Ezequiel

41 Tuirmai nia lori haʼu ba Fatin Santu,* no nia sukat riin sira iha sorin-sorin. Riin iha sorin ida luan kóvado* neen no riin ida iha sorin seluk luan kóvado neen. 2 Fatin tama nian luan kóvado sanulu no didin sorin iha fatin tama nian mahar kóvado lima iha sorin ida no kóvado lima iha sorin seluk. Nia sukat fatin neʼe, nia naruk mak kóvado 40 no luan kóvado 20.

3 Tuirmai nia tama ba laran* no sukat riin sira iha sorin-sorin ba fatin tama nian, no riin sira-neʼe mahar kóvado rua, no fatin tama nian luan kóvado neen. Didin sorin iha fatin tama nian luan kóvado hitu. 4 Tuirmai nia sukat kuartu neʼebé hateke ba Fatin Santu, no neʼe naruk kóvado 20 no luan kóvado 20.+ No nia dehan ba haʼu: “Neʼe mak Fatin Santu Liu Hotu.”+

5 Tuirmai nia sukat templu nia didin, no neʼe mahar kóvado neen. Kuartu sira neʼebé haleʼu templu luan kóvado haat.+ 6 Kuartu iha templu sorin mak andár tolu, no andár ida-idak iha kuartu 30. Kuartu sira-neʼe sadere deʼit ba templu nia didin, nuneʼe la presiza halo kuak iha didin.*+ 7 Kuartu sira iha leten mak luan liu kuartu sira iha kraik. No iha templu nia sorin-sorin iha eskada ho modelu nakdulas husi andár primeiru ba andár segundu no ba andár terseiru.+

8 Haʼu haree buat ruma neʼebé hanesan plataforma haleʼu templu neʼe. Kuartu sira-nia fundasaun aas ai-loos sukat ida, neʼe katak kóvado neen. 9 Didin liʼur husi kuartu sira-neʼe mahar kóvado lima. No iha mós fatin mamuk* iha liʼur iha kuartu sira neʼebé mak parte ba templu.

10 Entre templu no sala han-fatin* sira+ iha área ida ho luan kóvado 20 iha sorin-sorin. 11 Iha parte norte, iha odamatan ida atu tama ba kuartu sira iha templu sorin no ba fatin mamuk, no mós iha odamatan ida iha parte súl. No fatin mamuk hotu neʼebé haleʼu templu, luan kóvado lima.

12 Iha uma boot ida iha parte oeste neʼebé hateke ba área mamuk, no uma neʼe nia luan kóvado 70 no naruk kóvado 90. Uma nia didin neʼebé haleʼu mahar kóvado lima.

13 Nia sukat templu, no neʼe naruk kóvado 100. Área mamuk, no uma boot neʼe,* no ninia didin sira mós naruk hamutuk kóvado 100. 14 Templu nia oin neʼebé hateke ba parte leste no mós área mamuk, nia luan kóvado 100.

15 Nia sukat uma boot neʼebé hateke ba área mamuk iha kotuk, hamutuk ho ninia varanda sira iha sorin-sorin, no neʼe naruk kóvado 100.

Nia mós sukat Fatin Santu, Fatin Santu Liu Hotu,+ no varanda sira neʼebé hateke ba pátiu,* 16 no nia mós sukat área atu tama, sukat janela sira neʼebé ninia arus boot iha laran no kiʼik iha liʼur,+ no sukat varanda sira neʼebé iha área tolu neʼe. Besik área atu tama, iha didin neʼebé halo ho ai-kabelak+ husi rai toʼo ninia janela sira, no janela sira-neʼe taka ho ai-kabelak. 17 Nia sukat área atu tama nia parte leten, sukat templu nia laran, templu nia liʼur no didin hotu neʼebé haleʼu. 18 No iha mós dezeñu kerubín+ no dezeñu ai-palmeira+ neʼebé bahat ona. Dezeñu ida-idak iha kerubín rua no ai-palmeira ida iha sira-nia klaran, no kerubín ida-idak iha oin rua. 19 Kerubín nia oin neʼebé hanesan ema hateke ba ai-palmeira iha sorin ida, no oin hanesan leaun hateke ba ai-palmeira iha sorin seluk.+ Dezeñu sira-neʼe bahat haleʼu templu tomak. 20 Dezeñu kerubín no dezeñu ai-palmeira mak bahat iha fatin sagradu nia didin lolon sira husi rai toʼo área atu tama nia leten.

21 Fatin sagradu nia odamatan riin* mak kuadradu.+ Iha fatin santu* nia oin iha buat ruma hanesan 22 altár husi ai+ neʼebé aas kóvado tolu no luan kóvado rua. Altár neʼe nia ain sira iha ninia sikun. Altár nia laran* no sorin sira halo husi ai. Tuirmai nia dehan ba haʼu: “Neʼe mak meza neʼebé iha Jeová nia oin.”+

23 Fatin Santu no Fatin Santu Liu Hotu iha odamatan tahan rua.+ 24 Odamatan sira iha tahan rua neʼebé lulun hodi bele loke no taka; odamatan tahan rua ba odamatan ida-idak. 25 Fatin sagradu nia odamatan sira-neʼe iha dezeñu kerubín no dezeñu ai-palmeira neʼebé bahat ona hanesan ho dezeñu iha ninia didin lolon sira.+ Iha liʼur, iha varanda nia oin, iha mós tatiis neʼebé halo husi ai. 26 Iha mós janela sira neʼebé ninia arus boot iha laran no kiʼik iha liʼur,+ no iha dezeñu ai-palmeira iha varanda nia sorin-sorin, no mós iha templu nia kuartu sorin no iha tatiis okos.