João 14:6—“Haʼu mak dalan no lia-loos no moris”

“Jesus hatete ba nia: ‘Haʼu mak dalan no lia-loos no moris. Ema ida labele hakbesik ba Aman se la liu husi haʼu.’”—João 14:6, Tradusaun Mundu Foun.

“Jesus hateten ba nia: Haʼu neʼe dalan, lialos no moris. Ema ida la liu karik husi Haʼu, nia la bele hakbesik Haʼu Aman.’”—Joao 14:6, Liafuan diak ba imi, segunda edisaun.

Signifikadu husi João 14:6

Ema neʼebé hakarak adora Aman Maromak Jeováa tenke rekoñese Jesus nia knaar importante.

“Haʼu mak dalan.” Jesus fó “dalan” mai ita atu bele hakbesik ba Maromak. Porezemplu, ema neʼebé halo orasaun ba Maromak tenke halo ida-neʼe liuhusi Jesus nia naran. (João 16:23, 24) Jesus nia mate loke dalan ba ema atu hadame malu ho Maromak, no hetan fali relasaun diʼak ho Maromak. (Roma 5:8-11) Jesus mós hatudu hahalok diʼak hodi fó ezemplu ba ema neʼebé hakarak halo Maromak kontente.—João 13:15.

“Haʼu mak . . . lia-loos.” Jesus sempre koʼalia lia-loos no moris tuir lia-loos. (1 Pedro 2:22) Kuandu ita rona ba Jesus, ita bele aprende lia-loos kona-ba Maromak. (João 8:31, 32) Jesus mós nuʼudar “lia-loos” tanba nia kumpre Bíblia nia profesia no halo Maromak nia promesa sai loos.—João 1:17; 2 Korinto 1:19, 20; Koloso 2:16, 17.

“Haʼu mak . . . moris.” Jesus fó ninia moris nuʼudar sakrifísiu atu nuneʼe ema neʼebé tau fiar ba nia bele hetan moris rohan-laek. (João 3:16, 36) Nia mós “moris” ba ema neʼebé mate ona, tanba nia sei fó moris-hiʼas ba sira.—João 5:28, 29; 11:25.

“Ema ida labele hakbesik ba Aman se la liu husi haʼu.” Ema neʼebé hakarak iha relasaun diʼak ho Maromak tenke rekoñese Jesus nia knaar neʼebé úniku. Kuandu ita halo orasaun ba Maromak liuhusi Jesus nia naran, neʼe katak ita rekoñese Jesus Kristu nia autoridade. (João 15:16) Ita mós rekoñese katak só Jesus deʼit mak loke dalan ba ita atu bele hetan salvasaun.—Apóstolu 4:12; Filipe 2:8-11.

Kontestu husi João 14:6

João kapítulu 13 toʼo 17 fó sai Jesus nia konsellu ikus ba ninia apóstolu naʼin-11 neʼebé laran-metin iha kalan antes nia mate. Iha kapítulu 14, Jesus anima ninia dixípulu sira atu tau fiar ba nia no ninia Aman, no hatudu domin no halo tuir sira. (João 14:1, 12, 15-17, 21, 23, 24) Nia fó sai katak nia iha relasaun besik tebes ho ninia Aman. (João 14:10, 20, 28, 31) Maski Jesus sei fila fali ba lalehan, nia mós hatete katak nia sei la husik sira mesak. (João 14:18) Nia mós promete katak sira sei hetan “ajuda-naʼin”, neʼe mak “espíritu santu neʼebé Aman sei haruka ba imi hodi haʼu-nia naran”. (João 14:25-27) Liuhusi ida-neʼe no dalan seluk tan, Jesus prepara ninia dixípulu sira atu tahan hasoru susar iha futuru.