Isaias 26:3—“Ita-Boot sei proteje ema neʼebé sadere ba Ita ho laran tomak; Ita sei fó dame nafatin ba sira”

“Ita-Boot sei proteje ema neʼebé sadere ba Ita ho laran tomak; Ita sei fó dame nafatin ba sira, tanba sira tau fiar deʼit ba Ita.”—Isaias 26:3, Tradusaun Mundu Foun.

“O sei proteje no foo dame nebee perfeitu ba ema nebee hanoin nafatin O, tanba nia fiar ba O.”—Isaias 26:3, Bíblia Kadi Kapasidade.

Signifikadu husi Isaias 26:3

Profeta Isaias fó sai katak Maromak proteje ema neʼebé tau fiar tomak ba Nia. Nia halo ida-neʼe hodi ajuda sira atu sente seguru no dame.

“Ita-Boot sei proteje ema neʼebé sadere ba Ita ho laran tomak.” Neʼe koʼalia kona-ba ema neʼebé sempre tau fiar tomak ba Maromak Jeová.a Ema neʼebé tau fiar ba Maromak rekoñese katak sira presiza sadere ba ninia ajuda. Porezemplu, sira la sadere ba sira-nia hanoin rasik kuandu halo desizaun ruma, maibé buka-hatene Maromak nia hanoin kona-ba buat hotu neʼebé sira halo. (Provérbios 3:5, 6) Sira aprende Maromak nia hanoin hodi lee ninia Liafuan Bíblia no hanoin kleʼan kona-ba buat neʼebé sira lee. (Salmo 1:2; 119:15) Bainhira sira hasoru situasaun susar ruma, sira halo orasaun ba Jeová ho laran no husu ninia ajuda. (Salmo 37:5; 55:22) Hodi halo nuneʼe, sira hatudu sai sira-nia fiar ba Maromak, no Maromak fó dame ba sira.

“Ita sei fó dame nafatin ba sira.” Iha lian Ebraiku orijinál, liafuan “dame” temi dala rua atu tau énfaze, neʼe bele tradús nuʼudar “dame ba nafatin”, “dame neʼebé perfeitu”, ka “dame neʼebé kompletu”. Neʼe katak ema neʼebé tau fiar tomak ba Jeová bele sente laran-hakmatek, no iha dame neʼebé la depende ba situasaun. (Salmo 112:7; 119:165) Ita bele sente dame hanesan neʼe só deʼit kuandu ita iha relasaun besik ho Jeová no hakaʼas an atu halo buat neʼebé loos tuir Jeová nia hakarak.—Provérbios 3:32; Isaias 48:18.

“Dame nafatin” la dehan katak Maromak proteje ninia povu husi problema hotu atu sira nunka sente laran-susar. (1 Samuel 1:6, 7; Job 6:1, 2; Salmo 31:9) Maibé nia ajuda sira atu bele tahan hasoru susar oioin. (Isaias 41:10, 13) Nia hatán ba sira-nia orasaun, fó matenek, forsa no kmaan ba sira. (Salmo 94:19; Provérbios 2:6; Isaias 40:29) Rezultadu mak sira bele sente kalma nafatin maski hasoru situasaun susar.—Filipe 4:6, 7.

Kontestu husi Isaias 26:3

Profeta Isaias moris maizumenus tinan 800 antes Jesus nia tempu. Iha tempu neʼebá, ema Judeu barak la hatudu laran-metin ba Maromak Jeová. Tan neʼe, ikusmai Jeová husik inimigu sira ataka no harahun ema Judeu nia sidade kapitál Jeruzalein iha tinan 607 AEC.

Maibé tinan atus ida liu antes ida-neʼe akontese, Isaias hakerek knananuk profesia nian atu hahiʼi Jeová iha kapítulu 26. (Isaias 26:1-6) Knananuk neʼe fó sai kona-ba tempu iha futuru neʼebé ema sei harii fali sidade ida iha rai Judá, neʼe mak Jeruzalein.

Sidade Jeruzalein neʼe hahú harii fali husi tinan 537 AEC. Bainhira ida-neʼe akontese, ema Judeu sira neʼebé fila fali ona ba sira-nia rai bele sente seguru no hatete: “Ami iha sidade neʼebé forte.” (Isaias 26:1) Maibé tuir loloos, laʼós moru neʼebé metin mak halo sidade neʼe seguru. Sidade neʼe nia kondisaun seguru depende ba Jeová nia bensaun no protesaun.—Isaias 26:2.

Nuneʼe mós ho ohin loron. Ema neʼebé sadere ba Jeová ho laran tomak bele sente seguru tanba Jeová mak sai sira-nia “Fatuk Boot”, ka subar-fatin.—Isaias 26:4.

Haree vídeo badak neʼe hodi komprende kona-ba livru Isaias.