Osan mak buat aat hotu nia hun ka lae?

Bíblia nia resposta

Lae. Ema barak hatete “osan mak buat aat hotu nia hun”. Maibé Bíblia la hatete katak osan mak aat, no mós la hatudu katak osan mak hun ba buat aat hotu. Tuir loloos Bíblia dehan katak “domin ba osan mak buat aat hotu nia hun”.—1 Timóteo 6:10, Liafuan diak ba imi, segunda edisaun.

Saida mak Bíblia hatete kona-ba osan?

Bíblia esplika katak se uza osan ho matenek, neʼe bele ajuda ita, no mós bele “fó protesaun” mai ita. (Eclesiastes 7:12) Liután neʼe, Bíblia gaba ema neʼebé hatudu laran-diʼak ba ema seluk, no neʼe bele inklui fó osan.—Provérbios 11:25.

Maibé, Bíblia mós fó avizu atu la tau fokus hodi buka osan deʼit. Bíblia dehan: “Iha imi-nia moris, keta hadomi osan, maibé kontente ho buat neʼebé imi iha ona.” (Ebreu 13:5) Versíkulu neʼe hanorin ita atu uza osan ho matenek no la hadomi osan. Entaun ita presiza koko atu kontente ho buat neʼebé ita loloos presiza, hanesan hahán, roupa no hela fatin.—1 Timóteo 6:8.

**Tanbasá mak Bíblia fó avizu kona-ba domin ba osan?**

Ema kaan-teen sei la hetan moris rohan-laek. (Éfeso 5:5) Razaun ida mak hahalok kaan-teen hanesan deʼit ho adora estátua, neʼebé mak adorasaun falsu. (Koloso 3:5) Razaun seluk mak bainhira ema kaan-teen buka sira-nia hakarak, dala barak sira la uza morál neʼebé diʼak. Provérbios 28:20 hatete: “Ema neʼebé ansi atu sai riku sei halo sala.” Karik sira hetan tentasaun atu halo krime hanesan ameasa ema atu hetan osan, hamatak ema, naʼok, ka oho ema.

Maski dala ruma domin ba osan la lori ema ba hahalok aat, neʼe mós bele lori rezultadu aat seluk. Bíblia dehan katak “sira neʼebé hakarak duni atu sai riku monu ba tentasaun, lasu no hakarak beik no aat oioin, neʼebé lori terus no mate ba sira”.—1 Timóteo 6:9.

Oinsá mak Bíblia nia avizu kona-ba osan bele ajuda ita?

Se ita la kontra Maromak nia morál no ukun-fuan tan domin ba osan, ita sei iha dignidade no Maromak sei simu no apoia ita. Maromak promete ba ema neʼebé hakaʼas an ho laran atu halo nia kontente: “Haʼu sei nunka husik ó, no haʼu sei nunka fila kotuk ba ó.” (Ebreu 13:5, 6) Nia mós dehan katak “ema neʼebé laran-metin sei simu bensaun barak”.—Provérbios 28:20.

Eskritura sira iha Bíblia kona-ba osan

Eclesiastes 7:12: “Osan bele fó protesaun.”

Signifika: Kuandu ita uza osan ho matenek neʼe bele halo ita sente hakmatek.

Lucas 12:15: “Maski ema ida hetan rikusoin barak, ninia moris la mai husi buat neʼebé nia iha.”

Signifika: Osan laʼós buat neʼebé importante liu iha moris, no neʼe la ajuda ita hetan salvasaun.

1 Timóteo 6:10: “Tanba domin ba osan mak hun ba buat aat oioin, no tanba hadomi osan mak ema balu hadook an ona husi fiar no hakanek sira-nia an ho terus barak.”

Signifika: La sala atu iha osan. Maibé ema neʼebé hadomi osan, no iha objetivu ba moris atu manán osan deʼit, sira sei lori problema ba sira-nia an rasik, hanesan problema ho família no saúde tanba serbisu demais.

Ebreu 13:5: “Iha imi-nia moris, keta hadomi osan, maibé kontente ho buat neʼebé imi iha ona.”

Signifika: Duké buka rikusoin ho ita-nia forsa tomak, matenek liu atu sai kontente ho sasán neʼebé ita presiza duni.

Mateus 19:24: “Fasil liu ba kuda-kamelu ida atu tama liuhusi daun-kuak duké ema riku ida tama ba Maromak nia Ukun.”

Signifika: Jesus foin konvida mane joven riku atu sai ninia dixípulu. Mane neʼe lakohi tanba nia hadomi liu ninia rikusoin. Tan neʼe Jesus fó avizu ida. Ema neʼebé hanoin rikusoin uluk liu fali Maromak bele lakon moris rohan-laek.