Eclesiastes 3:11—“Buat hotu neʼebé Maromak halo mak furak tebes no tuir tempu”

“Buat hotu neʼebé Maromak halo mak furak tebes no tuir tempu. Nia mós tau ona tempu neʼebé la iha rohan iha ema sira-nia laran; maski nuneʼe, ema sei nunka hatene Maromak loos nia serbisu neʼebé nia halo ona husi primeiru toʼo ikus.”​—Eclesiastes 3:11, Tradusaun Mundu Foun.

“Maromak halo buat hotu furak tuir ninia tempu. No mos, Nia tau tempu rohan laek iha ema nia fuan laran. Maibee ema la bele deskobre Maromak nia servisu nebee Nia halao hosi hahuu too ikus.”​—Eklesiastes 3:11, Bíblia Kadi Kapasidade.

Signifikadu husi Eclesiastes 3:11

“Buat hotu neʼebé Maromak halo mak furak tebes no tuir tempu.” Liafuan Ebraiku neʼebé tradús nuʼudar “furak” bele mós tradús nuʼudar “halo ho diʼak”, neʼe laʼós refere deʼit ba buat neʼebé haree furak no jeitu. (Eclesiastes 3:11, nota-rodapé) Maromak nia serbisu furak oioin laʼós deʼit kona-ba buat hotu neʼebé nia kria ona, maibé inklui mós buat hotu neʼebé nia halo daudaun hodi kumpre ninia hakarak.​—Daniel 2:21; 2 Pedro 3:8; Apokalipse 4:11.

“Nia mós tau ona tempu neʼebé la iha rohan iha ema sira-nia laran.” Maromak kria ema atu moris ba nafatin. (Salmo 37:29) Tan neʼe, Maromak mós tau ona hakarak atu moris ba nafatin iha sira-nia laran. Maibé, kaben-naʼin primeiru Adão no Eva la halo tuir Maromak no rezultadu mak sira no sira-nia oan hotu mate. (Génesis 3:17-19; Roma 5:12) Maski nuneʼe, Maromak promete katak nia sei “halo kontente kriatura hotu neʼebé moris hodi fó buat neʼebé sira hakarak”, neʼe inklui ema nia hakarak atu moris ba nafatin. (Salmo 145:16) Bíblia esplika kona-ba buat neʼebé Jeová halo ona hodi ema bele hetan fali esperansa atu moris ba nafatin.​—Roma 6:23.

“Ema sei nunka hatene Maromak loos nia serbisu neʼebé nia halo ona husi primeiru toʼo ikus.” Maromak iha matenek neʼebé kleʼan tebes no Bíblia dehan “ita labele hatene ninia dalan hotu”. (Roma 11:33) Maski nuneʼe, nia prontu atu fó sai ninia objetivu ba ema neʼebé hakarak halo nia kontente.​—Amós 3:7.

Kontestu husi Eclesiastes 3:11

Liurai Salomão husi nasaun Izraél antigu mak hakerek livru Eclesiastes, nia mak ema famozu tanba simu matenek husi Maromak. Livru Eclesiastes fó sai konsellu kona-ba saida mak iha folin no la iha folin iha ema nia moris. (Eclesiastes 1:2, 3; 2:1, 17; 7:1; 12:1, 13) Iha kapítulu 3, Salomão temi atividade no serbisu oioin neʼebé ema halo iha sira-nia moris. (Eclesiastes 3:1-8, 10) Maromak fó ba ema liberdade atu halo desizaun kona-ba atividade saida deʼit mak sira halo no bainhira mak sira halo ida-neʼe. (Deuteronómio 30:19, 20; Josué 24:15) Salomão esplika katak ema bele hetan ksolok neʼebé loos husi sira-nia serbisu só deʼit kuandu sira halo tuir Maromak nia hakarak no respeitu tempu neʼebé loos tuir Ninia hanoin. Salomão temi ida-neʼe nuʼudar “prezente husi Maromak”.​—Eclesiastes 3:1, 12, 13.

Haree vídeo badak neʼe hodi komprende kona-ba livru Eclesiastes.