Esplika ba oan kona-ba tua

“Bainhira ba dala primeiru ami koʼalia ba ami-nia oan-feto kona-ba tua, nia mak tinan neen deʼit. Maibé ami hakfodak tanba nia hatene ona buat barak kona-ba neʼe.”​—Alexander.

• Buat neʼebé Ita presiza hatene

• Buat neʼebé Ita bele halo

• Saida mak Bíblia hatete kona-ba hemu tua

Buat neʼebé Ita presiza hatene

Importante tebes atu esplika ba oan kona-ba tua. Keta hein toʼo oan sai joven. Khamit husi rai-Rúsia dehan: “Diʼak liu se ami koʼalia ba ami-nia oan-mane kona-ba oinsá mak ita bele iha hanoin neʼebé loos kona-ba hemu tua bainhira nia sei kiʼik, tanba haʼu aprende lisaun neʼe liuhusi esperiénsia neʼebé la diʼak. Ikusmai haʼu haree katak haʼu-nia oan-mane komesa hemu tua beibeik kuandu nia foin tinan 13 deʼit.”

Tansá mak Ita presiza hanoin kona-ba neʼe?

• Kolega eskola, iklan sira, no programa iha televizaun bele kona Ita-nia oan nia hanoin kona-ba hemu tua.

• Governu Estadus Unidus nia projetu hodi kontrola no prevene moras (U.S. Centers for Disease Control and Prevention) dehan katak iha Estadus Unidus ema neʼebé hemu tua, porsentu 11 mak idade minoria.

Nuneʼe, ema neʼebé serbisu iha saúde anima inan-aman sira atu hanorin sira-nia oan husi kiʼik kedas kona-ba perigu sira husi hemu tua. Oinsá mak Ita bele halo ida-neʼe?

Buat neʼebé Ita bele halo

Hanoin nanis kona-ba pergunta neʼebé Ita-nia oan sei husu. Labarik sira gosta buka-hatene buat foun no joven sira gosta liután atu buka-hatene. Entaun, diʼak liu atu prepara uluk Ita-nia resposta. Porezemplu:

• Se Ita-nia oan hakarak koko hemu tua, karik Ita bele esplika katak tua mak hanesan sumu neʼebé siin, no serveja mak moruk.

• Se Ita-nia oan hakarak tebes atu hemu tua, bele hatete katak tua mak makaʼas liu ba labarik sira atu tahan. Esplika saida mak tua bele halo: Tua halo ita sente kalma, maibé kuandu hemu demais ita-nia oin bele halai, ita bele hatudu hahalok beik, ka koʼalia arbiru no hamoe an.​—Provérbios 23:29-​35.

Prepara Ita-nia an. Bíblia hatete: “Ema neʼebé matenek hatudu hahalok tuir ninia koñesimentu.” (Provérbios 13:16) Neʼe katak Ita presiza hatene kona-ba oinsá tua afeta Ita-nia moris no hatene lei kona-ba tua iha Ita-nia rai. Depois neʼe Ita prontu atu ajuda Ita-nia oan.

Keta demora atu koʼalia kona-ba tópiku neʼe. Aman ida husi rai-Inglaterra naran Mark hatete: “Haʼu husu haʼu-nia oan neʼebé tinan ualu, tuir ninia hanoin hemu tua sala ka lae, tanba labarik barak konfuzaun kona-ba hemu tua. Nuʼudar ami koʼalia haʼu koko atu koʼalia hanesan belun ida no neʼe ajuda nia atu koʼalia nakloke.”

Ita bele ajuda Ita-nia oan iha dalan diʼak liu se Ita koʼalia beibeik kona-ba tópiku neʼe. Depende ba Ita-nia oan nia idade, Ita mós bele koʼalia kona-ba tópiku seluk neʼebé importante hanesan hodi karreta ho seguru ka esplika kona-ba relasaun seksuál.

Hatudu ezemplu diʼak. Labarik sira lalais atu halo tuir buat neʼebé sira haree, no peskizadór sira hatete katak inan-aman nia ezemplu mak iha kbiit boot liu ba sira-nia oan. Nuneʼe se ita toman hemu tua atu sai kalma ka hatún estrese, Ita-nia oan bele hanoin katak nia tenke hemu tua kuandu nia estrese ka hanoin barak. Tan neʼe, hatudu ezemplu neʼebé diʼak. Ita rasik tenke uza matenek kona-ba hemu tua.