Biblioteka neʼebé fasil atu asesu

‘Tinan balu liubá, ita nunka imajina katak ita bele simu ai-han espirituál liuhusi sasán eletróniku.’ Ita konkorda ho liafuan neʼe ka lae? Neʼe mak irmaun Geoffrey Jackson nia liafuan bainhira nia hatoʼo diskursu 2020 Notísias husi Grupu Administradór #6. Nia hatutan: ‘Maibé agora durante pandemia neʼe, ita hafolin liután aplikasaun JW Library neʼebé halo fasil ba ita. Klaru katak durante tinan balu, Jeová prepara ita atu hasoru situasaun iha mundu agora.’

Oinsá Jeová prepara ita? Atu kria aplikasaun JW Library no mós mantein no hafoun aplikasaun neʼe envolve serbisu saida deʼit?

Aplikasaun neʼebé úniku

Iha fulan-Maiu 2013, Grupu Administradór husu ba Departamentu Programa MEPS iha sede-jerál atu dezenvolve aplikasaun ida neʼebé inklui Bíblia Tradusaun Mundu Foun edisaun revizaun. Irmaun Paul Willies neʼebé serbisu ho Departamentu Programa MEPS hatete: “Iha momentu neʼebá, ami nunka fó sai aplikasaun ruma iha app store. Maibé ami forma ekipa ida, hapara ami-nia projetu balu, no serbisu hamutuk ho departamentu seluk atu halo planeamentu no halo aplikasaun neʼe no mós informasaun sira iha laran. Ami halo orasaun beibeik, no fulan lima tuirmai, ho Jeová nia ajuda, ami fó sai aplikasaun neʼe iha reuniaun boot tinan nian.”

Susar tuirmai mak atu halo aplikasaun neʼe sai nuʼudar biblioteka kompletu neʼebé nakonu ho publikasaun oioin no iha língua oioin. Iha fulan-Janeiru 2015, maioria ita-nia publikasaun foun iha lian Inglés mosu ona iha aplikasaun, no fulan neen tuirmai, ema mós bele ona download publikasaun sira iha língua atus ba atus.

Husi tempu neʼebá, ita-nia irmaun sira hafoun aplikasaun neʼe iha dalan oioin. Porezemplu, sira aumenta vídeo oioin, sira mós halo seksaun ida neʼebé iha publikasaun hotu no foto sira neʼebé uza ba reuniaun. Sira mós dezenvolve aplikasaun neʼe atu bele asesu referénsia sira husi Livru atu buka informasaun, diretamente husi Bíblia nia eskritura ida.

Serbisu atu mantein JW Library

Loron-loron, iha sasán eletróniku neʼebé loke JW Library hamutuk millaun 8 no fulan-fulan iha sasán eletróniku hamutuk millaun 15 liu mak asesu JW Library. Saida mak Departamentu Programa MEPS presiza halo atu bele halo JW Library laʼo ho diʼak nafatin? Irmaun Paul Willies esplika: “Aplikasaun ida sempre presiza hafoun. Ami kontinua implementa buat foun oioin atu JW Library bele ajuda ema no fasil atu uza. Tanba telemovel nia sistema operasaun sempre hafoun, ami mós presiza halo mudansa beibeik ba JW Library atu nuneʼe bele serbisu hamutuk nafatin ho sistema operasaun oioin neʼebé foun liu. Ami mós presiza halo manutensaun no hafoun JW Library nia sistema nuʼudar publikasaun no gravasaun sira kontinua aumenta liután.” Se sura tuir língua hotu neʼebé iha ona, agora daudaun iha publikasaun hamutuk 200.000 no gravasaun áudio no vídeo hamutuk 600,000 liu iha JW Library.

Atu bele halo manutensaun no hafoun sistema, laʼós deʼit presiza komputadór, maibé mós presiza selu atu bele uza programa komputadór balu. Atu hetan lisensa ba programa komputadór ida mak gasta osan dolar 1.500 tinan-tinan. Laʼós neʼe deʼit, Departamentu Programa MEPS mós gasta osan maizumenus dolar 10.000 tinan-tinan atu sosa ekipamentu sira husi kompañia oioin atu bele kontinua mantein aplikasaun laʼo ho diʼak iha komputadór, tablet no mós telemovel sira neʼebé foun liu.

JW Library ajuda poupa osan kontribuisaun

Tanba JW Library, agora organizasaun nia gastu atu print, jilid, no haruka publikasaun sira sai menus. Porezemplu, hanoin toʼok kona-ba livru Buka-hatene Didiʼak Eskritura Loron-loron. Ita print livru Buka-hatene Didiʼak Eskritura Loron-loron—2013 atu besik kopia millaun 12. Maibé ba tinan 2020 nian, ita print deʼit maizumenus millaun lima, maski loloos haklaken-naʼin iha mundu tomak aumenta hamutuk naʼin-700.000 liu. Tanbasá print livru uitoan deʼit? Tanba ita-nia irmaun-irmán barak agora lee eskritura loron-loron iha JW Library.a

“JW Library mak folin-boot tebes”

JW Library mós ajuda ema iha dalan oioin. Irmán Geneviève neʼebé hela iha rai-Kanadá sente katak JW Library ajuda nia sai badinas liután estuda Bíblia. Nia hatete: “Haʼu koʼalia nakloke, se haʼu presiza halibur livru oioin neʼebé haʼu presiza atu estuda, karik haʼu sei lakohi estuda dadeer-dadeer. Maibé hodi uza JW Library, haʼu presiza uza deʼit haʼu-nia tablet no publikasaun hotu neʼebé haʼu presiza iha ona laran. Hodi estuda Bíblia beibeik, neʼe hametin haʼu-nia fiar ba Maromak no haʼu sai besik liután ba Jeová.”

JW Library mós sai nuʼudar ajuda boot durante tempu pandemia COVID-19. Irmán Charlyn husi Estadus Unidus esplika: “Durante pandemia COVID-19 kona mundu tomak, haʼu la simu publikasaun foun neʼebé print ona durante tinan ida liu. Maibé JW Library kontinua fó sai buat neʼebé ita presiza atu hametin ita-nia fiar, no haʼu hatoʼo agradese ba Jeová tanba prepara ida-neʼe.”

Ema barak mós sente buat neʼebé hanesan ho irmán Faye neʼebé hela iha rai-Filipinas. Nia hatete: “Haʼu uza JW Library atu bele nafatin hakbesik ba Jeová. Neʼe mak buat primeiru neʼebé haʼu lee iha dadeer. Neʼe mak buat neʼebé haʼu rona bainhira halo atividade oioin. Neʼe mak buat neʼebé haʼu uza atu prepara ba reuniaun. Neʼe mak buat neʼebé haʼu uza atu prepara ba haʼu-nia estuda Bíblia. Haʼu nonton vídeo liuhusi ida-neʼe bainhira haʼu iha tempu. Haʼu lee publikasaun sira ka Bíblia liuhusi aplikasaun neʼe bainhira forma daudaun. JW Library mak folin-boot tebes.”

Aplikasaun neʼe mós ajuda tebes iha serbisu haklaken. Porezemplu, bainhira haklaken, irmán ida iha rai-Kamaroins hakarak atu uza eskritura ida neʼebé uluk irmán ida uza semana ida liubá. Maibé nia labele hanoin-hetan eskritura saida mak neʼe. Nia esplika: “Diʼak mak haʼu hanoin-hetan fraze ida. Haʼu loke JW Library, tama ba Bíblia, no buka fraze neʼe. Lakleur deʼit, haʼu hetan eskritura neʼebé haʼu buka. Hodi uza JW Library, haʼu bele hetan lalais eskritura sira neʼebé dala ruma haʼu haluha.”

Kontribuisaun neʼebé Ita fó liuhusi dalan oioin neʼebé temi iha website donate.jw.org ajuda organizasaun atu dezenvolve, mantein no hadiʼa liután JW Library ba irmaun-irmán sira iha mundu tomak. Obrigadu ba imi-nia laran-luak.

JW Library nia istória

1. 

   Outubru 2013—fó sai aplikasaun JW Library ba dala primeiru no neʼe inklui ona ho Bíblia Tradusaun Mundu Foun edisaun revizaun nian

2. 

   Janeiru 2015—Bele asesu publikasaun seluk tan iha lian Inglés, no tuirmai iha língua atus ba atus

3. 

   Novembru 2015—Aumenta opsaun atu tau kór ba liafuan

4. 

   Maiu 2016—Aumenta seksaun Perhimpunan

5. 

   Maiu 2017—Aumenta opsaun kona-ba halo nota

6. 

   Dezembru 2017—Aumenta Bíblia Edisaun Estudu iha lian Inglés

7. 

   Marsu 2019—Komesa bele download gravasaun sira, streaming vídeo, no mós asesu referénsia sira husi Livru atu buka informasaun liuhusi Bíblia

8. 

   Janeiru 2021—Hafoun liután atu nuneʼe livru Moris Haksolok ba Nafatin bele laʼo ho didiʼak