Nota-rodapé

a 1 Reis 17:17-24 ¹⁷ Liutiha buat sira-neʼe, feto-faluk neʼe neʼebé nuʼudar uma-naʼin, ninia oan-mane sai moras, no moras neʼe sai todan liután toʼo ninia iis kotu. ¹⁸ Ho ida-neʼe, nia dehan ba Elias: “Oh Maromak loos nia atan, haʼu halo sala saida ba Ita-Boot? Ita mai iha neʼe atu fó kastigu haʼu tanba haʼu-nia sala no halo haʼu-nia oan-mane mate ka?” ¹⁹ Maibé Elias dehan ba feto neʼe: “Entrega ó-nia oan-mane mai haʼu.” Tuirmai nia koʼus labarik neʼe husi feto neʼe nia liman no lori ba ninia kuartu iha uma leten, katak kuartu neʼebé Elias hela bá, no nia hatoba labarik neʼe iha ninia kama rasik. ²⁰ Elias harohan ba Jeová, hodi dehan: “Oh Jeová, haʼu-nia Maromak, feto-faluk neʼe fó fatin ba haʼu atu hela, maibé Ita mós lori susar ba nia hodi husik ninia oan-mane mate ka?” ²¹ Tuirmai nia latan nia an iha labarik neʼe nia leten ba dala tolu no nia harohan ba Jeová, hodi dehan: “Oh Jeová, haʼu-nia Maromak, favór ida, husik labarik neʼe nia moris fila fali ba nia.” ²² Jeová rona ba Elias nia harohan, no labarik neʼe nia moris fila fali ba nia, no nia moris fali. ²³ Elias lori labarik neʼe tun husi kuartu iha uma leten hodi tama ba uma laran no entrega ba ninia inan; Elias dehan: “Haree bá, ó-nia oan-mane moris fali ona.” ²⁴ Ho ida-neʼe, feto neʼe hatete ba Elias: “Agora haʼu hatene duni katak Ita mak Maromak nia atan no katak Jeová nia liafuan neʼebé Ita fó sai mak lia-loos.”