Ebreu 11:1—“Fiar mak laran-metin katak ita-nia esperansa sei sai loos”

“Fiar mak laran-metin katak ita-nia esperansa sei sai loos; fiar mak evidénsia neʼebé hatudu ho klaru katak buat sira-neʼe iha duni maski matan labele haree.”—Ebreu 11:1, Tradusaun Mundu Foun.

“Fiar mak laran metin kona ba rahun diak sira nebe ita hein, hatene lo-los katak buat sira nebe ita matan la hare ohin iha duni.”—Ebreu 11:1, Liafuan diak ba imi, segunda edisaun.

Signifikadu husi Ebreu 11:1

Eskritura neʼe esplika ho klaru liafuan “fiar” neʼebé temi iha Bíblia signifika saida no fiar laʼós sentimentu deʼit.

“Fiar mak laran-metin katak ita-nia esperansa sei sai loos.” Iha testu orijinál husi Ebreu 11:1, liafuan Gregu neʼebé tradús nuʼudar “fiar” fó ideia kona-ba konfiansa, tau fiar no laran-metin. Fiar hanesan neʼe la bazeia ba sentimentu atu espera buat diʼak ruma; neʼe mak “laran-metin katak ita-nia esperansa sei sai loos”. Lian Gregu orijinála ba fraze neʼe bele mós tradús nuʼudar “dokumentu atu prova direitu nuʼudar naʼin”, neʼe refere ba garantia neʼebé halo ema ida fiar ka iha konfiansa katak nia mak iha direitu ba buat ruma.

“Fiar mak evidénsia neʼebé hatudu ho klaru katak buat sira-neʼe iha duni maski matan labele haree.” Fiar mak rezultadu husi prova neʼebé labele nega. Prova hanesan neʼe mak metin duni toʼo halo ema fiar ida-neʼe nuʼudar realidade maski nia labele haree ho matan.

Kontestu husi Ebreu 11:1

Livru Ebreu mak apóstolu Paulo nia karta ba ema Kristaun sira neʼebé hela iha Jeruzalein no iha área neʼebé besik. Iha kapítulu neʼe, Paulo fó sai katak importante atu iha fiar. Porezemplu, nia hakerek: “Se ita la iha fiar, ita labele halo Maromak kontente. Tanba ema neʼebé hakbesik ba Maromak tenke fiar katak Maromak iha duni, no mós fiar katak Maromak sei fó kolen ba sira neʼebé buka nia ho laran.” (Ebreu 11:6) Paulo esplika fiar katak sá iha Ebreu 11:1, tuirmai temi ezemplu kona-ba mane no feto husi Bíblia neʼebé hatudu hahalok importante neʼe. Nia konta oinsá sira hatudu sai sira-nia fiar hodi halo tuir Maromak nia hakarak.—Ebreu 11:4-38.