Provérbios 17:17—“Belun neʼebé loos hatudu domin iha tempu hotu”

Signifikadu husi Provérbios 17:17

Belun neʼebé loos tau fiar ba malu. Hanesan maun-alin rasik, sira hatudu laran-metin no tau matan ba malu, liuliu iha tempu susar.

“Belun neʼebé loos hatudu domin iha tempu hotu.” Fraze neʼe bele mós tradús nuʼudar “belun sira sempre hatudu sira-nia domin”. Iha língua Ebraiku, liafuan “domin” iha fraze neʼe laʼós deʼit atu refere ba emosaun ka sentimentu ba ema ruma. Neʼe mak domin neʼebé la hanoin an, no hatudu sai ida-neʼe liuhusi hahalok. (1 Korinto 13:4-7) Belun neʼebé hatudu domin hanesan neʼe sei laran-metin ba malu maski hasoru situasaun neʼebé bele estraga sira-nia relasaun, porezemplu komprende sala ba malu, ka problema ruma mosu. Sira mós prontu atu fó perdua ba malu. (Provérbios 10:12) Kuandu buat diʼak ruma akontese ba sira ida, belun neʼebé loos sei haksolok hamutuk ho nia duké sai laran-moras.—Roma 12:15.

“Belun neʼebé loos . . . sai hanesan maun ka alin ida iha tempu susar.” Relasaun entre maun-alin mak besik tebes. Tan neʼe, kuandu ita hakaʼas an atu halo buat hotu hodi ajuda belun neʼebé iha susar laran, neʼe katak ita hatudu daudaun hahalok hanesan maun, biin, ka alin rasik. Maski hasoru situasaun susar, belun neʼebé loos sei la husik ida-neʼe halo fraku sira-nia relasaun, maibé ida-neʼe sei hametin liután sira-nia domin no respeitu ba malu.

Kontestu husi Provérbios 17:17

Livru Provérbios fó sai matenek neʼebé kleʼan liuhusi lia-dadolin badak neʼebé book ema atu hanoin. Parte maioria husi livru neʼe mak Liurai Salomão nia liafuan. Ninia modelu atu hakerek provérbios mak hanesan ho poezia iha língua Ebraiku neʼebé fó sai ideia paralelu ka ideia neʼebé kontra malu, neʼe katak liña segundu bele aumenta ka kontra ideia husi liña primeiru. Provérbios 17:17 mak ezemplu ida kona-ba poezia ho modelu paralelu, tanba liña segundu iha versíkulu neʼe aumenta ideia husi liña primeiru. Provérbios 18:24 mak ezemplu kona-ba ideia neʼebé kontra malu. Eskritura neʼe dehan: “Iha kolega balu neʼebé hakarak atu halo aat ba malu, maibé iha mós belun neʼebé laran-metin liu fali maun-alin.”

Bainhira Salomão hakerek Provérbios 17:17, karik nia hanoin kona-ba relasaun belun entre ninia aman David ho Jonatan, Liurai Saul nia oan. (1 Samuel 13:16; 18:1; 19:1-3; 20:30-34, 41, 42; 23:16-18) Maski David ho Jonatan la iha relasaun família, maibé sira-nia relasaun metin liu fali maun-alin rasik. Jonatan tau ninia moris iha perigu laran hodi proteje ninia belun David neʼebé joven liu nia.a

Haree vídeo badak neʼe hodi komprende kona-ba livru Provérbios.