Oinsá ho Ita? Ita mós sente hanesan ho ema naʼin-tolu neʼe ka lae? Sin, ema barak sente hanesan neʼe duni. Maibé, hodi hatene katak Bíblia bele ajuda Ita atu haburas hahalok diʼak no iha moris kontente, neʼe sei book Ita atu lee Bíblia, loos ka lae? No se Ita mós hatene dalan diʼak balu kona-ba oinsá atu lee Bíblia, Ita bele sente laran-manas atu komesa, loos ka lae?

Agora, mai ita haree komentáriu husi ema balu neʼebé lee Bíblia no hetan ona benefísiu boot.

Mane ida naran Ezekiel, neʼebé tinan 20 ona, hatete: “Uluk haʼu-nia moris la iha objetivu, hanesan deʼit ho ema neʼebé lori karreta maibé la hatene atu bá neʼebé. Maibé lee Bíblia ajuda haʼu atu iha moris neʼebé iha objetivu. Bíblia iha konsellu diʼak barak neʼebé bele ajuda haʼu-nia moris loron-loron.”

Feto ida naran Frieda, neʼebé maizumenus tinan 25, esplika: “Uluk haʼu hirus-teen. Maibé depois haʼu komesa lee Bíblia, haʼu aprende oinsá atu kontrola an. Neʼe ajuda haʼu atu hatudu hahalok diʼak, no agora haʼu iha kolega barak.”

Feto ida tan naran Eunice, neʼebé tinan 50 resin hatete: “Bíblia ajuda tebes haʼu atu hadiʼa haʼu-nia hahalok no toman sira neʼebé ladún diʼak.”

Loos duni, ema rihun ba rihun aprende ona husi sira rasik nia esperiénsia, katak Bíblia bele ajuda ita atu iha moris neʼebé kontente liu. (Isaías [Yesaya] 48:17, 18) Porezemplu, Bíblia bele ajuda ita atu (1) halo desizaun neʼebé diʼak, (2) hetan belun neʼebé diʼak, (3) tahan hasoru susar, no mós (4) aprende lia-loos kona-ba Maromak. Bíblia nia konsellu hotu mai husi Maromak, no se ita halo tuir, ita sei iha moris neʼebé susesu.

Tan neʼe, importante mak atu hahú lee Bíblia. Maibé oinsá mak ita bele lee Bíblia iha dalan neʼebé lori ksolok ba ita?

Saida deʼit mak Ita presiza halo atu tempu lee Bíblia nian bele lori ksolok no benefísiu? Haree toʼok sujestaun lima tuirmai neʼe.

Buka fatin neʼebé diʼak. Buka fatin neʼebé hakmatek no kalma. Hakaʼas an atu la husik buat ida atrapalla Ita hodi Ita bele tau atensaun ba buat neʼebé Ita lee. Diʼak mós atu lee iha fatin neʼebé iha naroman no anin neʼebé fresku.

Prepara Ita-nia neon. Bíblia mak karta husi ita-nia Aman iha lalehan, tan neʼe ita presiza hatudu hahalok hanesan labarik ida neʼebé prontu atu aprende husi ninia aman. Se Ita hanoin katak informasaun husi Bíblia ladún iha folin, koko toʼok atu hadiʼa Ita-nia hanoin no sai prontu atu simu hanorin husi Maromak.—Salmo (Mazmur) 25:4.

Halo orasaun antes atu lee. Bíblia mak livru neʼebé fó sai Maromak nia hanoin, tan neʼe ita presiza Maromak nia ajuda atu komprende. Maromak promete katak nia sei “fó duni espíritu santu ba sira neʼebé husu ba nia”. (Lucas 11:13) Espíritu santu bele ajuda ita atu komprende Maromak nia hanoin, no ikusmai ita sei hatene ho loloos “buat kleʼan husi Maromak”.—1 Korinto 2:10.

Lee atu komprende. Keta lee liu deʼit. Hanoin didiʼak kona-ba eskritura sira neʼebé Ita lee. Porezemplu, kuandu Ita lee istória kona-ba ema ida, husu Ita-nia an: ‘Ema neʼe hatudu hahalok saida? Oinsá mak haʼu bele uza ida-neʼe iha haʼu-nia moris rasik?’

Halo planu kona-ba buat neʼebé Ita hakarak atu aprende. Atu bele hetan benefísiu husi lee Bíblia, Ita bele halo planu, hanesan: ‘Haʼu hakarak hatene liután kona-ba Maromak.’ ‘Haʼu hakarak sai ema neʼebé iha hahalok diʼak, ka sai laʼen (ka feen) neʼebé diʼak liután.’ Tuirmai, hili parte husi Bíblia neʼebé Ita bele lee atu ajuda Ita kumpre Ita-nia planu.a

Sujestaun lima neʼe sei ajuda ita atu komesa lee Bíblia. Maibé, hodi halo saida deʼit mak ita bele haburas ita-nia hakarak atu lee Bíblia? Haree toʼok sujestaun balu tan husi informasaun tuirmai.

Lee Bíblia sei halo Ita sente oinsá? Laran-manas, ka baruk? Mai ita buka-hatene saida deʼit mak bele ajuda ita sente laran-manas liután atu lee Bíblia.

Hili tradusaun Bíblia neʼebé diʼak. Se Ita lee tradusaun Bíblia neʼebé uza liafuan barak neʼebé susar atu komprende, neʼe bele halo Ita sente baruk. Tan neʼe, hili tradusaun Bíblia neʼebé fasil ba Ita atu komprende no bele kona loos Ita-nia laran. Maibé Ita mós presiza hili tradusaun Bíblia neʼebé hatoʼo liafuan orijinál ho loloos.a

Uza teknolojia. Ohin loron, ita bele lee Bíblia iha dalan oioin. Porezemplu, ita bele download ka lee Bíblia online iha ita-nia komputadór, tablet, ka telemovel. Hodi lee Bíblia iha dalan hanesan neʼe, ita bele kompara eskritura ida ho eskritura seluk neʼebé konta kona-ba istória neʼebé hanesan, ka kompara tradusaun oioin. Iha língua balu, ita mós bele rona gravasaun lee Bíblia nian. Ema barak rona ida-neʼe bainhira sira saʼe bís ka komboiu, halo serbisu uma-laran, ka halo atividade seluk tan. Ita mós hakarak koko ka lae?

Uza informasaun oioin atu komprende Bíblia. Porezemplu, hodi loke mapa kona-ba rai sira neʼebé temi iha Bíblia, neʼe bele ajuda ita atu hatene kona-ba fatin neʼebé istória ida-idak akontese. Informasaun oioin husi Livru Haklaken no sítiu jw.org mós bele ajuda ita atu komprende liafuan ka eskritura sira husi Bíblia.

Troka dalan neʼebé Ita lee Bíblia. Se Ita sente susar demais atu lee Bíblia husi Gênesis (Kejadian) toʼo Apokalipse, koko toʼok atu lee uluk parte neʼebé Ita gosta. Porezemplu, se Ita hakarak hatene kona-ba ema ruma husi Bíblia, karik Ita bele lee uluk eskritura sira kona-ba ema neʼe. Haree toʼok kaixa “Koñese didiʼak fiar-naʼin sira neʼebé temi iha Bíblia laran” iha pájina 5. Ita mós bele lee Bíblia tuir tópiku ka akontesimentu sira. Ita hakarak lee Bíblia iha dalan ida-neʼebé?

Bíblia la hanesan ho livru sira seluk, tanba livru neʼe fó sai matadalan husi ita-nia Kriadór. (2 Timóteo 3:16) Bíblia rasik dehan: “Maromak nia liafuan mak moris no iha kbiit boot.” (Ebreu 4:12) Sin, Bíblia iha forsa atu hadiʼa ita-nia moris iha dalan rua. Dalan primeiru mak hodi fó matadalan ba ita-nia moris loroloron nian, no dalan segundu mak hodi ajuda ita atu koñese didiʼak Maromak no ninia promesa ba futuru.—1 Timóteo 4:8; Tiago 4:8.

Hadiʼa Ita-nia moris agora nian. Bíblia bele ajuda Ita atu halaʼo moris ho kontente liután. Porezemplu, Bíblia nia matadalan sira bele ajuda Ita atu iha:

• Relasaun diʼak ho família no ema seluk.—Éfeso 4:31, 32; 5:22, 25, 28, 33.

• Saúde diʼak, inklui mós iha dalan mentál.—Salmo (Mazmur) 37:8; Provérbios (Amsal) 17:22.

• Morál neʼebé diʼak.—1 Korinto 6:9, 10.

• Hanoin neʼebé loos kona-ba osan.—Provérbios (Amsal) 10:4; 28:19; Éfeso 4:28.a

Porezemplu, kaben-naʼin ida iha rai-Filipinas, naran Vincent ho Annalou, hetan benefísiu boot husi Bíblia nia matadalan. Bainhira sira foin kaben, sira sente susar atu adapta an ho situasaun foun no la toman atu koʼalia nakloke ba malu. Maibé depois sira komesa lee Bíblia no halo tuir ninia matadalan sira, rezultadu saida mak sira hetan? Vincent hatete: “Buat neʼebé haʼu lee husi Bíblia ajuda haʼu atu hasoru susar oioin iha ami-nia moris kaben nian ho domin. Bíblia nia matadalan ajuda duni ami atu iha moris neʼebé kontente.” Annalou mós dehan: “Istória sira husi Bíblia mós ajuda ami. Agora haʼu sente kontente ho ami-nia moris kaben nian.”

Koñese didiʼak Maromak. Vincent mós hatutan tan: “Lee Bíblia halo haʼu sente besik liu ba Maromak Jeová.” Loos duni, Bíblia bele ajuda ita atu koñese didiʼak Maromak, no hetan matadalan oioin husi Nia. Ikusmai, ita bele sai belun diʼak ho Maromak. Ita mós bele hatene kona-ba buat oioin neʼebé Maromak promete ba ita-nia futuru, katak ita sei hetan “moris neʼebé loloos” ba nafatin. (1 Timóteo 6:19) Livru seluk la bele ajuda ita hanesan neʼe, loos ka lae?

Se Ita-Boot hatoman an hodi lee Bíblia no kontinua, Ita rasik mós bele hetan benefísiu sira-neʼe. Maibé kuandu Ita lee Bíblia, karik Ita sei iha pergunta barak. Tan neʼe, diʼak atu hanoin-hetan ezemplu husi ema-boot Etiópia neʼebé moris iha tinan 2.000 liubá. Nia iha pergunta barak kona-ba Bíblia, no bainhira Jesus nia dixípulu ida naran Filipe husu nia se nia komprende buat neʼebé nia lee, nia hatán: “Oinsá mak haʼu bele hatene se la iha ema ida esplika mai haʼu?”b Depois, nia simu ajuda husi Filipe ho laran-manas. (Apóstolu 8:30, 31, 34) Se Ita mós hakarak hatene didiʼak Bíblia, Ita bele husu ajuda hodi prenxe formuláriu online iha www.jw.org/tdt ka hodi hakerek karta ba diresaun ida husi lista iha pájina 2. Ita mós bele hakbesik ba Testemuña ba Jeová ida, ka bele mós bá Reuniaun-Fatin husi Testemuña ba Jeová iha Ita-nia área. Entaun, koko toʼok atu komesa lee Bíblia ohin, no hetan benefísiu boot ba Ita-nia moris.