Informasaun atu uza hamutuk livru Moris Kristaun no Haklaken
© 2023 Watch Tower Bible and Tract Society of Pennsylvania
1-7 JANEIRU
RIKUSOIN HUSI BÍBLIA | JOB 32-33
Fó kmaan ba sira neʼebé laran-taridu
it-1-E p. 710
Eliú
Eliú la todan ba sorin, nia la uza títulu espesiál ba ema ida. Nia rekoñese katak nia no mós Job mak ema neʼebé halo husi rai-rahun, no ninia Kriadór mak Maromak Boot Liu Hotu. Eliú lakohi halo Job sente taʼuk, nia koʼalia ho Job nuʼudar belun neʼebé loos hodi temi Job nia naran. Neʼe la hanesan ho Elifaz, Bildad no Zofar neʼebé nunka temi Job nia naran.—Job 32:21, 22; 33:1, 6.
Ita haree ema neʼebé “fraku” hanesan Jeová nia haree?
8 Atu hadiʼa ita-nia hanoin ba maluk neʼebé presiza ita-nia tulun, hanoin kona-ba susar no terus neʼebé sira hasoru. Porezemplu, sira balu tahan moras ruma ka depresaun, balu tan hela hamutuk ho família neʼebé fiar la hanesan. Se loron ida ita mós hasoru susar hanesan sira, ita hakarak ema seluk atu komprende ita. Antes Jeová lori povu Izraél ba rai neʼebé nia promete, nia fó avizu ba sira atu la haluha susar neʼebé sira hasoru iha rai-Ejitu, no labele ‘halo toos sira-nia laran’ ba ema neʼebé kiak no kbiit-laek.—Deu 15:7, 11; Lev 25:35-38.
9 Ita labele duun ka tesi lia lalais ba ita-nia maluk neʼebé hasoru problema. Duké sai hanesan neʼe, ita tenkesér ajuda lalais sira neʼebé iha susar laran. (Job 33:6, 7; Mt 7:1) Porezemplu, kuandu ema ida neʼebé lori motór hetan asidente no foin toʼo iha emerjénsia iha ospitál, doutór no enfermeira sira sei soe tempu hodi haksesuk malu kona-ba sé mak halo asidente neʼe ka lae? Lae, sira fó kedas tratamentu ba ema neʼe. Hanesan neʼe mós, kuandu ita-nia maluk ida mak sai fraku tanba problema ruma, ita hakarak ajuda kedas nia hodi nia bele sai metin fali iha lia-loos.—Lee 1 Tesalónika 5:14.
10 Se ita hanoin didiʼak kona-ba irmaun-irmán nia situasaun, ida-neʼe bele ajuda ita atu troka ita-nia hanoin kona-ba sira hodi haree katak sira la “fraku” ida. Porezemplu, hanoin toʼok kona-ba irmán sira neʼebé tahan hasoru susar husi família ba tempu kleur. Sira balu haree hanesan kbiit-laek, maibé loloos hatudu fiar metin. Oinsá ho irmán sira neʼebé mesak haboot oan, maibé la falta reuniaun? Ka, joven sira neʼebé loroloron hetan susar iha eskola tanba sira kaer metin ba lia-loos? Sira hotu hadomi Jeová no hakarak atu laran-metin nafatin ba nia. Kuandu ita hanoin didiʼak kona-ba ita-nia maluk sira-nia hakaʼas-an hodi serbí Jeová, ida-neʼe sei ajuda ita atu hatene katak sira loloos “riku iha fiar”.—Tiago 2:5.
Bainhira mak tempu diʼak atu koʼalia?
17 Mane ida tan neʼebé vizita Job mak Eliú. Nia mai husi Abraão nia família. Nia rona ba Job no mós mane naʼin-tolu seluk. Nia rona didiʼak ba sira-nia liafuan, tan neʼe mak nia bele fó konsellu neʼebé klaru ho laran-diʼak atu ajuda Job hadiʼa ninia hanoin. (Job 33:1, 6, 17) Buat neʼebé importante liu ba Eliú mak atu fó glória ba Jeová, laʼós ba ninia an rasik ka ba ema seluk. (Job 32:21, 22; 37:23, 24) Ita aprende husi Eliú nia ezemplu katak iha tempu atu nonook no rona. (Tgo 1:19) Ita mós aprende katak bainhira ita fó konsellu, buat neʼebé importante liu mak atu fó glória ba Jeová, laʼós ba ita-nia an rasik.
18 Ita bele hatudu katak ita hafolin kbiit atu koʼalia liuhusi halo tuir Bíblia nia konsellu kona-ba bainhira no oinsá atu koʼalia. Liurai Salomão hatete: “Liafuan neʼebé koʼalia iha tempu neʼebé loos mak hanesan masán osan-mean iha bikan osan-mutin nia laran.” (Prv 25:11) Se ita rona didiʼak ba ema seluk no hanoin uluk antes koʼalia, ita-nia liafuan bele sai hanesan masán osan-mean neʼebé folin-boot no furak. Maski ita koʼalia barak ka lae, ita sei hametin ema seluk no halo Jeová kontente. (Prv 23:15; Éf 4:29) Neʼe mak dalan diʼak liu hotu atu hatudu agradese ba prezente neʼebé Maromak fó mai ita.
Keʼe no hetan buat murak husi Bíblia
Hakbesik nafatin ba Jeová
10 Nuneʼe mós kona-ba dalan neʼebé ita hadiʼa ita-nia an. Maski ita hakarak haree diʼak, maibé lalika hanoin demais atu halo ita-nia isin ka oin haree hanesan joven fali. Bíblia hatete: “Fuuk mutin mak hanesan koroa furak ba ema kuandu laʼo iha dalan neʼebé loos.” (Prv 16:31) Tuir Jeová nia haree, buat neʼebé importante liu mak ita ema oinsá loos iha ita-nia laran, laʼós oinsá ita haree iha liʼur, no ita mós presiza haree ita-nia an hanesan Jeová haree. (Lee 1 Pedro 3:3, 4.) Tan neʼe, ita la presiza tau ita-nia saúde iha perigu laran hodi buka tratamentu ka ai-moruk atu sai bonitu ka bonita liu. Maski ita sai idade ka ita-nia isin ladún diʼak, maibé “Jeová nia haksolok” mak halo ita haree diʼak. (Ne 8:10) Iha mundu foun, ita sei hetan saúde perfeitu no sai joven fali. (Job 33:25; Isa 33:24) Toʼo tempu neʼebá, ita presiza halo desizaun diʼak kona-ba saúde no tau fiar ba Jeová hodi hakbesik nafatin ba nia.—1Ti 4:8.
8-14 JANEIRU
RIKUSOIN HUSI BÍBLIA | JOB 34-35
Kuandu ema diʼak hetan susar
Maromak nia hahalok hanesan saida?
Maromak sempre halo buat neʼebé loos. Tuir loloos, “Maromak neʼebé loos nunka halo buat neʼebé aat, Ida neʼebé Kbiit Boot Liu Hotu nunka halo sala!” (Job 34:10) Maromak nia tesi-lia sempre loos, hanesan ema neʼebé hakerek salmu dehan ba Jeová: “Ita sei tesi-lia ba povu hodi la todan ba sorin.” (Sal 67:4) Tanba “Jeová haree ema nia laran”, ema labele lohi Maromak, nia sempre hatene lia-loos no nia sei tesi-lia ho loloos. (1Sa 16:7) Laʼós neʼe deʼit, Maromak mós haree hahalok la justisa hotu neʼebé akontese iha mundu, no nia promete katak lakleur tan “ema aat . . . sei lakon husi rai.”—Prv 2:22.
Bainhira Maromak nia Ukun toʼo mai, saida mak sei lakon?
5 Jeová sei halo saida? Agora daudaun, Jeová fó oportunidade ba ema aat atu troka sira-nia hahalok. (Isa 55:7) Maski lakleur tan mundu neʼe sei lakon, maibé neʼe la dehan katak Jeová tesi lia ona ba ema aat sira-neʼe. Entaun, saida mak sei akontese ba ema sira neʼebé lakohi troka no fó nafatin sira-nia apoiu ba mundu aat neʼe toʼo tempu terus boot mosu mai? Jeová promete ona katak nia sei halakon ema aat hotu husi mundu neʼe. (Lee Salmo 37:10.) Ohin loron, ema barak halo hahalok aat subasubar, no dala barak ema la bele kaer-toman sira no sira la hetan kastigu ba sira-nia hahalok. (Job 21:7, 9) Maibé Bíblia fó-hanoin mai ita katak: “Maromak nia matan haree ba ema nia hahalok sira, no Nia haree ema nia hakat hotu. La iha fatin nakukun ka lalatak metan ba ema sira neʼebé halo sala atubele subar an.” (Job 34:21, 22) Ema la bele subar husi Jeová. Nia bele haree buat hotu neʼebé ema aat sira halo daudaun. Funu Armajedón liutiha, ita sei la haree tan ema aat iha mundu neʼe, tanba sira hotu sei lakon ba nafatin.—Sal 37:12-15.
Ita sei sidi tanba Jesus ka lae?
19 Neʼe mós akontese ohin loron ka lae? Sin. Ohin loron, ema barak sidi tanba ita neutrál kona-ba buat polítiku. Sira hakarak ita atu vota iha eleisaun. Maibé ita rekoñese katak se ita hili ema atu ukun ita, neʼe katak ita la simu Jeová nia ukun. (1Sa 8:4-7) Karik ema mós hanoin katak ita presiza harii eskola, ospitál no mós halo atividade karidade sira seluk. Sira sidi tanba ita tau fokus ba serbisu haklaken duké koko atu hadiʼa mundu nia problema.
20 Saida mak ajuda ita atu la sidi? (Lee Mateus 7:21-23.) Ita presiza tau fokus atu halo serbisu haklaken neʼebé Jesus haruka ita atu halo. (Mt 28:19, 20) Ita lalika gasta tempu atu koko hadiʼa problema polítiku no problema sosiál neʼebé akontese. Ita hadomi ema no hanoin sira, maibé ita hatene katak dalan diʼak liu atu ajuda sira mak hodi haklaken kona-ba Maromak nia Ukun no ajuda sira atu iha relasaun diʼak ho Jeová.
Keʼe no hetan buat murak husi Bíblia
Fó Ita-nia an nuʼudar voluntáriu hodi hahiʼi Jeová!
3 Mane ida rona hela bainhira ema naʼin-tolu ho Job koʼalia ba malu, nia naran Eliú. Bainhira sira ramata koʼalia ba malu, Eliú husu ba Job kona-ba Jeová: “Se ó-nia hahalok mak loos, ó bele fó saida ba nia? Ka saida mak nia sei simu husi ó?” (Job 35:7) Husi Eliú nia liafuan, nia mós hatete katak ita-nia hakaʼas-an atu serbí Jeová la iha folin ka lae? Lae. Tanba Jeová la korrije Eliú hanesan nia korrije mane naʼin-tolu neʼe. Eliú esplika katak Jeová la depende ba ita atu adora nia, tanba nia la falta buat ida. Nia la presiza ita atu halo buat ruma ba nia hodi nia bele sai riku liu ka forsa liu. Tuir loloos, hahalok diʼak ka kbiit sira neʼebé ita iha mai hotu husi Maromak, no nia gosta haree oinsá ita uza kbiit sira-neʼe.
15-21 JANEIRU
RIKUSOIN HUSI BÍBLIA | JOB 36-37
Tanbasá Ita bele tau fiar ba Maromak nia promesa kona-ba moris rohan-laek
w15-E 10/1 p. 13 par. 1-2
Ita bele hatene Maromak ka lae?
MAROMAK LA IHA HUN NO LA IHA ROHAN: Bíblia hanorin katak Maromak iha “husi uluk kedas no ba nafatin”. (Sal 90:2) Neʼe katak Maromak la iha hun no la iha rohan. Husi ema nia haree, “Ninia tinan sira barak tebes toʼo sura labele [nota, ‘ema labele komprende’].”—Job 36:26.
Neʼe lori benefísiu saida mai Ita? Maromak promete katak Ita sei moris ba nafatin se Ita hatene didiʼak nia. (Jo 17:3) Maibé oinsá mak ita bele tau fiar ba promesa neʼe se nia la moris ba nafatin? Só “Liurai rohan-laek” deʼit mak bele kumpre promesa hanesan neʼe.—1Ti 1:17.
Ita hafolin buat neʼebé Maromak fó ba ita ka lae?
6 Bee mak líkidu neʼebé eziste iha mundu tanba ita-nia planeta no loro-matan iha distánsia neʼebé loos. Se mundu besik liu uitoan ba loro-matan, bee hotu sei maran, rezultadu mak mundu sei manas, rai sei maran no labele sustenta moris. Se mundu dook liu uitoan husi loro-matan, bee hotu sei sai jelu-fatuk, no mundu sei nakonu ho jelu-rahun no labele sustenta moris. Tanba Jeová tau mundu iha fatin neʼebé loos, siklu bee nian bele sustenta moris. Loro-matan hamanas tasi-been no bee iha rai, no bee nia suar saʼe ba atmosfera hodi forma kalohan. Tinan-tinan, loro-matan halo nuneʼe ba bee litru millaun ba millaun. Bee sira-neʼe halibur iha atmosfera maizumenus ba loron sanulu, depois neʼe tun fali nuʼudar udan ka jelu-rahun. Ikusmai bee suli fali ba tasi ka fatin sira seluk, no siklu neʼe repete fali. Jeová kria siklu neʼe atu mundu bele kontinua iha bee. Neʼe hatudu katak Jeová matenek no iha kbiit boot.—Job 36:27, 28; Ecl 1:7.
Hametin ita-nia esperansa
16 Esperansa kona-ba moris ba nafatin mak prezente folin-boot husi Maromak. Ita hein namanas ba futuru kapás neʼebé sei akontese duni. Esperansa mak hanesan ankor neʼebé bele ajuda ita tahan bainhira hasoru susar sira, ema fó-terus, ka ita-nia moris iha perigu laran. Esperansa mós hanesan kapasete tanba bele proteje ita-nia hanoin atu ita bele halo buat neʼebé loos no la monu ba sala. Esperansa husi Bíblia ajuda ita hakbesik liután ba Maromak no hatudu katak nia hadomi tebes ita. Ita hetan benefísiu boot bainhira ita kontinua hametin ita-nia esperansa.
Keʼe no hetan buat murak husi Bíblia
it-1-E p. 492
Komunikasaun
Iha Bíblia nia tempu, ema hatutan informasaun no ideia sira hodi uza dalan oioin. Dala barak informasaun lokál no informasaun kona-ba rai seluk habelar liuhusi ema neʼebé konta tutan ba malu. (2Sa 3:17, 19; Job 37:20) Ema neʼebé laʼo rai, liuliu negósiu-naʼin sira neʼebé halo viajen nuʼudar grupu boot, lori notísias husi fatin dook bainhira sira para atu buka hahán, bee, ka buat seluk tan iha sidade sira ka iha dalan. Rai-Palestina mak fatin neʼebé úniku tanba iha ligasaun ho Ázia, Áfrika, no Europa, neʼe halo fasil ba ema neʼebé hela iha Palestina atu hetan informasaun kona-ba akontesimentu sira iha rai dook. Ema mós rona informasaun lokál no mós informasaun husi rai seluk iha sidade nia merkadu.
22-28 JANEIRU
RIKUSOIN HUSI BÍBLIA | JOB 38-39
Ita fahe tempu atu haree ba kriasaun ka lae?
Ita prontu atu hein ba Jeová ka lae?
7 Bainhira Bíblia esplika kona-ba oinsá Jeová kria mundu, Bíblia hatete katak nia “deside mundu neʼe nia luan no naruk”, tau “mundu nia riin sira” no tau mundu nia “fatuk prinsipál”. (Job 38:5, 6) Nia mós uza tempu atu hanoin kona-ba ninia serbisu sira. (Gén 1:10, 12) Anju sira sente oinsá bainhira haree Jeová kria buat oioin? Klaru katak sira kontente tebes. Tan neʼe, sira komesa “hasai lian hodi hahiʼi Maromak”. (Job 38:7) Saida mak ita aprende? Jeová uza tinan rihun ba rihun atu kria mundu, fitun sira no buat moris hotu, no bainhira nia haree ba buat hotu neʼebé nia kria, nia hatete: “Diʼak tebes.”—Gén 1:31.
Moris-hiʼas hatudu sai Maromak nia domin, matenek no pasiénsia
2 Primeiru Maromak Jeová kria ninia Oan-Mane Jesus. Tuirmai, liuhusi ninia Oan-Mane, “Maromak kria buat hotu”, inklui anju millaun ba millaun. (Kol 1:16) Jesus kontente tebes atu serbisu hamutuk ho ninia Aman. (Prv 8:30) Anju sira mós haksolok tebes bainhira haree Jeová no ninia Badaen neʼebé Matenek katak Jesus, kria lalehan no rai. Sira halo saida atu hatudu sai sira-nia ksolok? Sira “hahú hasai lian hodi hahiʼi Maromak”, no ita bele fiar katak sira kontinua fó hahiʼi ba Maromak bainhira sira haree buat seluk neʼebé nia kria, inklui ema. (Job 38:7; Prv 8:31) Kriasaun ida-idak hatudu sai Jeová nia domin no matenek.—Sal 104:24; Rom 1:20.
Aprende kona-ba Jeová liuhusi ninia kriasaun
8 Ita bele tau fiar ba Jeová. Jeová ajuda Job atu tau fiar liután ba Nia. (Job 32:2; 40:6-8) Bainhira Jeová konversa ho Job, nia temi buat barak neʼebé nia kria ona, inklui fitun sira, kalohan no rai-lakan. Jeová mós koʼalia kona-ba animál sira hanesan karau-aman no kuda. (Job 38:32-35; 39:9, 19, 20) Buat hotu neʼe fó prova katak Maromak iha forsa boot, iha matenek no mós domin. Job nia fiar ba Jeová sai metin liután depois konversa tiha ho Jeová. (Job 42:1-6) Nuneʼe mós bainhira ita haree didiʼak ba kriasaun sira, neʼe fó-hanoin ita katak Jeová mak matenek no kbiit boot liu fali ita. Nia mós bele no sei halakon ita-nia susar hotu. Lia-loos neʼe bele ajuda ita atu tau fiar liután ba Jeová.
Keʼe no hetan buat murak husi Bíblia
it-2-E p. 222
Ida neʼebé halo lei
Jeová mak Maromak neʼebé halo lei. Jeová deʼit mak Ida neʼebé halo lei sira iha universu. Nia halo lei fízika nian neʼebé kontrola ninia kriasaun neʼebé la iha moris (Job 38:4-38; Sal 104:5-19), no animál sira-nia moris. (Job 39:1-30) Nuʼudar Jeová nia kriasaun, ema mós halo tuir Jeová nia lei fízika nian. Maibé tanba ita mak kriatura neʼebé iha kbiit atu hanoin no iha presiza espirituál, ita mós tenke halo tuir Maromak nia lei kona-ba morál, hanesan ita halo tuir lei fízika nian. (Rom 12:1; 1Ko 2:14-16) Anju sira mós presiza halo tuir Jeová nia lei.—Sal 103:20; 2Pe 2:4, 11.
La iha buat ida mak bele troka Jeová nia lei fízika nian. (Jer 33:20, 21) Iha universu tomak neʼebé ema bele haree no hatene, Jeová nia lei neʼebé kontrola universu mak estavel no la iha mudansa, tan neʼe sientista sira bele kalkula movimentu husi fulan, planeta, no fitun sira ho loloos. Ema neʼebé kontra lei fízika nian sei hetan kedas konsekuénsia. Nuneʼe mós la iha buat ida mak bele troka Maromak nia lei kona-ba morál, no sira neʼebé kontra lei neʼe labele sees husi kastigu. Karik sira neʼebé kontra lei morál nian la hetan kedas kastigu hanesan kuandu kontra lei natureza nian, maibé sira sei hetan duni konsekuénsia. “Ita labele bosok Maromak. Tanba buat naran deʼit neʼebé ema kari, nia mós sei koʼa ida-neʼe.”—Gal 6:7; 1Ti 5:24.
29 JANEIRU–4 FEVEREIRU
RIKUSOIN HUSI BÍBLIA | JOB 40-42
Aprende lisaun husi buat neʼebé akontese ba Job
Sé mak hatene Maromak Jeová nia hanoin?
4 Nuʼudar ita hanoin kleʼan kona-ba Maromak Jeová nia atividade sira, ita hakarak kuidadu atu la tesi lia kona-ba Maromak Jeová nia hahalok sira tuir ita ema nia hanoin. Kona-ba ema hanesan neʼe, Maromak Jeová hatete: “Imi hanoin katak haʼu sei sai hanesan duni ho imi.” (Sal 50:21) Maizumenus tinan 175 liubá matenek-naʼin kona-ba Bíblia hatete: “Baibain ema tesi lia kona-ba Maromak nia hahalok sira tuir sira rasik nia hanoin, no sira hanoin katak Maromak tenke apoia no hakruʼuk ba lei sira neʼebé ema mak halo.”
5 Ita presiza kuidadu atu la hanoin katak Maromak Jeová nia hanoin no hakarak sempre hanesan ita-nian. Tanbasá mak ita labele hanoin hanesan neʼe? Nuʼudar ema sala-naʼin, ita la komprende buat hotu. Tan neʼe kuandu ita lee Bíblia karik ita bele hanoin katak buat balu neʼebé Maromak halo ladún loos. Nasaun Izraél antigu monu ba hanoin sala neʼe no sente katak dalan neʼebé Maromak Jeová tau matan ba sira mak ladún diʼak. Hanoin toʼok saida mak Maromak Jeová hatete ba sira: “Imi hotu sei hatete duni nuneʼe: ‘Maromak Jeová nia dalan la loos.’ Favór rona bá, oh, umakain Israel. Imi hatene ka lae katak haʼu-nia dalan loos? Imi hatene ka lae katak imi-nia dalan mak la loos?”—Eze 18:25.
6 Dalan ida neʼebé ajuda ita atu la monu ba lasu atu tesi lia ba Maromak Jeová tuir ita-nia hanoin mak hodi rekoñese katak ita la hatene buat hotu no dala ruma buat neʼebé ita hanoin mak sala. Job mós presiza aprende kona-ba neʼe. Durante nia hasoru susar sira, nia sai laran-tun no nia hanoin demais kona-ba nia an deʼit. Nia haluha atu hanoin kona-ba buat seluk tan neʼebé importante liu. Maibé ho domin Maromak Jeová ajuda nia atu loke ninia hanoin. Maromak Jeová husu Job pergunta 70 liu no Job la bele hatán pergunta sira-neʼe ida. Hodi halo nuneʼe, Maromak Jeová hatudu katak buat neʼebé Job komprende mak uitoan deʼit. Job hatudu haraik-an hodi hadiʼa nia dalan atu hanoin.—Lee Job 42:3, 6.
Hanoin nafatin kona-ba Jeová nia direitu atu ukun
12 Jeová la iha sentimentu ka lae hodi fó konsellu ba Job maski Job hasoru ona terus oioin? Lae, Job rasik mós la sente nuneʼe. Job komprende no hafolin Jeová nia konsellu. Nia dehan: “Haʼu dada fali haʼu-nia liafuan, no haʼu arrepende an hodi tuur iha rai-rahun no ahi-kadesan laran.” (Job 42:1-6) Antes neʼe, mane joven ida naran Eliú mós ajuda ona Job atu hadiʼa ninia hanoin. (Job 32:5-10) Bainhira Job rona ba Jeová nia konsellu no hadiʼa ninia hanoin, Jeová fó-hatene ba ema seluk katak nia kontente tebes ho Job nia laran-metin.—Job 42:7, 8.
“Tau esperansa ba Jeová”
17 Iha mós Jeová nia atan sira seluk neʼebé kontinua hatudu aten-brani no fiar metin bainhira hasoru susar. Iha apóstolu Paulo nia karta ba ema Ebreu, nia temi kona-ba Maromak nia atan barak no bolu sira nuʼudar “testemuña barak hanesan kalohan neʼebé haleʼu ita”. (Ebr 12:1) Sira hotu hasoru susar boot. Maibé sira nafatin laran-metin ba Jeová. (Ebr 11:36-40) Sira-nia hakaʼas an atu tahan susar mak saugati deʼit ka lae? Klaru katak lae. Maski sira la haree Maromak kumpre ninia promesa hotu durante sira-nia moris, maibé sira kontinua tau esperansa ba Jeová. Sira iha konfiansa katak sira sei haree Jeová nia promesa sira sai loos tanba sira fiar metin katak Jeová kontente ho sira. (Ebr 11:4, 5) Sira-nia ezemplu hametin ita atu kontinua tau esperansa ba Jeová.
18 Ohin loron, mundu nia situasaun sai aat liután. (2Ti 3:13) Satanás nafatin koko Maromak nia povu. Maski hasoru susar naran deʼit, mai ita deside metin atu serbí Jeová no fiar metin katak “ita tau ona ita-nia esperansa ba Maromak neʼebé moris”. (1Ti 4:10) Bensaun neʼebé Maromak haraik ba Job hatudu katak “Jeová iha domin neʼebé boot tebes no laran-sadiʼa”. (Tgo 5:11) Mai ita mós nafatin laran-metin ba Jeová no fiar metin katak nia sei “fó kolen ba sira neʼebé buka nia ho laran”.—Lee Ebreu 11:6.
Keʼe no hetan buat murak husi Bíblia
it-2-E p. 808
Goza
Job mantein ninia integridade maski nia tenke tahan hasoru ema neʼebé goza nia. Maibé nia mós haburas hanoin neʼebé la loos no halo sala, tan neʼe nia hetan konsellu. Kona-ba Job, Eliú dehan: “Mane ida-neʼebé mak hanesan Job, neʼebé hemu liafuan hamoe nian hanesan hemu bee?” (Job 34:7) Job hanoin barak demais katak nia mak loos liu duké Maromak, no nia hakarak tau énfaze demais kona-ba nia rasik nia hahalok loos duké Maromak nian. (Job 35:2; 36:24) Bainhira Job nia “kolega” naʼin-tolu goza nia, Job haree katak sira ataka nia rasik, laʼós Jeová. Tan neʼe, Job sai hanesan ema neʼebé kontente atu simu liafuan goza hanesan hemu bee. Liutiha neʼe, Maromak esplika ba Job katak loloos gozadór sira-neʼe koʼalia lia-bosok hasoru Maromak. (Job 42:7) No mós bainhira povu Izraél hakarak atu iha liurai, Jeová dehan ba profeta Samuel: “Laʼós ó mak sira la simu, maibé haʼu mak ida neʼebé sira la simu nuʼudar sira-nia liurai.” (1Sa 8:7) Jesus dehan ba ninia dixípulu sira: “Ema sei fó-terus ba imi no oho imi, no nasaun sira hotu sei odi imi tanba haʼu-nia naran [laʼós tanba imi].” (Mt 24:9) Hanoin-hetan buat sira-neʼe sei ajuda ema Kristaun atu tahan ho hanoin neʼebé loos kuandu ema goza sira, no sira sei hetan kolen tanba sira tahan.—Lc 6:22, 23.
5-11 FEVEREIRU
RIKUSOIN HUSI BÍBLIA | SALMO 1-4
Hili atu apoia Maromak nia Ukun
“Haʼu sei doko nasaun hotu”
8 Ema halo saida kuandu ita haklaken ba sira? Ema barak liu lakohi simu. (Lee Salmo 2:1-3.) Nasaun sira sai hirus. Sira lakohi simu Liurai neʼebé Jeová hili. Sira la haree mensajen neʼebé ita haklaken kona-ba Maromak nia Ukun nuʼudar “liafuan diʼak”. Governu balu bandu ita-nia serbisu haklaken. Maski ukun-naʼin barak iha nasaun sira-neʼe dehan katak sira adora Maromak, maibé sira lakohi husik sira-nia podér. Hanesan ho ukun-naʼin sira iha Jesus nia tempu, ohin loron ukun-naʼin sira kontra Liurai neʼebé Maromak hili hodi ataka Jesus nia dixípulu sira.—Aps 4:25-28.
Mantein neutrál iha mundu neʼebé la iha unidade
11 Materializmu. Se ita mak haree osan ka sasán nuʼudar buat neʼebé importante tebes ba ita-nia moris, neʼe bele halo susar ba ita atu mantein pozisaun neʼebé neutrál. Porezemplu, iha tinan 1970, tanba lakohi tuir partidu, ema fó terus ba Testemuña sira iha rai-Malavi. Tan neʼe sira barak presiza husik sasán no rikusoin hotu hodi halai. Maibé triste mak balu hakarak moris diʼak nafatin no lakohi husik sira-nia sasán. Irmán ida naran Ruth hatete: “Testemuña balu halai hamutuk ho ami, maibé ikusmai tama fali partidu hodi sira bele fila fali ba uma atu bele moris diʼak nafatin, sira lakohi moris iha kampu refujiadu.” Maibé Maromak nia povu barak mak mantein nafatin neutrál maski moris ho problema ekonomia no lakon sira-nia sasán hotu.—Ebr 10:34.
Keʼe no hetan buat murak husi Bíblia
it-1-E p. 425
Trigu-kulit
Neʼe mak kulit mihis neʼebé taka sevada ka trigu musan. Bíblia uza liafuan trigu-kulit nuʼudar ilustrasaun, hodi tuir toman husi tempu antigu kona-ba haliri trigu. Kuandu halibur trigu ka sevada-musan, ema sei soe deʼit ninia kulit tanba la iha folin, entaun neʼe mak sai hanesan símbolu ba buat neʼebé la iha folin, ema la gosta, no tenkesér haketak husi buat neʼebé diʼak no soe tiha.
Primeiru, ema baku hodi hasai trigu-musan husi ninia kulit. Tuirmai sira haliri atu nuneʼe anin bele huu ketak trigu-kulit no boen sira. Neʼe mak ilustrasaun neʼebé diʼak atu hatudu oinsá mak Maromak Jeová haketak apóstata sira husi ninia povu, no oinsá nia halakon ema aat no nasaun sira neʼebé kontra nia. (Job 21:18; Sal 1:4; 35:5; Isa 17:13; 29:5; 41:15; Os 13:3) Maromak nia Ukun sei harahun ninia inimigu sira toʼo uut, no sira sai hanesan trigu-kulit neʼebé anin huu sai tiha.—Dan 2:35.
Dala barak ema sunu trigu-kulit neʼebé la iha folin atu labele kahur fali ho trigu-musan neʼebé halibur ona. Hanesan neʼe mós, bainhira João Batista fó-hatene nanis kona-ba oinsá relijiaun falsu sira sei lakon, nia dehan katak Jesus mak hanesan toʼos-naʼin neʼebé haliri trigu, no haloot trigu neʼebé diʼak hodi “sunu trigu-kulit ho ahi neʼebé labele hamate”.—Mt 3:7-12; Lc 3:17.
12-18 FEVEREIRU
RIKUSOIN HUSI BÍBLIA | SALMO 5-7
Laran-metin nafatin maski ema hatudu hahalok aat
Lee Bíblia bele ajuda ita tahan problema sira
7 Ita-nia belun ka família ida hakanek Ita-nia laran ka lae? Se nuneʼe, Ita bele hetan ajuda hodi estuda kona-ba Liurai David nia oan-mane Absalão. Absalão la laran-metin ba ninia aman David no nia koko atu hadau ukun husi Liurai David.—2Sa 15:5-14, 31; 18:6-14.
8 (1) Halo orasaun. Hanoin kona-ba istória neʼe, no fó sai ba Jeová kona-ba buat neʼebé Ita sente tanba ema trata aat Ita. (Sal 6:6-9) Fó sai ida-neʼe ho klaru. Tuirmai husu Jeová atu ajuda Ita hetan prinsípiu neʼebé bele ajuda Ita atu tahan susar neʼe.
Fiar metin katak ita hetan ona lia-loos
3 Ita-nia fiar ba Maromak labele bazeia deʼit ba domin neʼebé irmaun-irmán sira hatudu. Tanbasá? Tanba se ita-nia fiar bazeia deʼit ba ida-neʼe, fasil atu lakon ita-nia fiar. Porezemplu, karik Ita sei para serbí Jeová se irmaun ka irmán ida, katuas kongregasaun ka pioneiru ida halo sala sériu. Ita mós karik sei para serbí Jeová se irmaun ka irmán ida hakanek Ita-nia laran ka kontra lia-loos no hatete katak Ita-nia fiar mak la loos. Tan neʼe, se Ita hakarak iha fiar neʼebé metin, Ita presiza haburas relasaun metin ho Jeová. Se Ita-nia fiar bazeia deʼit ba buat neʼebé ema seluk halo no laʼós bazeia ba Ita-nia relasaun diʼak ho Maromak, Ita-nia fiar sei la metin. Buat neʼebé Ita sente kona-ba Jeová no ninia povu bele ajuda Ita atu haburas fiar. Maibé atu hametin Ita-nia fiar, Ita mós presiza estuda kleʼan Bíblia no komprende buat neʼebé Ita aprende. Ita tenke prova rasik katak Bíblia hanorin lia-loos kona-ba Jeová.—Rom 12:2.
4 Jesus hatete katak ema balu sei simu lia-loos “ho haksolok”, maibé sira-nia fiar sai fraku bainhira hetan koko. (Lee Mateus 13:3-6, 20, 21.) Karik sira la komprende katak sira sei hasoru problema bainhira laʼo tuir Jesus. (Mt 16:24) Ka karik sira hanoin katak ema Kristaun sei la hasoru problema no simu deʼit bensaun. Maibé iha mundu aat neʼe sei mosu problema oioin. Situasaun iha ita-nia moris bele troka no halakon ita-nia ksolok.—Sal 6:6; Ecl 9:11.
Keʼe no hetan buat murak husi Bíblia
it-1-E p. 995
Rate
Iha Roma 3:13, apóstolu Paulo temi fali Salmo 5:9 hodi fó sai katak ema aat no lohidór sira-nia garganta mak hanesan “rate neʼebé nakloke”. Rate neʼebé nakloke sei sai nakonu ho mate-isin no buat neʼebé dodok, hanesan neʼe mós ema aat sira-nia garganta sei nakloke atu fó sai liafuan neʼebé aat no dodok.—Kompara Mt 15:18-20.
19-25 FEVEREIRU
RIKUSOIN HUSI BÍBLIA | SALMO 8-10
“Oh Jeová, haʼu sei hahiʼi Ita”!
Hafolin priviléjiu atu sai parte ba Jeová nia família
6 Jeová prepara hela-fatin neʼebé furak ba ita. Kleur antes Jeová kria ema, nia prepara uluk mundu ba ema. (Job 38:4-6; Jer 10:12) Tanba Jeová laran-diʼak no laran-luak, nia kria buat diʼak oioin atu halo ita kontente. (Sal 104:14, 15, 24) Dala ruma nia uza tempu atu hanoin kona-ba buat neʼebé nia kria ona no nia dehan “katak ida-neʼe diʼak”. (Gén 1:10, 12, 31) Nia hafolin ema hodi fó kbiit ba sira atu domina buat hotu iha rai. (Sal 8:6) Maromak hakarak ema neʼebé perfeitu atu sente kontente no tau matan ba ninia kriasaun ba nafatin. Ita fó agradese beibeik ba Jeová kona-ba neʼe ka lae?
Ita hafolin buat neʼebé Maromak fó ba ita ka lae?
10 Dalan ida atu bele hatudu katak ita hafolin kbiit atu koʼalia mak hodi esplika ita-nia fiar ba ema sira neʼebé fiar ba evolusaun. (Sal 9:1; 1Pe 3:15) Ema sira neʼebé habelar ideia kona-ba evolusaun hakarak ita atu fiar katak mundu no moris hotu mosu mesak deʼit. Hodi uza Bíblia no mós pontu balu iha lisaun neʼe, ita bele defende Jeová no esplika ba ema sira neʼebé prontu atu rona tanbasá ita fiar katak nia mak Kriadór ba lalehan no rai.—Sal 102:25; Isa 40:25, 26.
Hatudu ezemplu diʼak liuhusi Ita-nia liafuan
13 Kanta ho laran tomak. Bainhira ita kanta iha reuniaun, ita-nia objetivu primeiru mak atu fó hahiʼi ba Jeová. Irmán Sara sente katak ninia lian ladún furak. Maski nuneʼe, nia hakarak fó hahiʼi ba Jeová hodi kanta. Tan neʼe, bainhira nia prepara ba reuniaun, nia mós treinu atu kanta knananuk sira. Nia koko atu komprende oinsá knananuk nia liafuan liga ho tópiku neʼebé sei aprende iha reuniaun. Sara hatete: “Neʼe ajuda haʼu atu tau fokus ba knananuk nia liafuan sira, duké ba haʼu-nia abilidade atu kanta.”
Keʼe no hetan buat murak husi Bíblia
it-1-E p. 832
Liman-fuan
Bíblia fó sai katak Maromak kumpre ninia serbisu ho ninia “liman-fuan”, porezemplu bainhira nia hakerek Ukun-Fuan Sanulu iha fatuk-belar rua (Éx 31:18; Deu 9:10), halo milagre (Éx 8:18, 19, nota), no kria lalehan (Sal 8:3). Bainhira Bíblia dehan katak Maromak nia “liman-fuan” mak kria buat oioin, neʼe refere ba ninia espíritu santu, ka ninia forsa neʼebé ativu. Ita bele hatene ida-neʼe liuhusi livru Génesis neʼebé konta katak Maromak nia forsa neʼebé ativu (ruah, “espíritu”) mak book an bá-mai iha bee leten. (Gén 1:2) Maibé Eskritura Lian Gregu mak ajuda duni ita atu komprende katak Maromak nia “liman-fuan” refere ba ninia “espíritu”. Livru Mateus dehan katak Jesus duni sai anju aat sira hodi uza ‘Maromak nia espíritu santu’ no livru Lucas dehan katak nia halo ida-neʼe ho “Maromak nia liman-fuan”.—Mt 12:28; Lc 11:20, nota.
TREINU KONA-BA HAKLAKEN
Ajuda estudante Bíblia hetan batizmu
15 Uluk Ita sente taʼuk atu sai Testemuña ba Jeová ka lae? Karik Ita sente katak Ita sei nunka bele haklaken husi uma ba uma. Ka karik Ita taʼuk família ka belun sira kontra Ita. Se nuneʼe, karik Ita bele komprende Ita-nia estudante nia sentimentu. Jesus rekoñese katak ema balu sei sente taʼuk. Maibé nia anima ninia dixípulu atu la husik sentimentu taʼuk hanetik sira atu serbí Jeová. (Mt 10:16, 17, 27, 28) Oinsá Jesus ajuda ninia dixípulu atu manán sentimentu taʼuk? Oinsá Ita bele banati-tuir nia?
16 Neineik-neineik treinu estudante Bíblia atu fó sai ninia fiar ba ema seluk. Karik Jesus nia dixípulu sente laran-taridu bainhira nia haruka sira atu bá haklaken. Maibé Jesus ajuda sira hodi fó-hatene kona-ba sira bele haklaken ba sé no mensajen saida mak sira presiza fó sai. (Mt 10:5-7) Oinsá Ita bele banati-tuir Jesus? Ajuda Ita-nia estudante atu buka-hatene nia bele haklaken ba sé. Porezemplu, husu nia se nia koñese ema ruma neʼebé bele hetan benefísiu hodi aprende lia-loos espesífiku husi Bíblia. Tuirmai ajuda nia prepara no hatudu ba nia dalan simples atu fahe lia-loos. Se bele, treinu hamutuk ho nia hodi uza parte ho títulu “Ema balu dehan” no “Karik ema sei husu” iha livru Moris Haksolok ba Nafatin. Bainhira Ita treinu Ita-nia estudante, tau fokus atu ajuda nia uza Bíblia hodi fó resposta neʼebé simples no respeitu.
17 Ajuda estudante Bíblia atu tau fiar ba Jeová. Jesus hatete ba ninia dixípulu katak Jeová sei ajuda sira tanba Jeová hadomi sira. (Lee Mateus 10:19, 20, 29-31.) Fó-hanoin Ita-nia estudante katak Jeová mós sei ajuda nia. Ita bele ajuda nia atu sadere ba Jeová liuhusi halo orasaun kona-ba ninia planu sira hamutuk ho nia. Irmaun Franciszek iha rai-Polónia konta kona-ba tempu neʼebé nia estuda Bíblia, hodi dehan: “Haʼu-nia mestre Bíblia temi beibeik haʼu-nia planu sira iha ninia orasaun. Bainhira haʼu haree oinsá Jeová hatán ba haʼu-nia mestre nia orasaun, haʼu mós komesa halo orasaun. Haʼu sente Jeová ajuda haʼu bainhira haʼu presiza husu lisensa ba patraun atu bele tuir reuniaun sira no reuniaun boot.”
18 Jeová hadomi tebes ita-nia estudante Bíblia. Jeová hatene mestre Bíblia sira serbisu makaʼas atu ajuda ema hakbesik ba Jeová no nia hadomi mestre Bíblia sira-neʼe. (Isa 52:7) Se agora daudaun, Ita la estuda Bíblia ho ema ruma, Ita nafatin bele ajuda estudante Bíblia atu laʼo ba oin no hetan batizmu liuhusi akompaña maluk Kristaun sira seluk atu estuda Bíblia ho ema.
26 FEVEREIRU–3 MARSU
RIKUSOIN HUSI BÍBLIA | SALMO 11-15
Imajina Ita-nia an iha mundu foun neʼebé nakonu ho dame
w06-E 5/15 p. 18 par. 3
Pontu importante husi livru Salmo
11:3—Saida mak justisa nia hun neʼebé rahun ona? Neʼe refere ba fundasaun ka buat báziku neʼebé ema nia sosiedade tenkesér iha, hanesan lei, orden, no justisa. Kuandu buat sira-neʼe la iha, situasaun sai runguranga no sei la iha justisa. Iha situasaun hanesan neʼe, “ema laran-loos” presiza tau fiar tomak ba Maromak.—Sal 11:4-7.
Mundu neʼe bele sai livre husi violénsia ka lae?
Bíblia promete katak Maromak sei halakon violénsia husi mundu neʼe. Lakleur tan, Maromak nia “loron tesi-lia nian” sei toʼo mai no Nia sei “halakon ema aat” hotu. (2Pe 3:5-7) Sin, iha mundu tomak, sei la iha tan ema neʼebé halo violénsia. Maibé oinsá mak ita bele fiar katak Maromak sei halo nuneʼe?
Bíblia dehan, Maromak “odi ema hotu neʼebé gosta violénsia”. (Sal 11:5) Nia mak ita-nia Kriadór neʼebé hadomi dame no justisa. (Sal 33:5; 37:28) Nia sei la husik ema neʼebé halo violénsia atu moris ba nafatin.
Ita hatudu pasiénsia hodi hein ho laran ka lae?
15 Tanbasá mak David hakarak hein ho laran? Ita bele hetan ninia resposta husi Salmo 13 neʼebé nia uza pergunta “Toʼo bainhira?” ba dala haat. David dehan: “Kona-ba haʼu, haʼu tau fiar ba Ita-nia domin neʼebé laran-metin; Haʼu-nia laran sei haksolok tanba salvasaun husi Ita. Haʼu sei kanta ba Jeová, tanba nia hatudu ona laran-luak boot mai haʼu.” (Sal 13:5, 6) David hatene katak Jeová hadomi nia no Jeová sei nunka husik nia. Nia mós hanoin kona-ba tempu uluk oinsá Jeová ajuda ona nia no nia hein ba tempu neʼebé Jeová sei halakon ninia terus hotu. Sin, David mós fiar katak hodi hein ba Jeová, neʼe sei la sai saugati deʼit.
kr-E p. 236 par. 16
Maromak nia Ukun halaʼo ninia hakarak iha rai
16 Seguru. Ikusmai liafuan iha Isaias 11:6-9 sei kumpre iha dalan neʼebé kompletu. Mane, feto no labarik sira sei moris ho seguru iha fatin neʼebé deʼit iha mundu tomak. La iha ema ka animál ida mak lori perigu. Imajina toʼok kona-ba tempu neʼebé planeta mundu sei sai Ita-nia hela-fatin neʼebé seguru, Ita bele nani iha mota, lagoa, no tasi, Ita mós bele saʼe foho, no laʼo iha rai-luan ho seguru. Iha kalan Ita sei la sente taʼuk. Liafuan iha Ezequiel 34:25 sei sai loos, Maromak nia povu sei “hela ho seguru iha rai-fuik no toba iha ai-laran”.
Keʼe no hetan buat murak husi Bíblia
Ita “nakfila an” ka lae?
12 Triste tebes katak ema barak iha mundu ohin loron mós iha hanoin neʼebé hanesan ho ema Roma iha tempu uluk. Sira la gosta atu moris tuir morál ka matadalan ruma hodi hanoin katak ema labele obriga ema seluk atu halo buat ida. Mestre ho inan-aman sira mós husik joven sira atu halo tuir deʼit sira rasik nia hakarak. Sira hanoin katak ema ida-idak iha direitu atu deside rasik kona-ba ida-neʼebé mak loos ka sala. Ema barak dehan sira fiar Maromak, maibé hanoin katak sira lalika halo tuir Maromak nia ukun-fuan. (Sal 14:1) Ida-neʼe bele sai perigu ba ema kristaun, tanba se ita la kuidadu, ita mós komesa la halo tuir matadalan husi Maromak nia organizasaun no karik muramura kona-ba buat neʼebé ita la gosta. Karik ita mós komesa kontra hasoru konsellu husi Bíblia kona-ba halimar, uza internét, ka edukasaun.