Isaias 41:10—“Keta taʼuk, tanba haʼu hamutuk ho ó”

“Keta taʼuk, tanba haʼu hamutuk ho ó. Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó, haʼu sei kaer metin ó ho haʼu-nia liman-loos justisa nian.”​—Isaias 41:10, Tradusaun Mundu Foun.

Signifikadu husi Isaias 41:10

Maromak Jeováa fó fiar ba ninia atan sira neʼebé laran-metin katak nia sei ajuda sira ho problema saida deʼit neʼebé sira hasoru.

“Haʼu hamutuk ho ó.” Jeová fó razaun ba ninia atan sira neʼebé laran-metin atu labele taʼuk tanba sira la mesak. Tanba nia haree buat neʼebé akontese ba sira no nia rona ba sira-nia orasaun, neʼe hanesan nia iha neʼebá hamutuk ho sira.​—Salmo 34:15; 1 Pedro 3:12.

“Haʼu mak ó-nia Maromak.” Jeová halo kmaan ninia atan sira hodi fó-hanoin sira katak nia nafatin sira-nia Maromak no simu sira nuʼudar ema sira neʼebé adora nia. Sira bele fiar katak la iha buat ida mak bele hapara Maromak hodi ajuda sira.​—Salmo 118:6; Roma 8:32; Ebreu 13:6.

“Haʼu sei hametin ó, sin, haʼu sei ajuda ó, haʼu sei kaer metin ó ho haʼu-nia liman-loos justisa nian.” Jeová uza fraze tolu atu hametin ideia ida deʼit katak nia sei fó duni ajuda. Liafuan neʼebé nia uza halo ita imajina katak nia lolo ninia liman-loos atu dada fali ema neʼebé monu. Neʼe hatudu oinsá nia sei halo buat ruma kuandu ninia povu presiza ajuda.​—Isaias 41:13.

Dalan importante ida neʼebé Jeová uza atu hametin ninia atan sira mak liuhusi ninia Liafuan, Bíblia. (Josué 1:8; Ebreu 4:12) Porezemplu, Maromak nia Liafuan fó matadalan neʼebé matenek ba sira neʼebé hasoru susar, hanesan moris kiak, moras, ka lakon ema neʼebé sira hadomi tanba mate. (Provérbios 2:6, 7) Maromak mós bele uza ninia espíritu santu, ka ninia forsa atu ajuda ninia atan sira atu iha hanoin neʼebé diʼak no mós atu tahan sira-nia problema.​—Isaias 40:29; Lucas 11:13.

Kontestu husi Isaias 41:10

Liafuan sira-neʼe fó kmaan ba ema Judeu laran-metin sira neʼebé ikusmai sai dadur iha Babilónia. Jeová fó sai nanis katak kuandu ema Judeu sira-nia tempu dadur atu remata, sira sei rona ema konta katak inimigu sei mai atu harahun nasaun sira neʼebé haleʼu no neʼe sei lori ameasa ba Babilónia. (Isaias 41:2-4; 44:1-4) Nuʼudar Babilónia no nasaun neʼebé haleʼu sente nakdedar no taʼuk tebes kona-ba istória neʼe, ema Judeu la presiza hanoin barak, tanba Jeová sei proteje sira. Dala tolu Jeová fó fiar metin ba sira ho liafuan, “Keta taʼuk”.​—Isaias 41:5, 6, 10, 13, 14.

Maski Jeová koʼalia liafuan sira-neʼe ba ema Judeu neʼebé dadur iha Babilónia, maibé tanba liafuan sira-neʼe rai hela iha Bíblia toʼo ohin loron hatudu katak nia hakarak liafuan sira-neʼe atu fó kmaan ba ninia atan hotu. (Isaias 40:8; Roma 15:4) Nia ajuda sira ohin loron, hanesan nia ajuda ninia atan sira iha tempu uluk.