Testemuña ba Jeová sobu família ka hametin moris família nian?

Nuʼudar Testemuña ba Jeová, ami hakaʼas an atu halo moris família nian hotu kontente, maski ami-nia família rasik ka ema seluk nia moris família nian. Ami respeitu Maromak nuʼudar hun ba moris família nian. (Gênesis [Kejadian] 2:​21-​24; Éfeso 3:​14, 15) Liuhusi Bíblia, Nia hanorin matadalan sira neʼebé ajuda ona ema iha mundu tomak atu moris kontente no hametin sira-nia moris kaben nian.

Testemuña ba Jeová ajuda ema hametin moris família nian

Ami hakaʼas an moris tuir matadalan husi Bíblia, atu ami bele sai la’en, feen, no inan-aman neʼebé diʼak. (Provérbios [Amsal] 31:10-​31; Éfeso 5:22–​6:4; 1 Timóteo 5:8) Matadalan sira iha Bíblia bele ajuda mós feen-laʼen neʼebé relijiaun la hanesan atubele moris kontente. (1 Pedro 3:​1, 2) Haree toʼok liafuan husi kaben-naʼin sira neʼebé sira-nia kaben sai Testemuña ba Jeová ida:

• “Durante ami harii umakain ba tinan neen nia laran, ami sempre istori malu no la sente hakmatek. Maibé, bainhira haʼu-nia feen Ivete sai Testemuña ba Jeová, nia sai ema neʼebé hatudu domin no pasiénsia. Ninia hahalok furak sira-neʼe hametin fali ami-nia moris kaben nian.”​—Clauir, husi rai-Brazíl, neʼebé laʼós Testemuña ba Jeová.

• “Haʼu la gosta bainhira haʼu-nia laʼen Chansa komesa estuda Bíblia ho Testemuña ba Jeová, tanba haʼu hanoin katak sira mak grupu neʼebé gosta sobu moris família nian. Maibé loloos Bíblia ajuda duni ami-nia moris kaben nian.”​—Agness, husi rai-Zámbia, neʼebé laʼós Testemuña ba Jeová.

Bainhira ami Testemuña ba Jeová haklaken ba ema, ami esplika katak matadalan sira iha Bíblia bele ajuda ema

• Oinsá atu hili didiʼak ema neʼebé ita atu kaben

• Oinsá bele halaʼo moris nuʼudar feen-laʼen bainhira foin kaben

• Oinsá bele haree malu diʼak nafatin ho banin sira

• Oinsá bele uza osan ho didiʼak

• Oinsá atu la istori malu beibeik

• Oinsá atu fó perdua ba malu

• Oinsá atu hanorin oan sira

Troka relijiaun neʼe hamosu problema ba moris kaben nian ka lae?

Dala ruma ida-neʼe bele akontese. Porezemplu, relatóriu ida neʼebé fó sai husi kompañia Sofres iha tinan 1998, haktuir katak kaben-naʼin ida husi kaben-naʼin 20 neʼebé feen ka laʼen deʼit mak sai Testemuña, hasoru problema boot iha sira-nia moris kaben bainhira sai Testemuña ba Jeová.

Jesus fó-hatene nanis katak ema neʼebé hakarak tuir nia, dala ruma bele hasoru problema husi família. (Mateus 10:32-​36) Tuir istória-naʼin ida naran Will Durant hatete, iha tempu Governu Roma nia ukun, “ema duun relijiaun kristaun nuʼudar grupu neʼebé sobu moris família nian”.a Ohin loron mós ema balu hanoin hanesan neʼe kona-ba Testemuña ba Jeová. Maibé, kaben-naʼin neʼebé sai Testemuña ba Jeová hamosu duni problema iha família ka lae?

Bainhira ema duun katak Testemuña ba Jeová mak sobu moris família nian, Tribunál Europeu ba Direitus Umanus hatete katak família neʼebé laʼós Testemuña mak baibain hamosu problema, tanba lakohi “simu no hatudu respeitu ba ninia maluk nia liberdade atu halaʼo atividade relijiaun nian”. Tribunál neʼe mós hatutan tan, “situasaun neʼe akontese beibeik ba kaben-naʼin neʼebé fiar la hanesan, inklui mós kaben-naʼin neʼebé sai Testemuña ba Jeová”.b Maski ema kontra ami-nia fiar, ami Testemuña ba Jeová hakaʼas an nafatin atu halo tuir matadalan iha Bíblia neʼebé hatete: “Keta selu aat ho aat ba ema. . . . Hakaʼas imi-nia an atu nuneʼe, se bele karik, imi bele moris iha dame ho ema hotu.”​—Roma 12:17, 18.

Razaun tansá Testemuña ba Jeová tenke kaben deʼit ho ema neʼebé fiar hanesan ho sira

Testemuña sira halo tuir matadalan iha Bíblia neʼebé haruka ema kristaun atu kaben deʼit “iha Naʼi”, neʼe katak kaben deʼit ho ema neʼebé fiar hanesan. (1 Korinto 7:​39) Bíblia nia matadalan neʼe mós lori buat diʼak ba ema. Porezemplu jornál ida (Journal of Marriage and Family) hatete katak “feen-la’en neʼebé iha relijiaun no fiar hanesan” baibain sira-nia moris kontente liu.c

Maski nuneʼe, Testemuña ba Jeová sira la hanorin ema atu fahe malu ho sira-nia kaben neʼebé fiar lahanesan. Bíblia hatete: “Se maun-alin ida iha feen neʼebé laʼós fiar-naʼin, maibé nia feen kontente atu nafatin moris ho nia, nia labele husik ninia feen; no se feto ida iha laʼen neʼebé laʼós fiar-naʼin, maibé nia laʼen kontente atu nafatin moris ho nia, nia labele husik nia laʼen.” (1 Korinto 7:​12, 13) Testemuña ba Jeová halo tuir matadalan neʼe.