Informasaun atu uza hamutuk livru Moris Kristaun no Haklaken
© 2023 Watch Tower Bible and Tract Society of Pennsylvania
4-10 MARSU
RIKUSOIN HUSI BÍBLIA | SALMO 16-17
“Jeová, Hun ba buat diʼak hotu neʼebé haʼu simu”
Joven sira, imi bele moris kontente
BUKA BELUN NEʼEBÉ LOOS
11 Lee Salmo 16:3. David hatene oinsá atu hetan belun neʼebé loos. Nia hili belun sira neʼebé hadomi Jeová, no ida-neʼe lori “ksolok boot” ba nia. David bolu ninia belun sira nuʼudar “ema santu sira” tanba sira moris tuir morál neʼebé moos no loos. Ema seluk neʼebé hakerek Salmo mós sente hanesan ho David. Nia hakerek: “Haʼu sai belun ho sira hotu neʼebé hamtaʼuk Ita no ho sira neʼebé halo tuir Ita-nia lei sira.” (Sal 119:63) Hanesan ita aprende ona iha lisaun uluk nian, ita mós bele hetan belun diʼak barak neʼebé hamtaʼuk no halo tuir Jeová. Keta haluha katak ita bele sai belun ho ema neʼebé idade la hanesan.
“Haree Jeová nia laran-diʼak”
David kanta: “Jeová mak haʼu-nia parte, neʼebé haketak tiha ona ba haʼu, no parte husi haʼu-nia kopu. Ita proteje haʼu-nia liman-rohan. Buat neʼebé Ita sukat atu fó ba haʼu nuʼudar liman-rohan mak diʼak.” (Sal 16:5, 6) David kontente ho ninia “parte”, neʼe mak relasaun diʼak ho Jeová no iha oportunidade espesiál atu serbí Maromak. Hanesan ho David, dala ruma ita mós hasoru susar oioin, maibé ita mós simu bensaun espirituál barak! Entaun, mai ita kontente nafatin ho adorasaun neʼebé loos no sempre ‘hateke ho laran-haksolok’ ba Maromak Jeová nia templu espirituál.
w08-E 2/15 p. 3 par. 2-3
Jeová sempre iha Ita-nia oin
2 Ita hotu bele aprende buat barak husi ema neʼebé ita hatene ona husi Bíblia, hanesan Abraão, Sara, Moisés, Rute, David, Ester, apóstolu Paulo, no ema seluk tan. Maibé ita mós bele hetan benefísiu husi ema neʼebé ita ladún koñese iha Bíblia laran. Hodi medita kona-ba istória sira-neʼe bele ajuda ita atu halo tuir liafuan husi livru Salmo, neʼebé dehan: “Jeová sempre iha haʼu-nia oin. Haʼu sei nunka nakdedar tanba nia iha haʼu-nia liman-loos.” (Sal 16:8) Maibé neʼe katak sá?
3 Baibain soldadu ida kaer surik iha liman-loos no kaer eskudu iha liman-karuk, tan neʼe ninia isin parte sorin loos ladún hetan protesaun. Maibé se ninia maluk ida hamriik iha ninia oin parte sorin loos, soldadu neʼe bele hetan protesaun. Se ita nafatin hanoin kona-ba Jeová no halo tuir Ninia hakarak, Jeová sei proteje ita. Tan neʼe, mai ita haree oinsá mak medita kona-ba Bíblia nia istória bele hametin ita-nia fiar hodi nuneʼe Jeová bele nafatin hamriik ‘iha ita-nia oin’.
Keʼe no hetan buat murak husi Bíblia
it-2-E p. 714
Matan-fuan
Liafuan Ebraiku ʼi·shohnʹ (Deu 32:10; Prv 7:2), bainhira uza hamutuk ho ʽaʹyin (matan), neʼe katak “mane neʼebé kiʼik husi matan laran”, Lamentasaun 2:18 mós temi liafuan bath (oan-feto) atu fó ideia “oan-feto husi matan laran”, no fraze rua neʼe refere ba matan-fuan. Iha Salmo 17:8, fraze rua neʼe tau hamutuk hodi tau énfaze (ʼi·shohnʹ bath-ʽaʹyin), neʼebé signifika “mane neʼebé kiʼik, oan-feto husi matan laran” (“matan-fuan”, MF). Karik neʼe refere ba ema ida nia lalatak rasik iha ema seluk nia matan laran.
Matan mak buat neʼebé mamar no sensitivu. Kuandu fuuk lahan kiʼik ka rai-rahun mak kona ita-nia matan, ita nota kedas. Ita presiza kuidadu atu la estraga parte transparente neʼebé taka matan-fuan, tanba se parte neʼe hetan kanek ka sai malahuk, ita labele haree ho momoos, ka buat neʼebé ita haree sai kleʼuk, ka matan sai delek. Bíblia uza liafuan “ó-nia matan-fuan” atu refere ba buat neʼebé ita tenkesér proteje didiʼak ho kuidadu. (Prv 7:2) Deuteronómio 32:10 mós fó sai oinsá mak Maromak tau matan didiʼak ba nasaun Izraél hodi dehan katak Nia proteje nasaun neʼe “hanesan Ninia matan-fuan rasik”. David mós halo orasaun hodi husu Maromak atu proteje nia no tau matan nia hanesan Maromak nia “matan-fuan”. (Sal 17:8) David hakarak Jeová atu ajuda lalais nia kuandu hetan ataka husi inimigu sira.—Kompara ho Zac 2:8, neʼebé uza liafuan Ebraiku ba·vathʹ ʽaʹyin, “matan-fuan”.
11-17 MARSU
RIKUSOIN HUSI BÍBLIA | SALMO 18
“Jeová mak . . . Maromak neʼebé salva haʼu”
w09-E 5/1 p. 14 par. 4-5
Ita komprende komparasaun neʼebé temi iha Bíblia ka lae?
Bíblia mós kompara Jeová ho sasán sira neʼebé la iha iis moris nian. Porezemplu, Jeová mak “Fatuk Boot” no “fatin seguru”. (2Sa 23:3; Sal 18:2; Deu 32:4) Komparasaun neʼe katak sá? Hanesan fatuk boot neʼebé metin no la nakdoko, Maromak Jeová mós bele sai fatin seguru neʼebé metin ba Ita.
Livru Salmo uza komparasaun oioin atu esplika kona-ba Jeová nia personalidade. Porezemplu, Salmo 84:11 dehan katak Jeová hanesan “loro-matan” no “eskudu” tanba nia mak Hun ba naroman, moris, enerjia no protesaun. Nuneʼe mós, Salmo 121:5 hatete katak “Jeová mak fatin mahon iha ó-nia liman-loos”. Hanesan fatin mahon neʼebé bele proteje ita husi loro-matan, Jeová bele proteje ninia atan sira husi problema oioin hanesan fó mahon iha ninia “liman” okos ka iha ninia “liras” okos.—Isa 51:16; Sal 17:8; 36:7.
it-2-E p. 1161 par. 7
Lian
Maromak rona ninia atan sira-nia lian. Ema neʼebé adora Maromak ho espíritu no lia-loos bele bolu ba Maromak ho fiar metin katak Nia sei rona sira-nia lian maski sira uza língua naran deʼit. Liután neʼe, maski ita harohan ba Maromak ho lian ka nonook deʼit, maibé Maromak hatene ita ema nia laran, Nia “rona” no tau atensaun ba ita. (Sal 66:19; 86:6; 116:1; 1Sa 1:13; Ne 2:4) Maromak rona bainhira ema neʼebé hasoru susar halerik ba Nia hodi husu ajuda, Nia mós rona no hatene motivu husi ema sira neʼebé kontra Nia hodi halo planu aat ba Ninia atan sira.—Gén 21:17; Sal 55:18, 19; 69:33; 94:9-11; Jer 23:25.
Oinsá atu tahan hasoru laran-susar
2. Hanoin fila fali. Ita bele hanoin-hetan susar balu neʼebé Ita konsege tahan tanba deʼit Jeová ajuda Ita ka lae? Bainhira ita hanoin kona-ba oinsá Jeová ajuda ona ita no mós ninia atan sira seluk, neʼe bele ajuda ita sente dame iha laran no mós hametin ita-nia fiar ba Jeová. (Sal 18:17-19) Katuas kongregasaun ida naran Joshua hatete: “Haʼu halo lista kona-ba haʼu-nia orasaun sira neʼebé Jeová hatán ona. Neʼe ajuda haʼu atu hanoin-hetan tempu neʼebé haʼu husu buat espesífiku husi Jeová no nia fó buat neʼebé haʼu presiza.” Bainhira ita hanoin kleʼan kona-ba buat neʼebé Jeová halo ona ba ita, neʼe sei fó kbiit ba ita atu luta hasoru laran-susar.
Keʼe no hetan buat murak husi Bíblia
it-1-E p. 432 par. 2
Kerubín
La hanesan ho ema nia hanoin, kerubín sira-neʼe la’ós kriatura oin seluk ne’ebé iha liras hanesan estátua ne’ebé nasaun jentiu sira adora. Tuir istória husi ema Judeu antigu sira (Bíblia la ko’alia kona-ba ne’e) kerubín sira-nia modelu mak hanesan ema. Kerubín sira-ne’e mak arte ne’ebé kabeer loos, no reprezenta anju sira ne’ebé furak tebes, no ne’e “halo tuir ho didi’ak modelu” ne’ebé Jeová rasik fó sai ba Moisés. (Éx 25:9) Apóstolu Paulo esplika kerubín sira nu’udar kriatura espíritu ne’ebé “kmanek hodi fó mahon ba fatin halo dame nian.” (Ebr 9:5) Kerubín sira-neʼe liga ho Jeová nia prezensa: “Haʼu sei mosu ba ó iha neʼebá no koʼalia ho ó husi Arka nia matan leten. Haʼu sei koʼalia husi kerubín rua nia leet neʼebé iha Arka Aliansa nia leten.” (Éx 25:22; Núm 7:89) Entaun Bíblia dehan katak Jeová “tuur iha kerubín sira-nia leten [ka leet]”. (1Sa 4:4; 2Sa 6:2; 2Rs 19:15; 1Kr 13:6; Sal 80:1; 99:1; Isa 37:16) Iha dalan simbóliku, kerubín sira-neʼe “reprezenta Maromak nia karreta” neʼebé nia uza (1Kr 28:18), no kerubín sira-nia liras fó protesaun no book an bá-mai ho velosidade neʼebé lalais. Tan neʼe, David halo knananuk neʼebé hatudu oinsá Jeová lalais atu fó ajuda ba nia, hanesan Ida neʼebé “saʼe iha kerubín ida nia liras” no “semo tun mai iha anju ida nia liras leten”.—2Sa 22:11; Sal 18:10.
18-24 MARSU
RIKUSOIN HUSI BÍBLIA | SALMO 19-21
“Buat sira neʼebé iha lalehan fó sai Maromak nia glória”
w04-E 1/1 p. 8 par. 1-2
Husik buat hotu fó sai Jeová nia glória
DAVID, Jessé nia oan-mane, sai boot nuʼudar bibi-atan iha área besik Belein. Ita bele fiar katak David sempre hateke ba lalehan neʼebé nakonu ho fitun iha kalan bainhira nia tau matan ba ninia aman nia bibi-lubun iha fatin hakmatek neʼebé nakonu ho duʼut matak. Klaru katak David hanoin fali situasaun hanesan neʼe bainhira Maromak nia espíritu book nia atu halo melodia ho liafuan furak husi Salmo 19 hodi dehan: “Buat sira neʼebé iha lalehan fó sai Maromak nia glória; sira haklaken kona-ba serbisu neʼebé nia halo ho ninia liman. . . . Sira-nia lian toʼo iha mundu tomak, no sira-nia lia-menon toʼo ba ema neʼebé hela iha fatin dook liu iha mundu.”—Sal 19:1, 4.
2 Lalehan la iha lian maibé Jeová nia kriasaun furak neʼe fó sai Ninia glória loron-loron no kalan-kalan. Kriasaun sira nunka para atu fó sai Maromak nia glória, no kuandu ita hanoin kona-ba oinsá kriasaun sira fó sasin kona-ba Jeová toʼo “mundu tomak”, neʼe halo ita sente katak ita mak kiʼik deʼit. Maibé, sasin husi kriasaun neʼebé la iha lian, neʼe deʼit la toʼo. Bíblia anima ema neʼebé laran-metin atu bele fó sasin ho lian. Ema neʼebé hakerek Salmo hatete ba Maromak nia atan sira neʼebé laran-metin: “Fó hahiʼi ba Jeová tanba nia iha glória no kbiit. Fó glória ba Jeová tanba ninia naran.” (Sal 96:7, 8) Ema neʼebé iha relasaun besik ho Jeová sei kontente atu simu konvite neʼe. Maibé, fó glória ba Jeová envolve saida?
w04-E 6/1 p. 11 par. 8-10
Kriasaun fó sai Maromak nia glória!
8 Tuirmai David koʼalia kona-ba Jeová nia kriasaun seluk tan hodi dehan: “Iha lalehan nia harii tenda ida ba loro-matan. Loro-matan hanesan noivu neʼebé sai husi noiva nia kuartu, no haksolok hanesan mane forte neʼebé gosta halai-taru. Loro-matan sai husi lalehan nia rohan ida, no halai toʼo lalehan nia rohan seluk; la iha buat ida mak bele subar an husi ninia manas.”—Sal 19:4-6.
9 Loro-matan mak kiʼik deʼit se kompara ho fitun sira seluk. Maibé, loro-matan mak fitun ida neʼebé úniku tebes, no halo planeta sira neʼebé haleʼu nia haree hanesan kiʼik deʼit. Informasaun ida fó sai katak loro-matan nia todan mak tonelada millaun 2 biliaun triliaun (2.000.000.000.000.000.000.000.000.000), neʼe mak porsentu 99,9 husi sistema solár nia todan hotu. Todan husi loro-matan kria gravidade neʼebé halo planeta mundu bele haleʼu loro-matan hodi mantein distánsia maizumenus kilómetru millaun 150, neʼe la dook ka besik liu ba loro-matan. Enerjia husi loro-matan neʼebé toʼo mai ita-nia planeta mak kiʼik tebes, maibé neʼe natoon atu sustenta moris hotu.
10 Ema neʼebé hakerek Salmo kompara loro-matan hanesan “mane forte” ida neʼebé halai husi lalehan nia rohan ida toʼo lalehan nia rohan seluk iha loron, no deskansa iha ninia “tenda” durante kalan. Kuandu loro-matan neʼe subar husi ema nia haree, neʼe hanesan nia tama ba “tenda” atu deskansa. Iha dadeer, nia fó sai ninia naroman hanesan “noivu neʼebé sai husi noiva nia kuartu”. Nuʼudar bibi-atan, David hatene didiʼak malirin iha kalan. (Gén 31:40) Nia hanoin-hetan oinsá loro-matan nia naroman sei fó manas ba ninia isin no mós fatin neʼebé haleʼu nia. Klaru katak, loro-matan nunka kole atu halo viajen husi lorosaʼe toʼo loromonu tanba nia mak hanesan “mane forte neʼebé gosta halai-taru”.
g95-E 11/8 p. 7 par. 3
Artista neʼebé ema la hafolin iha ita-nia tempu
Hodi hafolin liután kriasaun furak sira iha natureza sei ajuda ita atu koñese ita-nia Kriadór. Jesus hatete ba ninia dixípulu sira atu haree didiʼak ba ai-funan sira neʼebé besik Galileia, hodi dehan: “Aprende husi ai-funan líriu iha rai-luan, no haree oinsá sira moris. Sira la serbisu no la suku roupa, maibé haʼu hatete ba imi katak, maski Salomão iha buat furak oioin, nia la hatais hanesan ai-funan sira-neʼe ida.” (Mt 6:28, 29) Kuandu ita haree ai-funan fuik nia furak, neʼe fó-hanoin ita katak Maromak sempre tau matan ba ita-nia presiza.
Keʼe no hetan buat murak husi Bíblia
it-1-E p. 1073
Lian Ebraiku
Iha mós modelu paralelu formál ka konstrutivu. Iha modelu neʼe, parte segundu laʼós deʼit repete ideia neʼebé hanesan ho parte primeiru ka fó sai ideia neʼebé kontra parte primeiru, maibé aumenta ideia foun. Salmo 19:7-9 hatudu ezemplu kona-ba neʼe:
Jeová nia ukun-fuan mak perfeitu,
halo ema hetan fali kbiit.
Jeová nia avizu mak ema bele tau fiar,
halo ema neʼebé la iha esperiénsia sai matenek.
Jeová nia orden mak loos,
halo ema nia laran haksolok;
Jeová nia mandamentu mak moos,
halo ema nia matan nabilan.
Hamtaʼuk Jeová mak hahalok santu,
no sei iha ba nafatin.
Jeová nia desizaun mak loos,
desizaun hotu neʼe mak diʼak.
Haree toʼok fraze ida-idak iha parte segundu sei halo kompletu ideia husi parte primeiru. Fraze tomak sai kompletu kuandu ideia husi parte primeiru no segundu tau hamutuk. Porezemplu, kuandu ema lee parte segundu hanesan “halo ema hetan fali kbiit” ka “halo ema neʼebé la iha esperiénsia sai matenek”, nia bele aprende razaun tanbasá “Jeová nia ukun-fuan mak perfeitu”, ka “Jeová nia avizu mak ema bele tau fiar”. Iha modelu paralelu hanesan neʼe, ideia primeiru ho ideia segundu sei fahe ho pauza iha klaran, no neʼe kria ritmu neʼebé furak. Nuʼudar ideia aumenta liután, poezia hanesan neʼe sei mantein modelu paralelu. Tan neʼe mak ema bolu modelu neʼe formál ka konstrutivu.
25-31 MARSU
RIKUSOIN HUSI BÍBLIA | SALMO 22
Bíblia fó-hatene nanis kona-ba Jesus nia mate
Sira hetan Mesias!
16 Sei haree hanesan Maromak husik ona Mesias. (Lee Salmo 22:1.) Hodi tuir profesia neʼe, “iha tuku tolu loraik, Jesus hakilar ho lia makaʼas, ‘Eloi, Eloi, lama sabachtani?’ katak, ‘Haʼu-nia Maromak, haʼu-nia Maromak, tansá Ita husik haʼu mesak?’” (Mc 15:34) Jesus nia liafuan neʼe la hatudu katak nia lakon ona ninia fiar ba ninia Aman iha lalehan. Maibé iha momentu neʼebá, Maromak la proteje tan Jesus husi inimigu sira. Ida-neʼe fó Jesus oportunidade atu hatudu nia laran-metin iha dalan neʼebé kompletu. Kuandu Jesus hakilar hanesan neʼe, nia kumpre liafuan iha Salmo 22:1.
Sira hetan Mesias!
13 David hatete nanis katak ema sei koʼalia aat Mesias. (Lee Salmo 22:7, 8.) Ema koʼalia aat Jesus kuandu nia hetan terus boot iha ai-riin. Mateus hatete: “Sira neʼebé liu daudaun, hateten aat nia, doko ulun dehan: ‘Ó neʼebé sobu templu no harii fali nia iha loron tolu nia laran, soi ó-nia an bá! Ó Maromak nia Oan karik, tun husi krús [“ai-riin”, MF] bá!’” Amlulik boot no eskriba sira ho katuas sira mós hamoe nia hodi dehan: “Nia soi ema seluk, maibé la bele soi nia an rasik! Nia liurai Israel nian, tun lai husi krús [“ai-riin”, MF], hafoin ita sei fiar nia! Nia tau laran-metin ba Maromak: Maromak hakarak karik, husik Maromak soi nia, basá nia dehan: ‘Haʼu Maromak nia Oan.’” (Mt 27:39-43) Maski ema halo aat ba Jesus, maibé nia tahan ho aten-brani. Nia hatudu ezemplu diʼak tebes mai ita!
Sira hetan Mesias!
14 Ema sei koko sorte atu fahe Mesias nia roupa. Ema neʼebé hakerek salmu ida hatete: “Sira fahe ba malu haʼu-nia hatais, no sira koko sorte kona-ba haʼu-nia roupa.” (Sal 22:18) Liafuan neʼe sai loos kuandu soldadu Roma sira hedi tiha Jesus iha ai-riin, “sira fahe ba malu nia hatais sira hodi koko sorte”.—Mt 27:35; lee João 19:23, 24.
Keʼe no hetan buat murak husi Bíblia
w06-E 11/1 p. 29 par. 7
Hatudu respeitu ba ita-nia reuniaun neʼebé sagradu
7 Ita bele hatudu respeitu ba ita-nia reuniaun iha dalan oioin. Dalan ida mak hodi partisipa kuandu kanta knananuk sira. Knananuk barak iha liafuan neʼebé hanesan ho orasaun, tan neʼe ita presiza kanta ho respeitu. Apóstolu Paulo hakerek kona-ba Jesus hodi temi Salmo 22, dehan: “Haʼu sei fó sai Ita-nia naran ba haʼu-nia maun-alin sira; iha kongregasaun nia leet haʼu sei hahiʼi Ita ho knananuk.” (Ebr 2:12) Tan neʼe, ita presiza hakaʼas an atu tuur iha ita-nia tuur-fatin antes aprezentadór loke reuniaun. Durante kanta, ita presiza tau atensaun ba liafuan husi knananuk. Ita hakarak duni atu sente hanesan ema neʼebé hakerek salmo neʼebé dehan: “Haʼu sei hahiʼi Jeová ho haʼu-nia laran tomak iha ema laran-loos sira-nia leet no iha kongregasaun.” (Sal 111:1) Loos duni, kanta knananuk atu hahiʼi Jeová mak razaun diʼak ida ba ita atu toʼo sedu iha reuniaun-fatin no tuir reuniaun toʼo hotu.
w03-E 9/1 p. 20 par. 1
Hahiʼi Jeová “iha kongregasaun nia leet”
Hanesan ho tempu uluk, Maromak nia atan ohin loron mós iha oportunidade oioin atu fó sai sira-nia fiar “iha kongregasaun nia leet”. Oportunidade ida ba ema hotu mak fó komentáriu iha reuniaun kongregasaun nian. Keta haluha katak komentáriu sira-neʼe bele lori benefísiu barak. Porezemplu, se ita fó komentáriu kona-ba oinsá atu manán ka sees husi problema, neʼe bele anima irmaun-irmán sira atu halo tuir Bíblia nia prinsípiu. Kuandu ita fó komentáriu hodi esplika kona-ba eskritura, ka pontu neʼebé ita hetan husi ita-nia estudu pesoál, neʼe bele anima ema seluk atu iha toman kona-ba estuda Bíblia mesak.
TREINU KONA-BA HAKLAKEN
Fiar metin katak ita hetan ona lia-loos
14 Bíblia nia profesia mak parte importante husi Maromak nia Liafuan no bele ajuda ita hametin ita-nia fiar ba Jeová. Profesia saida deʼit mak hametin ona Ita-nia fiar? Karik profesia kona-ba “loron ikus sira”. (2Ti 3:1-5; Mt 24:3, 7) Maibé iha profesia seluk tan neʼebé sai loos ona no bele hametin Ita-nia fiar ka lae? Porezemplu, ita bele esplika ka lae kona-ba profesia iha Daniel kapítulu 2 ka Daniel kapítulu 11 neʼebé sai loos ona no sai loos daudaun? Bainhira Ita-nia fiar bazeia ba Bíblia, fiar neʼe sei metin tebes. Hanoin toʼok kona-ba ezemplu husi irmaun-irmán sira neʼebé ema fó-terus makaʼas iha rai-Alemaña durante Funu Mundiál Segundu. Maski sira la komprende didiʼak Bíblia nia profesia kona-ba loron ikus sira, maibé sira fiar metin ba Bíblia.
15 Bainhira Nazi ukun rai-Alemaña, irmaun-irmán rihun ba rihun tama komarka. Hitler no ema-boot naran Heinrich Himmler, odi loos Testemuña ba Jeová. Irmán ida konta katak Heinrich hatete ba irmán grupu ida iha komarka: “Imi-nia Jeová ukun iha lalehan, maibé ami Nazi mak ukun iha rai! Imi sei haree sé mak sei lakon, imi ka ami!” Saida mak ajuda Jeová nia povu atu laran-metin nafatin?
16 Estudante Bíblia hatene katak Maromak nia Ukun harii ona iha tinan 1914. Sira la hakfodak tanba ema fó-terus makaʼas ba sira. Jeová nia povu fiar metin katak ema nia governu labele hanetik Jeová atu kumpre ninia hakarak. Hitler labele halakon adorasaun neʼebé loos ka harii governu ida neʼebé kbiit boot liu fali Maromak nia Ukun. Ita-nia irmaun-irmán sira fiar metin katak ikusmai Hitler nia ukun sei lakon.
17 Buat neʼebé irmaun-irmán sira-neʼe fiar mak loos. Lakleur governu Nazi lakon. Heinrich Himmler tenke halai atu salva ninia moris, maski uluk nia dehan “ami Nazi mak ukun iha rai”. Bainhira nia halai, nia hasoru irmaun Lübke neʼebé uluk tama komarka no nia koñese irmaun Lübke. Heinrich estrese loos no husu irmaun Lübke: “Entaun Estudante Bíblia, saida mak sei akontese tuirmai?” Irmaun Lübke esplika ba Heinrich katak Testemuña ba Jeová hatene nanis ona katak governu Nazi sei lakon no Testemuña sira sei sai livre. Heinrich neʼebé uluk koʼalia aat Testemuña ba Jeová, ikusmai la hatene atu koʼalia saida. Tuirmai Heinrich oho an. Ita aprende saida? Hodi estuda Bíblia, inklui mós estuda profesia sira, neʼe bele hametin ita-nia fiar ba Maromak no ajuda ita hamriik metin durante tempu susar.—2Pe 1:19-21.
1-7 ABRÍL
RIKUSOIN HUSI BÍBLIA | SALMO 23-25
“Jeová mak haʼu-nia Bibi-Atan”
w11-E 5/1 p. 31 par. 3
“Jeová mak haʼu-nia Bibi-Atan”
Jeová dirije ninia bibi sira. Kuandu bibi-atan la iha, bibi sira sei lakon dalan. Nuneʼe mós, ita presiza hetan ajuda atu bele laʼo iha dalan loos iha ita-nia moris. (Jer 10:23) David esplika katak Jeová dirije ninia povu ba “fatin neʼebé nakonu ho duʼut matak” no “fatin neʼebé iha bee barak atu deskansa”. Nia lori sira iha “dalan loos”. (Versíkulu 2, 3) Kuandu ita imajina situasaun hanesan neʼe, neʼe bele halo ita tau fiar liután ba Maromak. Hodi husik Maromak nia espíritu dirije ita liuhusi Bíblia, ita bele halaʼo moris iha dalan neʼebé halo ita sente kmaan, kontente, no seguru.
w11-E 5/1 p. 31 par. 4
“Jeová mak haʼu-nia Bibi-Atan”
Jeová proteje ninia bibi sira. Kuandu bibi-atan la iha, bibi sira sei sente taʼuk no lakon forsa. Jeová fó-hatene ba ninia povu katak sira la presiza sente taʼuk maski sira “laʼo iha foho-leet neʼebé nakukun tebes”, neʼe katak iha tempu neʼebé susar no nakukun liu iha sira-nia moris. (Versíkulu 4) Jeová sempre haree sira no prontu atu ajuda. Nia bele fó sira matenek no forsa neʼebé sira presiza atu bele tahan hasoru susar oioin.—Flp 4:13; Tgo 1:2-5.
w11-E 5/1 p. 31 par. 5
“Jeová mak haʼu-nia Bibi-Atan”
Jeová fó-han ninia bibi sira. Bibi-malae mak animál neʼebé sempre sadere ba ninia bibi-atan atu hetan hahán. Ita mós iha presiza espirituál, no ita bele hetan ida-neʼe só deʼit ho Maromak nia ajuda. (Mt 5:3) Ita agradese duni tanba Jeová mak Maromak neʼebé laran-luak, no nia prepara meza neʼebé nakonu ho buat oioin atu ninia atan sira bele han. (Versíkulu 5) Liuhusi Bíblia no publikasaun sira hanesan revista ida-neʼe, ita bele hetan ai-han espirituál neʼebé ita presiza atu bele hatene moris nia objetivu no Maromak nia hakarak ba ita ema.
Keʼe no hetan buat murak husi Bíblia
Hadomi buat neʼebé loos ho laran tomak
MAROMAK JEOVÁ dirije ninia povu iha “dalan sira neʼebé loos” liuhusi ninia Liafuan no ninia espíritu santu. (Sal 23:3) Maski nuneʼe, tanba ita hotu mak ema sala-naʼin, dala ruma ita laʼo sees husi dalan neʼe. Nuneʼe, atu fila fali ba dalan neʼebé loos ita presiza hakaʼas an duni. Saida mak sei ajuda ita atu halo ida-neʼe? Hanesan Jesus, ita tenke hadomi justisa ka buat neʼebé loos.—Lee Ebreu 1:9.
2 Saida mak “dalan sira neʼebé loos”? Dalan sira-neʼe mak Maromak Jeová nia matadalan sira neʼebé nia fó ba ita atu moris tuir. Lia-ebraiku no lia-gregu neʼebé tradús nuʼudar “justisa” ka “buat neʼebé loos” iha arti katak halo tuir ho laran-metin matadalan sira kona-ba morál. Bíblia fó sai katak Maromak mak “hela-fatin ba buat loos nian”. Tan neʼe, sira neʼebé adora Maromak Jeová kontente atu laʼo tuir dalan morál nian neʼebé loos neʼebé Maromak hili ba sira.—Jer 50:7.
3 Atu monu loos ba Maromak nia laran ita presiza hakaʼas an ho laran tomak atu halo tuir Maromak nia matadalan sira neʼebé loos. (Deu 32:4) Atubele halo ida-neʼe, ulukliu ita presiza aprende kona-ba Maromak Jeová liuhusi ninia Liafuan, Bíblia. Nuʼudar ita aprende buat barak liután kona-ba Maromak no hakbesik liután ba nia loron ba loron, ida-neʼe sei ajuda ita atu hadomi liu buat neʼebé loos tuir ninia haree. (Tgo 4:8) Ita mós presiza simu matadalan husi Maromak nia Liafuan kuandu ita halo desizaun neʼebé importante iha ita-nia moris.
8-14 ABRÍL
RIKUSOIN HUSI BÍBLIA | SALMO 26-28
Oinsá mak David hametin ninia integridade
w04-E 12/1 p. 14 par. 8-9
Laʼo ho integridade
8 David halo orasaun: “Oh Jeová, buka-hatene kona-ba haʼu, no koko haʼu bá; hamoos tiha haʼu-nia hanoin [orj., rins] no laran.” (Sal 26:2, nota) Rins nia pozisaun mak iha isin laran liu. Iha dalan simbóliku, rins reprezenta ita-nia hanoin no emosaun iha laran. No laran refere ba ita-nia motivasaun, sentimentu, no kbiit atu tetu didiʼak. Kuandu David husu Jeová atu buka-hatene kona-ba ninia an, nia husu Jeová atu haree didiʼak ninia hanoin no sentimentu iha laran.
9 David harohan ba Jeová atu hamoos ninia rins no laran. Oinsá mak Jeová bele hamoos ita ema nia laran? David kanta: “Haʼu sei hahiʼi Jeová, neʼebé fó ona matadalan ba haʼu. Durante kalan mós haʼu-nia hanoin sira [orj., rins] korrije haʼu.” (Sal 16:7) Neʼe katak konsellu husi Maromak kona David nia laran no nafatin belit metin iha neʼebá hodi korrije ninia hanoin no emosaun. Ita mós bele sente hanesan David se ita hafolin duni no medita kona-ba konsellu neʼebé ita simu husi Maromak nia Liafuan, husi ema sira neʼebé reprezenta Nia, husi Ninia organizasaun, no husik konsellu neʼe belit metin iha ita-nia laran. Se ita sempre halo orasaun ba Jeová atu hamoos ita hanesan neʼe, neʼe sei ajuda ita atu laʼo ho integridade.
w04-E 12/1 p. 15 par. 12-13
Laʼo ho integridade
12 David esplika kona-ba buat ida tan neʼebé ajuda nia atu hametin ninia integridade hodi dehan: “Haʼu la ransu [orj., tuur] ho ema sira neʼebé bosok-teen, no haʼu hasees an husi sira neʼebé subar sira-nia hakarak aat. Haʼu la gosta hamutuk ho ema aat, no haʼu lakohi ransu ho ema aat.” (Sal 26:4, 5, nota) David lakohi duni atu tuur hamutuk ho ema aat sira. Nia odi ransu neʼebé aat.
13 Oinsá ho ita? Ita lakohi tuur hamutuk ho bosok-teen sira liuhusi programa televizaun, vídeo, filme, internét ka liuhusi dalan seluk, loos ka lae? Ita hadook an husi ema neʼebé subar ninia identidade ka lae? Ema balu iha eskola ka serbisu-fatin karik buka atu habelun ho Ita ho motivu neʼebé la loos. Ita hakarak habelun ho ema neʼebé la moris tuir lia-loos? Apóstata sira mós finje sai hanesan ema neʼebé laran-moos maibé sira-nia motivu mak atu dada ita la serbí tan Jeová. Oinsá se ema ruma iha kongregasaun halaʼo moris ho oin rua? Sira mós subar sira-nia identidade. Irmaun Jayson neʼebé agora serbí nuʼudar atan ba kongregasaun, nia iha kolega sira hanesan neʼe kuandu sei joven. Nia hatete: “Loron ida, sira ida hatete mai haʼu: ‘Buat neʼebé ita halo agora la importante tanba kuandu mundu foun toʼo mai ita sei mate, ita sei la sente lakon buat ida.’ Koʼalia hanesan neʼe halo haʼu hakfodak. Haʼu lakohi mate kuandu mundu foun toʼo.” Jayson ho matenek deside atu la ransu tan ho sira. Apóstolu Paulo fó avizu: “Keta husik ema seluk lohi imi. Ransu hamutuk ho ema aat sei estraga toman diʼak.” (1Ko 15:33) Importante tebes atu hasees an husi ransu neʼebé aat!
w04-E 12/1 p. 16 par. 17-18
Laʼo ho integridade
17 Tabernákulu ho altár neʼebé uza atu hasaʼe sakrifísiu mak sentru atu adora Jeová iha Izraél. David fó sai ninia sentimentu kontente kona-ba fatin neʼe hodi halo orasaun: “Oh Jeová, haʼu gosta tebes uma neʼebé Ita hela bá, fatin neʼebé Ita-nia glória hela bá.”—Sal 26:8.
18 Ita kontente atu halibur hamutuk iha fatin neʼebé ita aprende kona-ba Jeová ka lae? Reuniaun-Fatin neʼebé oferese programa atu hanorin kona-ba Jeová mak sentru ba adorasaun neʼebé loos. Liután neʼe, ita mós iha reuniaun boot ba loron tolu no asembleia sira. Jeová fó beibeik “avizu” mai ita liuhusi reuniaun sira hanesan neʼe. Se ita aprende atu “hadomi tebes” avizu sira-neʼe, ita sei laran-manas atu tuir reuniaun sira no tau atensaun didiʼak ba programa hotu. (Sal 119:167) Ita sei kontente tebes kuandu ita hamutuk ho maluk fiar-naʼin sira neʼebé hanoin kona-ba ita-nia diʼak no ajuda ita atu kontinua laʼo ho integridade!—Ebr 10:24, 25.
Keʼe no hetan buat murak husi Bíblia
w06-E 7/15 p. 28 par. 15
Jeová sei salva ema kiʼik sira
15 David kanta: “Maski karik haʼu-nia inan-aman rasik husik tiha haʼu, maibé Jeová sei tau matan ba haʼu.” (Sal 27:10) Hodi hatene katak Jeová nia domin mai ita mak boot liu fali domin husi inan-aman, neʼe halo ita sente hakmatek! Maski ita sente triste tanba ema la simu ita, trata aat ita, ka inan-aman husik hela ita, neʼe sei la fó impaktu ba dalan neʼebé Jeová tau matan mai ita. (Rom 8:38, 39) Hanoin-hetan katak Jeová dada ema neʼebé nia hadomi. (Jo 3:16; 6:44) Maski ema trata aat Ita iha dalan naran deʼit, Ita-nia Aman iha lalehan nafatin hadomi Ita!
15-21 ABRÍL
RIKUSOIN HUSI BÍBLIA | SALMO 29-31
Dixiplina hatudu Jeová nia domin
it-1-E p. 802 par. 3
Oin
‘Subar oin’ iha signifikadu barak, depende ba situasaun. Dala barak Maromak Jeová subar ninia oin hodi hatudu katak nia la kontente ka la uza ninia forsa hodi fó ajuda. Neʼe bele akontese kuandu ema ida ka grupu ruma la hatudu laran-metin no la halo tuir Jeová, porezemplu nasaun Izraél. (Job 34:29; Sal 30:5-8; Isa 54:8; 59:2) Dala ruma liafuan neʼe mós bele signifika Jeová la fó sai Ninia an liuhusi buat neʼebé Nia halo ka koʼalia, tanba hein ba tempu neʼebé Nia determina. (Sal 13:1-3) Bainhira David harohan, “Subar Ita-nia oin husi haʼu-nia sala sira”, neʼe hatudu katak nia husu ho laran ba Maromak atu fó perdua no la hanoin tan kona-ba ninia sala sira.—Sal 51:9, nota; kompara ho Sal 10:11.
w07-E 3/1 p. 19 par. 1
Haksolok hodi hein ba Jeová
Benefísiu husi Jeová nia dixiplina bele kompara ho ai-fuan neʼebé tasak. Kona-ba dixiplina husi Jeová, Bíblia dehan: “Sira neʼebé simu treinu liuhusi dixiplina neʼe, ikusmai sei simu kolen dame nian, neʼe katak moris ho hahalok loos.” (Ebr 12:11) Hanesan ai-fuan neʼebé presiza tempu atu sai tasak, nuneʼe mós ita presiza tempu atu troka hahalok sira neʼebé hetan treinu ona husi Maromak. Porezemplu, se hahalok la moos halo ita lakon knaar espesiál ruma iha kongregasaun, hahalok hein ba Maromak sei halo ita la sai laran-tun ka lakon esperansa. Iha situasaun hanesan neʼe, ita bele hetan anima husi David nia liafuan neʼebé dehan: “Maromak hirus ema ida ba tempu uitoan deʼit, maibé nia hatudu laran-diʼak ba ema durante ema neʼe nia moris tomak. Karik ema bele tanis iha kalan, maibé iha dadeer, nia sei haklalak ho haksolok.” (Sal 30:5) Se ita haburas pasiénsia atu hein ba Jeová no aplika konsellu neʼebé ita simu husi Maromak nia Liafuan no Ninia organizasaun, ita sei “haklalak ho haksolok” bainhira tempu toʼo.
Arrepende an ho laran
18 Ema neʼebé kongregasaun hasai bele hatudu katak nia arrepende an ho laran hodi tuir reuniaun beibeik no halo tuir katuas sira-nia konsellu atu halo orasaun no estuda Bíblia beibeik. Nia mós sei hakaʼas an atu hasees an husi situasaun neʼebé bele tenta nia atu halo tan sala. Se nia hakaʼas an atu hadiʼa ninia relasaun diʼak ho Jeová, nia bele fiar metin katak Jeová sei fó perdua ba nia no kongregasaun sei simu fali nia. Bainhira katuas sira koko buka-hatene se ema ruma arrepende an duni ka lae, sira presiza hanoin-hetan katak kazu ida-idak la hanesan. Tan neʼe, sira analiza didiʼak kazu ida-idak no hakaʼas an atu hatudu justisa bainhira tau matan kazu ida.
Keʼe no hetan buat murak husi Bíblia
Orasaun—“Entrega imi-nia laran-susar hotu ba nia”
Koʼalia ba Jeová liuhusi orasaun sei hametin ita-nia fiar katak nia hanoin ita. Ita bele sente hanesan ema neʼebé hakerek salmo neʼebé harohan: “Ita haree ona haʼu-nia terus; Ita hatene didiʼak haʼu-nia susar boot sira.” (Sal 31:7) Hodi hatene katak Jeová haree buat hotu neʼebé ita hasoru daudaun, neʼe sei ajuda ita atu kontinua tahan iha tempu susar. Maibé Jeová la haree deʼit ita-nia susar. Nia mós komprende ita no ajuda ita atu hetan kmaan no anima liuhusi Bíblia.
22-28 ABRÍL
RIKUSOIN HUSI BÍBLIA | SALMO 32-33
Tanbasá fó sai sala neʼebé sériu?
w93-E 3/15 p. 9 par. 7
Jeová nia laran-sadiʼa ajuda ita atu la laran-triste
7 Se ita sente laran-todan tanba halo ona sala sériu neʼebé kontra Maromak nia ukun-fuan, susar ba ita atu fó sai ita-nia sala ba katuas sira no ba Jeová. Saida mak bele akontese iha situasaun hanesan neʼe? Iha Salmo 32, David hatete: “Bainhira haʼu nonook deʼit, haʼu-nia ruin sira sai fraku tanba haʼu neon-susar loron tomak. Tanba loron-kalan Ita-nia hirus mak hanesan naha todan iha haʼu-nia leten. Haʼu-nia kbiit lakon ona hanesan bee neʼebé maran tiha iha tempu manas.” (Versu 3, 4) Tanba David koko atu subar ninia sala no la halo tuir ninia konxiénsia, neʼe halo nia sai fraku. Nia lakon forsa hanesan ai-hun maran neʼebé labele xupa bee. Karik neʼe lori problema ba ninia saúde mentál no fíziku. Nia lakon duni ninia ksolok. Se Ita iha situasaun hanesan neʼe, Ita presiza halo saida?
cl-E p. 262 par. 8
Maromak “prontu atu fó perdua”
8 David neʼebé arrepende an, hatete: “Ikusmai haʼu fó sai haʼu-nia sala ba Ita; haʼu la taka haʼu-nia sala. . . . No Ita fó perdua ona ba haʼu-nia sala sira.” (Sal 32:5) Liafuan “fó perdua” tradús husi liafuan Ebraiku neʼebé signifika “hiʼit” ka “lori”. Liafuan “fó perdua” iha versu neʼe signifika hadook tiha sala no hahalok kontra. Entaun, Jeová hiʼit sai David nia sala sira no lori tiha. Neʼe halo David sente kmaan tanba livre husi sala neʼebé hatodan nia. (Sal 32:3) Ita mós bele tau fiar tomak ba Maromak katak nia sei hasai ita-nia sala sira kuandu ita husu perdua ba nia liuhusi Jesus nia sakrifísiu.—Mt 20:28.
w01-E 6/1 p. 30 par. 1
Fó sai sala lori kmaan ba ita
Depois David fó sai tiha ninia sala sira, nia la rende ba sentimentu negativu katak nia la iha folin. Ninia liafuan iha salmo hatudu katak depois nia fó sai tiha ninia sala, nia sente livre duni no hakarak serbí Maromak ho laran-metin, hanesan temi iha Salmo 32. Iha versu 1 dehan: “Ksolok ba ema neʼebé hetan ona perdua ba ninia hahalok aat, no ninia sala hamoos ona.” Maski ema ida halo ona sala neʼebé sériu, nia bele sente kontente fali se nia arrepende an ho laran. Dalan ida atu halo ida-neʼe mak simu responsabilidade ba sala neʼebé nia halo ona, hanesan buat neʼebé David halo. (2Sa 12:13) David la koko atu defende an iha Maromak nia oin no nia mós la koko atu duun ema seluk. Versu 5 hatete: “Ikusmai haʼu fó sai haʼu-nia sala ba Ita; haʼu la taka haʼu-nia sala. Haʼu dehan: ‘Haʼu sei fó sai haʼu-nia sala sira ba Jeová.’ No Ita fó perdua ona ba haʼu-nia sala sira.” Bainhira fó sai ita-nia sala, ita sei sente kmaan tanba ita-nia konxiénsia moos ona husi sala neʼebé uluk ita halo.
Keʼe no hetan buat murak husi Bíblia
w06-E 5/15 p. 20 par. 1
Pontu importante husi livru Salmo parte primeiru
33:6; nota—“Iis” ka “espíritu” husi Jeová nia ibun refere ba saida? Espíritu neʼe mak Maromak nia forsa neʼebé ativu, ka espíritu santu neʼebé Nia uza atu kria lalehan. (Gén 1:1, 2) Bíblia dehan espíritu husi Ninia ibun, tanba Maromak bele huu espíritu neʼe hanesan iis neʼebé forsa atu kumpre buat oioin maski husi dook.
29 ABRÍL–5 MAIU
RIKUSOIN HUSI BÍBLIA | SALMO 34-35
“Hahiʼi Jeová iha tempu hotu”
w07-E 3/1 p. 22 par. 11
Mai ita hamutuk hahiʼi ninia naran
11 “Haʼu sei hahiʼi Jeová iha tempu hotu; haʼu sei la para atu hahiʼi nia ho haʼu-nia ibun.” (Sal 34:1) Nuʼudar ema neʼebé halai husi perigu, karik David sempre hanoin kona-ba ninia presiza loroloron nian, maibé hanesan versu neʼe hatudu, nia la husik situasaun susar neʼe hanetik nia atu fó hahiʼi ba Jeová. Neʼe mak ezemplu kapás mai ita bainhira hasoru situasaun susar. Maski iha eskola, serbisu-fatin, bainhira hamutuk ho maluk Kristaun sira, ka bainhira haklaken, ita tenke iha hakarak atu hahiʼi Jeová. Hanoin kona-ba razaun barak atu halo ida-neʼe. Porezemplu, Jeová nia kriasaun furak sira neʼebé ita bele haree no goza, neʼe la iha rohan. Hanoin mós kona-ba buat neʼebé Nia kumpre ona liuhusi Ninia organizasaun iha rai. Jeová uza ona ema neʼebé laran-metin iha dalan neʼebé úniku maski sira la perfeitu. Buat neʼebé ema famozu sira halo iha mundu neʼe labele kompara ho buat neʼebé Maromak halo ona. Klaru katak ita sei hanoin hanesan David neʼebé dehan: “Oh Jeová, iha maromak sira seluk nia leet, la iha ida mak hanesan ho Ita, la iha ida mak halo buat neʼebé Ita halo.”—Sal 86:8.
w07-E 3/1 p. 22 par. 13
Mai ita hamutuk hahiʼi ninia naran
13 “Haʼu sei koʼalia kona-ba Jeová ho orgullu; ema laran-maus sira sei rona no haksolok.” (Sal 34:2) David la gaba an kona-ba buat neʼebé nia halo ona. Porezemplu, nia la koʼalia barak kona-ba oinsá nia lohi liurai husi Gat. Nia rekoñese katak Jeová mak proteje nia bainhira nia iha Gat no nia konsege halai tanba Jeová nia ajuda. (Prv 21:1) Entaun, David la gaba an, maibé nia gaba Jeová. Hahalok haraik an hanesan neʼe mak halo ema neʼebé laran-maus hakbesik ba Jeová. Jesus mós hahiʼi Jeová nia naran, no neʼe book ema sira neʼebé haraik an atu simu hanorin no hakbesik ba Jeová. Ohin loron, ema neʼebé laran-maus husi nasaun hotu kontente atu hakbesik an ba kongregasaun Kristaun iha mundu tomak neʼebé Jesus dirije daudaun. (Kol 1:18) Ema laran-maus sira kontente tebes bainhira haree Maromak nia naran hetan hahiʼi no bainhira rona no komprende mensajen husi Bíblia ho ajuda husi Maromak nia espíritu santu.—Jo 6:44; Aps 16:14.
w07-E 3/1 p. 23 par. 15
Mai ita hamutuk hahiʼi ninia naran
15 “Haʼu harohan ba Jeová, no nia hatán haʼu. Nia salva ona haʼu husi buat hotu neʼebé halo haʼu taʼuk.” (Sal 34:4) Esperiénsia neʼe importante ba David, tan neʼe mak nia dehan: “Ema kbiit-laek bolu Jeová, no nia rona. Nia salva ona ema neʼe husi ninia susar hotu.” (Sal 34:6) Bainhira ita ransu ho maluk fiar-naʼin sira, ita iha oportunidade barak atu konta esperiénsia kona-ba oinsá Jeová ajuda ona ita atu tahan hasoru situasaun susar ruma. Ida-neʼe sei hametin irmaun-irmán sira-nia fiar, hanesan David nia liafuan hametin ema sira neʼebé apoia nia. David nia maluk sira ‘tau fiar ba [Jeová] no sai kontente; sira sei la hetan moe’. (Sal 34:5) Maski David halai daudaun husi Liurai Saul, maibé sira nunka sente moe. Sira fiar katak Maromak apoia David, no neʼe halo sira kontente. Nuneʼe mós, ema foun neʼebé interese ba lia-loos no mós ema Kristaun neʼebé laran-metin ba tempu kleur sei sadere ba Jeová hodi hetan ajuda. Tanba sira sente ona oinsá Jeová ajuda sira, sira kontente no hakarak serbí Maromak ho laran-metin.
Keʼe no hetan buat murak husi Bíblia
w06-E 5/15 p. 20 par. 2
Pontu importante husi livru Salmo parte primeiru
35:19—Bainhira David husu Jeová atu la husik ninia inimigu sira “piska matan”, neʼe katak sá? Hodi piska matan, David nia inimigu sira hatudu katak sira kontente tanba sira-nia planu neʼebé aat kontra hasoru nia sai susesu. David husu katak neʼe sei nunka akontese.