Informasaun atu uza hamutuk livru Moris Kristaun no Haklaken
© 2024 Watch Tower Bible and Tract Society of Pennsylvania
4-10 NOVEMBRU
RIKUSOIN HUSI BÍBLIA SALMO 105
“Nia hanoin-hetan ninia aliansa ba nafatin”
Hametin ita-nia fiar ba Jeová nia promesa kona-ba mundu foun
11 Hanoin toʼok kona-ba buat balu neʼebé Maromak promete iha tempu uluk no tuir ema nia haree neʼe imposivel atu akontese. Nia promete ba Abraão no Sara katak sira sei iha oan-mane maski sira idade ona. (Gén 17:15-17) Nia mós hatete ba Abraão katak Abraão nia bei-oan sira sei simu rai-Kanaan. Durante tinan barak, ema Izraél neʼebé mai husi Abraão nia jerasaun sai atan iha rai-Ejitu, entaun karik haree hanesan promesa neʼe sei nunka sai loos. Maibé neʼe sai loos duni. Tuirmai, Jeová fó sai katak Isabel sei iha oan maski nia ferik ona. Nia mós fó sai ba Maria neʼebé virjen katak Maria sei tuur-ahi Maromak nia Oan-Mane. Ida-neʼe kumpre promesa neʼebé Jeová halo tinan rihun ba rihun liubá iha jardín Eden.—Gén 3:15.
12 Bainhira ita hanoin kona-ba Jeová nia promesa hotu no oinsá nia kumpre promesa sira-neʼe, neʼe sei hametin ita-nia fiar ba ninia kbiit atu kumpre promesa sira kona-ba mundu foun. (Lee Josué 23:14; Isaias 55:10, 11.) Neʼe mós sei ajuda ita atu hanorin ema seluk katak Jeová nia promesa kona-ba mundu foun laʼós mehi deʼit. Bainhira Jeová promete kona-ba lalehan foun no rai foun, nia hatete: “Liafuan sira-neʼe mak loos no ema bele tau fiar.”—Apk 21:1, 5.
it-2-E p. 1201 par. 2
Liafuan
Maromak bele uza kriasaun hotu inklui buat neʼebé moris no la moris atu kumpre ninia liafuan ka hakarak. (Sal 103:20; 148:8) Ita bele tau fiar ba Ninia liafuan. Maromak mós hanoin-hetan atu kumpre buat neʼebé nia promete. (Deu 9:5; Sal 105:42-45) Hanesan Maromak rasik hatete, ninia liafuan “sei hela ba nafatin”. Ninia liafuan sei la fila fali ba nia se neʼe seidauk kumpre ninia hakarak.—Isa 40:8; 55:10, 11; 1Pe 1:25.
Keʼe no hetan buat murak husi Bíblia
Tanbasá tenke laʼo ba oin iha lia-loos?
13 Sadere ba Jeová. Oinsá se ema seluk trata ita iha dalan neʼebé la diʼak? Karik ita bele esplika ba sira kona-ba ita-nia sentimentu. Maibé se ita mak defende an beibeik no hanoin katak ita mak loos, neʼe sei halo problema sai boot liután. Ita bele aprende husi José nia ezemplu. Ninia maun-alin sira trata nia aat tebes, maibé nia nunka rai odi ba sira. Ikusmai ema bobar lia hodi hatama nia ba komarka. Maibé nia sadere nafatin ba Jeová. Nia kaer metin nia fiar ba Jeová nia promesa no laran-metin ba nia. (Sal 105:19) Durante tempu susar sira-neʼe, José mós haburas hahalok diʼak barak neʼebé ikusmai ajuda tebes nia atu halaʼo knaar importante ida iha ninia moris. (Gén 41:37-44; 45:4-8) Bainhira ema trata ita iha dalan neʼebé la diʼak, halo orasaun atu husu matenek husi Jeová. Nia sei ajuda ita atu sente kalma no koʼalia iha dalan neʼebé diʼak.—Lee 1 Pedro 5:10.
11-17 NOVEMBRU
RIKUSOIN HUSI BÍBLIA SALMO 106
“Sira haluha Maromak neʼebé salva sira”
“Sé mak apoia Jeová?”
13 Ema Izraél sira sai taʼuk hodi haree dalan neʼebé Jeová uza ninia forsa hodi hatudu ninia an ba sira, tan neʼe sira husu Moisés atu reprezenta sira hodi saʼe ba Foho Sinai hodi koʼalia ba Jeová. (Éx 20:18-21) Moisés saʼe ba foho leten, maibé ba tempu kleur, la tun fali mai. Karik ba ema Izraél, sira sente mesamesak, la iha ema atu dirije ona sira. Karik sira sadere liu ba ulun-naʼin neʼebé matan bele haree, hanesan Moisés. Sira komesa hanoin barak no hatete ba Aarão: “Halo maromak ida ba ami atu laʼo ulukliu ami, tanba ami la hatene saida mak akontese ona ba Moisés, mane neʼebé lori ami sai husi rai-Ejitu.”—Éx 32:1, 2.
Keʼe no hetan buat murak husi Bíblia
w06-E 7/15 p. 13 par. 9
Pontu importante husi livru Salmo parte tolu no haat
106:36, 37. Versíkulu sira-neʼe liga adora estátua ho hasaʼe sakrifísiu ba anju aat sira. Neʼe hatudu katak ema neʼebé uza estátua karik hetan influénsia husi anju aat sira. Bíblia anima ita: “Hadook an husi estátua.”—1Jo 5:21.
18-24 NOVEMBRU
RIKUSOIN HUSI BÍBLIA SALMO 107-108
“Fó agradese ba Jeová, tanba nia mak diʼak”
w07-E 4/15 p. 20 par. 2
Husik kongregasaun fó hahiʼi ba Jeová
2 Kongregasaun laʼós deʼit fatin atu ransu malu, no laʼós mós asosiasaun ka klubu ba ema ho rasa, situasaun moris no hobi neʼebé hanesan atu halibur hamutuk. Maibé, kongregasaun nia objetivu prinsipál mak atu fó hahiʼi ba Maromak Jeová. Neʼe laʼós buat neʼebé foun, Salmo fó sai ona kona-ba neʼe. Salmo 35:18 hatete: “Haʼu sei fó agradese ba Ita iha kongregasaun boot nia leet; haʼu sei hahiʼi Ita iha ema-lubun boot nia leet.” Salmo 107:31, 32 mós anima ita: “Husik povu sira fó agradese ba Jeová tanba ninia domin neʼebé laran-metin no tanba buat furak neʼebé nia halo ba ema. Husik sira hahiʼi nia iha kongregasaun nia leet.”
Fó agradese ba Jeová no nia sei haraik bensaun
4 Se ita hakarak agradese nafatin ba Jeová, ita presiza hanoin didiʼak kona-ba bensaun sira neʼebé Jeová fó mai ita ida-idak. Depois, hanoin kona-ba oinsá bensaun sira-neʼe hatudu Maromak nia domin boot mai ita. Bainhira ema neʼebé hakerek salmu hanoin didiʼak kona-ba neʼe, nia hakfodak tanba Jeová halo ona buat furak barak ba nia.—Lee Salmo 40:5; 107:43.
Keʼe no hetan buat murak husi Bíblia
it-2-E p. 420 par. 4
Moab
Tuirmai, kuandu David ukun nuʼudar liurai, mosu mós funu entre ema Izraél no ema Moab. Ema Izraél manán no ema Moab tenke selu impostu ba David. Kuandu funu neʼe remata, David fahe tropa Moab ba grupu tolu no grupu rua husi grupu tolu neʼe hetan kastigu-mate. Haree hanesan David haruka sira toba latan iha rai no sukat sira ho tali hodi fahe ba grupu tolu no deside sé mak sei mate no sé mak sei moris. (2Sa 8:2, 11, 12; 1Kr 18:2, 11) Karik durante funu neʼe mak Jeoada nia oan-mane Benaias “oho Ariel ema Moab nia oan-mane naʼin-rua”. (2Sa 23:20; 1Kr 11:22) Bainhira David manán ema Moab, neʼe kumpre profeta Balám nia liafuan neʼebé nia fó sai tinan 400 antes neʼe, hodi hatete: “Fitun ida sei mosu husi Jacob, liurai nia ai-tonka ida sei mosu husi Izraél. Nia sei harahun duni Moab nia reen-toos no harahun funu-naʼin hotu neʼebé siʼak-teen nia ulun-ruin.” (Núm 24:17) Kona-ba akontesimentu neʼe, ema neʼebé hakerek salmo hatete katak Maromak haree Moab nuʼudar “basia atu fase an”.—Sal 60:8; 108:9.
25 NOVEMBRU–1 DEZEMBRU
RIKUSOIN HUSI BÍBLIA SALMO 109-112
Apoia Liurai Jesus!
w06-E 9/1 p. 13 par. 6
Pontu importante husi livru Salmo parte lima
110:1, 2—Saida mak “[David nia] Naʼi”, Jesus Kristu, halo durante nia tuur iha Maromak nia liman-loos? Depois Jesus hetan tiha moris-hiʼas, nia saʼe ba lalehan no hein iha Maromak nia liman-loos toʼo tinan 1914 atu ukun nuʼudar Liurai. Durante tempu neʼe, Jesus ukun ema Kristaun neʼebé iha esperansa atu bá lalehan, no dirije sira iha serbisu haklaken no hanorin, no mós prepara sira atu ukun hamutuk ho nia iha ninia Ukun.—Mt 24:14; 28:18-20; Lc 22:28-30.
w00-E 4/1 p. 18 par. 3
Sira neʼebé kontra Maromak sei lakon!
3 Hahú husi maizumenus tinan 100 liubá, Jeová nia povu hetan ataka. Iha rai barak, ema ho intensaun neʼebé aat buka atu hanetik Jeová nia povu atu haklaken kona-ba Maromak nia Ukun. Ita-nia inimigu Diabu neʼebé “laʼo bá-mai hanesan leaun ida neʼebé hasai lian makaʼas no buka atu han ema ruma” mak book ema sira-neʼe atu kontra ita. (1Pe 5:8) Kuandu “tempu neʼebé hili tiha ona ba nasaun sira” remata iha tinan 1914, Maromak foti ninia Oan-Mane nuʼudar mundu nia Liurai foun, no fó mandamentu ba nia: “Bá domina iha ó-nia inimigu sira-nia leet.” (Lc 21:24; Sal 110:2) Jesus uza podér neʼebé nia simu atu soe tun Satanás husi lalehan ba rai no Satanás labele fila fali ba lalehan. Tanba Diabu hatene katak ninia tempu hela uitoan deʼit, nia sai hirus tebes ba ema Kristaun neʼebé iha esperansa atu bá lalehan no bibi-malae seluk. (Apk 12:9, 17) Tanba sira kontra beibeik Maromak, neʼe lori rezultadu saida?
Hatudu katak ita laʼo ba oin
Ita presiza haburas hakarak atu bele uza prezente neʼebé ita simu. Entaun, ita husu ema seluk atu haklaken ho ita ka lae? Ita buka oportunidade atu ajuda ema foun, joven, ka ema neʼebé moras ka lae? Ita prontu atu ajuda hodi hamoos Reuniaun-Fatin ka ajuda iha reuniaun boot sira ka lae? Ita uza ita-nia tempu atu serbí nuʼudar pioneiru estra ka lae? Ita bele serbí nuʼudar pioneiru regulár ka ajuda kongregasaun neʼebé presiza haklaken-naʼin ka lae? Se ita mak irmaun ida, ita hakaʼas an atu kumpre kritériu husi Bíblia atu sai atan ba kongregasaun no katuas ka lae? Se ita prontu atu fó ajuda no mós simu knaar sira, neʼe mak sinál neʼebé hatudu katak ita laʼo ba oin.—Sal 110:3.
Keʼe no hetan buat murak husi Bíblia
Hatudu fiar neʼebé metin ba Maromak nia Ukun
15 Aliansa Abraão no David nian fó garantia ba feto nia bei-oan atu sai liurai ida. Maibé, ukun deʼit nuʼudar liurai ida seidauk bele lori bensaun tomak ba ema hotu. Tanba amlulik deʼit mak bele hasaʼe sakrifísiu hodi ema bele sai husi sala no mate no iha fali relasaun diʼak ho Jeová, entaun bei-oan neʼe mós presiza sai nuʼudar amlulik ida. Atu fó garantia katak nia sei halo duni arranju neʼe, Jeová halo aliansa legál ida tan neʼebé bolu naran aliansa atu sai amlulik hanesan Melkizedek.
16 Liuhusi Liurai David nia liafuan, Maromak fó-hatene katak nia sei halo aliansa ida ho Jesus. Aliansa neʼe sei kumpre buat rua. Primeiru, Jesus sei ‘tuur iha Maromak nia liman-loos’ no simu autoridade hodi halakon Maromak nia inimigu hotu. Segundu, Jesus sei sai “amlulik ba nafatin iha dalan hanesan ho Melkizedek” nian. (Lee Salmo 110:1, 2, 4.) Tanbasá mak Jesus tenke sai amlulik ida “iha dalan hanesan ho Melkizedek” nian? Tanba antes Abraão iha bei-oan, Melkizedek mak liurai ba sidade Salém no “amlulik ba Maromak neʼebé Aas Liu Hotu”. (Ebr 7:1-3) Jeová rasik mak foti Melkizedek hodi sai liurai no amlulik. Toʼo Jesus sai liurai no amlulik ida, la iha ema ida mak iha pozisaun úniku hanesan Melkizedek. Tan neʼe mak Bíblia bolu nia nuʼudar amlulik ba nafatin.
17 Maromak uza aliansa neʼe hodi foti rasik Jesus sai amlulik ida. Tan neʼe, Jesus sei sai “amlulik ba nafatin tuir dalan Melkizedek nian”. (Ebr 5:4-6) Liuhusi aliansa atu sai amlulik hanesan Melkizedek nian mak Jeová fó garantia katak nia sei uza Mesias nia Ukun atu kumpre ninia hakarak ba ema no mundu.
2-8 DEZEMBRU
RIKUSOIN HUSI BÍBLIA SALMO 113-118
Oinsá ita bele selu fali Jeová?
w01-E 1/1 p. 11 par. 13
Sai metin liután liuhusi domin
13 Jesus nia liafuan fó sai ho klaru katak ita tenke hadomi uluk Jeová no ita-nia domin ba Jeová tenke sai buat neʼebé importante liu iha ita-nia moris. Maibé ita la moris mai ho domin ba Jeová. Ita presiza haburas ida-neʼe. Bainhira ita foin aprende kona-ba Jeová, ita gosta buat neʼebé ita aprende. Neineik-neineik ita aprende oinsá Jeová kria mundu ba ema. (Gén 2:5-23) Ita aprende oinsá Jeová hatudu domin ba ema hodi deside atu sosa fali ita husi ita-nia sala. (Gén 3:1-5, 15) Nia hatudu domin ba sira neʼebé laran-metin, no ikusmai fó ninia Oan-Mane mesak atu bele perdua ita-nia sala sira. (Jo 3:16, 36) Nuʼudar ita aprende liután kona-ba Jeová, ita mós sente agradese liután ba nia. (Isa 25:1) Liurai David hatete katak nia hadomi Jeová tanba Jeová tau matan ba nia ho domin. (Sal 116:1-9) Ohin loron, Jeová tau matan, dirije, hametin, no enkoraja ita. Bainhira ita aprende liután kona-ba nia, ita-nia domin ba nia mós sai boot liután.—Sal 31:23; Sof 3:17; Rom 8:28.
w09-E 7/15 p. 29 par. 4-5
Hatudu agradese kuandu simu, no fó mós ho laran tomak
Ema neʼebé hakerek salmo hanoin: “Saida mak haʼu sei fó hodi selu fali Jeová?” (Sal 116:12) Nia simu ona benefísiu saida? Jeová apoia nia durante tempu neʼebé nia sente “neon-susar no triste”. Liután neʼe, Jeová “salva ona [nia] husi mate”. Tan neʼe, nia hakarak buka dalan atu “selu fali” Jeová. Saida mak nia bele halo? Nia hatete: “Haʼu sei kumpre haʼu-nia juramentu ba Jeová.” (Sal 116:3, 4, 8, 10-14) Nia deside metin atu halo tuir ninia promesa hotu ba Jeová no kumpre ninia obrigasaun hotu ba Jeová.
Ita mós bele halo nuneʼe. Oinsá? Liuhusi halo tuir Jeová nia ukun-fuan no prinsípiu sira iha Ita-nia moris tomak. Tan neʼe, Ita presiza hakaʼas an atu tau uluk Ita-nia adorasaun ba Jeová iha Ita-nia moris, no husik Maromak nia espíritu santu dirije buat hotu neʼebé Ita halo. (Ecl 12:13; Gal 5:16-18) Klaru katak Ita nunka bele selu fali Jeová ba buat hotu neʼebé nia halo ona ba Ita. Maski nuneʼe, ‘Jeová nia laran haksolok’ bainhira Ita serbí nia ho laran tomak. (Prv 27:11) Ita iha priviléjiu furak atu bele halo Jeová nia laran haksolok!
Ita bele aprende saida husi livru Levítico?
9 Lisaun segundu: Ita serbí Jeová tanba hakarak hatudu agradese ba nia. Atu aprende kona-ba lisaun neʼe, mai ita koʼalia kona-ba sakrifísiu dame nian. Sakrifísiu neʼe mak parte importante ba adorasaun loos iha Izraél antigu. Iha livru Levítico, ita aprende katak ema Izraél bele hasaʼe sakrifísiu dame nian “atu hatudu agradese”. (Lev 7:11-13, 16-18) Ema Izraél fó sakrifísiu neʼe laʼós tanba iha obrigasaun maibé ho hakarak rasik no tanba hadomi Maromak Jeová. Ema neʼebé fó sakrifísiu neʼe, ninia família, no amlulik sira sei han naʼan husi animál neʼebé hasaʼe ona nuʼudar sakrifísiu. Maibé animál neʼe nia isin parte balu tenke entrega ba Jeová. Parte neʼe inklui saida deʼit?
10 Lisaun terseiru: Ita fó buat diʼak liu ba Jeová tanba ita hadomi nia. Jeová haree animál nia bokur nuʼudar parte neʼebé diʼak liu. Nia mós hatete katak animál nia parte balu inklui rins sira mak folin-boot. (Lee Levítico 3:6, 12, 14-16.) Tan neʼe, Jeová kontente tebes bainhira ema Izraél ho hakarak rasik fó animál nia parte balu neʼe no mós bokur sira. Ema Izraél neʼebé fó sakrifísiu hanesan neʼe hatudu sai ninia hakarak atu fó buat diʼak liu hotu ba Maromak. Nuneʼe mós, Jesus ho hakarak rasik fó buat neʼebé diʼak liu hotu ba Jeová hodi serbí Jeová ho laran tomak tanba hadomi nia. (Jo 14:31) Jesus gosta tebes atu halo tuir Maromak nia hakarak. Nia hadomi tebes Maromak nia ukun-fuan. (Sal 40:8) Jeová kontente tebes atu haree Jesus serbí nia ho hakarak rasik.
11 Ita-nia serbisu ba Maromak mak hanesan sakrifísiu dame nian tanba neʼe hatudu sai ita-nia domin ba nia. Ita hakarak fó buat diʼak liu ba Jeová, no ita halo nuneʼe tanba hadomi nia ho laran tomak. Ita bele fiar katak Jeová kontente tebes atu haree ema millaun ba millaun adora nia ho hakarak rasik tanba hadomi nia no ninia matadalan sira. Jeová haree no hafolin buat neʼebé ita halo no mós ita-nia motivu. Neʼe anima duni ita. Porezemplu, se ita idade ona no labele tan halo buat barak neʼebé ita hakarak, ita bele iha konfiansa katak Jeová komprende. Karik ita sente katak ita labele halo buat barak ba Jeová, maibé nia haree ita-nia domin boot neʼebé motiva ita atu halo buat neʼebé ita bele halo. Nia kontente atu simu buat neʼebé ita bele fó tuir ita-nia kbiit.
Keʼe no hetan buat murak husi Bíblia
Pergunta husi lee-naʼin
Ema neʼebé hakerek salmu hatete: “Se ema sira neʼebé laran-metin ba Jeová mak mate, ida-neʼe folin-boot iha ninia matan.” (Sal 116:15) Maski Jeová haree ninia atan ida-idak nia moris nuʼudar folin-boot ba nia, maibé liafuan neʼebé foin temi iha Salmo 116 la koʼalia deʼit kona-ba ema ida-idak nia mate.
Kuandu hatoʼo diskursu kona-ba ema kristaun ida neʼebé mate, eskritura iha Salmo 116:15 labele uza ba ema neʼebé foin mate maski nia mate hodi laran-metin ba Jeová toʼo rohan. Tanbasá? Tanba liafuan neʼe nia arti mak Maromak hafolin tebes ninia atan sira-nia moris nuʼudar grupu ida, no tan neʼe nia sei nunka husik sira hotu mate.—Haree Salmo 72:14; 116:8.
9-15 DEZEMBRU
RIKUSOIN HUSI BÍBLIA SALMO 119:1-56
“Oinsá mak mane joven ida halo ninia dalan sira moos nafatin?”
w87-E 11/1 p. 18 par. 10
Ita nafatin moos iha dalan hotu ka lae?
10 Iha Éfeso 5:5 Paulo fó avizu: “Imi rasik hatene no rekoñese ida-neʼe, katak ema neʼebé halo sala seksuál ka hatudu hahalok la moos ka kaan-teen, neʼebé hanesan ho adora estátua, sei la simu liman-rohan iha Kristu no Maromak nia Ukun.” Maski nuneʼe, tinan-tinan irmaun-irmán rihun ba rihun hetan dixiplina ka hasai husi kongregasaun tanba halo sala seksuál, ka ‘halo sala kontra isin rasik’. (1Ko 6:18) Dala barak, neʼe akontese tanba sira la ‘kontinua proteje sira-nia an tuir Maromak nia liafuan’. (Sal 119:9) Porezemplu, irmaun-irmán barak la kontinua atu matan-moris kuandu sira bá feriadu. Sira la ransu ho irmaun-irmán sira, no habelun ho ema seluk neʼebé sira hasoru kuandu bá feriadu. Tanba hanoin katak ema sira-neʼe mak laran-diʼak tebes, ikusmai irmaun-irmán sira-neʼe halo atividade balu neʼebé la diʼak ba ema Kristaun. Irmaun-irmán seluk sai besik loos ho sira-nia kolega iha serbisu-fatin. Katuas kongregasaun ida sai besik demais ho feto ida iha serbisu-fatin toʼo ikusmai nia husik hela ninia família no hela hamutuk ho feto neʼe. Rezultadu mak kongregasaun hasai nia. Bíblia nia liafuan tuirmai mak loos duni: “Ransu hamutuk ho ema aat sei estraga toman diʼak”!—1Ko 15:33.
w06-E 6/15 p. 25 par. 1
“Haʼu gosta Ita-nia avizu sira”
JEOVÁ fó ba ninia povu avizu sira neʼebé bele ajuda sira tahan durante tempu susar. Dala ruma, ita simu avizu ruma kuandu ita lee Bíblia mesak, no liuhusi informasaun no komentáriu sira neʼebé hatoʼo iha reuniaun. Dala barak buat neʼebé ita lee ka rona iha situasaun sira-neʼe laʼós buat neʼebé foun. Karik ita estuda ona informasaun neʼe. Maibé dala ruma ita haluha, tan neʼe ita presiza estuda beibeik kona-ba Jeová nia hakarak, ukun-fuan, no matadalan sira. Ita presiza hafolin Maromak nia avizu sira. Buat sira-neʼe hametin ita no ajuda ita atu kontinua fokus ba buat neʼebé uluk book ita atu komesa moris tuir Maromak nia hakarak. Tan neʼe, ema neʼebé hakerek salmo kanta ba Jeová: “Haʼu gosta Ita-nia avizu sira.”—Sal 119:24.
Keta husik ita-nia matan haree buat neʼebé la iha folin!
2 Maibé, buat neʼebé ita haree mós bele halo aat ba ita. Ita-nia matan no ita-nia neon iha relasaun neʼebé metin, informasaun neʼebé ita hatama ba ita-nia neon liuhusi ita-nia matan bele book ita-nia hakarak no hahalok. No tanba ita moris iha mundu aat neʼebé Diabu Satanás mak ukun no iha mundu neʼebé ema buka deʼit sira-nia diʼak, ita haree imajen ka foto barak no liafuan oioin neʼebé bele book ita atu halo buat neʼebé la diʼak maski ita haree liu deʼit. (1Jo 5:19) Tan neʼe mak ema neʼebé hakerek salmu ida husu Maromak: “Keta husik haʼu-nia matan atu haree buat neʼebé la iha folin; halo haʼu moris nafatin tuir Ita-nia dalan.”—Sal 119:37.
Keʼe no hetan buat murak husi Bíblia
w00-E 10/1 p. 14-15 par. 8
Estuda lori kontente no rezultadu diʼak
8 Sin, ita-nia domin ba Jeová nia Liafuan tenke mosu husi ita-nia laran rasik. Ita presiza uza tempu atu hanoin kona-ba eskritura sira neʼebé ita foin lee. Ita presiza koko atu hanoin kleʼan ka hanoin didiʼak kona-ba buat espirituál. Atu bele halo nuneʼe, ita presiza fatin hakmatek hodi bele hanoin kleʼan no halo orasaun. Hanesan Ezras, ita presiza prepara ita-nia laran atu lee no estuda didiʼak Maromak nia Liafuan. Kona-ba Ezras, Bíblia hatete: “Ezras prepara ona ninia laran atu estuda Jeová nia Ukun-Fuan no halo tuir, no mós atu hanorin ninia mandamentu no desizaun iha Izraél.” (Ezr 7:10) Haree toʼok razaun tolu tanbasá Ezras prepara ninia laran: atu estuda, atu aplika ida-neʼe iha ninia moris no atu hanorin ema seluk. Ita mós presiza banati-tuir ninia ezemplu.
16-22 DEZEMBRU
RIKUSOIN HUSI BÍBLIA SALMO 119:57-120
Oinsá ita bele tahan terus?
w06-E 6/15 p. 20 par. 2
“Oh haʼu hadomi tebes Ita-nia ukun-fuan!”
2 Diʼak atu hanoin: “Oinsá mak Maromak nia ukun-fuan fó kmaan ba ema neʼebé hakerek salmo?” Nia iha konfiansa katak Jeová hanoin nia, no neʼe hametin nia. Benefísiu neʼebé nia hetan tanba aplika ukun-fuan halo nia kontente maski nia hasoru susar husi kontradór sira. Nia rekoñese katak Jeová hatudu laran-diʼak ba nia. Liután neʼe, hodi aplika matadalan husi Maromak nia ukun-fuan, neʼe halo nia matenek liu fali ninia inimigu no neʼe proteje ninia moris. Halo tuir Maromak nia ukun-fuan halo nia sente dame no iha konxiénsia neʼebé moos.—Sal 119:1, 9, 65, 93, 98, 165.
w00-E 12/1 p. 14 par. 3
Ita hadomi tebes Jeová nia avizu sira ka lae?
3 Ema neʼebé hakerek salmo hafolin tebes Maromak nia avizu sira, nia kanta: “Haʼu lalais atu halo tuir no la demora atu kumpre Ita-nia mandamentu sira. Ema aat nia tali sira bobar haleʼu haʼu, maibé haʼu la haluha Ita-nia ukun-fuan.” (Sal 119:60, 61) Kuandu ema fó-terus ba ita, Jeová nia avizu sira bele ajuda ita tahan tanba ita fiar metin katak ita-nia Aman iha lalehan bele tesi tali sira neʼebé inimigu sira bobar haleʼu ita. Nia sei halo ita livre husi susar neʼe iha tempu neʼebé loos atu nuneʼe ita bele kontinua haklaken.—Mc 13:10.
w06-E 9/1 p. 14 par. 4
Pontu importante husi Salmo parte lima
119:71—Saida mak diʼak husi hetan susar? Bainhira ita hetan susar, neʼe bele hanorin ita atu sadere liután ba Jeová, halo orasaun ba nia ho laran, no sai badinas liután atu estuda Bíblia no mós aplika buat neʼebé Bíblia hanorin. Liután neʼe, ita-nia reasaun kuandu hetan susar bele hatudu sai se ita presiza hadiʼa ita-nia hahalok ruma ka lae. Se ita husik susar sira-neʼe atu ajuda ita haburas liután hahalok diʼak, neʼe sei ajuda ita atu la sai hirus.
“Tanis ho sira neʼebé tanis”
3 Ita bele hetan kmaan husi ita-nia Aman Jeová neʼebé laran-diʼak. (Lee 2 Korinto 1:3, 4.) Nia hatudu ezemplu neʼebé diʼak liu hotu kona-ba hanoin ema, no nia promete ba ninia povu hodi dehan: “Haʼu mak Ida neʼebé fó kmaan ba imi.”—Isa 51:12; Sal 119:50, 52, 76.
5 Ita bele fiar ho laran tomak katak Jeová sei ajuda ita. Tan neʼe mak ita bele halo orasaun ba nia iha tempu naran deʼit atu fó sai ita-nia sentimentu triste kona-ba ema neʼebé ita hadomi mate. Hodi hatene katak Jeová komprende kona-ba ita-nia sentimentu no nia sei fó ajuda ba ita, neʼe fó kmaan tebes ba ita! Maibé oinsá mak nia halo nuneʼe?
Keʼe no hetan buat murak husi Bíblia
Keta husik Ita-nia domin sai malirin
11 Nuʼudar ema kristaun, ita hadomi lia-loos. No lia-loos mai husi Maromak nia Liafuan. Iha Jesus nia orasaun ba ninia Aman nia dehan: “Ita-nia liafuan mak lia-loos.” (Jo 17:17) Ita tenkesér hatene Bíblia hakerek saida deʼit hodi ita bele iha domin ba lia-loos husi Bíblia. (Kol 1:10) Maibé hatene deʼit seidauk toʼo. Mai ita haree toʼok saida mak Salmo 119 hatete ita presiza halo. (Lee Salmo 119:97-100.) Iha moris loroloron nian, ita tenke hanoin kleʼan beibeik kona-ba saida mak ita lee husi Bíblia. Bainhira ita hanoin kleʼan kona-ba oinsá mak lia-loos husi Bíblia bele ajuda ita-nia moris, neʼe sei halo ita hadomi liután lia-loos sira-neʼe.
12 Eskritura husi Salmo mós hatete: “Ita-nia liafuan sira mak midar iha haʼu-nia nanál, midar liu fali bani-been iha haʼu-nia ibun!” (Sal 119:103) Livru sira neʼebé bazeia ba Bíblia husi Maromak nia organizasaun mak hanesan ai-han neʼebé gostu. Se ita mak han ai-han neʼebé ita gosta, karik ita sei la ansi, maibé nata didiʼak. Hanesan neʼe mós bainhira estuda, ita la bele ansi. Uza tempu atu estuda didiʼak sei halo ita gosta liután “liafuan furak” sira husi lia-loos, no neʼe sei halo fasil liu ba ita atu hanoin-hetan buat neʼebé ita lee no oinsá atu uza informasaun sira-neʼe hodi ajuda ema seluk.—Ecl 12:10.
23-29 DEZEMBRU
RIKUSOIN HUSI BÍBLIA SALMO 119:121-176
Oinsá atu hasees an husi laran-kanek?
Husik Maromak nia ukun-fuan no prinsípiu sira treinu Ita-nia konxiénsia
5 Atu Jeová nia ukun-fuan sira bele ajuda ita, la toʼo atu lee ka hatene deʼit ukun-fuan sira-neʼe. Ita presiza hadomi no respeitu ukun-fuan sira-neʼe. Bíblia hatete: “Odi buat neʼebé aat, no hadomi buat neʼebé diʼak.” (Am 5:15) Maibé oinsá mak ita bele halo ida-neʼe? Xave mak, ita presiza aprende oinsá atu haree buat hotu tuir Jeová nia haree. Porezemplu, hanoin toʼok, ba semana balu ona, ita la bele dukur iha kalan. Doutór haruka ita atu han hahán neʼebé diʼak, ezersísiu liután, no halo mudansa seluk tan iha ita-nia moris. Ita halo tuir ninia konsellu neʼe, no lakleur, ita haree rezultadu neʼebé diʼak. Ita sei sente agradese tebes ba doutór tanba hodi halo tuir ninia matadalan, ita sente diʼak liután iha ita-nia moris.
6 Hanesan neʼe mós, ita-nia Kriadór fó mai ita ukun-fuan sira atu proteje ita husi konsekuénsia aat tanba sala, no atu ita bele iha moris neʼebé diʼak. Porezemplu, Bíblia hanorin katak ita labele bosok, naʼok, halo sala seksuál, halo violénsia no espiritizmu. (Lee Provérbios 6:16-19; Apk 21:8) Bainhira ita haree rasik benefísiu husi halo tuir Jeová, ita sei hadomi liután nia no ninia ukun-fuan sira.
w93-E 4/15 p. 17 par. 12
Joven sira, saida mak imi buka?
12 Importante liu, ita presiza aprende atu odi buat neʼebé aat. (Sal 97:10) Oinsá ita bele odi buat neʼebé aat se ida-neʼe lori kontente? Neʼe mak hodi hanoin kona-ba konsekuénsia husi hahalok neʼe. Bíblia hatete: “Keta lohi imi-nia an: Ita labele bosok Maromak. Tanba buat naran deʼit neʼebé ema kari, nia mós sei koʼa ida-neʼe. Ema neʼebé kari hodi tuir hakarak isin nian sei koʼa mate husi ninia isin.” (Gal 6:7, 8) Kuandu ita hetan tentasaun atu monu ba hakarak neʼebé sala, hanoin toʼok kona-ba konsekuénsia neʼebé aat liu, neʼe mak ita sei hakanek Jeová nia laran. (Kompara ho Salmo 78:41.) Hanoin mós kona-ba posibilidade atu sai isin-rua, ka kona moras ruma hanesan AIDS, ka hanoin oinsá neʼe afeta ita-nia emosaun no halo ita sente folin-laek. Hahalok neʼe mós bele lori konsekuénsia neʼebé ita tenke hasoru durante tempu kleur. Irmán ida hatete: “Haʼu no haʼu-nia laʼen halo relasaun seksuál ho ema seluk antes ami koñese malu. Maski ohin loron, ami mak ema Kristaun, maibé buat neʼebé uluk ami halo, nafatin hamosu problema iha ami-nia moris kaben nian, hanesan hirus malu no laran-moras ba malu.” Se ita monu ba hakarak neʼebé sala, ita mós bele lakon ita-nia knaar iha kongregasaun ka kongregasaun bele hasai ita. (1Ko 5:9-13) Susar neʼebé ita sei hasoru mak barak liu se kompara ho ksolok neʼebé ita sente.
Keʼe no hetan buat murak husi Bíblia
Fiar metin katak Maromak nia “liafuan mak lia-loos”
2 Jeová nia povu fiar metin katak Jeová mak “Maromak lia-loos nian” no nia hakarak ita hetan buat neʼebé diʼak. (Sal 31:5; Isa 48:17) Ita hatene katak ita bele tau fiar ba buat neʼebé hakerek iha Bíblia. Ita fiar katak “[Maromak nia] liafuan mak lia-loos”. (Lee Salmo 119:160.) Ita konkorda ho buat neʼebé matenek-naʼin ida kona-ba Bíblia hakerek: “Maromak nia liafuan hotu sempre loos no buat hotu neʼebé nia hatete sempre sai loos. Maromak nia povu bele tau fiar ba ninia liafuan tanba fiar ba Maromak neʼebé hatete liafuan sira-neʼe.”
30 DEZEMBRU–5 JANEIRU
RIKUSOIN HUSI BÍBLIA SALMO 120-126
Sira kuda fini ho matan-been, maibé koʼa ho haksolok
w04-E 6/1 p. 16 par. 10
Ema neʼebé fó glória ba Maromak simu bensaun
10 Bainhira ita sai Kristu nia dixípulu, ita tenke luta hasoru Satanás. Iha Tiago 4:7 Jeová promete: “Kontra hasoru Diabu, no nia sei halai husi imi.” Neʼe la dehan katak serbí Maromak mak buat neʼebé fasil, ita presiza hakaʼas an. (Lc 13:24) Maibé iha Salmo 126:5, Bíblia promete: “Ema sira neʼebé kuda fini ho matan-been sei koʼa ho haklalak haksolok nian.” Sin, ita adora Maromak neʼebé hafolin tebes buat neʼebé ita halo. Nia “sei fó kolen ba sira neʼebé buka nia ho laran”, no haraik bensaun ba sira neʼebé fó glória ba nia.—Ebr 11:6.
Ita-nia fiar sei metin nafatin ka lae?
17 Se Ita sente laran-triste tanba ema neʼebé Ita hadomi mate, diʼak atu uza tempu hodi hametin Ita-nia fiar kona-ba moris-hiʼas liuhusi lee istória husi Bíblia kona-ba moris-hiʼas. Se Ita sente laran-triste tanba kongregasaun hasai Ita-nia família ruma, diʼak atu estuda Bíblia hodi prova ba Ita-nia an katak Maromak nia dixiplina sempre lori buat diʼak. Aproveita situasaun susar hotu atu hametin Ita-nia fiar. Fakar sai Ita-nia sentimentu ba Jeová. Keta hadook an husi ema seluk, maibé hakbesik nafatin ba irmaun-irmán sira. (Prv 18:1) Hola parte iha atividade sira neʼebé bele ajuda Ita tahan, maski karik Ita tanis tanba hanoin fali buat neʼebé akontese ona. (Sal 126:5, 6) Kontinua tuir reuniaun, bá haklaken no lee Bíblia. Tau fokus ba bensaun furak oioin neʼebé Jeová sei haraik ba Ita iha futuru. Bainhira Ita haree oinsá Jeová ajuda Ita agora, neʼe sei hametin liután Ita-nia fiar ba nia.
w01-E 7/15 p. 18-19 par. 13-14
Kontinua halo serbisu koʼa nian!
13 Maromak nia maluk serbisu-naʼin, liuliu sira neʼebé hasoru terus, bele hetan kmaan husi Salmo 126:5, 6: “Ema sira neʼebé kuda fini ho matan-been sei koʼa ho haklalak haksolok nian. Ema neʼebé bá toʼos maski nia tanis hela, hodi lori ninia fini neʼebé iha bornál laran atu kari, nia sei fila duni ho haklalak haksolok nian, hodi lori trigu neʼebé nia koʼa.” Liafuan kona-ba kuda fini no koʼa rezultadu mak ai-knanoik atu hatudu dalan neʼebé Jeová tau matan no haraik bensaun ba ema Izraél neʼebé fila husi Babilónia antigu. Sira kontente tebes, maibé karik sira tanis bainhira sira kuda fini iha rai neʼebé mamuk durante tinan 70. Maibé sira neʼebé kuda fini no halo serbisu konstrusaun hetan duni rezultadu diʼak no sente kontente husi sira-nia hakaʼas an.
14 Karik ita sei tanis kuandu ita hasoru susar, ka kuandu ita ka ita-nia maluk fiar-naʼin hetan terus tanba halo hahalok loos. (1Pe 3:14) Iha ita-nia serbisu koʼa nian, foufoun karik ita sente susar tanba haree hanesan ita la hetan rezultadu husi ita-nia serbisu haklaken. Maibé se ita kontinua kuda no rega, Maromak sei halo moris, no dala barak liu fali buat neʼebé ita espera. (1Ko 3:6) Rezultadu diʼak neʼebé irmaun-irmán sira hetan husi fahe Bíblia no ita-nia publikasaun sira mak ezemplu diʼak kona-ba neʼe.
Keʼe no hetan buat murak husi Bíblia
cl-E p. 73 par. 15
Kbiit atu fó protesaun—“Maromak mak ita-nia fatin protesaun”
15 Primeiru, hanoin toʼok kona-ba hetan protesaun iha dalan fíziku. Nuʼudar Jeová nia atan sira, ita bele espera katak Jeová sei proteje ita iha dalan fíziku nuʼudar grupu ida. Se Jeová la proteje ita, fasil deʼit ba Satanás atu ataka ita. Hanoin toʼok, Satanás mak “ukun-naʼin mundu neʼe nian”, no nia hakarak tebes atu halakon adorasaun loos. (Jo 12:31; Apk 12:17) Governu balu neʼebé kbiit boot bandu ita-nia serbisu haklaken no koko atu halakon ita. Maski nuneʼe, Jeová nia povu hamriik metin nafatin no kontinua haklaken. Tanbasá nasaun sira neʼebé iha kbiit boot labele hapara ita-nia atividade sira, maski ita mak grupu kiʼik deʼit? Tanba Jeová proteje ita iha ninia liras okos.—Sal 17:7, 8.