Diversaun neʼebé envolve espiritizmu mak perigu ka lae?

Ita hanoin oinsá?

• Sala ka lae atu lee oróskopu, halimar jelangkung, ka bá matan-dook?

• Istória sira neʼebé liga ho buat espiritizmu nian mak atu hatudu deʼit funu entre buat aat no buat diʼak, ka neʼe loloos buat neʼebé perigu?

Iha informasaun neʼe, ita sei buka-hatene tanbasá ema gosta diversaun neʼebé envolve espiritizmu no tanbasá ita presiza kuidadu.

• Tanbasá ema gosta diversaun neʼebé envolve espiritizmu?

• Tanbasá Ita tenke kuidadu?

• Saida mak Ita bele halo?

• Ita-nia kolega hanoin saida

Tanbasá ema gosta diversaun neʼebé envolve espiritizmu?

Ohin loron iha filme, programa televizaun, vídeo game no livru barak neʼebé iha ligasaun ho espiritizmu. Tan neʼe mak joven barak interese loos kona-ba astrolojia, demóniu, vampir, no matan-dook nia atividade. Tanbasá? Razaun balu mak:

• Tanba kuriozu: Atu buka-hatene iha duni mundu espíritu ka lae

• Tanba hanoin barak: Atu hatene kona-ba buat neʼebé sei akontese iha futuru

• Tanba hakarak komunika: Atu koko koʼalia ho família ka belun neʼebé mate tiha ona

Tuir loloos razaun sira-neʼe la sala. Porezemplu, se ita hakarak hatene saida mak sei akontese iha futuru ka se ita sente saudades ba ema neʼebé mate tiha ona, neʼe normál. Maibé, ita tenke hatene katak iha mós perigu sira.

Tanbasá ita tenke kuidadu?

Bíblia bandu buat hotu neʼebé liga ho espiritizmu. Porezemplu, Bíblia dehan:

“Iha imi-nia leet labele iha ema neʼebé . . . siʼik futuru, ema neʼebé halo masonik, ema neʼebé buka sinál oioin atu siʼik futuru, matan-dook, ema neʼebé fekit ema seluk, ema neʼebé husu ba ema neʼebé koko atu koʼalia ho ema mate ka husu ba ema neʼebé siʼik futuru, ka ema neʼebé husu ema mate. Tanba Jeová hakribi ema neʼebé halo buat sira-neʼe.”​—Deuteronómio 18:10-12.

Tanbasá Bíblia bandu espiritizmu?

• Espiritizmu halo ita besik liu ba anju aat sira. Bíblia hanorin katak anju balu kontra hasoru Maromak no sai ninia inimigu. (Génesis 6:2; Judas 6) Atu lohi ema, anju aat sira-neʼe uza matan-dook sira, ema neʼebé koko koʼalia ho ema mate, no siʼikdór sira. Se ita mak hola parte iha atividade sira-neʼe, ita mós sai Maromak nia inimigu.

• Espiritizmu habelar hanorin falsu sira katak iha ema neʼebé bele hatene kona-ba futuru. Maibé tuir loloos, só Maromak deʼit mak bele dehan: “Husi uluk kedas haʼu fó-hatene nanis buat neʼebé sei mosu, no husi tempu uluk haʼu fó sai buat sira neʼebé seidauk akontese.”​—Isaias 46:10; Tiago 4:13, 14.

• Espiritizmu mós apoia lia-bosok neʼebé dehan katak ema neʼebé mate ona bele komunika ho ita. Bíblia dehan: “Ema neʼebé mate ona la hatene buat ida . . . La iha serbisu ka planu ka koñesimentu ka matenek iha rate.”​—Eclesiastes 9:5, 10.

Tanba razaun sira-neʼe, Testemuña ba Jeová sees husi atividade sira neʼebé iha ligasaun ho espiritizmu. Sira mós sees husi diversaun neʼebé envolve zombi, vampir no kbiit neʼebé la baibain. Joven ida naran Maria hatete: “Se buat sira hanesan neʼe mak mosu iha programa televizaun ka iha game, haʼu sei la haree ka halimar game neʼe.”a

Saida mak Ita bele halo?

• Hakaʼas an atu “iha konxiénsia neʼebé moos” iha Jeová nia oin hodi hasees an husi buat naran deʼit neʼebé iha ligasaun ho espiritizmu.​—Apóstolu 24:16.

• Ita tenke soe hotu sasán neʼebé iha ligasaun ho espiritizmu. Lee Apóstolu 19:19, 20, no aprende husi ema Kristaun nia ezemplu diʼak iha tempu uluk.

Hanoin-hetan: Bainhira ita la simu atividade no diversaun hotu neʼebé iha ligasaun ho espiritizmu, neʼe katak ita apoia Jeová no halo ninia laran kontente!​—Provérbios 27:11.