Saida mak Bíblia hatete kona-ba tau matan ba inan-aman neʼebé idade ona?

Bíblia nia resposta

Oan sira neʼebé boot ona iha responsabilidade importante ida atu tau matan didiʼak ba saida mak sira-nia inan-aman neʼebé idade ona presiza. Bíblia dehan katak oan sira neʼebé boot ona tenke hatudu “sira-nia laran-metin ba Maromak hodi tau matan ba sira-nia umakain rasik. Sira tenke tau matan ba sira-nia inan-aman . . . hanesan selu fali debe, tanba Maromak simu ida-neʼe.” (1 Timóteo 5:4) Kuandu oan sira tau matan sira-nia inan-aman, sira mós halo tuir Bíblia nia ukun-fuan atu hatudu respeitu ba sira-nia inan-aman.—Éfeso 6:2, 3.

Bíblia la fó matadalan espesífiku kona-ba oinsá atu tau matan inan-aman neʼebé idade ona. Maibé, Bíblia fó ezemplu balu kona-ba mane no feto fiar-naʼin sira neʼebé halo ona ida-neʼe. Bíblia mós fó matadalan atu ajuda ema neʼebé iha knaar atu fó ajuda ba inan-aman.

• Iha dalan saida deʼit mak ema iha Bíblia nia tempu tau matan ba sira-nia inan-aman neʼebé idade ona?

• Bíblia nia matadalan saida mak bele ajuda sira neʼebé tau matan ba inan-aman?

• Bíblia dehan katak tenke tau matan ba inan-aman neʼebé idade ona iha uma ka lae?

Iha dalan saida deʼit mak ema iha Bíblia nia tempu tau matan ba sira-nia inan-aman neʼebé idade ona?

Sira halo ida-neʼe iha dalan oioin, tuir situasaun.

• José hela dook husi ninia aman, Jacob neʼebé idade ona. Maibé bainhira José nia situasaun permite, nia arranja atu Jacob hela besik nia. Tuirmai, José fó hela-fatin, ai-han, no proteje ninia aman.—Génesis 45:9-11; 47:11, 12.

• Rute muda ba ninia banin-feto nia rai no serbisu ho badinas atu tau matan ba ninia banin.—Rute 1:16; 2:2, 17, 18, 23.

• Jesus, antes nia mate, nia hili ema ida atu tau matan ba ninia inan, Maria, neʼebé karik sai feto-faluk ona.—João 19:26, 27.a

Bíblia nia matadalan saida mak bele ajuda sira neʼebé tau matan ba inan-aman?

Ema neʼebé tau matan ba inan-aman dala ruma sai kole tebetebes iha dalan emosaun no fíziku. Maibé Bíblia fó prinsípiu sira neʼebé bele ajuda.

• Hatudu respeitu ba inan-aman.

  Saida mak Bíblia hatete: “Hatudu respeitu ba imi-nia inan-aman.”—Éxodo 20:12.

  Oinsá bele aplika prinsípiu neʼe? Ita hatudu respeitu kuandu fó liberdade ba inan-aman atu halo desizaun kona-ba sira-nia moris. Se bele, husik sira atu deside oinsá mak sira hakarak ema atu tau matan sira. Iha tempu hanesan, hatudu respeitu no halo buat neʼebé ita bele halo atu ajuda sira.

• Koko atu komprende no fó perdua.

  Saida mak Bíblia hatete: “Ema nia matenek sei ajuda duni nia atu la sai hirus lalais, no buat furak neʼebé nia halo mak nia la hanoin fali kona-ba ema nia sala.”—Provérbios 19:11.

  Oinsá bele aplika prinsípiu neʼe? Se inan-aman koʼalia liafuan neʼebé hakanek Ita, ka la hafolin buat neʼebé Ita halo, husu Ita-nia an, ‘Saida mak haʼu sente se haʼu iha ninia fatin?’ Bainhira Ita koko atu komprende no fó perdua, neʼe sei halo kalma situasaun.

• Husu ema seluk nia hanoin.

  Saida mak Bíblia hatete: “Planu sira sei la sai loos kuandu ema la koʼalia ba malu, maibé buat hotu sei laʼo ho diʼak kuandu ema barak fó konsellu.”—Provérbios 15:22.

  Oinsá bele aplika prinsípiu neʼe? Halo riset kona-ba oinsá atu tau matan ba inan-aman nia problema saúde nian. Buka-hatene kona-ba opsaun sira neʼebé iha komunidade nia laran atu bele ajuda sira-nia saúde. Koʼalia ho ema seluk neʼebé uluk tau matan ba sira-nia inan-aman. Se Ita iha maun, biin ka alin sira, diʼak atu halo enkontru família nian hodi koʼalia kona-ba inan-aman nia presiza, oinsá atu tau matan sira, no oinsá ita bele fahe responsabilidade.

  

• Hatudu haraik an.

  Saida mak Bíblia hatete: “Matenek sei hamutuk ho ema neʼebé haraik an.”—Provérbios 11:2.

  Oinsá bele aplika prinsípiu neʼe? Rekoñese Ita-nia limitadu. Porezemplu, ema hotu nia tempu no forsa iha limite. Limitadu sira-neʼe bele afeta dalan neʼebé Ita uza atu ajuda inan-aman. Se ita sente susar atu tau matan inan-aman mesak, diʼak atu husu ajuda husi membru iha família laran ka husi profisionál sira neʼebé iha matenek atu ajuda.

• Tau matan an.

  Saida mak Bíblia hatete: “La iha mane ida neʼebé odi ninia isin rasik, maibé nia fó-han no hafolin ninia isin.”—Éfeso 5:29.

  Oinsá bele aplika prinsípiu neʼe? Maski Ita iha responsabilidade atu tau matan Ita-nia inan-aman, Ita mós presiza tau matan Ita-nia an no mós ba Ita-nia família rasik se Ita kaben ona. Ita presiza han hahán neʼebé diʼak. Ita presiza deskansa no toba diʼak. (Eclesiastes 4:6) No dala ruma, Ita mós presiza buka tempu atu halo buat seluk. Se Ita tau matan ba Ita rasik nia emosaun, mentál no fíziku, neʼe bele ajuda Ita atu tau matan ba Ita-nia inan-aman iha dalan neʼebé diʼak liután.

Bíblia dehan katak tenke tau matan ba inan-aman neʼebé idade ona iha uma ka lae?

Bíblia la dehan se oan sira tenke tau matan inan-aman iha uma ka lae. Família balu hili atu inan-aman nafatin hela ho sira iha uma. Maibé, karik tanba situasaun, sira balu ikusmai sei deside atu hatama sira-nia inan-aman ba fatin idozu nian tanba hanoin neʼe mak opsaun diʼak liu. Família bele halo enkontru atu deside saida mak diʼak ba ema hotu iha família laran.—Galásia 6:4, 5.