“Sira hakarak haʼu atu buka-hatene saida mak Bíblia hanorin”

HAʼU-NIA MORIS ULUK NIAN:

Haʼu moris iha sidade Santo Domingo, Repúblika Dominikana. Haʼu mak oan ikus husi oan naʼin-haat. Haʼu-nia inan-aman mak ema neʼebé iha edukasaun diʼak, tan neʼe sira hakarak atu haboot ami iha komunidade neʼebé diʼak no laran-moos. Tinan haat antes haʼu moris, haʼu-nia inan-aman hasoru misionáriu husi igreja Mormon. Sira admira ho dalan neʼebé mane joven sira-neʼe hatais, hadiʼa an no hatudu respeitu. Tan neʼe, haʼu-nia inan-aman deside katak ami-nia família sei sai família primeiru iha rai neʼe atu tuir Igreja de Jesus Cristo dos Santos dos Ultimos Dias, ka naran seluk mak igreja Mormon.

Bainhira haʼu boot, haʼu kontente ho atividade sira iha igreja no respeitu igreja Mormon tanba tau fokus ba moris família nian no morál neʼebé diʼak. Haʼu kontente atu sai membru ba igreja Mormon no haʼu-nia planu mak atu sai nuʼudar misionáriu.

Bainhira haʼu tinan 18, haʼu-nia família muda ba Estadus Unidus atu haʼu bele tuir universidade. Tinan ida liutiha, haʼu-nia tiu no tia neʼebé mak Testemuña ba Jeová, mai vizita ami iha Florida. Sira konvida ami tuir reuniaun boot kona-ba Bíblia hamutuk ho sira. Haʼu hakfodak haree ema hotu loke eskritura no hakerek nota. Entaun haʼu husu lapizeira no surat-tahan no komesa hakerek nota.

Depois reuniaun boot hotu, haʼu-nia tiu no tia dehan katak tanba haʼu hakarak atu sai misionáriu ida, sira bele ajuda haʼu atu aprende kona-ba Bíblia. Haʼu hanoin neʼe mak ideia neʼebé diʼak tanba iha tempu neʼebá, haʼu hatene buat barak kona-ba Livru Mormon nian maibé ladún hatene kona-ba Bíblia.

OINSÁ BÍBLIA TROKA HAʼU-NIA MORIS:

Bainhira ami koʼalia kona-ba Bíblia liuhusi telefone, haʼu-nia tiu no tia sempre anima haʼu atu kompara haʼu-nia fiar ho buat neʼebé Bíblia hanorin. Sira hakarak haʼu atu buka-hatene saida mak Bíblia hanorin.

Iha buat barak kona-ba Mormon nia fiar neʼebé haʼu simu. Maibé haʼu la hatene ho loloos se hanorin sira-neʼe mak hanesan ho buat neʼebé Bíblia hanorin ka lae. Haʼu-nia tia haruka ba haʼu Matan-moris bá! 8 Novembru 1995 husi Testemuña ba Jeová. Revista neʼe temi informasaun kona-ba igreja Mormon nia fiar. Haʼu hakfodak katak haʼu la hatene kona-ba igreja Mormon nia hanorin barak. Neʼe book haʼu atu lee igreja Mormon nia website hodi haree se buat neʼebé revista Matan-moris bá! fó sai mak loos ka lae. Revista neʼe mak loos duni, no kuandu haʼu vizita Mormon nia muzeu iha Utah haʼu hatene liután faktu sira.

Haʼu sempre fiar katak Livru Mormon nian no Bíblia apoia malu. Maibé bainhira haʼu komesa lee didiʼak Bíblia, haʼu nota Mormon nia hanorin no Bíblia nia hanorin mak kontra malu.

Haʼu mós la gosta ideolojia nasionalizmu neʼebé igreja Mormon fó sai. Porezemplu, igreja Mormon hanorin katak jardín Eden mak iha Jackson County, Missouri, Estadus Unidus. No ulun-naʼin relijiaun iha igreja Mormon hanorin katak iha futuru Maromak sei ukun mundu tomak liuhusi Estadus Unidus nia governu.

Haʼu hanoin barak kona-ba saida mak sei akontese ba nasaun seluk hanesan nasaun neʼebé haʼu moris bá. Kalan ida, joven ida neʼebé tuir treinamentu atu sai Mormon nia misionáriu telefone haʼu, no haʼu husu nia kona-ba tópiku neʼe. Haʼu husu kona-ba se ninia nasaun funu hasoru nasaun seluk, nia sei funu hasoru ninia maluk Mormon ka lae. Haʼu hakfodak bainhira nia hatán sin! Haʼu buka-hatene liután kona-ba igreja Mormon nia hanorin neʼebé haʼu fiar no mós koʼalia ho ulun-naʼin sira iha igreja Mormon. Sira hatete katak haʼu labele hetan resposta ba haʼu-nia pergunta sira tanba agora neʼe mak mistériu, maibé iha futuru sira sei hatene resposta.

Haʼu laran-kraik ho sira-nia esplikasaun, haʼu analiza haʼu-nia laran no haʼu-nia motivu tanbasá haʼu hakarak atu sai Mormon nia misionáriu. Haʼu rekoñese katak haʼu hakarak sai nuʼudar misionáriu ida, tanba haʼu hakarak ajuda ema seluk. Haʼu mós hakarak sai misionáriu tanba ema seluk respeitu misionáriu sira, no haʼu hakarak ema respeitu haʼu. Maibé haʼu la hatene didiʼak kona-ba Maromak. Maski uluk haʼu loke Bíblia dala barak, maibé haʼu hanoin Bíblia ladún importante. Haʼu la hatene kona-ba Maromak nia hakarak ba rai ka ema.

BUAT DIʼAK NEʼEBÉ HAʼU HETAN:

Bainhira haʼu estuda Bíblia ho Testemuña ba Jeová haʼu aprende kona-ba Maromak nia naran, ema mate nia kondisaun, no oinsá Jesus hola parte atu ajuda kumpre Maromak nia hakarak. Ikusmai, haʼu aprende saida mak Bíblia hanorin no haʼu kontente atu fahe ba ema seluk kona-ba lia-loos neʼebé haʼu aprende. Uluk kedas haʼu fiar katak Maromak iha duni, maibé agora haʼu bele koʼalia ho nia liuhusi orasaun hanesan haʼu-nia Belun diʼak. Haʼu batizmu nuʼudar Testemuña ba Jeová iha 12 Jullu 2004 no fulan neen liutiha haʼu komesa uza haʼu-nia tempu-tomak atu haklaken.

Durante tinan lima, haʼu serbí iha sede-jerál husi Testemuña ba Jeová iha Brooklyn, Novaiorke. Haʼu kontente atu bele ajuda prodús Bíblia no publikasaun seluk neʼebé bele lori benefísiu barak ba ema iha mundu tomak no haʼu kontente nafatin atu ajuda ema aprende kona-ba Maromak.