Apokalipse 21:4—“Nia sei hamaran sira-nia matan-been hotu husi sira-nia matan”

“Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”—Apokalipse 21:4, Tradusaun Mundu Foun.

“Nia sei hamaran sira nia mataben housi sira nia matan; mate la iha ona, no ema sei la tanis tan eh laran susar, basa sasan raiklaran uluk nian liu tiha ona.”—Apokalipse 21:4, Liafuan diak ba imi, segunda edisaun.

Signifikadu husi Apokalipse 21:4

Maromak promete atu halakon ema nia sentimentu susar no terus, maibé laʼós neʼe deʼit, nia mós sei halakon problema nia hun hotu.

“Nia sei hamaran sira-nia matan-been hotu husi sira-nia matan.” Liafuan sira-neʼe konfirma Maromak Jeováa nia promesa neʼebé profeta Isaias fó sai ona, katak Jeová sei “hamaran matan-been husi ema hotu nia oin”. (Isaias 25:8; Apokalipse 7:17) Neʼe hatudu katak Maromak Jeová hanoin tebes ema hotu neʼebé matan-been suli tanba hasoru susar oioin, inklui mós ema neʼebé sira hadomi mate.

“Mate sei la iha tan.” Fraze neʼe bele mós tradús nuʼudar “mate sei la eziste tan”. Maromak promete atu halakon mate no susar hotu neʼebé akompaña ho mate. Liután neʼe, Maromak mós promete katak ema neʼebé mate ona sei moris hiʼas fali. (1 Korinto 15:21, 22) Loos duni, mate sei lakon ba nafatin.—1 Korinto 15:26.

“Ema sei la triste tan ka tanis ka sente moras.” Neʼe la dehan katak Maromak sei halo ema labele sente tan triste ka moras. Tuir loloos, sente moras iha dalan fíziku bele lori benefísiu ba ita tanba neʼe fó avizu ba ita atu sees husi perigu ka ajuda ita la hetan kanek. Entaun, promesa neʼe dehan katak Maromak sei halakon hotu sentimentu moras iha dalan fíziku, mentál, no emosionál neʼebé ita ema sente tanba rezultadu husi salab no tanba ita la perfeitu.—Roma 8:21, 22.

“Buat sira neʼebé uluk nian lakon tiha ona.” Neʼe mak rezumu ba mudansa boot neʼebé sei akontese ba ema iha futuru. Livru referénsia ida dehan: “Iha moris uluk nian, ema labele sees husi mate, terus, tanis, no moras nuʼudar parte husi ema nia situasaun, maibé Maromak sei halakon buat sira-neʼe hotu hodi troka ho moris foun.” Iha tempu neʼebá, ema sei bele moris haksolok ba nafatin iha mundu neʼe ho kondisaun perfeitu hodi tuir Maromak nia hakarak husi tempu ulukliu kedas.—Génesis 1:27, 28.

Kontestu husi Apokalipse 21:4

Kapítulu 21 hahú ho apóstolu João nia liafuan kona-ba buat neʼebé nia haree iha vizaun ida, hodi dehan: “Haʼu haree lalehan foun no rai foun.” (Apokalipse 21:1) Nia uza liafuan simbóliku atu esplika kona-ba mudansa boot neʼebé Bíblia nia livru sira seluk mós fó-hatene nanis ona. (Isaias 65:17; 66:22; 2 Pedro 3:13) “Lalehan foun” ka Maromak nia governu iha lalehan mak sei troka husi ema nia governu hotu no ukun “rai foun”, neʼe mak grupu foun husi ema neʼebé hela iha mundu.—Isaias 65:21-23.

Tuir vizaun neʼe, ema nia moris iha mundu sei sai oinsá? Primeiru, Maromak nia promesa hahú ho liafuan: “Maromak nia tenda hamutuk ho ema.” (Apokalipse 21:3) Promesa neʼe laʼós ba anju sira iha lalehan, maibé ba ema iha mundu. Segundu, vizaun neʼe koʼalia kona-ba mundu neʼebé “mate sei la iha tan”. (Apokalipse 21:4) Husi ulukliu kedas, mate nunka akontese iha lalehan, maibé neʼe akontese ba ema iha mundu. (Roma 5:14) Tan neʼe, ita bele fiar tuir lójiku katak versíkulu neʼe koʼalia kona-ba mundu nia kondisaun iha futuru.

Haree vídeo badak neʼe hodi komprende kona-ba livru Apokalipse.