Ezequiel

42 Tuirmai nia lori haʼu ba pátiu* boot iha parte norte.+ No nia lori haʼu ba uma neʼebé iha sala han-fatin sira. Uma neʼe besik área mamuk,+ iha uma boot nia parte norte.+ 2 Iha fatin atu tama ba uma neʼe iha parte norte, no uma neʼe naruk kóvado* 100, no luan kóvado 50. 3 Uma neʼe harii entre pátiu boot nia laʼo-fatin no pátiu kiʼik nia área ida neʼebé ho luan kóvado 20.+ Uma neʼe iha andár tolu ho varanda neʼebé hateke malu. 4 Iha sala han-fatin* sira-nia klaran iha laʼo-fatin+ ho luan kóvado 10 no naruk kóvado 100,* no fatin atu tama mak husi parte norte. 5 Sala han-fatin sira iha andár leten mak kiʼik liu fali sala han-fatin sira iha klaran no okos, tanba varanda mak okupa fatin barak liu. 6 Tanba uma sira-neʼe iha andár tolu, maibé uma neʼe la iha riin hanesan ho pátiu sira-nia riin. Tan neʼe mak ladún iha fatin barak iha andár leten, no sala sira iha andár leten kiʼik liu fali sala sira iha andár klaran no okos.

7 Moru liʼur husi fatuk neʼebé besik sala han-fatin sira, naruk kóvado 50. Moru neʼe mós besik pátiu boot no hateke malu ho sala han-fatin sira seluk. 8 Tanba sala han-fatin sira neʼebé besik pátiu boot, naruk kóvado 50, maibé sala han-fatin sira neʼebé hateke ba fatin sagradu, naruk kóvado 100. 9 Iha parte leste iha mós fatin atu tama ba sala han-fatin sira-neʼe liuhusi pátiu boot.

10 Iha pátiu nia moru laran* iha parte leste, iha mós sala han-fatin sira, besik área mamuk no uma boot.+ 11 Iha mós laʼo-fatin iha sala sira-neʼe nia oin hanesan laʼo-fatin iha sala han-fatin sira iha parte norte.+ Sala sira-neʼe nia naruk no luan mak hanesan deʼit; sala sira-neʼe nia dalan atu sai no nia modelu mak hanesan deʼit. Fatin atu tama ba sala sira-neʼe 12 hanesan deʼit ho fatin atu tama ba sala han-fatin sira neʼebé iha parte súl. Iha neʼebá iha fatin atu ema tama ba laʼo-fatin neʼe, fatin neʼe besik moru fatuk nian iha parte leste.+

13 Tuirmai nia dehan ba haʼu: “Sala han-fatin sira iha parte norte no iha parte súl neʼebé besik área mamuk+ mak sala han-fatin sira neʼebé santu. Amlulik sira neʼebé halo serbisu ba Jeová uza fatin neʼe atu han sakrifísiu sira neʼebé santu liu hotu.+ Iha neʼebá mak sira tau sakrifísiu sira neʼebé santu liu hotu, sakrifísiu trigu* nian, sakrifísiu sala nian, no sakrifísiu taka sala nian, tanba fatin neʼe mak fatin santu.+ 14 Bainhira amlulik sira tama, sira labele sai husi fatin santu hodi bá pátiu boot se sira seidauk hasai sira-nia roupa neʼebé sira uza atu halo serbisu,+ tanba roupa sira-neʼe mak santu. Sira tenke hatais fali roupa seluk hodi bele hakbesik ba área neʼebé povu bele tama.”

15 Bainhira nia sukat hotu templu* nia área laran, nia lori haʼu sai liuhusi portaun neʼebé hateke ba parte leste,+ no nia sukat área neʼe tomak.

16 Nia sukat parte leste hodi uza ai-loos sukat nian,* no parte neʼe nia naruk mak ai-loos sukat 500 husi sorin ida toʼo sorin seluk.

17 Nia sukat parte norte hodi uza ai-loos sukat nian, no parte neʼe nia naruk mak ai-loos sukat 500.

18 Nia sukat parte súl hodi uza ai-loos sukat nian, no parte neʼe nia naruk mak ai-loos sukat 500.

19 Nia bá parte oeste. Nia sukat parte neʼe hodi uza ai-loos sukat nian, no parte neʼe nia naruk mak ai-loos sukat 500.

20 Nia sukat sorin haat hotu. Área neʼe iha moru neʼebé haleʼu ninia sorin haat,+ no iha sorin-sorin moru neʼe nia naruk mak ai-loos sukat 500,+ atu haketak área neʼebé santu ho área neʼebé la santu.*+