Salmo 23:4—“Maski haʼu laʼo iha foho-leet neʼebé nakukun tebes”

“Maski haʼu laʼo iha foho-leet neʼebé nakukun tebes, haʼu la taʼuk kona-ba perigu sira, tanba Ita hamutuk ho haʼu; Ita-nia ai-tonka bibi-atan nian mak halo haʼu-nia laran hakmatek.”—Salmo 23:4, Tradusaun Mundu Foun.

“Maski hau lao iha mahon mate nian, hau la tauk buat aat, tanba O mak hamutuk ho haʼu; O nia rota no ai tonka foo kmaan mai hau.”​—Salmu 23:4 nota-rodapé, Bíblia Kadi Kapasidade.

Signifikadu husi Salmo 23:4a

Maromak proteje no tau matan ba ema neʼebé adora nia maski sira hasoru situasaun susar. Eskritura neʼe atu fó sai kona-ba oinsá Maromak proteje ninia atan, hanesan bibi-atan proteje ninia bibi sira.b Maromak nia atan sira la sente mesak kuandu sira hasoru situasaun neʼebé halo sira taʼuk hanesan iha foho-leet neʼebé nakukun tebes ka fatin neʼebé lori perigu ba moris. Sira sente seguru tanba hatene katak Maromak hamutuk ho sira.

Iha tempu Bíblia nian, bibi-atan ida baibain uza ai atu proteje bibi sira husi animál fuik. Nia mós sei uza ninia ai-tonka ho tutun neʼebé kleʼuk atu dirije no dada bibi sira husi perigu. Hanesan bibi-atan neʼebé tau matan bibi ho domin, Maromak Jeová mós proteje no dirije ema neʼebé adora nia. Jeová tau matan ba ninia atan sira iha dalan oioin maski sira hasoru situasaun neʼebé susar tebes.

• Nia dirije no fó kmaan ba sira liuhusi ninia Liafuan Bíblia.—Roma 15:4.

• Nia rona sira-nia orasaun, no mós fó sira dame iha laran no neon.—Filipe 4:6, 7.

• Nia uza maluk Kristaun atu anima sira.—Ebreu 10:24, 25.

• Nia fó ba sira esperansa kona-ba futuru neʼebé diʼak liu. Iha tempu neʼebá Maromak sei halakon susar hotu neʼebé sira hasoru ohin loron.—Salmo 37:29; Apokalipse 21:3-5.

Kontestu husi Salmo 23:4

David mak hakerek Salmo 23. Kuandu nia joven, nia mak bibi-atan ida no ikusmai sai liurai ba nasaun Izraél antigu. (1 Samuel 17:34, 35; 2 Samuel 7:8) Salmo neʼe komesa hodi esplika katak Jeová mak hanesan Bibi-Atan neʼebé dirije, fó-han, no fó kmaan ba ema neʼebé adora nia.—Salmo 23:1-3.

Iha Salmo 23:4, bainhira temi kona-ba Maromak nia protesaun, David la bolu tan Jeová ho liafuan “nia” maibé uza fali liafuan “Ita”. Neʼe hatudu katak David iha relasaun neʼebé besik tebes ho Jeová. David hatene katak Maromak interese ba nia no hatene kona-ba ninia susar hotu. Rezultadu mak David la sente taʼuk ba buat ida.

Iha Salmo 23 versíkulu 5 no 6, David temi Jeová nuʼudar uma-naʼin, no ninia an nuʼudar bainaka. Hanesan uma-naʼin neʼebé laran-luak, Jeová simu David nuʼudar bainaka neʼebé importante. David nia inimigu sira labele hapara Maromak atu tau matan ba nia. Ikusmai David remata salmo neʼe hodi hatudu sai ninia fiar neʼebé metin katak Maromak sei kontinua hatudu laran-diʼak no domin ba nia iha ninia moris tomak.

Liafuan sira iha Salmo 23 hatudu katak Maromak sei kontinua tau matan no hatudu domin ba ninia atan sira.—1 Pedro 2:25.