Fó-hatene família katak Ita hadomi sira

Ong-Li mak Testemuña ba Jeová no hela iha rai-Bulgária. Nia estuda Bíblia ho feto naran Zlatka, maibé ninia laʼen la estuda. Ong-Li dehan: “Kuandu ami koʼalia hela kona-ba moris família nian, haʼu esplika ba nia katak importante tebes atu fó-hatene ita-nia kaben no oan katak ita hadomi sira. Zlatka hatudu oin triste, no dehan katak husi loron neʼebé nia kaben toʼo agora nia nunka fó-hatene ninia katuas-oan ka ninia oan-feto neʼebé tinan sia katak nia hadomi sira!”

Zlatka esplika, “Haʼu prontu atu halo buat naran deʼit ba sira, maibé haʼu labele hatete liafuan sira-neʼe.” Nia hatutan tan, “Haʼu-nia inan nunka hatete katak nia hadomi haʼu, no haʼu-nia avó-feto nunka hatete katak nia hadomi haʼu-nia inan.” Ong-Li loke Bíblia no hatudu ba Zlatka katak Jeová hatete sai katak nia hadomi Jesus. (Mateus 3:17) Nia fó laran-manas ba Zlatka atu halo orasaun ba Jeová no husu ninia ajuda hodi Zlatka bele fó-hatene ninia katuas-oan no oan-feto katak nia hadomi sira.

Ong-Li dehan: “Loron rua tuirmai, Zlatka ho laran haksolok fó-hatene haʼu katak nia husu Jeová nia ajuda. Bainhira nia katuas-oan fila husi serbisu, Zlatka fó-hatene katak nia aprende husi Bíblia oinsá importante tebes ba feen atu hatudu respeitu no domin ba ninia laʼen. Zlatka para uitoan, depois nia fó-hatene ninia laʼen katak nia hadomi tebes ninia laʼen! Kuandu ninia oan-feto fila husi eskola, Zlatka hakoʼak nia no fó-hatene katak nia hadomi tebes nia oan! Zlatka dehan ba haʼu: ‘Agora haʼu sente kmaan tebes. Ba tinan barak ona susar ba haʼu atu fó sai haʼu-nia sentimentu, maibé ikusmai ho Jeová nia ajuda haʼu bele fó sai haʼu-nia domin ba haʼu-nia família.’”

Ong-Li hatete tan: “Semana tuirmai, haʼu hasoru Zlatka nia laʼen, no nia dehan ba haʼu: ‘Ema barak fó-hatene haʼu katak la diʼak se Zlatka estuda Bíblia ho ó, maibé agora haʼu la duvida ida katak buat neʼebé Zlatka aprende husi Bíblia ajuda tebes ami-nia família. Agora ami-nia relasaun família nian diʼak liu no kontente liu.’”