Informasaun atu uza hamutuk livru Moris Kristaun no Haklaken
© 2024 Watch Tower Bible and Tract Society of Pennsylvania
2-8 SETEMBRU
RIKUSOIN HUSI BIBLÍA SALMO 79-81
Hatudu domin ba Jeová nia naran neʼebé kmanek
Jesus nia sakrifísiu—Prezente furak husi Aman Jeová
5 Oinsá mak ita bele hatudu katak ita hadomi Jeová nia naran? Liuhusi ita-nia hahalok. Jeová hakarak ita atu sai santu. (Lee 1 Pedro 1:15, 16.) Neʼe katak ita adora nia mesak deʼit no halo tuir nia ho laran tomak. Maski hetan terus, ita hakarak kontinua moris tuir Jeová nia lei no ukun-fuan sira. Ita bele fó glória ba Jeová nia naran liuhusi hatudu hahalok neʼebé loos. (Mt 5:14-16) Hodi halo nuneʼe, ita hatudu katak Jeová nia ukun-fuan sira mak diʼak no lia neʼebé Satanás duun kona-ba Jeová mak laloos. Tanba ita mak ema sala-naʼin, tan neʼe dala ruma ita halo sala. Maibé ita presiza arrepende an no hakaʼas an atu la hatudu tan hahalok sira neʼebé hafoʼer Jeová nia naran.—Sal 79:9.
Roma 10:13—“Bolu Naʼi nia naran”
Iha Bíblia laran, fraze “bolu Jeová nia naran” la signifika deʼit katak hatene Maromak nia naran no uza ida-neʼe iha adorasaun. (Sal 116:12-14) Maibé neʼe inklui mós tau fiar ba Maromak no sadere ba ninia ajuda.—Sal 20:7; 99:6.
Jesus Kristu haree Maromak nia naran nuʼudar buat neʼebé importante. Fraze primeiru iha ninia orasaun neʼebé nia hanorin mak: “Ami Aman iha lalehan, halo Ita-nia naran sai santu.” (Mt 6:9) Jesus mós hatudu katak ita tenke hatene, halo tuir no hadomi Jeová, se ita hakarak hetan moris ba nafatin.—Jo 17:3, 6, 26.
Keʼe no hetan buat murak husi Bíblia
it-2-E p. 111
José
José nia naran mak espesiál. Tanba José iha pozisaun boot entre Jacob nia oan-mane sira, dala ruma Bíblia temi José nia naran atu reprezenta nasaun Izraél nia suku hotu (Sal 80:1) ka suku sira husi nasaun Izraél parte norte. (Sal 78:67; Am 5:6, 15; 6:6) Profesia iha Bíblia mós temi José nia naran. Iha Ezequiel nia vizaun, José hetan liman-rohan dala rua (Eze 47:13), portaun ida iha sidade “Jeová Iha Neʼebá” hanaran José (Eze 48:32, 35), no kuandu koʼalia kona-ba halibur hamutuk fali Jeová nia povu, profesia neʼe temi José nuʼudar ulun-naʼin ba parte ida husi nasaun neʼe no Judá nuʼudar ulun-naʼin ba parte ida seluk. (Eze 37:15-26) Obadias nia profesia hatudu katak “José nia umakain” sei hola parte atu halakon “Esaú nia umakain” (Oba 18), no Zacarias nia profesia fó sai katak Jeová sei salva “José nia umakain”. (Zac 10:6) Duké temi Efraim, Bíblia temi fali José mak nuʼudar suku ida husi Izraél espirituál.—Apk 7:8.
José nia naran mós temi iha lista neʼebé hakerek iha Apokalipse 7:8, no neʼe hatudu katak profesia neʼebé Jacob fó sai antes nia mate sei aplika ba Izraél espirituál. Tan neʼe, Jeová nuʼudar Jacob nia Maromak neʼebé forte, fó Jesus nuʼudar Bibi-Atan Diʼak neʼebé entrega ninia moris ba ninia “bibi-malae sira”. (Jo 10:11-16) Liután neʼe, Jesus Kristu mak fatuk prinsipál iha fundasaun neʼebé Maromak harii ninia templu, neʼebé forma husi ema Izraél espirituál. (Éf 2:20-22; 1Pe 2:4-6) Bibi-Atan no Fatuk neʼe hamutuk ho Maromak neʼebé Kbiit Boot Liu Hotu.—Jo 1:1-3; Aps 7:56; Ebr 10:12; kompara ho Gén 49:24, 25.
9-15 SETEMBRU
RIKUSOIN HUSI BIBLÍA SALMO 82-84
Hafolin knaar neʼebé Ita iha
Aprende husi manu sira neʼebé semo iha lalehan
Ema iha sidade Jeruzalein toman atu haree manu-andoriña neʼebé halo sira-nia knuuk iha uma-kakuluk okos, inklui mós iha Salomão nia templu. Tinan-tinan, manu-andoriña balu bá templu iha Jeruzalein hodi haboot sira-nia oan iha fatin neʼe, neʼebé seguru tebes.
Ema neʼebé hakerek Salmo 4 mak Kora nia oan-mane ida neʼebé hetan knaar atu serbí iha templu durante semana ida kada fulan neen. Nia hetan manu-andoriña nia knuuk iha templu, no neʼe halo nia sente laran-moras no hakarak atu hela iha Maromak Jeová nia templu hanesan ho manu-andoriña. Nia dehan: “Oh Jeová, . . . Ita-nia tenda santu neʼebé kmanek mak furak tebes! Haʼu hakarak tebes, sin, haʼu . . . hakarak tebes atu bá iha Jeová nia pátiu sira. . . . Manu sira mós hetan ona hela-fatin iha Ita-nia uma no manu-andoriña halo knuuk ba nia an, hodi tau matan ba ninia oan sira besik Ita-nia altár kmanek, oh Jeová!” (Sal 84:1-3) Oinsá ho ita? Ita ho ita-nia oan sira hafolin tebes fatin neʼebé ita adora Maromak no kontente atu halibur hamutuk beibeik hodi halaʼo ita-nia adorasaun ka lae?—Sal 26:8, 12.
w08-E 7/15 p. 30 par. 3-4
Haburas hakarak neʼebé lójiku, no sai kontente
Se Ita-nia idade aumenta ka saúde sai fraku, neʼe bele hamenus Ita-nia serbisu ba Jeová. Se Ita iha oan, karik Ita sente katak Ita ladún hetan benefísiu husi estuda pesoál ka reuniaun tanba Ita-nia tempu no enerjia hotu uza ba oan sira. Maibé se Ita tau fokus liu ba Ita-nia limitasaun, neʼe sei hanetik Ita atu tau atensaun ba buat neʼebé Ita bele halo.
Tinan rihun ba rihun liubá, ema Levi ida fó sai ninia hakarak neʼebé imposivel. Nia iha priviléjiu atu serbí iha templu durante semana rua kada tinan. Maibé, nia fó sai ninia hakarak atu hela besik altár ba nafatin. (Sal 84:1-3) Saida mak ajuda mane fiar metin neʼe atu sente kontente ho buat neʼebé nia bele halo? Nia rekoñese katak serbí loron ida deʼit iha pátiu mós priviléjiu neʼebé úniku. (Sal 84:4, 5, 10) Hanesan neʼe mós, duké hanoin beibeik kona-ba ita-nia limitasaun, diʼak liu hakaʼas an atu komprende no hafolin buat neʼebé ita bele halo.
Jeová hadomi no hafolin ita
12 Se agora Ita moras, fiar metin bá katak Jeová hatene Ita-nia susar. Husu nia atu ajuda Ita haburas hanoin neʼebé loos kona-ba Ita-nia situasaun. Tuirmai uza Bíblia atu buka liafuan diʼak neʼebé Jeová rai ba Ita. Tau fokus ba eskritura sira neʼebé hatudu oinsá Jeová hafolin ninia atan sira. Se Ita halo nuneʼe, Ita sei haree katak Jeová hatudu laran-diʼak ba ema hotu neʼebé serbí nia ho laran-metin.—Sal 84:11.
Keʼe no hetan buat murak husi Bíblia
it-1-E p. 816
Oan-kiak
Fasil ba ema atu la hatudu interese ba sira neʼebé la iha inan-aman no kbiit-laek, tan neʼe Jeová uza liafuan “oan-kiak sira [nota, labarik neʼebé la iha aman]” atu hatudu oinsá ema Izraél nia hahalok kona-ba justisa. Kuandu nasaun Izraél iha relasaun diʼak ho Jeová, sira tau matan didiʼak oan-kiak sira. Bainhira la iha justisa iha nasaun neʼe, ema la tau matan ba oan-kiak sira, no neʼe mak sinál neʼebé hatudu katak nasaun nia kondisaun komesa sai aat. (Sal 82:3; 94:6; Isa 1:17, 23; Jer 7:5-7; 22:3; Eze 22:7; Zac 7:9-11; Mal 3:5) Jeová fó-malisan ba ema neʼebé hanehan oan-kiak sira. (Deu 27:19; Isa 10:1, 2) Jeová temi ninia an nuʼudar Maromak neʼebé defende (Prv 23:10, 11), fó ajuda (Sal 10:14), no Aman (Sal 68:5) ba oan-kiak sira. Jeová mós tesi-lia ho loloos hodi defende sira (Deu 10:17, 18), hatudu laran-sadiʼa (Os 14:3), apoia (Sal 146:9), no tau matan ba sira-nia moris.—Jer 49:11.
Sinál ida ba ema Kristaun loos mak sira-nia atensaun ba feto-faluk no oan-kiak sira. Dixípulu Tiago hakerek ba ema Kristaun sira: “Adorasaun neʼebé moos no la foʼer tuir ita-nia Aman Maromak nia hanoin mak neʼe: tau matan ba oan-kiak no feto-faluk sira iha sira-nia susar, no kontinua hadook an husi hahalok aat iha mundu neʼe.”—Tgo 1:27.
16-22 SETEMBRU
RIKUSOIN HUSI BIBLÍA SALMO 85-87
Orasaun ajuda ita tahan
Ita haleno Jeová nia glória ka lae?
10 Atu haleno Maromak nia glória, ita mós ‘labele kole atu harohan’. (Rom 12:12) Liuhusi orasaun, ita presiza husu Jeová nia ajuda atu ita bele serbí nia iha dalan neʼebé nia simu. Ita bele husu espíritu santu, husu atu hametin ita-nia fiar, no husu forsa atu tahan hasoru tentasaun. Ita mós bele husu nia atu fó matenek mai ita atu bele hanorin Bíblia iha dalan neʼebé diʼak liután. (Mt 6:13; Lc 11:13; 17:5; 2Ti 2:15) Ita presiza tau fiar ba ita-nia Aman Jeová, hanesan labarik ida neʼebé tau fiar ba ninia aman. Se ita husu Jeová nia ajuda atu bele serbí nia iha dalan neʼebé diʼak liután, entaun ita bele fiar katak nia sei ajuda ita. Ita lalika hanoin katak ita-nia orasaun sei halo Jeová hirus. Tan neʼe, mai ita halo orasaun hodi hahiʼi Jeová, fó-agradese ba nia, no husu ninia matadalan liuliu kuandu ita hasoru susar ruma. Ita mós bele husu Jeová nia ajuda atu serbí nia iha dalan neʼebé fó glória ba ninia naran neʼebé santu.—Sal 86:12; Tgo 1:5-7.
Oinsá Jeová hatán ita-nia orasaun
17 Lee Salmo 86:6, 7. Liurai David fiar katak Jeová rona no hatán ninia orasaun. Ita mós bele fiar hanesan neʼe. Ezemplu sira neʼebé temi iha lisaun neʼe ajuda ita fiar katak Jeová fó ita matenek no kbiit atu tahan. Karik Jeová uza irmaun-irmán sira ka ema neʼebé la adora nia atu ajuda ita.
18 Maski dala ruma Jeová hatán ita-nia orasaun iha dalan neʼebé ita la espera, maibé ita hatene katak nia sei hatán duni ita-nia orasaun. Nia sei fó buat neʼebé ita presiza iha tempu neʼebé loos. Tan neʼe mai ita kontinua halo orasaun, no fiar metin katak Jeová sei tau matan ita agora no sei “halo kontente kriatura hotu neʼebé moris hodi fó buat neʼebé sira hakarak” iha mundu foun neʼebé sei mai.—Sal 145:16.
Keʼe no hetan buat murak husi Bíblia
it-1-E p. 1058 par. 5
Laran
Serbí ho “laran tomak”. Ema nia fuan tenkesér kompletu atu bele halaʼo ninia funsaun, maibé ita-nia laran bele fahe ba rua. David halo orasaun: “Halo haʼu labele laran-rua hodi hamtaʼuk Ita-nia naran”, neʼe hatudu katak ema nia laran bele fahe ba rua kona-ba ninia domin no sentimentu taʼuk. (Sal 86:11, nota) Ema hanesan neʼe karik “la fó laran tomak” atu adora Maromak, hanesan ema neʼebé morna deʼit. (Sal 119:113; Apk 3:16) Ema mós bele sai “laran-rua” hodi koko atu serbí patraun rua, ka koʼalia buat ida maibé hanoin buat seluk. (1Kr 12:33; Sal 12:2, nota) Jesus kontra duni hahalok laran-rua no laran-makerek hanesan neʼe.—Mt 15:7, 8.
23-29 SETEMBRU
RIKUSOIN HUSI BIBLÍA SALMO 88-89
Jeová nia ukun mak diʼak liu hotu
Fó apoiu ba Jeová nia direitu atu ukun!
5 Razaun ida tan neʼebé hatudu katak Jeová iha direitu atu ukun mak, nia uza ninia podér iha dalan neʼebé justu liu hotu. Jeová dehan: “Haʼu mak Jeová, Ida neʼebé hatudu domin neʼebé laran-metin, justisa, no hahalok loos iha rai, tanba haʼu haksolok ho buat hirak-neʼe.” (Jer 9:24) Jeová la presiza uza ema nia lei atu ajuda nia halo buat neʼebé loos, tanba nia mak hahalok loos nia hun. No nia halo ukun-fuan ba ema bazeia husi ninia justisa neʼebé loos. Ema neʼebé hakerek salmo dehan: “Hahalok loos no justisa mak hun ba [ninia] kadunan.” Tan neʼe mak ukun-fuan, prinsípiu, ka desizaun naran deʼit neʼebé mai husi Jeová sempre loos. (Sal 89:14; 119:128) Satanás hatete katak Jeová laʼós Ukun-Naʼin neʼebé justu, maibé Satanás rasik deʼit nunka lori justisa ba mundu neʼe.
Fó apoiu ba Jeová nia direitu atu ukun!
10 Jeová nunka ukun iha dalan neʼebé siʼak. Kriatura sira neʼebé halo tuir nia sempre sente livre no haksolok. (2Ko 3:17) David dehan: “Dignidade no kmanek mak iha ninia oin; kbiit no ksolok mak iha ninia hela-fatin.” (1Kr 16:7, 27) Hanesan neʼe mós ho ema neʼebé hakerek salmu naran Etan hatete: “Ksolok ba povu neʼebé hahiʼi Ita ho lian kontente nian. Oh Jeová, sira laʼo iha naroman neʼebé sai husi Ita-nia oin. Loron tomak sira haksolok tanba Ita-nia naran, no sira hetan hahiʼi tanba Ita-nia hahalok loos.”—Sal 89:15, 16.
11 Se ita mak hanoin kleʼan liután kona-ba Jeová nia hahalok diʼak, neʼe sei hametin liután ita-nia fiar katak dalan neʼebé Jeová ukun mak diʼak liu hotu. Ema neʼebé hakerek salmu dehan: “Loron ida iha Ita-nia pátiu mak diʼak liu fali loron rihun ida iha fatin seluk!” (Sal 84:10) Jeová mak kria ita, tan neʼe nia hatene saida mak bele halo ita kontente. Ho laran-diʼak nia fó buat oioin ba ita. Buat naran deʼit neʼebé nia husu ita atu halo sempre lori diʼak ba ita, maski ita presiza halo sakrifísiu oioin atu halo tuir nia.—Lee Isaias 48:17.
Hatudu fiar neʼebé metin ba Maromak nia Ukun
14 Aliansa neʼe mak naran aliansa ho David nian neʼebé Jeová halo ho liurai David iha tempu Izraél antigu. (Lee 2 Samuel 7:12, 16.) Iha neʼe Jeová promete ba David katak Mesias sei mai husi ninia bei-oan ida, no nia mak iha direitu legál atu sai Liurai iha Mesias nia Ukun. (Lc 1:30-33; Eze 21:25-27) Tanba Jesus mak David nia bei-oan, entaun bele dehan katak David nia ukun mós ‘sei hela ba nafatin; ninia kadunan sei metin hanesan loro-matan’. (Sal 89:34-37) Ita bele kaer metin liafuan neʼe katak sei la iha korrupsaun iha Mesias nia Ukun, no ninia Ukun sei lori bensaun toʼo tempu neʼebé la bele sura!
Keʼe no hetan buat murak husi Bíblia
w93-E 1/1 p. 32
“Sasin laran-metin iha lalehan”
KLEUR antes ema primeiru iha, fulan fó naroman ona iha kalan. Iha tempu uluk, ema barak adora fulan nuʼudar maromak-feto ida. Hakerek-naʼin ida husi Gregu naran Plutarco hatete katak fulan mak destinasaun ikus ba klamar neʼebé sala-laek depois ema ida mate. Iha mitolojia Báltika, fulan mak mane ida no ninia feen mak loro-matan. Sira iha problema iha moris kaben nian no fulan halai husi ninia feen, tan neʼe sira ladún mosu hamutuk iha lalehan!
Ohin loron, ema neʼebé iha sentimentu domin ba malu maski sei joven ka idade ona, gosta hateke ba fulan no hanoin kona-ba buat romántiku. Maizumenus iha tinan 1960, sientista sira gasta osan barak atu haruka ema bá fulan no lori fatuk balu husi neʼebá atu halo peskiza. Buat ida neʼebé metin kona-ba fulan mak, loroloron nia saʼe no tun tuir tempu. Nia laran-metin ba ninia rotasaun, tan neʼe ita bele sura ninia faze no eklipse durante tinan rihun ba rihun.
Bainhira ema Izraél hateke ba fulan, sira hanoin-hetan buat furak ida. Maromak promete katak Liurai David nia ukun sei la lakon. Maromak hatete: “Ninia kadunan [David nia jerasaun nia kadunan] sei metin nafatin hanesan fulan, neʼebé nuʼudar sasin laran-metin iha lalehan.” (Sal 89:35-37) Promesa neʼe sai loos ba Jesus, “David nia Oan”. (Lc 18:38) Depois Jesus mate, nia hetan moris-hiʼas isin espíritu neʼebé labele mate, no saʼe ba lalehan. Nia sei sai Liurai ba Maromak nia Ukun iha lalehan. (Apk 12:10) Ukun neʼe hahú ona no “sei hamriik ba nafatin”. (Dan 2:44) Iha dalan hanesan neʼe mak Jesus neʼebé reprezenta David nia kadunan sei dura ba nafatin hanesan fulan, “sasin laran-metin iha lalehan”.
Tan neʼe, kuandu Ita haree fulan naroman iha tempu kalan, hanoin-hetan Maromak nia promesa ba David no hatoʼo agradese tanba Maromak nia Ukun hahú ona no sei dura ba nafatin. Neʼe sei fó glória ba Maromak no lori bensaun ba nafatin ba ema neʼebé laran-metin.—Apk 11:15.
30 SETEMBRU–6 OUTUBRU
RIKUSOIN HUSI BIBLÍA SALMO 90-91
Tau fiar ba Jeová hodi bele moris naruk
Ema buka-hatene oinsá atu bele moris naruk
Maski ohin loron ema bele moris naruk liu fali tinan 200 liubá, maibé neʼe tanba ema aprende ona oinsá atu halaʼo moris saudavel, no iha ai-moruk no vasina ba moras oioin. Sientista sira dehan katak maski iha tratamentu barak atu prevene ema sai ferik-katuas, maibé ema labele moris naruk liu tanba ema nia moris toʼo ona ninia limite.
Maizumenus tinan 3.500 liubá, Moisés neʼebé hakerek-naʼin ida ba Bíblia dehan: “Ami-nia moris mak toʼo tinan 70, ka se ema ida iha forsa, ninia tinan bele toʼo 80. Maibé tinan sira-neʼe nakonu ho susar no triste; neʼe sei liu lalais deʼit, no ami la iha tan.” (Sal 90:10) Maski ema hakaʼas an atu hanaruk sira-nia moris, maibé ita-nia moris nafatin hanesan deʼit tuir buat neʼebé Moisés hatete.
Maibé iha animál balu iha tasi neʼebé bele moris ba tinan atus ba atus, no ai-hun balu bele toʼo tinan rihun ba rihun. Se ita kompara ita-nia moris ho buat sira-neʼe, neʼe halo ita hanoin, ‘Ita-nia moris toʼo deʼit tinan 70 ka 80 ka lae?’
wp19.1 p. 5, kaixa
Maromak iha naran ka lae?
Sé mak kria Maromak?
Ema barak hanoin kona-ba pergunta neʼe. Karik Ita mós hanesan. Ita bele husu fali: Se Maromak mak kria universu no buat hotu iha universu neʼe, entaun sé mak kria Maromak?
Sientista barak konkorda katak universu neʼe la mosu mesak deʼit. Ida-neʼe apoia malu ho eskritura primeiru iha Bíblia neʼebé hatete: “Horiuluk kedas Maromak kria lalehan no rai.”—Gén 1:1.
Ita-nia universu la mosu mesak deʼit. Buat hotu iha tanba kriadór mak halo. Se kriadór la iha, ita-nia universu, buat hotu iha universu no ita mós la iha. Entaun, ita bele fiar katak kriadór iha duni. Nia mak espíritu neʼebé iha kbiit boot tebes, no ninia naran mak Jeová—Jo 4:24.
Bíblia hatete kona-ba Maromak: “Antes Ita halo foho sira ka antes Ita halo mundu no rai neʼebé buras, Ita mak Maromak, husi uluk kedas no ba nafatin.” (Sal 90:2) Neʼe katak la iha mak kria Maromak. Nia iha ona husi uluk kedas. No tuirmai mak nia kria universu.—Apk 4:11.
Domin ajuda ita manán sentimentu taʼuk
16 Satanás hatene katak ita hafolin moris. Nia duun katak ita prontu atu husik buat naran deʼit, inklui ita-nia relasaun diʼak ho Jeová atu bele kontinua moris. (Job 2:4, 5) Maibé Satanás sala boot! Maski nuneʼe, Satanás “iha kbiit atu halo mate” no nia koko atu aproveita ita-nia sentimentu taʼuk mate atu book ita hadook an husi Jeová. (Ebr 2:14, 15) Dala ruma, ema sira neʼebé Satanás kontrola ameasa atu oho Jeová nia atan sira se sira la nega sira-nia fiar. Dala ruma Satanás aproveita emerjénsia médiku atu halo ita la kaer metin ba ita-nia fiar. Karik doutór ka família neʼebé laʼós Testemuña obriga ita atu simu transfuzaun raan neʼebé kontra Maromak nia ukun-fuan. Ka karik ema ruma obriga ita atu simu tratamentu ruma neʼebé kontra Bíblia nia prinsípiu sira.
17 Klaru katak ita lakohi mate, maibé ita hatene katak Jeová sei kontinua hadomi ita maski ita mate. (Lee Roma 8:37-39.) Bainhira Jeová nia belun sira mate, nia kontinua hanoin-hetan sira hanesan sira sei moris hela. (Lc 20:37, 38) Nia hakarak tebes atu halo sira moris fali. (Job 14:15) Jeová selu ona folin neʼebé karun atu nuneʼe ita bele “hetan moris rohan-laek”. (Jo 3:16) Ita hatene katak Jeová hadomi tebes ita no hanoin tebes ita. Tan neʼe, duké husik Jeová bainhira ita moras ka atu besik mate, diʼak liu atu sadere ba Jeová atu hetan kmaan, matenek no kbiit. Irmán Valérie no ninia laʼen halo nuneʼe duni.—Sal 41:3.
Keʼe no hetan buat murak husi Bíblia
Ita iha “anjo da guarda” ka lae?
Bíblia la hanorin katak ema ida-idak iha anju ida neʼebé hein no proteje ninia moris. Maski Jesus dehan: “Kuidadu atu imi la hakribi kiʼikoan sira-neʼe ida [katak, ida husi Kristu nia dixípulu sira], tanba haʼu hatete ba imi katak sira-nia anju sira iha lalehan sempre hateke ba haʼu-nia Aman iha lalehan nia oin.” (Mt 18:10) Maibé, neʼe la dehan katak ema ida-idak iha anju ida. Jesus nia liafuan neʼe hatudu deʼit katak anju sira interese ba ninia dixípulu ida-idak. Tan neʼe, ema neʼebé halaʼo adorasaun neʼebé loos la tau sira-nia moris iha perigu laran hodi hanoin katak Maromak nia anju sira sei proteje sira.
Neʼe katak, anju sira nunka ajuda ema ka lae? Lae. Sira bele ajuda ema. (Sal 91:11) Ema balu fiar katak Maromak haruka ninia anju sira atu proteje sira ka book sira atu halo buat ruma. Kenneth neʼebé temi iha pájina 3 mós fiar hanesan neʼe. Ita la bele hatene ho loloos, maibé karik Kenneth mak loos. Ami Testemuña ba Jeová iha esperiénsia barak neʼebé halo ami fiar katak anju sira mós hola parte iha serbisu haklaken. Maibé, ita la bele haree anju sira, tan neʼe ita la hatene ho loloos oinsá mak Maromak uza sira atu ajuda ema. Maski nuneʼe, diʼak ba ita atu fó-agradese ba Maromak kona-ba ajuda ka apoiu neʼebé ita simu.—Kol 3:15; Tgo 1:17, 18.
7-13 OUTUBRU
RIKUSOIN HUSI BIBLÍA SALMO 92-95
Serbí Jeová mak desizaun neʼebé diʼak liu iha Ita-nia moris!
Joven sira, imi tau fokus ba planu espirituál sira ka lae?
5 Razaun importante liu hotu atu halo planu espirituál mak atu hatudu agradese ba Jeová nia domin no ba buat hotu neʼebé nia fó ba ita. Ema neʼebé hakerek Salmo dehan: “Oh Jeová, diʼak duni atu fó-agradese ba Ita . . . Oh Jeová, Ita halo haʼu haksolok tanba Ita-nia hahalok sira; haʼu haklalak ho haksolok tanba serbisu neʼebé Ita halo ho Ita-nia liman rasik.” (Sal 92:1, 4) Hanoin toʼok Jeová fó ona saida ba Ita: moris, fiar, Bíblia, kongregasaun, no esperansa atu moris ba nafatin iha Paraízu. Bainhira Ita halo planu espirituál, Ita hatudu ba Jeová katak Ita agradese tebes ba buat hotu neʼe no neʼe halo Ita hakbesik liután ba nia.
Sé mak troka daudaun Ita-nia hanoin?
8 Hanesan inan-aman neʼebé diʼak, Jeová mós hakarak ninia oan sira atu iha moris neʼebé diʼak liu hotu. (Isa 48:17, 18) Tan neʼe mak nia hanorin prinsípiu báziku ba ita kona-ba morál no ita-nia hahalok ba ema seluk. Nia konvida ita atu haburas ninia hanoin no moris tuir ninia morál sira. Neʼe la halakon ita-nia liberdade. Maibé ajuda ita atu haburas ita-nia kbiit atu hanoin. (Sal 92:5; Prv 2:1-5; Isa 55:9) Hodi halo nuneʼe ita bele halo desizaun neʼebé lori kontente ba ita. (Sal 1:2, 3) Sin, iha Jeová nia hanoin lori benefísiu oioin ba ita.
Jeová hadomi no hafolin ita
18 Maski ita idade ona, maibé ita bele fiar katak Jeová sei uza ita atu halo serbisu balu. (Sal 92:12-15) Jesus hanorin ita katak Jeová hafolin buat hotu neʼebé ita bele halo iha ninia serbisu, maski ita sente buat neʼebé ita bele halo ladún iha folin. (Lc 21:2-4) Tan neʼe, tau fokus ba buat neʼebé Ita bele halo. Porezemplu, Ita bele koʼalia kona-ba Jeová, halo orasaun kona-ba irmaun-irmán sira, no anima ema seluk atu laran-metin nafatin. Jeová haree Ita nuʼudar ninia maluk serbisu-naʼin, laʼós tanba buat neʼebé Ita bele halo, maibé tanba Ita prontu atu halo tuir nia.—1Ko 3:5-9.
Keʼe no hetan buat murak husi Bíblia
cl-E p. 176 par. 18
‘Maromak nia matenek mak kleʼan tebes!’
18 Apóstolu Paulo fó sai Maromak nia matenek neʼebé úniku tebes hodi dehan: “Oh, bensaun husi Maromak mak barak tebes! Ninia matenek no komprende mak kleʼan tebes! Ita-nia hanoin la toʼo atu komprende kona-ba ninia tesi-lia no ita la bele hatene ninia dalan hotu!” (Rom 11:33, Tradusaun Mundu Foun edisaun 2014) Hodi loke versíkulu neʼe ho liafuan “Oh”, Paulo hatudu sai sentimentu makaʼas, sentimentu admira no hamtaʼuk. Liafuan Gregu neʼebé tradús nuʼudar “kleʼan” mak liga metin ho liafuan “rai-kuak neʼebé kleʼan tebes”. Tan neʼe, Paulo nia liafuan bele ajuda ita atu hanoin kona-ba dezeñu ida. Kuandu ita buka-hatene Jeová nia matenek, neʼe hanesan ita hateke didiʼak ba rai-kuak neʼebé la iha rohan, fatin neʼebé kleʼan no luan tebes toʼo ita nunka bele imajina, sá tan atu komprende. (Sal 92:5) Neʼe book ita atu haraik an, loos ka lae?
14-20 OUTUBRU
RIKUSOIN HUSI BIBLÍA SALMO 96-99
“Haklaken liafuan diʼak”!
Lia-foun diʼak neʼe kona-ba saida?
EMA kristaun tenke haklaken “lia-foun diʼak reinu nian neʼe” ba ema seluk, hodi esplika katak Maromak nia ukun sei halakon buat aat iha mundu tomak. Maibé dala ruma Bíblia mós uza “lia-foun diʼak” kona-ba buat seluk. Porezemplu, Bíblia uza liafuan hanesan “lia-foun diʼak kona-ba salvasaun” (Sal 96:2); “Maromak nia liafuan diʼak” (Mc 1:14); no “liafuan diʼak nian kona-ba Jesus Kristu”.—Mc 1:1.
Lia-foun diʼak neʼe inklui Jesus nia hanorin kona-ba lia-loos hotu neʼebé ninia dixípulu sira hakerek. Antes Jesus atu saʼe ba lalehan, nia haruka nia dixípulu sira: “Neʼe duni, laʼo bá, hanorin nasaun hotu-hotu; sarani sira hodi Aman, Oan no espíritu santu nia naran, hanorin sira atu halo tuir buat hotu neʼebé haʼu haruka imi.” (Mt 28:19, 20) Tan neʼe, ema kristaun neʼebé loos nia knaar laʼós atu fó-hatene deʼit kona-ba Maromak nia reinu, ka ukun, maibé sira mós tenke hanorin ema atu halo tuir Jesus.
brwp120901 par. 2
Saida mak sei akontese iha Loron Tesi-Lia nian?
Hanesan hatudu iha dezeñu iha sorin, ema barak hanoin katak iha Loron Tesi-Lia nian ema barak nia klamar sei hamriik iha Maromak nia kadunan nia oin no hetan tesi-lia tuir sira-nia hahalok uluk. Balu sei simu bensaun atu moris iha lalehan, no balu simu kastigu iha infernu. Maibé Bíblia hatudu katak objetivu husi Loron Tesi-Lia nian mak atu salva ema husi hahalok la justu. (Sal 96:13) Maromak hili ona Jesus atu sai Juís neʼebé sei lori fali justisa mai mundu.—Lee Isaias 11:1-5; Apóstolu 17:31.
Dame ba tinan rihun ida no ba nafatin!
18 Maibé, kuandu Satanás book ema atu kontra hasoru Jeová, rezultadu mak ida-neʼe estraga ema hotu nia relasaun diʼak ho Nia. Maibé husi tinan 1914, Jesus nia Ukun halo daudauk buat oioin hodi Jeová nia kriasaun hotu bele hetan fali dame no unidade. (Éf 1:9, 10) Durante Kristu nia Ukun ba Tinan Rihun Ida, buat furak barak neʼebé ita seidauk haree sei sai realidade. Depois, “rohan sei mosu mai”. Neʼe katak Kristu nia Ukun ba Tinan Rihun Ida sei toʼo rohan. Saida mak sei akontese iha tempu neʼebá? Maski Jesus simu “kbiit tomak iha lalehan no rai”, nia la foti an hodi hanoin atu hadau Jeová nia pozisaun. Duké halo nuneʼe, Jesus ho haraik-an sei “saran reinu ba Aman Maromak”. Sin, Jesus sempre uza ninia pozisaun espesiál no kbiit ba “Maromak nia glória”.—Mt 28:18; Flp 2:9-11.
19 Iha tempu neʼebá, ema hotu neʼebé iha Maromak nia Ukun nia okos sei sai ona ema neʼebé perfeitu. Hodi halo tuir Jesus nia ezemplu, sira mós ho haraik-an simu Jeová nia direitu atu ukun, no sei hatudu hakarak neʼe hodi tahan hasoru Satanás nia babeur ba dala ikus. (Apk 20:7-10) Liutiha neʼe, ema ho anju sira neʼebé kontra hasoru Jeová sei la iha tan ba nafatin. Neʼe mak tempu neʼebé ita hotu sei haksolok tebes! Sin, Jeová nia família hotu iha lalehan no rai sei kontente atu fó hahiʼi ba Jeová, neʼebé sai “buat hotu” ba ninia kriasaun hotu.—Lee Salmo 99:1.
Keʼe no hetan buat murak husi Bíblia
it-2-E p. 994
Knananuk
Liafuan “knananuk foun” mosu laʼós deʼit iha Salmo, maibé mós iha Isaias no apóstolu João nia livru. (Sal 33:3; 40:3; 96:1; 98:1; 144:9; 149:1; Isa 42:10; Apk 5:9; 14:3) Bainhira ita estuda kona-ba kontestu neʼebé haleʼu liafuan “knananuk foun”, ita bele komprende katak tempu atu kanta knananuk foun mak kuandu Jeová hatudu sai ninia direitu atu ukun universu iha dalan foun. Porezemplu, Salmo 96:10 fó sai avizu ida ho haksolok: “Jeová sai ona Liurai!” “Knananuk foun” neʼe karik fó sai kona-ba mudansa sira kuandu Jeová hametin liután ninia pozisaun nuʼudar Liurai, no mós oinsá neʼe afeta lalehan no rai.—Sal 96:11-13; 98:9; Isa 42:10, 13.
21-27 OUTUBRU
RIKUSOIN HUSI BIBLÍA SALMO 100-102
Hatudu agradese ba Jeová nia domin neʼebé laran-metin
Oinsá atu sai prontu ba batizmu?
18 Ita-nia domin ba Jeová mak hahalok neʼebé furak tebes. (Lee Provérbios 3:3-6.) Bainhira Ita iha domin neʼebé boot ba Jeová, neʼe sei ajuda Ita tahan susar sira ho susesu. Bíblia temi beibeik kona-ba Jeová nia domin neʼebé laran-metin ba ninia atan sira. Tan neʼe nia sei nunka husik hela ninia atan sira no nunka para atu hadomi sira. (Sal 100:5) Maromak kria Ita tuir ninia ilas. (Gén 1:26) Oinsá mak Ita bele banati-tuir ninia domin?
19 Hahú hodi haburas agradese. (1Ts 5:18) Loroloron husu ba Ita-nia an: ‘Oinsá Jeová hatudu ona domin mai haʼu?’ Tuirmai fó obrigadu ba Jeová liuhusi orasaun. Ita bele temi buat espesífiku neʼebé nia halo ona mai Ita. Rekoñese katak Jeová halo buat diʼak ba Ita tanba nia hadomi Ita. Apóstolu Paulo mós rekoñese ida-neʼe kona-ba Jeová. (Lee Galásia 2:20.) Husu ba Ita-nia an: ‘Haʼu hakarak hatudu fali domin ba Jeová ka lae?’ Domin ba Jeová sei ajuda Ita tahan tentasaun no mós susar sira ho susesu. Domin sei book Ita atu kontinua halo atividade espirituál beibeik no loroloron hatudu katak Ita hadomi Ita-nia Aman Jeová.
“Proteje imi-nia neon no matan-moris bá!”
10 Perigu balu neʼebé ita presiza hasees an inklui oin-moris ba ema seluk, hemu tua barak demais, han barak demais, koʼalia hodi hakanek ema seluk nia laran, no mós atividade halimar nian neʼebé hatudu violénsia, pornografia no buat seluk hanesan neʼe. (Sal 101:3) Ita-nia inimigu Diabu sempre buka oportunidade atu estraga ita-nia relasaun diʼak ho Jeová. (1Pe 5:8) Se ita la matan-moris nafatin, Satanás bele kuda sentimentu hanesan laran-moras, la onestu, kaan-teen, odi, foti an no rai odi iha ita-nia neon no laran. (Gal 5:19-21) Karik foufoun ita hanoin katak sentimentu sira-neʼe ladún perigu. Maibé se ita la fokit sai kedas sentimentu sira-neʼe, neʼe sei kontinua moris hanesan ai-horis venenu no hamosu problema.—Tgo 1:14, 15.
Ita sei halo tuir Jeová nia avizu ka lae?
7 Saida mak ita presiza halo atu bele hadook an husi mestre bosok sira? Ita labele simu sira iha ita-nia uma ka kumprimenta sira. Ita mós lakohi atu lee sira-nia livru, haree sira-nia programa iha televizaun, ka lee informasaun kona-ba sira iha internét. Tansá mak ita foti desizaun metin hanesan neʼe? Ulukliu hotu, tanba ita hadomi “Maromak lia-loos nian”. Tan neʼe, ita lakohi rona ba hanorin falsu neʼebé kontra lia-loos iha Maromak nia Liafuan. (Sal 31:5; Jo 17:17) Ita mós hadomi Maromak Jeová nia organizasaun neʼebé hanorin ita lia-loos neʼebé furak tebes, hanesan Jeová nia naran no ninia naran nia arti, Maromak nia hakarak ba mundu neʼe, saida mak akontese ba ema neʼebé mate, no esperansa kona-ba moris-hiʼas. Ita sei hanoin-hetan ka lae oinsá ita sente kuandu ita foin aprende kona-ba lia-loos sira-neʼe? Nuneʼe, mai ita la husik mestre bosok sira halo ita kontra ita-nia organizasaun neʼebé hanorin ita lia-loos sira-neʼe.—Jo 6:66-69.
8 Buat naran deʼit neʼebé mestre bosok sira hatete, ita sei la rona sira! Ita lakohi tuir ema neʼebé hanesan bee-posu neʼebé maran. Entaun, mai ita nafatin laran-metin ba Jeová no ba ninia organizasaun neʼebé sempre fó mai ita bee lia-loos nian neʼebé moos husi Maromak nia Liafuan.—Isa 55:1-3; Mt 24:45-47.
Keʼe no hetan buat murak husi Bíblia
it-2-E p. 596
Manu-Pelikanu
Bainhira manu-pelikanu han toʼo bosu, baibain nia bá fatin neʼebé hakmatek, tuur hanesan triste hodi subar ulun iha ninia liras, no la book an toʼo halo ema hanoin sala katak neʼe mak fatuk mutin ida. Nia bele tuur ho pozisaun hanesan neʼe ba oras barak. Entaun, bainhira ema neʼebé hakerek salmo hatete: “Haʼu sai hanesan manu-pelikanu iha rai-fuik”, neʼe katak nia sente triste no labele halo buat ida. (Sal 102:6) Liafuan “rai-fuik” iha eskritura neʼe la refere ba rai-maran, maibé neʼe refere ba fatin neʼebé dook husi ema nia hela-fatin, karik área neʼebé iha bee no tahu barak. Toʼo ohin loron, área hanesan neʼe iha parte norte husi Mota Jordaun sai hela-fatin ba manu-pelikanu sira durante tempu balu. Iha Izraél bele hetan manu-pelikanu variante tolu. Variante neʼebé ema bele hetan beibeik liu mak Pelecanus onocrotalus, maibé dala ruma ema mós bele haree Pelecanus crispus no Pelecanus rufescens.
Manu-pelikanu gosta fatin neʼebé fuik no dook husi ema. Iha fatin hanesan neʼe, nia halo knuuk, iha oan, no deskansa kuandu hetan ona ikan. Tanba nia gosta fatin neʼebé fuik no dook husi ema, Bíblia uza manu neʼe atu reprezenta kondisaun neʼebé ema ida la tau matan. Atu reprezenta kondisaun aat neʼebé Edom sei hasoru, Isaias fó sai katak manu-pelikanu mak sei okupa rai neʼe. (Isa 34:11) Sofonias fó sai nanis katak manu-pelikanu sei hela entre sidade Nínive nia riin sira, neʼe hatudu katak sidade neʼe sei aat totál no la iha ema ida mak hela iha neʼebá.—Sof 2:13, 14.
28 OUTUBRU–3 NOVEMBRU
RIKUSOIN HUSI BIBLÍA SALMO 103-104
Nia hanoin-hetan “ita mak rai-rahun deʼit”
Banati-tuir Jeová kona-ba la ulun-toos
5 Jeová hatudu haraik an no laran-sadiʼa, no neʼe book nia atu la ulun-toos. Porezemplu, Jeová hatudu haraik an bainhira nia deside atu halakon ema aat iha Sodoma. Liuhusi ninia anju sira, nia fó matadalan ba Lot neʼebé laran-metin atu halai ba área foho nian. Maibé Lot taʼuk atu halo nuneʼe. Tan neʼe Lot husu atu nia no ninia família halai ba Zoar, neʼe mak sidade kiʼik neʼebé Maromak deside ona atu halakon. Loloos, Jeová bele obriga Lot atu halo tuir ninia matadalan. Duké halo nuneʼe, nia fó lisensa ba Lot atu bá Zoar no nia la halakon sidade neʼe. (Gén 19:18-22) Tinan barak liutiha, Jeová hatudu laran-sadiʼa ba ema Nínive. Nia haruka profeta Jonas atu fó avizu katak Jeová sei harahun sidade neʼe. Maibé bainhira ema Nínive arrepende an, Jeová hanoin sira no la harahun sidade neʼe.—Jon 3:1, 10; 4:10, 11.
Hanesan Sansão, sadere ba Jeová
16 Maski Sansão hetan konsekuénsia neʼebé aat husi ninia sala, maibé nia kontinua hakaʼas an atu halo tuir Jeová nia hakarak. Se ita halo sala no hetan konsellu ka lakon knaar, keta rende an. Hanoin-hetan, Jeová prontu atu fó perdua ba ita. (Sal 103:8-10) Maski ita halo sala, Jeová bele fó ita kbiit atu halo ninia hakarak, hanesan buat neʼebé nia halo ona ba Sansão.
17 Hanoin toʼok ezemplu husi irmaun joven ida naran Michael. Nia okupadu atu halaʼo atividade espirituál, nia serbí nuʼudar atan ba kongregasaun no pioneiru regulár. Triste mak nia halo sala no lakon ninia knaar. Nia hatete: “Haʼu halo buat barak tebes atu serbí Jeová. Maibé derrepente deʼit haʼu sente hanesan la iha buat ida neʼebé haʼu bele halo ba Jeová. Haʼu fiar katak Jeová sei nunka husik hela haʼu, maibé haʼu duvida se haʼu-nia relasaun ho nia bele sai diʼak fali no haʼu bele simu fali knaar hanesan uluk ka lae.”
18 Michael la rende an. Nia hatete: “Haʼu fokus atu hadiʼa haʼu-nia relasaun ho Jeová hodi halo orasaun ba nia, estuda, no medita beibeik.” Ikusmai Michael simu fali knaar iha kongregasaun. Agora, nia serbí nuʼudar katuas kongregasaun no pioneiru regulár. Nia hatete: “Apoia no anima neʼebé haʼu simu, liuliu husi katuas sira, ajuda haʼu atu rekoñese katak Jeová nafatin hadomi haʼu. Haʼu bele serbí fali iha kongregasaun ho konxiénsia neʼebé moos. No haʼu hatene katak Jeová prontu atu fó perdua ba ema neʼebé arrepende an ho laran.” Ita bele fiar metin katak Jeová sei uza ita no haraik bensaun ba ita maski uluk ita halo sala, naran katak ita troka ita-nia hahalok no kontinua sadere ba nia.—Sal 86:5; Prv 28:13.
Ita bele duni kumpre Ita-nia planu espirituál
2 Lalika sai laran-kraik se agora daudaun Ita seidauk kumpre Ita-nia planu ida. Atu kumpre planu neʼebé simples mós Ita presiza tempu no hakaʼas an. Tanba Ita nafatin hakarak atu kumpre Ita-nia planu, neʼe hatudu katak Ita hafolin Ita-nia relasaun diʼak ho Jeová no hakarak fó buat neʼebé diʼak liu hotu ba nia. Jeová hafolin Ita-nia hakaʼas an. Klaru katak Jeová la husu Ita atu halo buat neʼebé liu fali Ita-nia kbiit. (Sal 103:14; Miq 6:8) Entaun bainhira halo planu, diʼak atu hili ida neʼebé Ita bele kumpre tuir Ita-nia situasaun. Maibé oinsá atu kumpre planu neʼe? Mai ita koʼalia kona-ba sujestaun balu.
Keʼe no hetan buat murak husi Bíblia
cl-E p. 55 par. 18
Kbiit atu kria—“Kriadór ba lalehan no rai”
18 Saida mak ita bele aprende husi dalan neʼebé Jeová uza ninia kbiit atu kria? Kuandu ita haree kriasaun oioin, neʼe halo ita admira tebetebes toʼo susar atu imajina. Ema neʼebé hakerek salmo hatete: “Oh Jeová, Ita-nia serbisu sira barak tebes! . . . Rai nakonu ho buat neʼebé Ita halo ona.” (Sal 104:24) Loos duni! Biolojista sira deskobre ona kriatura ho espésie millaun ida liu mak moris iha mundu neʼe, maibé biolojista balu hanoin katak karik sei iha tan espésie millaun ba millaun. Artista ida karik bele lakon ninia ideia, maibé Jeová nia ideia no kbiit atu kria buat foun nunka hotu.