼik sei laran-metin mós iha buat boot.”—Lucas 16:10.
Lisaun importante: Ita-nia abilidade atu maneja tempu bele hatudu sai Ita mak ema hanesan saida.
Tuir loloos, maneja tempu laʼós buat neʼebé fasil. Haree toʼok dezafiu balu neʼebé karik Ita hasoru.
Dezafiu #1: Kolega sira
“Se haʼu-nia kolega husu haʼu atu sai hamutuk ho sira, haʼu sempre tuir deʼit maski loloos haʼu la iha tempu. Baibain haʼu hanoin: ‘Diʼak hela, orasida fila ba uma mak haʼu halo hotu lalais haʼu-nia serbisu.’ Maibé dala ruma neʼe la akontese no rezultadu la diʼak.”—Cynthia.
Dezafiu #2: Buat ruma dada Ita-nia atensaun
“Televizaun mak hanesan ho mákina xupa rai-rahun, tanba bele xupa ita-nia tempu tomak. Televizaun mak tentasaun boot, no susar atu tahan tentasaun atu la nonton filme ka buat seluk.”—Ivy.
“Haʼu bele halimar tablet ba oras barak. Haʼu sei para halimar só deʼit se tablet nia bateria hotu, haʼu sente moe loos.”—Marie.
Dezafiu #3: Toman atu demora
“Haʼu sempre demora atu halo hotu haʼu-nia TPC sira no buat seluk neʼebé haʼu presiza halo. Haʼu gasta haʼu-nia tempu hodi halo buat neʼebé la importante toʼo minutu ikus atu entrega TPC. Haʼu-nia abilidade atu maneja tempu mak aat tebes.”—Beth.
Maneja tempu fó liberdade liután ba Ita atu halo buat barak, laʼós hanetik fali Ita
Buat neʼebé Ita bele halo
Halo lista ba serbisu sira. Neʼe inklui Ita-nia serbisu uma-laran nian no TPC. Hakerek oras hira mak Ita presiza uza atu kompleta Ita-nia knaar ida-idak durante semana ida.
Bíblia nia prinsípiu: “Buka-hatene loloos buat sira neʼebé importante liu.”—Filipe 1:10.
Halo lista ba atividade halimar nian neʼebé Ita hakarak atu halo. Neʼe bele inklui atividade sira hanesan haree média sosiál no mós haree televizaun. Hakerek mós oras hira mak Ita gasta atu halo ida-neʼe semana-semana.
Bíblia nia prinsípiu: “Kontinua halaʼo moris ho matenek . . . , hodi uza didiʼak imi-nia tempu.”—Koloso 4:5.
Halo planu. Haree ba lista rua neʼebé Ita hakerek ona. Tempu atu kompleta Ita-nia serbisu sira sei toʼo ka lae? Ita presiza uza oras balu husi oras halimar nian atu halo serbisu ka lae?
Sujestaun: Loron-loron, hakerek lista kona-ba atividade sira neʼebé Ita presiza halo iha loron ida nia laran, tau sinál ba atividade ida-idak bainhira Ita kumpre ona ida-neʼe.
Bíblia nia prinsípiu: “Ema badinas nia planu sei hetan duni susesu.”—Provérbios 21:5.
Halo tuir Ita-nia planu. Klaru katak dala ruma Ita presiza duni atu la simu kolega nia konvite hodi ransu hamutuk atu nuneʼe Ita bele halo hotu uluk Ita-nia serbisu neʼebé importante liu. Tuir loloos, se Ita kaer metin ba Ita-nia oráriu, Ita bele iha tempu barak liután no bele sai kontente liután.
Bíblia nia prinsípiu: “Sai badinas bá, keta sai baruk-teen.”—Roma 12:11.
Kumpre uluk Ita-nia serbisu antes hetan kolen. Joven feto ida naran Tara hatete: “Kuandu haʼu kumpre ona buat rua husi haʼu-nia lista, dala ruma haʼu hanoin: ‘Loos ona, agora haʼu sei nonton televizaun ba minutu 15, tuirmai mak haʼu kontinua fali.’ Maibé minutu 15, sai fali minutu 30, no minutu 30 sai fali oras ida. Ikusmai, haʼu nonton televizaun ba oras rua.”
Se nuneʼe solusaun mak saida? Haree atividade halimar nian nuʼudar kolen neʼebé Ita sei hetan bainhira halo hotu ona Ita-nia knaar, laʼós nuʼudar Ita-nia atividade loroloron.
Bíblia nia prinsípiu: “Diʼak liu ba ema ida atu . . . hetan ksolok husi ninia serbisu makaʼas.”—Eclesiastes 2:24.