Tanbasá Testemuña ba Jeová la selebra loron-boot balu?

• Oinsá mak Testemuña ba Jeová deside se sira bele selebra loron-boot balu?

• Testemuña ba Jeová hadomi nafatin sira-nia família maski la selebra loron-boot balu ka lae?

• Testemuña ba Jeová obriga ema seluk atu la selebra loron-boot balu ka lae?

Oinsá mak Testemuña ba Jeová deside se sira bele selebra loron-boot balu?

Testemuña ba Jeová hanoin didiʼak prinsípiu sira husi Bíblia antes deside atu selebra loron-boot ruma. Se Loron-boot no selebrasaun ruma mak kontra duni Bíblia nia prinsípiu, Testemuña ba Jeová sei la partisipa. Maibé kona-ba loron-boot neʼebé la kontra Bíblia nia prinsípiu, Testemuña ba Jeová ida-idak mak sei deside rasik hodi “hakaʼas an atu nafatin iha konxiénsia neʼebé moos iha Maromak nia oin no mós iha ema nia oin”.​—Apóstolu 24:16.

Tuirmai mak pergunta balu neʼebé Testemuña ba Jeová sira husu ba sira-nia an antes atu hola parte iha selebrasaun ruma.a

• Loron-boot neʼe nia hun mai husi hanorin neʼebé kontra Bíblia ka lae?

  Bíblia nia prinsípiu: “‘Sai husi sira-nia leet, no haketak imi-nia an’, Jeová dehan, ‘no keta kona buat neʼebé la moos.’”​—2 Korinto 6:15-17.

  Atu haketak an husi hanorin sira neʼebé la moos ka kontra Bíblia nia hanorin, Testemuña ba Jeová la selebra loron-boot neʼebé inklui buat tuirmai neʼe.

  Loron-boot sira neʼebé bazeia ba fiar ka adorasaun ba maromak sira seluk. Jesus hatete: “Imi tenke adora Jeová, imi-nia Maromak, no ba nia deʼit mak imi tenke halo serbisu sagradu.” (Mateus 4:10) Hodi halo tuir matadalan neʼe, Testemuña ba Jeová sira la selebra Natál, Páskua, ka May Dayb tanba selebrasaun sira-neʼe bazeia ba adorasaun ba maromak seluk, laʼós Maromak Jeová. No mós sira la partisipa iha loron-boot hanesan tuirmai neʼe.

  • Kwanzaa. Naran Kwanzaa “mai husi liafuan Swahili matunda ya kwanza, neʼebé signifika ‘ai-fuan primeiru’ no neʼe hatudu katak loron-boot neʼe bazeia ba selebrasaun kona-ba tempu koʼa nian neʼebé halaʼo husi tempu uluk kedas iha Áfrika”. (Encyclopedia of Black Studies) Maski ema balu dehan katak Kwanzaa mak laʼós selebrasaun relijiaun nian, maibé livru Encyclopedia of African Religion hatete katak selebrasaun neʼe iha ligasaun ho festa Áfrika nian ida neʼebé envolve hasaʼe ai-fuan primeiru ba “maromak sira no beiʼala sira atu fó agradese”. Livru neʼe hatutan tan katak Kwanzaa mak loron-boot ba ema Áfrika-Amérika, neʼebé sira fó agradese ba moris neʼebé simu husi beiʼala sira.

    

  • Tinan Foun. Kona-ba selebrasaun neʼe nia hun, livru The World Book Encyclopedia hatete: “Iha tinan 46 AEC, ukun-naʼin Roma nian ida naran Júlio César hili loron 1 Janeiru nuʼudar tinan foun. Ema Roma dedika loron neʼe ba maromak Jano.”

  • Nauruz (Nowruz). “Festa neʼe nia hun mak husi relijiaun Zoroaster nia hanorin no neʼe mak loron santu liu iha Zoroaster nia kalendáriu antigu. . . . Tuir Zoroaster nia tradisaun, ema halo selebrasaun neʼe atu fó benvindu fali ba Espíritu Tempu Meiudia nian naran Rapithwin. Ema fiar katak durante Espíritu Tempu Malirin nian obriga Espíritu Tempu Meiudia nian atu subar durante fulan sira neʼebé rai-malirin.”​—United Nations Educational, Scientific and Cultural Organization (UNESCO).

  • Shab-e Yalda. Livru Sufism in the Secret History of Persia hatete, selebrasaun neʼe halaʼo iha tempu malirin fulan-Dezembru, iha tempu neʼebé kalan mak sai naruk liu no neʼe “liga duni ho adorasaun ba Mitra”, maromak naroman nian. Ema mós dehan katak loron-boot neʼe karik liga ho adorasaun ba ema Roma no Gregu nia maromak loro-matan.c

  • Loron hatoʼo agradese nian (Thanksgiving). Hanesan Kwanzaa, loron-boot neʼe mós bazeia ba selebrasaun antigu iha tempu koʼa nian no loron neʼe fó glória ba maromak oioin. Depois neʼe, “igreja Kristaun sira komesa halo tuir ema nia tradisaun antigu sira-neʼe”.​—A Great and Godly Adventure​—The Pilgrims and the Myth of the First Thanksgiving.

  Loron-boot sira neʼebé bazeia ba superstisaun ka fiar ba sorte. Bíblia dehan ema neʼebé “prepara meza ba maromak Sorte Diʼak nian” mak hanesan “ho sira neʼebé husik hela Jeová”. (Isaias 65:11) Tan neʼe, Testemuña ba Jeová la selebra loron-boot hanesan tuirmai neʼe:

  • Ivan Kupala. Livru The A to Z of Belarus hatete: “Ema barak fiar katak durante selebrasaun Ivan Kupala, natureza hasai forsa májiku no ema neʼebé aten-brani no iha sorte bele hetan forsa balu.” Foufoun, eventu neʼe mak loron-boot ema jentiu nian neʼebé selebra loron neʼebé loro-matan fó naroman ba oras barak liu iha fulan-Juñu. Maibé livru Encyclopedia of Contemporary Russian Culture hatete: “Bainhira ema jentiu sira sai ema Kristaun, sira kahur selebrasaun neʼe ho loron-boot igreja nian, neʼe mak loron São João Batista.”

  • Loron Imlek (Tinan Foun Xinés ka Koreanu nian). Tuir livru Mooncakes and Hungry Ghosts​—Festivals of China, “durante tempu neʼe, família no kolega sira tau fokus liu kona-ba oinsá sira bele hetan sorte diʼak, hatudu respeitu ba maromak sira no klamar sira, no mós husu atu hetan sorte diʼak iha tinan tuirmai.” Nuneʼe mós ho Tinan Foun Koreanu nian. Tuir Encyclopedia of New Year’s Holidays Worldwide, neʼe envolve “adorasaun ba beiʼala sira, serimónia atu duni anju aat no husu atu hetan sorte diʼak iha Tinan Foun, no uza masonik atu buka-hatene nanis saida mak akontese iha Tinan Foun”.

    

  Loron-boot sira neʼebé bazeia ba ema nia fiar kona-ba klamar neʼebé nunka mate. Bíblia esplika ho klaru katak ema neʼebé mate ona, sira la hatene buat ida no la iha klamar neʼebé moris ba nafatin. (Eclesiastes 9:5, 10) Tan neʼe, Testemuña ba Jeová la selebra loron-boot sira tuirmai, tanba loron-boot sira neʼe habelar fiar kona-ba klamar neʼebé moris ba nafatin:

  • Loron Matebian (Finadu). Livru New Catholic Encyclopedia hatete katak loron neʼe mak atu “hanoin-hetan ema hotu neʼebé mate ona”. Husi maizumenus tinan 500 EC toʼo tinan 1500 EC, ema barak fiar katak iha loron neʼe klamar sira iha purgatóriu bele mosu nuʼudar buan, matan-dook, manduku no buat seluk tan atu habosok ema neʼebé halo aat ba sira durante sira moris.

  • Festa Ceng Beng no Klamar neʼebé Hamlaha. Ema halaʼo festa rua neʼe atu fó hahiʼi ba beiʼala sira. Livru Celebrating Life Customs Around the World​—From Baby Showers to Funerals hatete katak durante Ceng Beng, “ema sei sunu ai-han, hemu no osan-tahan hodi nuneʼe ema mate sira labele sai hamlaha ka hamrook no bele iha osan”. Livru neʼe mós dehan katak “durante fulan ba Klamar neʼebé Hamlaha, liuliu iha kalan neʼebé fulan-nakonu, ema neʼebé selebra loron-boot neʼe fiar katak ema mate no ema moris sai besik liu ba malu iha kalan neʼe duké iha kalan seluk, tan neʼe importante tebes atu hadame malu ho ema mate no mós fó glória ba beiʼala sira”.

  • Chuseok. Livru The Korean Tradition of Religion, Society, and Ethics hatete katak festa neʼe inklui mós “hasaʼe ai-han no tua nuʼudar sakrifísiu ba ema mate nia klamar”. Sakrifísiu neʼe haleno “fiar katak klamar sei kontinua moris kuandu sira-nia isin mate”.

  Loron-boot sira neʼebé iha ligasaun ho espiritizmu. Bíblia hatete: “Ema neʼebé siʼik futuru, ema neʼebé halo masonik, ema neʼebé buka sinál oioin atu siʼik futuru, matan-dook, ema neʼebé fekit ema seluk, ema neʼebé husu ba ema neʼebé koko atu koʼalia ho ema mate ka husu ba ema neʼebé siʼik futuru, ka ema neʼebé husu ema mate . . . Jeová hakribi ema neʼebé halo buat sira-neʼe.” (Deuteronómio 18:10-12) Atu la envolve an ho espiritizmu, inklui astrolojia ka buat naran deʼit neʼebé liga ho siʼik futuru, Testemuña ba Jeová la selebra Halloween ka loron-boot sira hanesan tuirmai neʼe:

  • Tinan Foun Sinhala no Tamil nian. Livru Encyclopedia of Sri Lanka hatete katak: “Serimónia oioin neʼebé halaʼo iha loron-boot neʼe . . . inklui atividade sira neʼebé halaʼo iha tempu neʼebé matenek-naʼin kona-ba astrolojia deside ona katak sei lori sorte diʼak.”

  • Songkran. Livru Food, Feasts, and Faith​—An Encyclopedia of Food Culture in World Religions hatete katak naran ba festa Ázia nian neʼe “mai husi liafuan Sánskritu . . . neʼebé signifika ‘movimentu’ ka ‘mudansa’, no festa neʼe atu hatudu katak loro-matan halo mudansa hodi forma fitun-lubun zodíaku nian ida naran Aries”.

  Toman sira husi Moisés nia Ukun-Fuan neʼebé remata bainhira Jesus fó ninia moris nuʼudar sakrifísiu. Bíblia hatete: “Kristu mak Ukun-Fuan nia rohan.” (Roma 10:4) Ema Kristaun hetan benefísiu husi prinsípiu sira iha Moisés nia Ukun-Fuan ba ema Izraél. Maibé sira la selebra festa sira husi Ukun-Fuan neʼe, liuliu festa sira neʼebé ho objetivu atu ajuda ema hein ba Mesias, tanba ema Kristaun fiar katak nia mai tiha ona. Bíblia dehan: “Buat sira-neʼe mak nuʼudar lalatak husi buat sira neʼebé atu mai, maibé buat neʼebé realidade mak Kristu.” (Koloso 2:17) Iha mós selebrasaun balu neʼebé inklui kostume neʼebé kontra Bíblia. Tan neʼe, Testemuña ba Jeová la selebra festa sira hanesan tuirmai neʼe:

  • Hanukkah. Neʼe mak festa atu komemora tempu neʼebé ema Judeu dedika fali templu iha Jeruzalein. Maibé Bíblia dehan katak Jesus sai ona nuʼudar Amlulik Boot iha “tenda santu neʼebé importante no perfeitu liu, neʼebé laʼós ema nia liman mak halo, neʼe katak, laʼós parte ba kriasaun neʼe”. (Ebreu 9:11) Ba ema Kristaun, templu espirituál mak troka ona templu iha Jeruzalein.

  • Rosh Hashanah. Neʼe mak loron primeiru ba kalendáriu Judeu nian. Iha tempu antigu, festa neʼe mak tempu atu hasaʼe sakrifísiu espesiál ba Maromak. (Números 29:1-6) Maibé, Jesus Kristu, nuʼudar Mesias, “hapara sakrifísiu no prezente sira neʼebé ema hasaʼe”, no tan neʼe sakrifísiu sira-neʼe la iha folin ona ba Maromak.​—Daniel 9:26, 27.

• Loron-boot neʼe anima ema atu kahur adorasaun husi relijiaun oioin ka lae?

  Bíblia nia prinsípiu: “Saida mak hanesan entre ema fiar-naʼin no ema neʼebé laʼós fiar-naʼin? No oinsá mak Maromak nia templu bele liga ho estátua sira?”​—2 Korinto 6:15-17.

  Maski Testemuña ba Jeová hakaʼas an atu moris dame ho sira-nia viziñu no respeitu ema ida-idak nia direitu atu hili sira-nia fiar, maibé sira la hola parte iha selebrasaun sira neʼebé kahur ho adorasaun husi relijiaun oioin, hanesan temi tuirmai.

  Serimónia atu selebra akontesimentu ruma neʼebé liga ho ema importante iha relijiaun ida ka eventu sira neʼebé anima ema husi fiar oioin atu halaʼo adorasaun hamutuk. Bainhira Maromak dirije ninia povu iha tempu antigu atu bá rai foun ida neʼebé ema iha rai neʼe adora maromak seluk, nia hatete ba ninia povu: “Imi labele halo aliansa ho sira ka ho sira-nia maromak sira. . . . Se imi serbí sira-nia maromak sira, neʼe sei sai duni lasu ba imi.” (Éxodo 23:32, 33) Tan neʼe, Testemuña ba Jeová la hola parte iha loron-boot sira hanesan tuirmai.

  • Loy Krathong. Livru Encyclopedia of Buddhism dehan katak durante ema Tailándia halo festa neʼe, sira halo manko hanesan ró husi ai-tahan sira, no tau lilin ka insensu iha laran, no husik manko neʼe iha bee leten. Ema dehan katak ró neʼe lori dook tiha sorte aat. Tuir loloos festa neʼe atu komemora Buda nia ain-fatin santu neʼebé nia husik hela.

  • Loron Nasionál Hakribi Sala nian. Ema-boot governu nian ida koʼalia iha jornál The National iha Papua-Guiné Foun, hodi dehan katak ema sira neʼebé partisipa iha eventu neʼe “konkorda ho hanorin importante husi Kristaun nia fiar”. Nia dehan katak loron neʼe mak “hun ba prinsípiu husi Kristaun nia fiar iha nasaun neʼe”.

  • Waisak. Livru Holidays, Festivals, and Celebrations of the World Dictionary dehan: “Neʼe mak ema Budista nia selebrasaun neʼebé santu liu. Iha loron neʼe, sira selebra Buda nia loron moris, loron atu simu naroman, loron mate ka loron atu tama ba lalehan ka Nirwana.”

    

  Selebrasaun sira neʼebé bazeia ba relijiaun nia kostume laʼós bazeia ba Bíblia. Jesus hatete ba ulun-naʼin relijiaun sira: “Imi halo ona Maromak nia liafuan sai folin-laek tanba imi-nia lisan.” Nia mós hatete katak sira-nia adorasaun mak saugati deʼit tanba sira “hanorin ema nia ukun-fuan nuʼudar Maromak nia doutrina”. (Mateus 15:6, 9) Tanba Testemuña ba Jeová halo tuir avizu neʼe, sira la hola parte iha selebrasaun barak neʼebé la bazeia ba Bíblia.

  • Epifania (Loron Liurai Naʼin-Tolu nian, Timkat, ka Los Reyes Magos). Ema neʼebé selebra festa neʼe komemora tempu neʼebé astrólogu sira vizita Jesus ka tempu neʼebé Jesus hetan batizmu. Livru The Christmas Encyclopedia hatete katak selebrasaun Kristaun neʼe “mai husi ema jentiu nia festa neʼebé fó glória ba maromak sira neʼebé kontrola bee no mota”. No mós selebrasaun naran Timkat neʼebé liga ho festa Epifania, neʼe “iha ligasaun metin ho tradisaun”.​—Encyclopedia of Society and Culture in the Ancient World.

  • Loron Assunsaun da Nossa Senhora. Festa neʼe atu komemora igreja nia doutrina neʼebé dehan katak Jesus nia inan saʼe ba lalehan ho isin fíziku. Livru Religion and Society​—Encyclopedia of Fundamentalism dehan: “Ema Kristaun iha tempu uluk la hatene kona-ba doutrina neʼe no la iha Eskritura ida mak fó sai kona-ba neʼe.”

  • Loron Nossa Senhora da Imaculada Conceição. Tuir livru New Catholic Encyclopedia hatete katak, “Bíblia la hanorin doutrina kona-ba Imaculada Conceição . . . Igreja deʼit mak deside kona-ba neʼe”.

  • Kuarezma. Livru New Catholic Encyclopedia dehan katak neʼe mak períodu atu hakribi sala no jejún, ema hahú halaʼo Kuarezma iha tinan 200 depois ema hakerek hotu ona Bíblia. Kona-ba loron primeiru husi tempu Kuarezma neʼe, livru neʼe hatutan tan: “Toman neʼebé ema halo hodi simu cinzas iha Kuarta-feira Cinzas mak buat neʼebé halaʼo ona iha mundu tomak komesa husi Sínode Benevento iha tinan 1091.”

  • Meskel (ka, Maskal). Livru the Encyclopedia of Society and Culture in the Medieval World dehan katak neʼe mak ema Etiópia nia festa ida neʼebé selebra tempu neʼebé “hetan krús neʼebé ema prega Jesus, no iha selebrasaun neʼe ema sunu ahi no dansa haleʼu”. Maibé, Testemuña ba Jeová la uza krús iha sira-nia adorasaun.

• Loron-boot neʼe fó glória ba ema, organizasaun ka símbolu nasaun nian ka lae?

  Bíblia nia prinsípiu: “Jeová dehan nuneʼe: ‘Malisan ba ema neʼebé tau fiar deʼit ba ema, neʼebé sadere ba ema nia forsa, no hadook ninia laran husi Jeová.’”​—Jeremias 17:5.

  Maski Testemuña ba Jeová hafolin ema seluk no halo orasaun ba sira-nia diʼak, maibé Testemuña la hola parte iha eventu ka selebrasaun sira hanesan tuirmai neʼe:

  Loron-boot neʼebé fó glória ba ukun-naʼin ida ka ema importante ruma. Bíblia hatete: “Atu imi bele hetan buat diʼak, keta tau fiar tan ba ema neʼebé dada iis ho sira-nia inus. Sira bele lori buat diʼak saida ba imi?” (Isaias 2:22) Tan neʼe, Testemuña ba Jeová la hola parte iha selebrasaun atu fó glória ba ema, porezemplu selebra ukun-naʼin ka ema importante ruma nia loron moris.

  Selebrasaun kona-ba nasaun nia bandeira. Testemuña ba Jeová la selebra loron ba bandeira. Tanbasá? Tanba Bíblia dehan: “Hadook an husi estátua.” (1 João 5:21) Ema balu ohin loron la haree bandeira nuʼudar buat neʼebé hanesan ho estátua neʼebé ema uza atu adora, maibé matenek-naʼin kona-ba istória, naran Carlton J. H. Hayes hakerek katak bandeira mak “símbolu atu haburas domin no laran-metin ba nasaun, no buat neʼebé sagradu atu adora nasaun”.

  Loron-boot ka selebrasaun neʼebé fó glória ba santu sira. Saida mak akontese bainhira mane ida hakneʼak hodi hakruʼuk ba apóstolu Pedro? Bíblia dehan: “Pedro hiʼit saʼe nia, hodi dehan: ‘Hamriik bá. Haʼu mós ema deʼit.’” (Apóstolu 10:25, 26) Pedro no mós apóstolu sira seluk lakohi atu ema fó glória ka hahiʼi ba sira, tan neʼe Testemuña ba Jeová la hola parte iha eventu sira neʼebé ema halo atu fó glória ba santu sira, hanesan tuirmai neʼe:

  • Loron Santu-Santa Sira-nian. Livru New Catholic Encyclopedia hatete: “Neʼe mak festa atu fó glória ba santu hotu . . . Ladún hatene festa neʼe nia hun.”

  • Festa kona-ba Liurai-Feto husi Guadalupe. Livru The Greenwood Encyclopedia of Latino Literature hatete katak, festa neʼe atu fó glória ba “santa neʼebé ajuda Méxiku”, no ema barak fiar katak santa neʼe mak Maria, Jesus nia inan. Ema dehan katak nia mosu nuʼudar toʼos-naʼin ida iha tinan 1531.

    

  • Loron Naran nian (Name Day). Livru Celebrating Life Customs Around the World​—From Baby Showers to Funerals dehan: “Loron tau naran nian mak festa ida hodi komemora loron ba santu neʼebé naran hanesan ho labarik ida, no karik labarik simu naran neʼe nuʼudar naran sarani nian ka atu konfirma ninia fiar ba serimónia igreja nian.” Livru neʼe hatutan tan katak loron neʼe iha “ligasaun metin ho relijiaun”.

  Selebrasaun kona-ba atividade polítiku ka sosiál nian. Bíblia dehan: “Diʼak liu buka protesaun husi Jeová duké tau fiar ba ema.” (Salmo 118:8, 9) Testemuña ba Jeová fiar katak Maromak mak sei rezolve problema hotu iha mundu, tan neʼe sira la hola parte iha Loron Juventude nian ka Loron Feto nian neʼebé apoia ema nia atividade polítiku no kampaña sosiál. Ho razaun neʼebé hanesan, Testemuña sira mós la hola parte iha Loron Libertasaun nian ba Atan sira ka selebrasaun seluk neʼebé hanesan neʼe. Duké halo nuneʼe, sira hein ba Maromak nia Ukun atu halakon problema odi malu kona-ba rasa no igualidade.​—Roma 2:11; 8:21.

• Loron-boot neʼe fó glória liu ba nasaun ka rasa ka lae?

  Bíblia nia prinsípiu: “Maromak la todan ba sorin, no iha nasaun hotu, Maromak simu ema hotu neʼebé hamtaʼuk nia no halo buat neʼebé loos.”​—Apóstolu 10:34, 35.

  Maski Testemuña ba Jeová hafolin sira-nia rai, maibé sira hasees an husi selebrasaun neʼebé fó glória ba nasaun ka rasa.

  Serimónia neʼebé fó glória ba tropa sira. Jesus la hanorin ninia dixípulu sira atu halo funu, maibé nia hatete: “Hadomi nafatin imi-nia inimigu no harohan ba ema neʼebé haterus imi.” (Mateus 5:44) Tan neʼe, Testemuña ba Jeová la tuir serimónia neʼebé fó glória ba tropa sira, inklui loron-boot sira hanesan tuirmai neʼe:

  • Anzac Day. Livru Historical Dictionary of Australia hatete: “Anzac refere ba korpu militár husi Austrália no Novazelándia, no neineik-neineik Anzac Day sai fali loron atu hanoin-hetan ema sira neʼebé mate iha funu.”

  • Loron Veteranu nian (Remembrance Day). Tuir Encyclopædia Britannica, loron-boot neʼe mak atu fó glória ba “tropa sira neʼebé sai ona veteranu no mós sira neʼebé mate iha funu”.

  Selebrasaun kona-ba nasaun nia istória ka independénsia. Jesus koʼalia kona-ba ninia dixípulu sira: “Sira laʼós parte husi mundu neʼe, hanesan haʼu mós laʼós parte husi mundu neʼe.” (João 17:16) Maski Testemuña ba Jeová kontente atu aprende kona-ba sira-nia nasaun nia istória, maibé sira nafatin haketak an husi eventu sira hanesan tuirmai neʼe:

  • Loron Austrália nian. Tuir livru Worldmark Encyclopedia of Cultures and Daily Life, neʼe mak loron-boot atu komemora “loron ida iha tinan 1788 bainhira tropa Inglaterra dada saʼe sira-nia bandeira no deklara katak Austrália mak sira-nia kolónia foun ida”.

  • Loron Guy Fawkes. Tuir livru A Dictionary of English Folklore hatete katak, neʼe mak “loron nasionál atu komemora loron neʼebé Guy Fawkes no ema neʼebé apoia Katólika la konsege oho Liurai James I no mós membru parlamentu Inglaterra nian iha tinan 1605”.

  • Loron Independénsia. Tuir livru Merriam-Webster’s Unabridged Dictionary hatete katak, neʼe mak “loron ida neʼebé deside nanis ba ema hotu atu selebra tempu neʼebé nasaun komesa ukun an rasik”.

• Loron-boot neʼe nakonu ho hahalok arbiru ka hahalok la morál ka lae?

  Bíblia nia prinsípiu: “Uluk imi uza ona tempu barak atu halo tuir nasaun sira-nia hakarak hodi halo hahalok aat toʼo la sente moe, iha hakarak aat neʼebé labele kontrola, hemu tua barak demais, festa arbiru, halibur malu hodi hemu tua barak, no adora estátua neʼebé kontra ukun-fuan.”​—1 Pedro 4:3.

  Hodi tuir prinsípiu neʼe, Testemuña ba Jeová la envolve an iha selebrasaun neʼebé ema hemu tua barak demais no festa arbiru. Testemuña ba Jeová gosta atu halibur hamutuk ho sira-nia belun, no karik sira deside atu hemu tua uitoan. Sira hakaʼas an atu halo tuir Bíblia nia konsellu: “Se imi han, hemu, ka halo buat seluk, halo buat hotu-hotu ba Maromak nia glória.”​—1 Korinto 10:31.

  Tan neʼe, Testemuña ba Jeová la hola parte iha karnavál ka festa seluk neʼebé hatudu hahalok la morál neʼebé kontra Bíblia. Neʼe inklui ema Judeu nia festa naran Purim. Maski ba tempu kleur ema Judeu antigu selebra Purim atu komemora tempu neʼebé ema Judeu sai livre husi kastigu-mate iha tinan 484 AEC, maibé tuir livru Essential Judaism dehan katak agora festa neʼe “haree hanesan refere ba ema Judeu nia versaun kona-ba Mardi Grass ka Karnavál, dala barak neʼe envolve hatais oioin (dala barak mane hatais feto nia roupa), hatudu hahalok arbiru, hemu tua demais, no halo barullu barak”.

Testemuña ba Jeová hadomi nafatin sira-nia família maski la selebra loron-boot balu ka lae?

Sin, hadomi nafatin. Bíblia hanorin ema atu hadomi no respeitu sira-nia família, inklui mós família neʼebé fiar la hanesan. (1 Pedro 3:1, 2, 7) Klaru katak, bainhira Testemuña ida para atu hola parte iha selebrasaun ruma, ninia família karik sai hirus, laran-kanek, ka sente katak ema neʼe la hadomi tan sira. Tan neʼe, Testemuña barak hakaʼas an atu halo sira-nia família sente domin, esplika ho respeitu kona-ba sira-nia desizaun, no vizita sira-nia família iha tempu seluk.

Testemuña ba Jeová obriga ema seluk atu la selebra loron-boot balu ka lae?

Lae. Sira fiar katak ema ida-idak presiza halo desizaun rasik. (Josué 24:15) Testemuña ba Jeová “hatudu respeitu ba ema oioin”, no la haree ba ema nia relijiaun.​—1 Pedro 2:17.