Nota-rodapé

a Liafuan neʼe hanesan maromak ida: “Liafuan neʼe” koʼalia kona-ba Jesus Kristu (haree nota estudu ba Liafuan neʼe) Kuandu João temi kona-ba “Liafuan neʼe”, nia la koʼalia kona-ba Maromak Kbiit Boot Liu Hotu. Tuir loloos, versíkulu neʼe dehan “Liafuan neʼe” mak “hamutuk ho Maromak”, neʼe hatudu ho klaru katak naʼin-rua laʼós ida deʼit. Liafuan neʼe mak “hanesan maromak ida” tanba nia iha pozisaun neʼebé importante liu, nia mak Maromak nia Oan-Mane primeiru no Maromak kria buat hotu liuhusi nia. Tradusaun iha lia-inglés, lia-fransés no lia-alemaun tradús eskritura neʼe iha dalan neʼebé hanesan ho Bíblia Sagrada Tradusaun Mundu Foun no fó ideia katak “Liafuan neʼe” mak “hanesan maromak” ka “maromak ida”. Hodi hatudu ida-neʼe, Koloso 2:9 mós dehan katak Kristu “nia hahalok hotu kompletu iha nia”. Tradusaun Septuajinta, tradús liafuan ebraiku el no elohim nuʼudar theos, katak Maromak. Liafuan rua neʼe fó ideia neʼebé hanesan, katak “ida neʼebé forte; kbiit-naʼin”. Entaun, hodi dehan katak “Liafuan neʼe” mak “maromak ida” apoia profesia neʼebé hakerek iha Isaias (Yesaya) 9:6 neʼebé dehan katak ema sei bolu Mesias nuʼudar “Maromak Kbiit Boot”, laʼós “Maromak Kbiit Boot Liu Hotu”.