Filipe 4:8—“Kontinua hanoin kona-ba buat hotu neʼebé loos”

“Ikusliu, maun-alin sira, kontinua hanoin kona-ba buat hotu neʼebé loos, buat hotu neʼebé importante, buat hotu neʼebé diʼak tuir Maromak nia haree, buat hotu neʼebé moos, buat hotu neʼebé haburas domin, buat hotu neʼebé merese respeitu, no buat hotu neʼebé santu no buat hotu neʼebé merese hahiʼi.”—Filipe 4:8, Tradusaun Mundu Foun.

“Ikus mai, maun alin sira, halo nakonu imi nia neon ho buat nebe los, santu, diak, mos, furak no aas.”—Filipe 4:8, Liafuan diak ba imi, segunda edisaun.

Signifikadu husi Filipe 4:8

Maromak interese ba buat neʼebé ita ema hanoin, liuliu tanba buat neʼebé ita hanoin sei afeta ita-nia hahalok. (Salmo 19:14; Marcos 7:20-23) Tan neʼe, ema neʼebé hakarak halo Maromak kontente hakaʼas an atu hanoin kona-ba buat neʼebé Maromak gosta no la simu hanoin neʼebé la diʼak tuir Maromak nia haree.

Eskritura neʼe temi buat diʼak ualu neʼebé ema Kristaun presiza “kontinua hanoin”, ka sai toman atu hanoin.

• “Buat hotu neʼebé loos.” Neʼe refere ba buat neʼebé diʼak no bele tau fiar, hanesan informasaun husi Maromak nia Liafuan Bíblia.—1 Timóteo 6:20.

• “Buat hotu neʼebé importante.” Neʼe refere ba buat neʼebé importante duni, laʼós buat neʼebé importante iha liʼur deʼit. Ema Kristaun neʼebé hanoin kona-ba buat neʼebé importante sei hametin sira-nia hakarak atu halo buat neʼebé loos.—Tito 2:6-8.

• “Buat hotu neʼebé diʼak tuir Maromak nia haree.” Neʼe refere ba planu no hahalok neʼebé tuir Maromak nia kritéria kona-ba buat neʼebé loos, laʼós tuir deʼit ema nia matenek neʼebé limitadu.—Provérbios 3:5, 6; 14:12.

• “Buat hotu neʼebé moos.” Neʼe refere ba ideia kona-ba hanoin no motivu neʼebé moos no santu, laʼós deʼit iha buat seksuál nian, maibé iha buat hotu.—2 Korinto 11:3.

• “Buat hotu neʼebé haburas domin.” Neʼe refere ba buat diʼak neʼebé book ita atu haburas domin, laʼós odi, laran-moras, ka hirus malu.—1 Pedro 4:8.

• “Buat hotu neʼebé merese respeitu.” Neʼe refere ba buat neʼebé halo ema ida hetan naran diʼak no halo kontente ema seluk neʼebé respeitu Maromak.—Provérbios 22:1.

• “Buat hotu neʼebé santu.” Neʼe refere ba buat furak neʼebé tuir Maromak nia kritéria. Neʼe mak buat neʼebé diʼak tebes.—2 Pedro 1:5, 9.

• “Buat hotu neʼebé merese hahiʼi.” Neʼe refere ba buat neʼebé merese simu gaba, liuliu tuir Maromak nia haree. Neʼe inklui mós Maromak nia hahalok furak neʼebé merese hahiʼi, no importante ba ema atu hanoin.—Salmo 78:4.

Kontestu husi Filipe 4:8

Bainhira apóstolu Paulo hakerek karta ba ema Kristaun iha Filipe, nia sulan hela iha uma nuʼudar dadur iha Roma. Maski nuneʼe, matenek-naʼin sira kona-ba Bíblia temi karta neʼe nuʼudar “karta haksolok nian” tanba ninia mensajen pozitivu no inklui fraze barak neʼebé hatudu domin no laran-diʼak.—Filipe 1:3, 4, 7, 8, 18; 3:1; 4:1, 4, 10.

Paulo hadomi irmaun-irmán sira iha Filipe, no nia hakarak sira atu sente haksolok no dame hanesan nia. (Filipe 2:17, 18) Entaun, iha parte ikus husi ninia karta neʼe, nia anima sira atu haburas ksolok, labele ulun-toos, sempre sadere ba Maromak liuhusi orasaun, no fokus ba buat neʼebé haburas dame iha sira-nia laran no iha sira-nia relasaun ho Maromak.—Filipe 4:4-9.

Haree vídeo badak neʼe hodi komprende kona-ba livru Filipe.