Roma 5:8—“Kristu mate ba ita bainhira ita sei sala-naʼin hela”

“Maromak hatudu ninia domin ba ita iha dalan tuirmai neʼe: Kristu mate ba ita bainhira ita sei sala-naʼin hela.”—Roma 5:8, Tradusaun Mundu Foun.

“Maromak hatudu nia domin ba ita iha neʼe: katak, wainhira ita ema maksalak, Kristu mate tan ita.”—Roma 5:8, Liafuan diak ba imi, segunda edisaun.

Signifikadu husi Roma 5:8

Maromak Jeováa hatudu domin boot hodi husik ninia Oan-Mane Jesus mate atu salva ita ema neʼebé sala-naʼin. (João 3:16) Nuʼudar sala-naʼin, fasil ba ita atu iha hanoin no hahalok neʼebé kontra Maromak nia hakarak. (Koloso 1:21, 22) Maibé Maromak loke dalan mai ita atu hadame fali ho nia “liuhusi ninia Oan-Mane nia mate”. (Roma 5:10) Rezultadu mak ita bele iha oportunidade atu iha relasaun diʼak ho Maromak agora no iha esperansa atu moris ba nafatin iha futuru.—Roma 5:11; 1 João 4:9, 10.

Kontestu husi Roma 5:8

Apóstolu Paulo hakerek ida-neʼe ba ema Kristaun neʼebé hela iha Roma. Iha ninia karta ba Roma kapítulu 5, nia esplika tanbasá mak ema Kristaun bele haksolok no fiar metin ba sira-nia esperansa. (Roma 5:1, 2) Esperansa neʼe “sei la halo ita laran-triste”, tanba ida-neʼe bazeia ba domin boot neʼebé Maromak hatudu ona hodi fó Jesus nuʼudar sakrifísiu atu salva ita. (Roma 5:5, 6) Jesus sempre halo tuir Maromak iha dalan neʼebé perfeitu, la hanesan ho ema primeiru Adão. (Roma 5:19) Tanba Adão la halo tuir, neʼe lori sala no mate ba ninia oan no bei-oan hotu. (Roma 5:12) Maibé, tanba Jesus halo tuir no fó ninia an nuʼudar sakrifísiu, ema neʼebé halo tuir bele iha esperansa atu hetan moris rohan-laek.—Roma 5:21.