Ezequiel
23 Jeová koʼalia tan mai haʼu, hodi dehan: 2 “Oan-mane husi ema, iha feto naʼin-rua neʼebé inan ida deʼit.+ 3 Sira sai feto-aat* iha rai-Ejitu+ husi sira-nia tempu joven kedas. Iha neʼebá ema buti sira-nia susun no kumu sira-nia hirus-matan neʼebé virjen hela. 4 Feto neʼebé boot naran Ohola,* no ninia alin-feto naran Oholiba.* Sira sai haʼu-nian no sira tuur-ahi oan-mane no oan-feto sira. Ohola mak Samaria,+ no Oholiba mak Jeruzalein.
5 “Ohola komesa faʼan an*+ bainhira nia sei haʼu-nian hela. Nia hakarak tebes ninia doben sira neʼebé kaan nia,+ katak ninia viziñu ema Asíria.+ 6 Ema sira-neʼe mak governadór sira neʼebé hatais hena kór-azúl no administradór sira. Sira hotu mak mane joven neʼebé isin kapás no saʼe kuda. 7 Nia kontinua faʼan nia an nuʼudar feto-aat ba ema Asíria nia oan-mane hotu neʼebé importante liu, nia kaan ema sira-neʼe no hafoʼer ninia an+ ho sira-nia estátua sira neʼebé haʼu hakribi.* 8 Nia la husik ninia hahalok nuʼudar feto-aat neʼebé nia halo iha rai-Ejitu, tanba husi ninia tempu joven kedas ema toba ona ho nia. Sira kaer ninia hirus-matan neʼebé virjen no sira kaan nia, no halo relasaun seksuál ho nia.+ 9 Tan neʼe, haʼu entrega nia ba ninia doben sira neʼebé uluk kaan nia, sira mak ema Asíria nia oan-mane sira+ neʼebé nia kaan loos. 10 Sira halo nia sai isin-tanan+ no kaer ninia oan-mane ho oan-feto sira,+ no sira oho nia ho surik. Ninia naran sai foʼer iha feto hotu nia leet, no sira fó kastigu ba nia.
11 “Bainhira ninia alin-feto Oholiba haree ida-neʼe, Oholiba komesa kaan mane sira makaʼas liu fali ninia biin, no Oholiba nia hahalok nuʼudar feto-aat mak aat liu fali ninia biin.+ 12 Nia kaan ema Asíria nia oan-mane sira+ neʼebé nuʼudar ninia viziñu. Nia kaan governadór no administradór sira neʼebé hatais hena furak no saʼe kuda. Ema sira-neʼe hotu mak mane joven neʼebé isin kapás. 13 Bainhira nia hafoʼer ona ninia an, haʼu haree katak sira naʼin-rua halo hahalok neʼebé hanesan deʼit.+ 14 Maibé Oholiba kontinua aumenta ninia hahalok nuʼudar feto-aat. Nia haree dezeñu kona-ba mane neʼebé ema bahat ona iha didin, dezeñu kona-ba ema Kaldeia sira neʼebé pinta ho kór-mean, 15 neʼebé kesi sintu iha sira-nia knotak, tau turbante* naruk iha sira-nia ulun, no isin hanesan funu-naʼin sira. Dezeñu hotu neʼe mak kona-ba ema Babilónia neʼebé moris iha ema Kaldeia nia rai. 16 Bainhira nia haree dezeñu sira-neʼe, nia komesa kaan kedas sira, no nia haruka ema lori lia-menon ba sira iha rai-Kaldeia.+ 17 Entaun ema Babilónia nia oan-mane sira kontinua mai halo relasaun seksuál ho nia iha ninia kama. Sira kaan nia no hafoʼer* nia. Bainhira sira hafoʼer ona nia, nia hakribi sira no sees husi sira.
18 “Bainhira Oholiba kontinua hatudu hahalok nuʼudar feto-aat toʼo la sente moe no hatudu sai ninia isin-tanan,+ haʼu hakribi nia no sees husi nia, hanesan haʼu* hakribi no sees husi ninia biin.+ 19 Nia kontinua aumenta tan ninia hahalok nuʼudar feto-aat,+ nia hanoin-hetan ninia tempu joven bainhira nia sai feto-aat iha rai-Ejitu.+ 20 Nia kaan mane sira-neʼe hanesan feen-kiʼik neʼebé kaan loos ninia laʼen neʼebé ninia oin-lulik hanesan ho kuda-burru aman nian no kuda-aman nian. 21 Ó hakarak tebes halo hahalok foʼer neʼebé ó halo ona iha rai-Ejitu+ husi ó-nia tempu joven bainhira sira kumu ó-nia hirus-matan, no buti ó-nia susun.+
22 “Tan neʼe, oh Oholiba, Jeová, Naʼi Ukun-Naʼin Boot Liu, dehan nuneʼe: ‘Haʼu sei book ó-nia doben sira+ neʼebé uluk kaan ó, neʼebé ó hakribi no hasees an ona, no haʼu sei lori sira atu kontra ó husi ó-nia sorin-sorin.+ 23 Haʼu sei lori ema Babilónia nia oan-mane sira+ no ema Kaldeia hotu,+ hamutuk ho mane sira husi Pekod,+ Soa no Koa, no mós ema Asíria nia oan-mane hotu. Ema sira-neʼe hotu mak mane joven neʼebé isin kapás, governadór no administradór sira, funu-naʼin no ema importante, sira hotu saʼe kuda. 24 Sira sei ataka ó ho kuda-karreta funu nian barak no ho tropa neʼebé barak tebes, neʼebé kaer eskudu boot, eskudu kiʼik,* no taka kapasete. Sira sei forma haleʼu ó, no haʼu sei fó lisensa ba sira atu tesi-lia, no sira sei tesi-lia ba ó tuir sira-nia hakarak.+ 25 Haʼu sei hatudu sai haʼu-nia laran-nakali hasoru ó, no sira sei halo aat ba ó ho hirus. Sira sei tesi tiha ó-nia inus no tilun, no ó-nia ema restu sei mate ho surik. Sira sei lori tiha ó-nia oan-mane no oan-feto sira, no sunu ó-nia ema restu.+ 26 Sira sei kolu tiha ó-nia roupa+ no hadau ó-nia sasán murak sira.+ 27 Haʼu sei hapara ó-nia hahalok foʼer no hahalok nuʼudar feto-aat,+ neʼebé ó komesa halo iha rai-Ejitu.+ Ó sei la hateke tan ba sira, no la hanoin-hetan tan rai-Ejitu.’
28 “Tanba Jeová, Naʼi Ukun-Naʼin Boot Liu, dehan nuneʼe: ‘Agora haʼu atu entrega ó ba ema sira neʼebé ó odi, sira neʼebé ó hakribi no laʼo sees ona.+ 29 Sira sei odi ó no halo aat ba ó no foti tiha buat hotu neʼebé ó hetan ho serbisu makaʼas+ no husik ó isin-tanan no molik. Ema sei haree ó-nia isin-tanan, sira sei haree ó-nia hahalok neʼebé la iha morál, hahalok foʼer, no ó-nia hahalok nuʼudar feto-aat.+ 30 Buat sira-neʼe sei akontese ba ó tanba ó duni tuir ema husi nasaun sira hanesan feto-aat,+ tanba ó hafoʼer ó-nia an ho sira-nia estátua sira neʼebé haʼu hakribi.*+ 31 Ó halo tuir ó-nia biin nia hahalok,+ no haʼu sei entrega ninia kopu ba ó-nia liman.’+
32 “Jeová, Naʼi Ukun-Naʼin Boot Liu, dehan nuneʼe:
‘Ó sei hemu tua husi ó-nia biin nia kopu neʼebé boot no naruk,+
Kopu neʼe nakonu ho liafuan goza, entaun ema sei hamnasa no goza ó.+
33 Ó sei hemu husi ó-nia biin Samaria nia kopu toʼo hotu,
Ó sei lanu todan no sai triste tebes,
Ó sei sai buat neʼebé halo ema taʼuk no sei rahun.
34 Ó tenke hemu husi kopu neʼe toʼo sai mamuk.+ Kopu neʼe sei rahun no ó sei nata kopu neʼe nia pedasuk neʼebé halo husi rai-mean.
Tuirmai ó sei lees sai tiha ó-nia susun.
“Tanba haʼu rasik mak fó sai liafuan sira-neʼe”, Jeová, Naʼi Ukun-Naʼin Boot Liu, mak dehan.’
35 “Jeová, Naʼi Ukun-Naʼin Boot Liu, dehan nuneʼe: ‘Tanba ó haluha ona haʼu no la hatudu respeitu ba haʼu,+ ó sei lori todan ba ó-nia hahalok foʼer no ó-nia hahalok nuʼudar feto-aat.’”
36 Tuirmai Jeová dehan ba haʼu: “Oan-mane husi ema, ó sei prontu atu fó sai haʼu-nia desizaun ba Ohola no Oholiba,+ no hatudu sai sira-nia hahalok foʼer sira ka lae? 37 Sira halo ona adultériu,*+ no sira oho ema. Sira halo adultériu hodi adora estátua sira neʼebé haʼu hakribi,* maibé laʼós neʼe deʼit, sira mós hasaʼe sira-nia oan-mane rasik neʼebé mós nuʼudar haʼu-nia oan, hodi sunu iha ahi* nuʼudar sakrifísiu* ba sira-nia estátua sira.+ 38 Laʼós neʼe deʼit, sira mós halo buat tuirmai neʼe hodi kontra haʼu: Sira hafoʼer haʼu-nia fatin sagradu iha loron neʼebá, no hafoʼer haʼu-nia Sábadu. 39 Bainhira sira oho tiha sira-nia oan hodi hasaʼe nuʼudar sakrifísiu ba sira-nia estátua sira neʼebé haʼu hakribi,*+ sira mós tama ba haʼu-nia fatin sagradu atu hafoʼer fatin neʼe+ iha loron neʼe duni. Neʼe mak buat neʼebé sira halo iha haʼu-nia uma rasik. 40 Liután neʼe, sira haruka ema lori mensajen atu bolu mane sira mai husi fatin dook.+ Bainhira mane sira-neʼe mai daudaun, ó* hariis, pinta matan, no hafurak an ho sasán murak oioin.+ 41 No ó tuur iha kadeira kmanek+ no iha meza ida iha ó-nia oin.+ Ó tau haʼu-nia insensu+ no mina iha meza neʼe nia leten.+ 42 Ema rona lian husi mane barak neʼebé mai atu buka haksolok. Ema lori sira mai fatin neʼe hamutuk ho lanu-teen sira husi rai-fuik. Sira tau kelu iha feto sira-neʼe nia liman no tau koroa furak iha sira-nia ulun.
43 “Tuirmai haʼu koʼalia kona-ba feto neʼebé sai kole ona tanba halo sala seksuál,* hodi dehan: ‘Agora nia sei halo nafatin hahalok nuʼudar feto-aat.’ 44 Nuneʼe sira kontinua bá hasoru nia, hanesan ema neʼebé bá hasoru feto-aat. Iha dalan hanesan neʼe mak sira bá hasoru Ohola no Oholiba, feto sira neʼebé halo hahalok foʼer. 45 Maibé mane laran-loos sira sei fó kastigu ba feto neʼebé halo sala seksuál*+ no oho ema,+ tanba sira mak feen neʼebé halo sala seksuál,* no sira mak ohodór.+
46 “Jeová, Naʼi Ukun-Naʼin Boot Liu, dehan nuneʼe: ‘Haʼu sei lori tropa hodi kontra sira atu halo sira sai buat neʼebé halo ema taʼuk no ema sei hadau sira-nia sasán.+ 47 Tropa sei tuda sira ho fatuk+ no taa sira ho surik. Tropa sei oho sira-nia oan-mane no oan-feto+ no sunu sira-nia uma.+ 48 Haʼu sei hapara hahalok foʼer iha rai neʼe, no feto hotu sei hatene kona-ba neʼe no la halo tuir imi-nia hahalok foʼer.+ 49 Tropa sira sei kastigu imi hodi imi lori todan ba imi-nia hahalok foʼer no sala neʼebé imi halo ho estátua sira neʼebé haʼu hakribi.* Nuneʼe imi sei hatene duni katak haʼu mak Jeová, Naʼi Ukun-Naʼin Boot Liu.’”+