-
Saida mak Maromak nia hakarak mai ita ema?Moris Haksolok ba Nafatin—Kursu Bíblia Interativu
-
-
LISAUN 25
Saida mak Maromak nia hakarak mai ita ema?
Bíblia dehan katak ema nia ‘moris mak badak no nakonu ho susar’. (Job 14:1) Maromak hakarak ema nia moris hanesan neʼe duni ka lae? Se lae, saida mak Maromak nia hakarak mai ita ema? Ninia hakarak neʼe sei akontese duni ka lae? Haree toʼok Bíblia nia resposta neʼebé bele fó kmaan mai ita.
1. Jeová hakarak ita atu goza moris hanesan saida?
Jeová hakarak ita atu iha moris neʼebé diʼak liu hotu. Bainhira nia kria ema primeiru, Adão no Eva, nia halo paraízu ida neʼebé furak nuʼudar sira-nia hela-fatin, neʼe mak jardín Eden. Tuirmai “Maromak haraik bensaun ba sira, no Maromak dehan ba sira: ‘Iha oan no sai barak bá, halo nakonu no domina rai neʼe.’” (Génesis 1:28) Jeová hakarak sira atu iha oan, atu halo mundu tomak sai paraízu, no tau matan ba animál sira. Ninia hakarak mak atu ema hotu goza moris neʼebé kontente ho saúde neʼebé perfeitu ba nafatin.
Maski ema nia moris la sai nuneʼe,a maibé Maromak nia hakarak la troka. (Isaias 46:10, 11) Nia nafatin hakarak atu ema neʼebé halo tuir nia bele moris ba nafatin ho kondisaun neʼebé perfeitu.—Lee Apokalipse 21:3, 4.
2. Oinsá mak ita bele halaʼo moris neʼebé kontente agora?
Jeová kria ita ho presiza espirituál nian, neʼe katak ita ema presiza ninia matadalan no hakarak atu koñese no adora nia. (Lee Mateus 4:4 no 5:3-6.) Nia hakarak ita atu iha relasaun neʼebé besik ho nia, “atu laʼo iha ninia dalan hotu, atu hadomi nia” no atu serbí nia ‘ho ita-nia laran tomak’. (Deuteronómio 10:12; Salmo 25:14) Bainhira ita halo nuneʼe, ita bele sente kontente duni maski hasoru problema. Adora Jeová bele halo ita-nia moris iha folin duni tanba ita moris tuir ninia hakarak.
KEʼE KLEʼAN
Aprende kona-ba domin boot neʼebé Jeová hatudu hodi prepara mundu mai ita no saida mak Bíblia hanorin kona-ba objetivu ba moris.
3. Jeová hakarak atu ema iha moris neʼebé kontente
Loke VÍDEO, depois koʼalia hamutuk kona-ba pergunta tuirmai.
Tanbasá mak Maromak kria mundu furak neʼe?
Lee Eclesiastes 3:11, depois koʼalia hamutuk kona-ba pergunta tuirmai:
Husi eskritura neʼe, saida mak Ita aprende kona-ba Jeová nia hakarak?
4. Jeová nia hakarak la troka
Lee Salmo 37:11, 29 no Isaias 55:11, depois koʼalia hamutuk kona-ba pergunta tuirmai:
Oinsá mak ita bele hatene katak Jeová nia hakarak mai ita ema la troka?
Uma neʼebé aat ona bele hadiʼa fali. Nuneʼe mós, Maromak sei hadiʼa fali mundu neʼebé ema estraga ona, no fó ida-neʼe ba ema neʼebé hadomi nia
5. Adora Jeová bele halo ita-nia moris iha folin duni
Hodi hatene objetivu ba moris, neʼe bele lori kontente mai ita. Loke VÍDEO, depois koʼalia hamutuk kona-ba pergunta tuirmai.
Benefísiu saida mak Terumi hetan tanba aprende kona-ba objetivu ba moris?
Lee Eclesiastes 12:13, depois koʼalia hamutuk kona-ba pergunta tuirmai:
Tanba Jeová halo ona buat barak mai ita, saida mak ita presiza halo atu hatudu agradese ba nia?
KARIK EMA SEI HUSU: “Tanbasá mak ita moris?”
Ita sei hatán saida?
PONTU IMPORTANTE
Jeová hakarak ita atu moris ba nafatin iha mundu ho kondisaun neʼebé perfeitu. Kuandu ita serbí nia ho ita-nia laran tomak, ita bele sente moris neʼe iha folin duni.
Rezumu
Saida mak Jeová nia hakarak loloos ba Adão no Eva?
Oinsá mak ita hatene katak Maromak nia hakarak mai ita ema la troka?
Oinsá mak Ita bele halaʼo moris neʼebé iha folin?
BUKA-HATENE LIUTÁN
Haree evidénsia neʼebé hatudu katak uluk jardín Eden iha duni.
“Jardín Eden—Iha duni ka lae?” (Informasaun husi Livru Haklaken)
Aprende tanbasá mak ita bele fiar katak mundu neʼe sei iha ba nafatin.
Haree saida mak Bíblia hatete kona-ba tanbasá ita moris.
Haree oinsá mak mane ida neʼebé sente katak nia iha buat hotu, ikusmai rekoñese katak buat ruma falta iha ninia moris.
a Iha lisaun tuirmai, Ita sei aprende tanbasá mak ita-nia moris ohin loron la hanesan ho buat neʼebé Maromak hakarak.
-
-
Saida mak Maromak nia Reinu?Moris Haksolok ba Nafatin—Kursu Bíblia Interativu
-
-
2. Sé mak ukun hamutuk ho Jesus?
Jesus la ukun mesak. Ema husi “suku, língua, povu no nasaun hotu . . . sei ukun nuʼudar liurai ba mundu tomak”. (Apokalipse 5:9, 10) Ema naʼin-hira mak sei ukun hamutuk ho Kristu? Husi tempu neʼebé Jesus mai iha mundu, ema millaun ba millaun sai ona Jesus nia dixípulu. Maibé ema naʼin-144.000 deʼit husi ema Kristaun sira-neʼe mak bá lalehan atu ukun hamutuk ho Jesus. (Lee Apokalipse 14:1-4.) Ema Kristaun seluk iha mundu sei sai povu ba Maromak nia Ukun.—Salmo 37:29.
-
-
Maromak nia Ukun sei halo saida?Moris Haksolok ba Nafatin—Kursu Bíblia Interativu
-
-
Maromak nia Ukun sei halo saida?
Maromak nia Ukun hahú ona iha lalehan. Lakleur tan Ukun neʼe sei lori mudansa boot ba mundu. Mai ita hanoin kona-ba buat diʼak balu neʼebé sei akontese iha futuru kuandu Maromak nia Ukun toʼo mai mundu.
1. Oinsá mak Maromak nia Ukun sei lori dame no justisa ba mundu?
Nuʼudar Liurai ba Maromak nia Ukun, Jesus sei halakon ema aat no governu hotu iha funu Armagedon. (Apokalipse 16:14, 16) Iha tempu neʼebá, Bíblia nia promesa tuirmai sei sai loos: “Hela tempu uitoan tan, ema aat sei la iha ona.” (Salmo 37:10) Liuhusi Maromak nia Ukun, Jesus sei halo mundu neʼe nakonu ho dame no justisa.—Lee Isaias 11:4.
2. Kuandu Maromak nia hakarak sai loos iha rai, ema nia moris sei sai oinsá?
Iha Maromak nia Ukun okos, “ema laran-loos sira sei simu rai nuʼudar sira-nian, no sira sei moris ba nafatin iha rai”. (Salmo 37:29) Imajina toʼok ita moris iha mundu neʼebé ema hotu mak laran-loos, hadomi Jeová no hadomi malu! La iha ema ida mak moras, no ema hotu sei moris ba nafatin.
3. Depois halakon tiha ema aat sira, Maromak nia Ukun sei halo saida?
Depois halakon tiha ema aat sira, Jesus sei ukun nuʼudar Liurai ba tinan 1.000. Durante tempu neʼe, Jesus hamutuk ho liurai naʼin-144.000 sei ajuda ema iha mundu sai perfeitu. Antes tinan 1.000 remata, mundu tomak sei sai paraízu furak, nakonu ho ema neʼebé haksolok no simu bensaun oioin tanba halo tuir Jeová nia ukun-fuan sira. Tuirmai, Jesus sei entrega fali ninia ukun ba Aman Jeová. Iha tempu neʼebá, Jeová nia ‘naran sei sai santu’ iha dalan neʼebé kompletu. (Mateus 6:9, 10) Kriatura hotu sei haree duni katak Jeová mak Ukun-Naʼin diʼak tebes neʼebé hanoin ninia kriatura hotu. Ikusmai, Jeová sei halakon tiha Satanás, anju aat sira, no ema hotu neʼebé hili atu kontra hasoru Ninia ukun. (Apokalipse 20:7-10) Situasaun perfeitu neʼebé Maromak nia Ukun lori mai, sei dura ba nafatin.
KEʼE KLEʼAN
Hanoin toʼok tanbasá ita bele fiar katak Maromak sei uza ninia Ukun atu kumpre Bíblia nia promesa kona-ba ita-nia futuru.
4. Maromak nia Ukun sei halakon ema nia governu hotu
“Ema mak domina ema seluk, no neʼe lori deʼit susar.” (Eclesiastes 8:9) Jeová sei uza ninia Ukun atu hadiʼa situasaun aat neʼe.
Lee Daniel 2:44 no 2 Tesalónika 1:6-8, depois koʼalia hamutuk kona-ba pergunta tuirmai:
Jeová no ninia Oan-Mane Jesus sei halo saida ba governu sira iha mundu no ema neʼebé apoia governu sira-neʼe?
Husi buat neʼebé Ita aprende ona kona-ba Jeová no Jesus, oinsá mak Ita bele fiar metin katak buat neʼebé sira halo sempre tuir justisa?
5. Jesus mak Liurai neʼebé diʼak tebes
Nuʼudar Liurai ba Maromak nia Ukun, Jesus sei lori benefísiu barak ba ninia povu iha rai. Loke VÍDEO no haree oinsá Jesus hatudu ona katak nia iha hakarak no kbiit husi Maromak atu ajuda ema.
Bainhira iha mundu, Jesus halo buat oioin atu hatudu kona-ba bensaun sira neʼebé Maromak nia Ukun sei halo iha futuru. Husi lista tuirmai neʼe, Ita rasik hein liuliu ba bensaun saida? Lee eskritura sira neʼebé liga ho bensaun sira-neʼe.
BAINHIRA IHA RAI, JESUS . . .
HUSI LALEHAN, JESUS SEI . . .
kontrola forsa natureza.—Marcos 4:36-41.
rezolve problema kona-ba mundu nia ambiente.—Isaias 35:1, 2.
halo milagre hodi fó-han ema rihun ba rihun.—Mateus 14:17-21.
halakon rai-hamlaha.—Salmo 72:16.
kura moras oioin.—Lucas 18:35-43.
halo ema hotu iha saúde neʼebé perfeitu.—Isaias 33:24.
halo ema mate moris fali.—Lucas 8:49-55.
fó moris-hiʼas ba ema mate no halakon mate.—Apokalipse 21:3, 4.
6. Maromak nia Ukun sei lori futuru kapás
Ukun neʼe sei kumpre Jeová nia hakarak ba ema tuir ninia planu husi tempu uluk kedas. Ema sei moris ba nafatin iha mundu neʼebé sai ona paraízu. Loke VÍDEO atu haree saida mak Jeová halo daudauk atu kumpre ninia hakarak liuhusi ninia Oan-Mane Jesus.
Lee Salmo 145:16, depois koʼalia hamutuk kona-ba pergunta tuirmai:
Ita sente oinsá hodi hatene katak Jeová sei “halo kontente kriatura hotu neʼebé moris hodi fó buat neʼebé sira hakarak”?
EMA BALU DEHAN: “Se ita serbisu hamutuk, ita bele rezolve problema sira iha mundu neʼe.”
Maromak nia Ukun sei rezolve problema saida deʼit neʼebé ema nia governu labele halakon?
PONTU IMPORTANTE
Maromak nia Ukun sei kumpre ninia objetivu. Ukun neʼe sei halo mundu tomak sai paraízu neʼebé nakonu ho ema neʼebé adora Jeová ba nafatin.
Rezumu
Oinsá mak Maromak nia Ukun halo Jeová nia naran sai santu?
Tanbasá mak ita bele fiar katak Maromak nia Ukun sei kumpre Bíblia nia promesa sira?
Husi buat oioin neʼebé Maromak nia Ukun sei halo iha futuru, Ita rasik hein liuliu kona-ba saida?
BUKA-HATENE LIUTÁN
Buka-hatene saida mak funu Armagedon.
Buka-hatene saida deʼit mak sei akontese durante tempu neʼebé Jesus bolu nuʼudar “terus boot”.—Mateus 24:21.
Haree toʼok oinsá mak família sira bele medita hamutuk kona-ba bensaun sira iha futuru neʼebé Maromak nia Ukun sei lori mai.
Lee istória “Haʼu iha pergunta sira neʼebé halo haʼu hanoin barak” no haree oinsá mak mane ida neʼebé uluk kontra governu hetan solusaun neʼebé kleur ona nia buka.
-