Saida mak Bíblia nia hanorin kona-ba fó ba ema seluk?
Bíblia nia resposta
Bíblia anima ita atu fó ho laran-kontente no ho motivu neʼebé loos. Bíblia hatudu katak ema neʼebé fó no mós ema neʼebé simu sei hetan benefísiu. (Provérbios 11:25; Lucas 6:38) Jesus hatete: “Kontente liu atu fó duké simu.”—Apóstolu 20:35.
Bainhira mak fó ba ema seluk halo Maromak kontente?
Bainhira ita fó ba ema seluk ho laran, ida-neʼe halo Maromak kontente. Bíblia hatete: “Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran haksolok.”—2 Korinto 9:7.
Fó ba ema seluk ho laran mak parte ida husi “adorasaun” neʼebé Maromak simu. (Tiago 1:27) Se ita ajuda ema seluk neʼebé presiza duni ajuda, neʼe hanesan ita serbisu hamutuk ho Maromak. No Maromak haree ida-neʼe hanesan ita fó empresta ba nia. (Provérbios 19:17) Bíblia hanorin katak Maromak sei selu fali ita.—Lucas 14:12-14.
Bainhira mak fó ba ema seluk la halo Maromak kontente?
Se Ita halo ida-neʼe ho motivu neʼebé la loos. Ezemplu mak hanesan:
Atu hetan gaba.—Mateus 6:2.
Atu simu fali buat ruma.—Lucas 14:12-14.
Atu hetan salvasaun.—Salmo 49:6, 7.
Se ema uza buat neʼebé Ita fó atu apoia atividade no hahalok sira neʼebé kontra Maromak. Porezemplu, fó osan ba ema atu sira joga osan ka sosa droga ka tua mak sala. (1 Korinto 6:9, 10; 2 Korinto 7:1) Liután neʼe, ladún diʼak atu fó osan ba ema neʼebé loloos iha forsa atu serbisu maibé nia lakohi buka serbisu.—2 Tesalónika 3:10.
Se Ita fó ba ema seluk toʼo labele tau matan ba Ita-nia família rasik. Bíblia hanorin katak ulun ba família tenke sustenta ninia família nia presiza. (1 Timóteo 5:8) La loos atu ulun ba família ida fó buat barak ba ema seluk toʼo labele tau matan ba ninia família rasik. Nuneʼe mós, Jesus la simu ema balu neʼebé lakohi tau matan ba sira-nia inan-aman neʼebé ferik-katuas ona tanba sira hatete katak buat naran deʼit neʼebé sira iha, sira “fó ona ba Maromak”.—Marcos 7:9-13.