Isaias 40:31—“Ema neʼebé tau esperansa ba Jeová sei hetan fali kbiit”

“Maibé ema neʼebé tau esperansa ba Jeová sei hetan fali kbiit. Sira sei semo aas hanesan manu-makikit. Sira sei halai no la sai fraku; sira sei laʼo no la sai kole.”—Isaias 40:31, Tradusaun Mundu Foun.

“Maibee sira nebee hein NAI sei hetan kbiit foun, sira sei sae ho liras hanesan makikit nian; sira sei halai no la sai kole, sira sei lao no la sai fraku.”—Isaias 40:31, Bíblia Kadi Kapasidade.

Signifikadu husi Isaias 40:31

Maromak Jeováa promete ba ninia povu katak nia sei fó ba sira kbiit neʼebé sira presiza atu tahan hasoru problema naran deʼit.

“Ema neʼebé tau esperansa ba Jeová sei hetan fali kbiit.” Ema neʼebé tau esperansa ba Jeová fiar katak nia bele no hakarak ajuda ninia povu. Ema sira-neʼe fiar katak Maromak bele apoia sira. (Provérbios 3:5, 6) Dalan ida neʼebé Maromak bele fó kbiit ba ninia povu mak hodi haraik ninia espíritu santu.—Lucas 11:13.

“Sira sei semo aas hanesan manu-makikit.” Ai-knanoik neʼe hatudu kona-ba oinsá ema hetan kbiit husi Maromak. Manu-makikit aproveita anin manas neʼebé huu saʼe husi rai hodi semo no la presiza baku nia liras. Se manu-makikit hetan tiha anin neʼe, manu neʼe loke nia liras no semo ho dulas hodi husik anin lori nia aas tebes. Manu makikit sei muda husi anin manas ida ba fali anin manas seluk atu bele nafatin iha anin laran ba oras barak no bele semo toʼo fatin neʼebé nia hakarak hodi la hasai forsa barak.

“Sira sei halai no la sai fraku.” Problema sira neʼebé ita hasoru bele halo ita kole iha isin no emosaun. Maibé, ita bele nafatin tahan tanba ita hetan kbiit husi Maromak. Ita mós bele nafatin halo buat neʼebé loos maski hasoru susar neʼebé todan tebes. Apóstolu Paulo hasoru problema barak iha ninia moris, maibé nia hatete: “Iha situasaun hotu haʼu hetan kbiit liuhusi nia neʼebé fó kbiit mai haʼu.”—Filipe 4:13.

Kontestu husi Isaias 40:31

Maizumenus iha tinan 700 AEC, Maromak dirije profeta Isaias atu hakerek liafuan sira-neʼe. Maski eskritura neʼe ba Maromak nia atan hotu neʼebé laran-metin, maibé karik Maromak fó sai liafuan sira-neʼe ba ema Judeu neʼebé sei sai dadur iha Babilónia durante tinan 70. Sira sente duni liafuan sira-neʼe sai loos bainhira sira livre husi dadur no fila fali ba sira-nia rai. (Isaias 40:1-3) Iha tempu neʼebá, Maromak fó kbiit ba sira atu bele halaʼo viajen neʼebé dook tebesb no perigu husi Babilónia ba Jeruzalein iha tinan 537 AEC.—Isaias 40:29.