Informasaun atu uza hamutuk livru Moris Kristaun no Haklaken
2-8 OUTUBRU
Keʼe no hetan buat murak husi Bíblia
w01 15/5 p. 27
Pergunta husi lee-naʼin
Horibainhira mak Jeová halo santu “Fatin Santu Liu Hotu”, hanesan Daniel 9:24 fó-hatene nanis?
Daniel 9:24-27 mak profesia ida kona-ba tempu neʼebé Kristu, “Mesias, Ulun-Naʼin” sei mosu mai. Tan neʼe, tempu neʼebé atu halo santu Fatin Santu Liu Hotu laʼós refere ba templu iha Jeruzalein. Maibé liafuan “Fatin Santu Liu Hotu” iha eskritura neʼe refere ba Maromak nia fatin santu lalehan nian, iha Jeová nia templu espirituál.—Ebreu 8:1-5; 9:2-10, 23.
Horibainhira mak Maromak nia templu espirituál hahú laʼo? Hanoin toʼok buat neʼebé akontese bainhira Jesus hetan batizmu iha tinan 29. Husi tempu neʼebá, Jesus kumpre liafuan iha Salmo (Mazmur) 40:6-8 iha ninia moris. Ikusmai, apóstolu Paulo hatete katak Jesus halo orasaun hodi dehan: “Ita lakohi simu sakrifísiu no prezente; maibé Ita prepara isin-lolon mai haʼu.” (Ebreu 10:5) Jesus hatene katak Maromak “lakohi” ona ema atu hasaʼe animál nuʼudar sakrifísiu iha templu iha Jeruzalein, tanba Jeová prepara ona Jesus nia isin neʼebé perfeitu atu hasaʼe nuʼudar sakrifísiu. Jesus hatete: “Haree! Oh, Maromak, haʼu mai ona atu halo Ita-nia hakarak, hanesan hakerek nanis ona iha livru kona-ba haʼu.” (Ebreu 10:7) Jeová hanoin saida kona-ba Jesus nia hakarak neʼe? Iha evanjellu Mateus hatete: “Hetan tiha batizmu, Jesus sai husi bee, no tuirmai lalehan nakloke, no nia haree Maromak nia espíritu hanesan manu-pombu ida tun ba Jesus. No mós, lian ida husi lalehan dehan: ‘Neʼe mak haʼu-nia Oan-Mane neʼebé haʼu hadomi, ida neʼebé halo haʼu-nia laran kontente.’”—Mateus 3:16, 17.
Iha tempu neʼebé Jeová simu Jesus nia isin neʼebé nia sei fó nuʼudar sakrifísiu, signifika katak altár espirituál neʼebé importante liu fali altár iha Jeruzalein mós harii ona. Altár neʼe mak Maromak nia “hakarak”, ka arranju atu simu Jesus nia moris nuʼudar sakrifísiu. (Ebreu 10:10) Iha tempu neʼebé Jesus simu Maromak nia espíritu santu, Maromak hahú ona ninia arranju kona-ba templu espirituál. Tan neʼe, bainhira Jesus hetan batizmu, lalehan sai ona Fatin Santu Liu Hotu iha Jeová nia arranju kona-ba templu espirituál.
w07 1/9 p. 20 par. 4
Pontu importante husi livru Daniel
9:27—Aliansa saida mak “vale ba ema barak” toʼo tinan 36 liutiha Kristu bainhira semana 70 nian ramata ona? Aliansa Ukun-Fuan nian ramata ona iha tinan 33 bainhira Jesus mate iha ai-riin. Maibé tanba aliansa ho Abraão nian sei laʼo nafatin toʼo tinan 36, neʼe hatudu katak Jeová sei kontinua simu no fó bensaun ba ema judeu sira tanba sira mak Abraão nia bei-oan. Aliansa ho Abraão nian sei vale ba “Izraél Maromak nian”.—Galásia 3:7-9, 14-18, 29; 6:16.
9-15 OUTUBRU
Keʼe no hetan buat murak husi Bíblia
w13 15/7 p. 13 par. 16, nota
“Haʼu sei hela nafatin hamutuk ho imi”
Daniel 12:3 hatete katak “sira neʼebé iha matenek [ema kristaun kose-mina sira] sei nabilan hanesan naroman husi lalehan”. Ema kristaun kose-mina sira kumpre daudauk profesia neʼe liuhusi serbisu haklaken. Maibé, Mateus 13:43 koʼalia kona-ba tempu neʼebé sira sei nabilan iha Maromak nia Ukun iha lalehan. Uluk, ita hanoin katak eskritura rua neʼe koʼalia kona-ba serbisu haklaken.
dp p. 315 par. 18
Jeová promete kolen furak ida ba Daniel
18 Daniel nia livru ramata ho Maromak nia promesa furak ida. Jeová nia anju dehan ba Daniel: “Ó sei hamriik atu simu ó-nia parte iha loron sira-neʼe nia rohan.” Liafuan sira-neʼe signifika saida? Antes neʼe, anju foin koʼalia kona-ba mate bainhira nia uza liafuan “deskansa”, tan neʼe, bainhira anju dehan katak nia sei “hamriik”, neʼe koʼalia kona-ba moris-hiʼas! Matenek-naʼin balu kona-ba Bíblia hanoin katak iha Daniel kapítulu 12 mak dala primeiru neʼebé Bíblia koʼalia kona-ba moris-hiʼas. (Daniel 12:2) Maibé tuir loloos, laʼós hanesan neʼe. Daniel hatene didiʼak kona-ba esperansa moris-hiʼas nian.
16-22 OUTUBRU
Keʼe no hetan buat murak husi Bíblia
w07 15/9 p. 14 par. 7
Pontu importante husi livru Oséias
1:7—Horibainhira mak Jeová hatudu laran-sadiʼa hodi salva umakain Judá? Ida-neʼe akontese iha Liurai Ezekias nia tempu iha tinan 732 molok Kristu. Iha tempu neʼe, ema Asíria ameasa Jeruzalein, maibé Jeová nia anju oho Asíria nia tropa naʼin–185.000 iha kalan ida deʼit. (2 Reis [Raja-Raja] 19:34, 35) Ho ida-neʼe, Jeová salva Judá, laʼós liuhusi “rama, surik, funu, kuda sira, ka liuhusi tropa neʼebé saʼe kuda”, maibé liuhusi anju ida.
Oséias nia profesia ajuda ita laʼo ho Maromak
16 Maromak mós kumpre promesa neʼe: “Iha loron neʼebá, haʼu sei halo aliansa ho animál fuik sira iha rai-luan, ho manu sira iha lalehan no ho animál sira neʼebé dolar iha rai, ba haʼu-nia povu sira-nia diʼak; Haʼu sei hasai tiha rama, surik, no funu husi rai neʼe, no haʼu sei halo sira moris ho seguru.” (Oséias [Hosea] 2:18) Ema judeu neʼebé fila ba Jeruzalein moris ho seguru, sira la presiza taʼuk animál fuik sira. Profesia neʼe mós sai loos iha tinan 1919, bainhira ema restu husi Izraél espirituál sai livre husi relijiaun falsu, “Babilónia Boot”. Agora daudauk sira moris seguru no kontente iha paraízu espirituál hamutuk ho sira-nia maluk sira neʼebé iha esperansa atu moris iha rai. Iha ema kristaun sira-neʼe nia leet, la iha ema neʼebé hatudu hahalok siʼak hanesan animál.—Apokalipse 14:8; Isaías (Yesaya) 11:6-9; Galásia 6:16.
g05 8/9 p. 12 par. 2
Unidade iha mundu tomak
Iha futuru sei iha unidade neʼebé úniku tanba Maromak sei hanorin ninia povu oinsá atu tau matan didiʼak ba rai. Nia mós sei “halo aliansa” ho animál siʼak hotu, hodi halo animál sira-neʼe moris hamutuk ho ema iha dame.—Oséias (Hosea) 2:18; Gênesis (Kejadian) 1:26-28; Isaías (Yesaya) 11:6-8.
23-29 OUTUBRU
Keʼe no hetan buat murak husi Bíblia
“Jeová nia dalan sira mak loos”
7 Se ita adora Jeová ho laran tomak no iha dalan neʼebé loos, ita sei simu Jeová nia domin neʼebé laran-metin. Oséias koʼalia ba ema Izraél sira neʼebé la halo tuir, hodi dehan: “Agora sei iha tempu atu buka Jeová, tan neʼe, fila rai bá iha fatin neʼebé diʼak, kuda fini bá ho hahalok loos no koʼa domin neʼebé laran-metin; Toʼo tempu neʼebé nia mai no hanorin imi ho hahalok loos.”—Oséias (Hosea) 10:12.
Sira hein ba Mesias
10 Hanesan ema Izraél, Jeová sei bolu mós Mesias husi rai-Ejitu. (Oséias [Hosea] 11:1) Antes Herodes fó sai mandamentu atu oho labarik mane sira, anju ida haruka José, Maria no Jesus hodi halai ba Ejitu. Sira hela iha neʼebá “toʼo Herodes mate. Ida-neʼe kumpre liafuan neʼebé Jeová koʼalia liuhusi ninia profeta, neʼebé dehan: ‘Husi Ejitu mak haʼu bolu haʼu-nia oan-mane.’” (Mateus 2:13-15) Jesus la bele organiza buat sira neʼebé akontese bainhira nia foin moris no iha tempu neʼebé nia sei kiʼik.
30 OUTUBRU–5 NOVEMBRU
Keʼe no hetan buat murak husi Bíblia
w07 1/10 p. 13 par. 5
Pontu importante husi livru Joel no Amós
2:12, 13. Arrepende an neʼebé loos laʼós envolve ‘lees roupa’ maibé ‘lees ita-nia fuan’, atu hatudu katak neʼe mai duni husi laran.
w07 1/10 p. 13 par. 3
Pontu importante husi livru Joel no Amós
3:14—Saida mak “foho-leet tesi-lia nian”? Neʼe mak fatin simbóliku ida neʼebé Jeová halaʼo ninia tesi lia. Iha Liurai Jeosafát husi Judá nia tempu, neʼebé ninia naran iha arti katak “Jeová Mak Tesi-Lia Naʼin”, Maromak salva Judá husi nasaun sira hodi halo sira-nia tropa sira sai bilán. Tan neʼe, fatin neʼe mós iha naran “Foho-Leet Jeosafát”. (Joel 3:2, 12) Iha ita-nia tempu, neʼe reprezenta fatin simbóliku ida neʼebé Jesus sei sama nasaun sira hanesan ema sama uvas-fuan iha fatin atu sama uvas nian.—Apokalipse 19:15.
DANIEL
7 Iha tinan primeiru husi Liurai Belsazar nia ukun iha rai-Babilónia, Daniel haree mehi ida no vizaun sira iha nia neon nuʼudar nia toba hela iha kama leten. Tuirmai nia hakerek mehi neʼe; nia hakerek ida-neʼe ho kompletu. 2 Daniel fó sai, hodi dehan:
“Bainhira haʼu haree daudaun ba haʼu-nia vizaun sira durante kalan, haree bá! anin husi lalehan nia sorin haat huu makaʼas loos iha tasi leten neʼebé luan. 3 No animál haat neʼebé boot tebes sai husi tasi, sira ida-idak la hanesan.
4 “Ida primeiru hanesan leaun ida, no nia iha liras hanesan manu-makikit nian. Haʼu kontinua hateke toʼo ninia liras fokit sai tiha, no buat ruma hiʼit saʼe nia husi rai toʼo nia hamriik loos ho ninia ain rua hanesan ema, no nia simu fali ema nia fuan.
5 “No haree bá! animál ida tan, ida segundu, hanesan ursu ida. Nia hiʼit saʼe ona ninia ain sorin ida, no iha knosen-ruin tolu entre ninia nehan sira; no lian ida dehan ba nia: ‘Hamriik bá, han naʼan barak.’
6 “Depois neʼe, haʼu kontinua hateke, no haree bá! animál ida tan, hanesan leopardu, maibé iha liras haat iha ninia kotuk hanesan manu nia liras. No animál neʼe iha ulun haat, no nia simu kbiit atu ukun.
7 “Depois neʼe, haʼu kontinua haree vizaun sira durante kalan neʼe, no haʼu haree animál númeru haat, neʼebé hamosu taʼuk, siʼak loos no forte tebes, no nia iha nehan boot husi besi. Nia tolan no harahun ninia vítima, no buat neʼebé restu nia sama ho ninia ain. Animál neʼe la hanesan ho animál fuik sira seluk neʼebé mosu antes nia, no nia iha dikur sanulu. 8 Bainhira haʼu hateke no hanoin hela kona-ba dikur sira-neʼe, haree bá! dikur ida seluk, dikur kiʼik ida, mosu iha sira-nia leet, no dikur tolu neʼebé iha nanis ona, fokit sai tiha iha dikur kiʼik neʼe nia oin. No haree bá! iha dikur neʼe iha matan hanesan ema nian, no iha ibun neʼebé koʼalia ho foti-an.
9 “Haʼu kontinua hateke toʼo kadunan sira tau tiha iha fatin no Naʼi husi Horiuluk Kedas tuur iha ninia kadunan. Ninia unuk mutin hanesan jelu-rahun, no ninia fuuk hanesan bibi-malae fulun neʼebé moos. Ninia kadunan mak ahi lakan; kadunan neʼe nia roda sira lakan ho ahi. 10 Iha ahi neʼebé suli hanesan mota sai husi ninia oin. Anju millaun ida serbí nia, no anju millaun atus ida hamriik iha ninia oin. Juis tuur iha ninia fatin, no livru sira loke tiha.
11 “Iha tempu neʼebá, haʼu kontinua hateke tanba lian husi dikur neʼebé koʼalia liafuan foti an; haʼu hateke toʼo sira oho animál neʼe no harahun ninia isin no entrega nia atu sunu iha ahi. 12 Maibé kona-ba animál sira seluk, sira-nia kbiit atu ukun hasai tiha, no sira-nia moris hanaruk tan ba tempu ida.
13 “Haʼu kontinua haree vizaun sira durante kalan neʼe, no haree bá! iha ida neʼebé hanesan oan-mane husi ema, nia mai ho kalohan sira iha lalehan; no nia simu lisensa hodi tama ba hasoru Naʼi husi Horiuluk Kedas, no sira lori nia besik ba Ninia oin. 14 No nia simu kbiit nuʼudar liurai, simu dignidade, no simu ukun ida, atu nuneʼe povu sira no nasaun sira neʼebé koʼalia língua oioin, sira hotu tenke serbí nia. Ninia ukun mak rohan-laek no ba nafatin, no ninia ukun sei nunka lakon.
15 “Kona-ba haʼu, Daniel, haʼu-nia neon-susar tebes tanba vizaun sira neʼebé haʼu haree halo haʼu taʼuk. 16 Haʼu hakbesik ba anju ida neʼebé hamriik iha neʼebá atu husu nia hodi esplika neʼe ba haʼu. Entaun nia hatán no esplika buat sira-neʼe nia signifika ba haʼu.
17 “‘Animál sira-neʼe neʼebé boot tebes, hamutuk haat, sira mak liurai naʼin-haat neʼebé sei mosu iha rai. 18 Maibé santu sira neʼebé serbí Ida neʼebé Aas Liu, sei simu ukun, no ukun neʼe sei sai sira-nian ba nafatin, sin, ba nafatin.’
19 “Depois neʼe, haʼu hakarak hatene liután kona-ba animál númeru haat, neʼebé la hanesan animál sira seluk hotu; animál neʼe hamosu taʼuk, no ninia nehan husi besi, ninia ain-kukun husi riti; nia tolan no harahun ninia vítima, no buat neʼebé restu nia sama ho ninia ain; 20 no haʼu hakarak hatene kona-ba dikur sanulu iha ninia ulun, no mós dikur kiʼik ida seluk neʼebé mosu, neʼebé dikur tolu monu iha ninia oin, no iha dikur neʼe iha matan no iha ibun neʼebé koʼalia ho foti-an, no dikur neʼe boot liu fali sira seluk.
21 “Haʼu kontinua hateke nuʼudar dikur neʼe halo funu ho santu sira, no nia atu manán sira, 22 toʼo Naʼi husi Horiuluk Kedas mai no nia tesi-lia hodi apoia santu sira neʼebé serbí Ida neʼebé Aas Liu, no toʼo tempu neʼebé hili tiha ona ba santu sira atu simu ukun nuʼudar sira-nian.
23 “Nia esplika tuirmai neʼe: ‘Kona-ba animál númeru haat, neʼe mak ukun númeru haat neʼebé sei mosu iha rai. Ukun neʼe sei la hanesan ho ukun sira seluk hotu, no neʼe sei tolan rai tomak no sei sama no harahun tiha rai. 24 Kona-ba dikur sanulu, neʼe katak liurai naʼin-sanulu sei mosu husi ukun neʼe; no sei iha liurai ida tan neʼebé mosu depois sira, no nia sei la hanesan liurai sira seluk, no nia sei hamoe liurai naʼin-tolu. 25 Nia sei koʼalia liafuan hodi kontra Maromak Aas Liu Hotu, no nia sei kontinua haterus santu sira neʼebé serbí Ida neʼebé Aas Liu. Nia sei planu atu troka tempu no ukun-fuan, no santu sira sei entrega tiha ba ninia liman ba tempu ida, tempu rua, no tempu sorin balu. 26 Maibé Juis tuur ona, no sira hasai tiha liurai neʼe nia kbiit atu ukun, atu nuneʼe bele halakon no harahun nia ho kompletu.
27 “Ukun no kbiit nuʼudar liurai no dignidade husi ukun sira hotu iha lalehan okos entrega tiha ba povu santu sira neʼebé serbí Ida neʼebé Aas Liu. Sira-nia ukun mak rohan-laek, no ema nia ukun hotu sei serbí no halo tuir sira.’
28 “Neʼe mak buat neʼebé haʼu haree no rona. Kona-ba haʼu, Daniel, haʼu-nia hanoin halo haʼu sai bilán, toʼo haʼu-nia oin sai kamutis; maibé haʼu rai metin buat sira-neʼe iha haʼu-nia laran.”
8 Iha tinan terseiru husi Liurai Belsazar nia ukun, vizaun ida mosu ba haʼu, Daniel, vizaun neʼe la hanesan ida neʼebé haʼu haree uluk. 2 Haʼu sei iha palásiu Susan, neʼebé iha distritu Elam; haʼu haree vizaun neʼe besik mota Ulai. 3 Bainhira haʼu foti matan, haree bá! iha bibi-malae aman ida hamriik besik mota ninin, no nia iha dikur rua. Dikur rua neʼe naruk, maibé dikur ida naruk liu fali ida seluk, no ida neʼebé naruk liu mosu ikus. 4 Haʼu haree bibi-malae aman neʼe halai ba parte oeste, parte norte, no parte súl, hodi ataka, no la iha animál fuik ida neʼebé bele hamriik iha ninia oin, no la iha ema ida mak bele salva buat ida husi ninia kbiit. Nia halo tuir deʼit ninia hakarak no foti an tebes.
5 Bainhira haʼu kontinua hateke, haree bá! iha bibi-timur aman ida mai husi parte oeste halai liu rai tomak no ninia ain la kona rai. No bibi-timur neʼe iha dikur boot ida entre ninia matan sira. 6 Bibi-timur neʼe halai hasoru bibi-malae aman neʼebé iha dikur rua, neʼebé uluk hamriik besik mota ninin; bibi-timur neʼe halai bá ho hirus makaʼas.
7 Haʼu haree nia hakbesik daudaun ba bibi-malae aman neʼe, no nia odi loos bibi-malae neʼe. Nia tuku monu bibi-malae neʼe no halo tohar bibi neʼe nia dikur rua, no bibi-malae neʼe la iha kbiit hodi kontra nia. Nia soe bibi-malae neʼe ba rai no sama bibi neʼe, no la iha ema ida bele salva bibi neʼe husi ninia kbiit.
8 Tuirmai, bibi-timur aman neʼe foti an tebes, maibé bainhira nia foin sai forte, ninia dikur boot neʼe tohar tiha; depois neʼe, dikur boot haat mosu fali iha dikur neʼe nia fatin hodi see ba lalehan nia sorin haat.
9 Husi dikur sira-neʼe ida, mosu tan dikur ida seluk, dikur ida neʼebé kiʼik, no dikur neʼe sai boot loos hodi see ba parte súl no ba parte leste no ba Rai neʼebé Furak. 10 Dikur neʼe sai naruk tebetebes toʼo kona tropa lalehan nian, no dikur neʼe halo tropa balu no fitun sira balu monu ba rai, no nia sama tiha sira. 11 Dikur neʼe foti an hodi kontra hasoru Ulun-Naʼin ba tropa sira, no dikur neʼe foti sai tiha sakrifísiu neʼebé hasaʼe beibeik iha Ulun-Naʼin neʼe nia oin, no dikur neʼe estraga tiha Ulun-Naʼin neʼe nia fatin santu neʼebé harii metin ona. 12 No tropa sira hamutuk ho sakrifísiu neʼe entrega tiha ba nia, tanba hahalok sala; no dikur neʼe kontinua soe lia-loos ba rai, no dikur neʼe hetan susesu ho buat neʼebé nia halo.
13 No haʼu rona anju ida koʼalia, no anju ida seluk husu kona-ba vizaun neʼe ba anju neʼebé koʼalia daudaun: “Vizaun kona-ba sakrifísiu neʼebé hasaʼe beibeik, kona-ba hahalok sala neʼebé lori susar, no kona-ba dikur neʼebé sama tiha fatin santu no tropa sira; vizaun neʼe sei kontinua toʼo bainhira?” 14 Nuneʼe nia dehan ba haʼu: “Toʼo loron 2.300 liutiha; no fatin santu sei hadiʼa duni hodi sai diʼak fali tuir ninia kondisaun.”
15 Nuʼudar haʼu, Daniel, hateke daudaun ba vizaun neʼe no buka atu komprende, derrepente deʼit ida neʼebé haree hanesan mane ida hamriik iha haʼu-nia oin. 16 Tuirmai haʼu rona mane ida nia lian iha mota Ulai nia klaran, no nia bolu, hodi dehan: “Gabriel, halo ema neʼe komprende buat neʼebé nia haree.” 17 Nuneʼe nia hakbesik ba haʼu iha fatin neʼebé haʼu hamriik bá, maibé kuandu nia mai, haʼu sai taʼuk tebetebes toʼo haʼu hakneʼak ho oin ba rai. Nia dehan ba haʼu: “Oh oan-mane husi ema, komprende bá katak vizaun neʼe kona-ba tempu nia rohan.” 18 Maibé nuʼudar nia koʼalia hela ba haʼu, haʼu toba-dukur tiha ho oin ba rai. Entaun nia kona haʼu no halo haʼu hamriik iha fatin neʼebé uluk haʼu hamriik bá. 19 Tuirmai nia dehan: “Agora haʼu atu halo ó hatene buat neʼebé sei mosu iha parte ikus husi tempu hirus nian, tanba vizaun neʼe kona-ba tempu nia rohan.
20 “Bibi-malae aman neʼebé iha dikur rua neʼebé ó haree mak reprezenta liurai sira husi Média no Pérsia. 21 Bibi-timur aman neʼebé iha fulun barak reprezenta liurai husi Grésia; no dikur boot neʼebé iha entre ninia matan reprezenta liurai primeiru. 22 Kona-ba dikur neʼebé tohar tiha, hodi dikur haat mosu fali, neʼe reprezenta ukun haat neʼebé sei mosu husi ninia nasaun, maibé sira la iha kbiit hanesan liurai neʼe.
23 “No iha tempu ikus husi sira-nia ukun, bainhira sira-nia hahalok sala sai barak liu ona, liurai siʼak-teen ida sei mosu no nia komprende buat neʼebé susar atu komprende. 24 Ninia forsa sei sai boot tebes, maibé laʼós ho ninia kbiit rasik. Nia sei halakon buat barak, no nia sei hetan susesu ho buat neʼebé nia halo. Nia sei halakon asuwaʼin sira, no mós povu santu sira. 25 No ho laran-makerek nia sei uza lia-bosok hodi hetan susesu; no iha ninia laran nia sei foti aas ninia an; no durante tempu hakmatek nian mak nia sei lori ema barak ba mate. Nia mós sei hamriik hodi kontra Ulun-Naʼin ba ulun-naʼin sira hotu, maibé nia sei sai rahun, laʼós ho ema nia liman.
26 “Buat neʼebé fó sai ona iha vizaun neʼe kona-ba sakrifísiu neʼebé hasaʼe loroloron iha kalan no dadeer mak loos, maibé ó tenke rai vizaun neʼe nuʼudar segredu, tanba neʼe kona-ba loron sira iha futuru.”
27 Kona-ba haʼu, Daniel, haʼu sai kole no haʼu moras ba loron balu. Tuirmai haʼu hadeer no halo serbisu ba liurai; maibé haʼu sai bilán tanba buat neʼebé haʼu haree ona, no la iha ema ida mak bele komprende kona-ba neʼe.
9 Iha tinan primeiru husi Assuero nia oan-mane Dário nia ukun, Assuero mak ema Média nia jerasaun, neʼebé simu ona kbiit nuʼudar liurai atu ukun ema Kaldeia; 2 iha tinan primeiru husi Dário nia ukun, haʼu, Daniel, komprende husi livru sira katak Jeová nia liafuan ba profeta Jeremias kona-ba tinan sira neʼebé Jeruzalein sai rahun mak hamutuk tinan 70. 3 Entaun, haʼu fila oin hodi buka Jeová, Maromak neʼebé loos, atu harohan ba nia iha orasaun, no haʼu mós halo jejún no hatais hena karón, no kari ahi-kadesan ba haʼu-nia leten. 4 Haʼu halo orasaun ba haʼu-nia Maromak no fó sai ami-nia sala ba nia, hodi dehan:
“Oh Jeová, Ita mak Maromak neʼebé loos, Maromak neʼebé boot no kmanek tebes, neʼebé kumpre Ita-nia aliansa no hatudu domin neʼebé laran-metin ba sira neʼebé hadomi Ita no halo tuir Ita-nia mandamentu sira, 5 ami halo sala ona no halo buat neʼebé la loos, ami hatudu hahalok aat no hahalok kontra; no ami laʼo sees ona husi Ita-nia mandamentu no desizaun sira. 6 Ami la rona ba Ita-nia atan profeta sira, neʼebé koʼalia hodi Ita-nia naran ba ami-nia liurai sira, ami-nia ulun-naʼin sira, ami-nia beiʼala sira, no ba povu hotu. 7 Oh Jeová, Ita-Boot deʼit mak iha hahalok loos, maibé moe mak taka ami-nia oin hanesan agora daudaun, moe taka ema sira husi Judá, ema sira neʼebé hela iha Jeruzalein, no ema Izraél hotu, sira neʼebé besik no dook, iha rai hotu neʼebé Ita halo sira namkari tanba sira la hatudu laran-metin ba Ita.
8 “Oh Jeová, moe mak taka ami-nia oin, ami-nia liurai sira, ami-nia ulun-naʼin sira, no ami-nia beiʼala sira-nia oin, tanba ami halo sala ona kontra Ita. 9 Jeová, ami-nia Maromak, mak prontu atu fó perdua no hatudu laran-sadiʼa, maibé ami kontra ona Ita. 10 Oh Jeová, ami-nia Maromak, ami kontra ona Ita-nia liafuan tanba ami la halo tuir Ita-nia lei sira neʼebé Ita fó ba ami liuhusi Ita-nia atan profeta sira. 11 Ema Izraél hotu la halo tuir Ita-nia Ukun-Fuan no fila kotuk ona hodi la halo tuir Ita-nia liafuan, tan neʼe mak Ita fakar sai malisan ba ami hodi tuir buat neʼebé Ita jura ona neʼebé hakerek iha livru Ukun-Fuan husi Maromak loos nia atan Moisés, tanba ami halo sala ona kontra Ita. 12 Ita kumpre ona Ita-nia liafuan sira neʼebé Ita koʼalia ona kontra ami no kontra ukun-naʼin sira neʼebé ukun ami, hodi lori terus boot ba ami; no iha rai tomak seidauk akontese buat ida hanesan buat neʼebé Ita halo ona iha Jeruzalein. 13 Hanesan hakerek ona iha livru Ukun-Fuan Moisés nian, terus hotu neʼe kona ona ami, maibé ami la harohan ba Ita, oh Jeová, ami-nia Maromak, atu husu Ita-nia laran-sadiʼa, tanba ami la husik ami-nia sala no la hanoin kleʼan kona-ba Ita-nia lia-loos.
14 “Nuneʼe, Jeová, ami-nia Maromak, Ita kontinua matan-moris no lori susar ba ami, tanba Ita, oh Jeová, Ita hatudu hahalok loos iha buat hotu neʼebé Ita halo ona; maski nuneʼe, ami la halo tuir Ita-nia liafuan.
15 “Agora, oh Jeová, ami-nia Maromak, Ida neʼebé lori Ita-nia povu sai husi rai-Ejitu ho liman neʼebé forte no halo Ita-nia naran sai boot toʼo ohin loron, ami halo sala ona no hatudu hahalok aat. 16 Oh Jeová, Ita-Boot nia hahalok hotu mak loos, favór ida, hatún Ita-nia hirus no laran-nakali ba Ita-nia sidade Jeruzalein, Ita-nia foho santu. Povu hotu neʼebé haleʼu ami hamoe Jeruzalein no mós hamoe Ita-nia povu tanba sala neʼebé ami ho ami-nia beiʼala sira halo. 17 Agora, oh ami-nia Maromak, rona ba Ita-nia atan nia orasaun no harohan, no tanba Ita-nia naran rasik, favór ida, oh Jeová, hatudu laran-diʼak ba Ita-nia fatin santu neʼebé sai fuik ona. 18 Oh haʼu-nia Maromak, see tilun no rona bá! Favór ida, loke Ita-nia matan no haree ami-nia susar no haree sidade neʼebé lori Ita-nia naran sai fuik ona; ami harohan ba Ita laʼós tanba ami-nia hahalok loos maibé tanba Ita-nia laran-sadiʼa neʼebé boot. 19 Oh Jeová, rona bá. Oh Jeová, fó perdua bá. Oh Jeová, haree bá no ajuda ami! Keta demora, tanba Ita-Boot nia naran, oh haʼu-nia Maromak, tanba Ita-nia sidade no Ita-nia povu lori Ita-Boot nia naran.”
20 Bainhira haʼu sei koʼalia hela no halo orasaun no fó sai hela haʼu-nia sala no haʼu-nia povu Izraél nia sala no husu laran-diʼak ba Jeová, haʼu-nia Maromak, kona-ba haʼu-nia Maromak nia foho santu, 21 sin, bainhira haʼu koʼalia hela iha orasaun, mane Gabriel, neʼebé uluk haʼu haree iha vizaun, toʼo mai haʼu kuandu haʼu fraku tebes maizumenus iha tempu hasaʼe sakrifísiu nian iha kalan. 22 No nia esplika atu halo haʼu komprende, hodi dehan:
“Oh Daniel, agora haʼu mai atu fó kbiit atu komprende kleʼan no matenek ba ó. 23 Bainhira ó komesa harohan, haʼu simu mensajen ida, no haʼu mai atu fó-hatene ba ó, tanba ó mak ema neʼebé folin-boot tebes. Entaun, hanoin kona-ba liafuan neʼe no komprende vizaun neʼe.
24 “Maromak deside ona semana 70 ba ó-nia povu no ó-nia sidade santu, atu halakon hahalok kontra, atu hapara sala, atu hamoos sala, atu lori mai hahalok loos neʼebé rohan-laek, atu hametin vizaun no profeta nia liafuan, no atu halo santu Fatin Santu Liu Hotu. 25 Ó tenke hatene no komprende katak husi tempu neʼebé fó sai liafuan atu hadiʼa no harii fali Jeruzalein toʼo Mesias, Ulun-Naʼin, mai, sei iha semana 7, no mós semana 62. Ema sei hadiʼa no harii fali sidade neʼe, hamutuk ho fatin públiku ida no bee-dalan neʼebé haleʼu sidade, maibé ema sei halo ida-neʼe durante tempu susar.
26 No liutiha semana 62, ema sei oho Mesias, nia sei la husik hela buat ida.
“No tropa sira neʼebé tuir ulun-naʼin ida neʼebé atu mai mak sei harahun sidade no fatin santu. No neʼe sei rahun tanba bee boot. No sei iha funu toʼo rohan; no Maromak deside ona katak neʼe sei sai rahun.
27 “No nia sei halo aliansa neʼe vale ba ema barak ba semana ida tan; no iha semana neʼe nia klaran, nia sei hapara sakrifísiu no prezente sira neʼebé ema hasaʼe.
“No ida neʼebé lori susar sei mai hodi tuur iha liras husi buat neʼebé foʼer; no buat neʼebé Maromak deside ona sei fakar sai mós ba sidade neʼebé sai fuik ona, toʼo halakon buat hotu.”
10 Iha tinan terseiru husi Liurai Ciro nia ukun ba rai-Pérsia, Daniel, neʼebé mós hanaran Beltessazar, simu mensajen ida; mensajen neʼe mak loos, no neʼe kona-ba funu boot. Nia komprende mensajen neʼe no nia simu kbiit atu komprende buat neʼebé nia haree ona.
2 Iha tempu neʼebá, haʼu, Daniel, triste tebes ba semana tolu tomak. 3 Haʼu la han ai-han diʼak sira, no haʼu la han naʼan no la hemu tua-uvas, no haʼu la kose mina ba haʼu-nia isin ba semana tolu tomak. 4 Iha loron 24 husi fulan primeiru, nuʼudar haʼu hamriik besik mota boot nia ninin, katak Mota Tigris, 5 haʼu foti matan no haree iha mane ida neʼebé hatais hena-liñu, no sintu neʼebé iha ninia knotak halo ho osan-mean husi Ufaz. 6 Ninia isin-lolon nabilan hanesan fatuk-krisólitu, ninia oin hanesan rai-lakan, ninia matan hanesan ahi-oan neʼebé lakan makaʼas, ninia liman no ain haree hanesan riti neʼebé halo nabilan ona, no ninia lian hanesan ema barak nia lian. 7 Haʼu, Daniel, haʼu deʼit mak haree vizaun neʼe; mane sira neʼebé hamutuk ho haʼu la haree vizaun neʼe. Maibé, sira sai taʼuk tebes, no sira halai hodi subar an.
8 Depois neʼe, hela haʼu mesak deʼit, no bainhira haʼu haree vizaun kmanek neʼe, haʼu lakon haʼu-nia forsa no haʼu-nia oin sai kamutis tebes no haʼu lakon haʼu-nia kbiit hotu. 9 Tuirmai haʼu rona ninia lian; maibé kuandu haʼu rona nia koʼalia daudaun, haʼu toba-dukur tiha ho oin ba rai. 10 Depois neʼe, iha liman ida kona haʼu, no fanu haʼu hodi haʼu bele hakneʼak. 11 Tuirmai nia dehan ba haʼu:
“Oh Daniel, mane neʼebé folin-boot tebes, see tilun didiʼak ba liafuan sira neʼebé haʼu atu fó sai ba ó. Agora hamriik bá, tanba Maromak haruka ona haʼu mai hasoru ó.”
Bainhira nia koʼalia tiha neʼe ba haʼu, haʼu hamriik, no nakdedar.
12 Tuirmai nia dehan ba haʼu: “Oh Daniel, keta taʼuk, Maromak rona ona ó-nia liafuan husi loron primeiru neʼebé ó deside hodi buka kbiit atu komprende no haraik an iha ó-nia Maromak nia oin, no haʼu mai iha neʼe tanba ó-nia liafuan. 13 Maibé ulun-naʼin rai-Pérsia nian hamriik hodi kontra haʼu ba loron 21. Maibé Miguel, ulun-naʼin boot ida, mai hodi ajuda haʼu; no durante tempu neʼe, haʼu kontinua hamriik iha neʼebá iha liurai Pérsia sira-nia sorin. 14 Haʼu mai iha neʼe atu halo ó komprende kona-ba buat neʼebé sei kona ó-nia povu iha loron sira-neʼe nia rohan, tanba vizaun neʼe mak kona-ba tempu neʼebé atu mai.”
15 Bainhira nia koʼalia tiha liafuan sira-neʼe ba haʼu, haʼu hateke ba rai no la bele koʼalia buat ida. 16 Tuirmai, ida neʼebé haree hanesan mane ida, nia kona haʼu-nia ibun, no haʼu loke haʼu-nia ibun hodi koʼalia ba ida neʼebé hamriik iha haʼu-nia oin, hodi dehan: “Haʼu-nia naʼi, haʼu nakdedar tanba vizaun neʼe, no haʼu la iha forsa. 17 Entaun oinsá mak Ita-Boot nia atan neʼe bele koʼalia ho Ita? Tanba agora haʼu la iha forsa, no haʼu la bele dada iis.”
18 No ida neʼebé haree hanesan mane ida, nia kona fali haʼu no fó forsa ba haʼu. 19 Tuirmai nia dehan: “Keta taʼuk, oh mane neʼebé folin-boot tebes. Dame hela ho ó. Sai forte bá, sin, sai forte bá.” Nuʼudar nia koʼalia ho haʼu, haʼu hetan forsa fali no haʼu dehan: “Oh haʼu-nia naʼi, koʼalia bá, tanba Ita fó ona forsa ba haʼu.”
20 Depois neʼe, nia dehan: “Ó hatene tansá mak haʼu mai hasoru ó? Agora haʼu sei fila fali hodi funu hasoru ulun-naʼin ba rai-Pérsia. Bainhira haʼu bá tiha, ulun-naʼin ba rai-Grésia sei mai. 21 Maibé, haʼu sei konta ba ó buat sira neʼebé hakerek ona iha livru lia-loos nian. Miguel, imi-nia ulun-naʼin, nia deʼit mak fó apoiu makaʼas ba haʼu kona-ba buat sira-neʼe.
11 “Kona-ba haʼu, iha tinan primeiru husi Dário, ema Média, nia ukun, haʼu hamriik hodi hametin no proteje nia. 2 Buat neʼebé haʼu konta ba ó agora mak lia-loos:
“Haree bá! Liurai naʼin-tolu tan sei ukun rai-Pérsia, no liurai númeru haat sei halibur rikusoin barak liu fali sira seluk hotu. No bainhira nia sai forte ona tanba ninia rikusoin, nia sei halo ema hotu hamriik hodi kontra hasoru rai-Grésia.
3 “No liurai kbiit boot ida sei hamriik no ukun ho kbiit boot no nia halo tuir deʼit ninia hakarak. 4 Maibé kuandu nia hamriik, ninia ukun sei rahun no haketak tiha ba lalehan nia sorin haat, maibé la entrega ba ninia bei-oan no kbiit la boot hanesan ninia ukun; tanba ninia ukun sei fokit sai tiha hodi entrega fali ba ema seluk.
5 “No liurai súl sei sai forte, liurai neʼe mak uluk nuʼudar ninia ulun-naʼin ida; maibé iha ema ida neʼebé sei manán nia no sei ukun ho kbiit boot liu fali ninia kbiit atu ukun.
6 “Liutiha tinan balu, sira sei halo aliansa, no liurai súl nia oan-feto sei mai hasoru liurai norte atu halo aliansa. Maibé oan-feto neʼe nia liman sei la forte nafatin; no liurai sei monu, no ninia liman mós sei la forte tan; no ema sei entrega oan-feto neʼe ba ema seluk; ema mós sei entrega sira hotu neʼebé lori nia bá neʼebá, ninia aman, no mós ida neʼebé halo nia sai forte iha tempu neʼebá. 7 No oan-feto neʼe nia família ida sei tuur iha ninia pozisaun, no nia sei mai hodi kontra tropa sira no kontra liurai norte nia uma aas neʼebé seguru, nia sei kontra sira no manán. 8 No mós nia sei lori sira-nia maromak sira ba rai-Ejitu, hamutuk ho sira-nia estátua sira husi besi, sira-nia sasán folin-boot husi osan-mutin no osan-mean, no mós lori ema dadur sira. Ba tinan balu nia sei hamriik dook husi liurai norte. 9 Maski nuneʼe, liurai norte sei mai hodi kontra hasoru liurai súl nia ukun, maibé sei fila fali ba ninia rai rasik.
10 “Kona-ba ninia oan-mane sira, sira sei prepara ba funu no halibur tropa barak neʼebé boot tebes. Nia sei mai no ataka rai neʼe hanesan bee neʼebé boot. Maibé nia sei fila fali, no nia sei halo funu tuituir dalan toʼo ninia uma aas neʼebé seguru.
11 “No liurai súl sei sai hirus no sei bá hodi halo funu hasoru liurai norte; no nia sei halibur ema-lubun boot ida, maibé ema lubun neʼe sei entrega tiha ba liurai neʼe nia liman. 12 No liurai neʼe sei lori tiha ema-lubun neʼe. Ninia laran sei sai foti an, no nia sei oho ema rihun ba rihun; maibé nia sei la uza didiʼak ninia pozisaun neʼebé forte.
13 “Liurai norte sei fila fali no halibur ema-lubun boot liu fali ida primeiru; no iha tempu neʼe nia rohan, liutiha tinan balu, nia sei mai duni ho tropa neʼebé boot no ho armas barak. 14 Iha tempu neʼebá, ema barak sei hamriik hodi kontra hasoru liurai súl.
“No sira neʼebé sempre halo violénsia iha ó-nia povu nia leet sei tuir hodi koko atu kumpre vizaun ida; maibé sira sei sidi.
15 “No liurai norte sei mai no ateru rai hodi halo aas atu bele ataka no manán sidade neʼebé metin. No liurai súl nia tropa sei la hamriik, no ninia tropa neʼebé forte liu mós sei la hamriik; no sira sei la iha kbiit atu hamriik. 16 No ida neʼebé mai kontra liurai súl sei halo tuir deʼit ninia hakarak, no la iha ema ida sei hamriik iha ninia oin. Nia sei hamriik iha Rai neʼebé Furak, no ninia liman iha kbiit atu halakon buat barak. 17 Nia sei fila oin no mai ho forsa hotu husi ninia ukun, no sei halo aliansa ho liurai neʼe; no nia sei hetan susesu. Nia sei hetan kbiit atu halakon oan-feto ida. No oan-feto neʼe sei la hamriik, no oan-feto neʼe sei la laran-metin nafatin ba nia. 18 Nia sei fila oin ba rai sira besik tasi no sei manán rai barak. No komandante ida sei hapara ema neʼe nia hahalok foti an, atu nuneʼe komandante neʼe la hetan tan moe. Komandante neʼe sei halo moe fali nia. 19 Tuirmai nia fila oin fali ba uma aas sira neʼebé seguru iha ninia rai rasik, no nia sei sidi no monu, no ema sei la hetan tan nia.
20 “No iha ema ida neʼebé sei tuur iha ninia pozisaun, neʼebé sei haruka kobradór impostu hodi laʼo liu ukun neʼebé kmanek, maibé liu loron balu deʼit nia sei lakon, maski laʼós ho hirus ka funu.
21 “No iha ema ida neʼebé sei tuur iha ninia pozisaun, ida neʼebé ema hakribi, no sira sei la fó glória husi ukun neʼe ba nia; no nia sei mai durante tempu dame nian no hadau ukun neʼe liuhusi lia-bosok. 22 No tropa neʼebé hanesan bee boot sei lakon tanba nia, no sira sei rahun; nuneʼe mós ho Ulun-Naʼin ba aliansa. 23 No tanba sira halo aliansa ho nia, nia sei kontinua lohi no sai boot no sai forte tanba nasaun kiʼik ida. 24 Durante tempu dame nian, nia sei mai iha distritu ida nia fatin neʼebé riku liu no halo buat neʼebé ninia beiʼala sira nunka halo. Nia sei fahe ba sira sasán, rikusoin no buat neʼebé nia hadau husi funu; no nia sei halo planu aat hasoru fatin sira neʼebé seguru, maibé ida-neʼe ba tempu badak deʼit.
25 “Ho ninia forsa tomak no ho laran tomak nia sei kontra liurai súl ho tropa barak, no liurai súl sei prepara an ba funu neʼe ho tropa neʼebé barak tebes no forte. No nia sei la hamriik, tanba sira sei halo planu aat hasoru nia. 26 No sira neʼebé han ninia hahán diʼak sira sei halo nia monu.
“Kona-ba ninia tropa sira, sira sei lakon, no ema sei oho tropa barak.
27 “Kona-ba liurai naʼin-rua neʼe, sira-nia laran hakarak halo buat neʼebé aat, no sira sei tuur hamutuk iha meza ida hodi koʼalia bosok ba malu. Maibé sira sei la hetan susesu, tanba sira-nia rohan sei toʼo mai iha tempu neʼebé Maromak deside ona.
28 “No nia sei fila fali ba ninia rai hodi lori sasán barak, no ninia laran hakarak kontra hasoru aliansa santu. Nia sei hetan susesu no fila fali ba ninia rai.
29 “Iha tempu neʼebé hili tiha ona, nia sei fila fali no mai kontra liurai súl. Maibé tempu neʼe la hanesan ho tempu ida uluk, 30 tanba ró sira husi Kitim sei mai hodi kontra nia, no nia sei hetan moe.
“Nia sei fila fali no hatudu sai nia hirus hasoru aliansa santu no nia hetan susesu; nia sei fila fali no buka sira neʼebé husik tiha aliansa santu. 31 Nia sei haruka tropa sira, no sira sei hamriik; no sira sei hafoʼer uma aas neʼebé seguru, neʼe katak fatin santu, no sira sei hapara sakrifísiu neʼebé hasaʼe beibeik.
“No sira sei tau buat foʼer neʼebé hamosu susar.
32 “Kona-ba sira neʼebé hatudu hahalok aat hodi kontra aliansa neʼe, nia sei lori sira atu fila kotuk ba Maromak liuhusi ninia liafuan midar sira. Maibé ema sira neʼebé hatene sira-nia Maromak sei manán no hetan susesu. 33 Kona-ba sira neʼebé iha kbiit atu komprende kleʼan iha povu nia leet, sira sei halo ema barak komprende. Ema sei halo sira sidi ba loron balu tanba surik no ahi, halo sira sai dadur no hadau sira-nia sasán. 34 Maibé bainhira ema halo sira sidi, sira sei simu ajuda uitoan; no ema barak sei fó apoiu ba sira ho liafuan midar sira. 35 Ema balu neʼebé iha kbiit atu komprende kleʼan sei sidi, no tanba sira mak ema sei hetan koko hodi sai moos no sai mutin toʼo tempu nia rohan; tanba tempu neʼebé Maromak deside ona seidauk toʼo mai.
36 “Liurai sei halo tuir deʼit ninia hakarak, no nia sei foti an no fó glória ba nia an rasik aas liu fali maromak sira hotu; no nia sei koʼalia ho foti an hodi kontra Maromak neʼebé aas liu maromak sira seluk. No nia sei hetan susesu toʼo tempu hirus nian remata; tanba buat neʼebé deside ona tenke akontese. 37 Nia sei la hafolin ninia beiʼala sira-nia Maromak; no nia sei la hafolin feto sira-nia hakarak no la hafolin maromak sira seluk hotu, maibé nia sei fó glória ba nia an liu fali ema hotu. 38 Nia sei fó fali glória ba maromak neʼebé tau matan ba uma aas sira neʼebé seguru; nia sei fó glória ba maromak neʼebé ninia beiʼala sira la hatene hodi fó osan-mean, osan-mutin, fatuk-murak oioin, no sasán folin-boot sira. 39 Nia sei hetan susesu hodi kontra hasoru uma aas sira neʼebé seguru tebes, ho ajuda husi maromak foun ida. Nia sei fó glória boot ba sira neʼebé apoia nia, no nia sei halo sira ukun iha ema barak nia leet; no nia sei fahe rai ba sira se sira selu folin ba nia.
40 “Iha tempu nia rohan, liurai súl sei dudu malu ho nia, no liurai norte sei mai hanesan anin-boot hodi kontra liurai súl ho kuda karreta, ho tropa neʼebé saʼe kuda, no ho ró barak; no nia sei tama ba rai sira no ataka hanesan bee neʼebé boot. 41 Nia mós sei tama ba Rai neʼebé Furak, no nia sei manán rai barak. Maibé Edom, Moab, no mós ema importante husi ema Ammon mak sei la monu ba nia liman. 42 No nia sei kontinua lolo liman hodi kontra rai sira; no kona-ba rai-Ejitu, neʼe mós sei la sees husi ninia liman. 43 No nia sei ukun rikusoin neʼebé subar hela, ukun osan-mean, osan-mutin no buat folin-boot hotu husi rai-Ejitu. No ema Líbia ho ema Etiópia sei laʼo tuir nia.
44 “Maibé lia-menon husi parte leste no parte norte sei halo nia hirus, no nia sei sai ho laran-nakali makaʼas atu halakon no harahun ema barak. 45 Nia sei harii ninia tenda liurai nian entre tasi boot no foho santu neʼebé Furak; no nia sei toʼo ninia rohan, no sei la iha ajuda-naʼin ida ba nia.
12 “Durante tempu neʼe, Miguel sei hamriik, nia mak ulun-naʼin boot neʼebé hamriik daudaun hodi apoia ó-nia povu. No sei mosu tempu susar neʼebé ema seidauk hasoru husi tempu neʼebé harii nasaun sira toʼo tempu neʼe. No durante tempu neʼe, ó-nia povu sei hetan salvasaun, katak sira hotu neʼebé naran hakerek ona iha Maromak nia livru. 2 No ema barak neʼebé mate ona sei moris fali, balu hetan moris rohan-laek no seluk hetan moe ba nafatin.
3 “No sira neʼebé iha kbiit atu komprende kleʼan sei nabilan hanesan lalehan, no sira neʼebé ajuda ema barak sai ema laran-loos sei nabilan hanesan fitun sira, ba nafatin.
4 “Kona-ba ó, Daniel, rai liafuan sira-neʼe nuʼudar segredu, no tau selus hodi taka tiha livru neʼe toʼo tempu nia rohan. Ema barak sei buka-hatene didiʼak livru neʼe, no koñesimentu neʼebé loos sei sai barak.”
5 Tuirmai haʼu, Daniel, haʼu hateke no haree anju naʼin-rua tan hamriik iha neʼebá, ida iha mota nia ninin sorin neʼe no ida tan iha mota nia ninin sorin seluk. 6 Depois neʼe, anju ida koʼalia ba mane neʼebé hatais hena-liñu, neʼebé iha bee leten iha mota neʼe, hodi dehan: “Toʼo bainhira mak buat kmanek sira-neʼe sei remata?” 7 Tuirmai, haʼu haree mane neʼebé hatais hena-liñu, neʼebé iha bee leten iha mota neʼe, foti nia liman-loos no liman-karuk ba lalehan, no haʼu rona nia jura hodi Ida neʼebé moris ba nafatin, hodi dehan: “Ba tempu ida, tempu rua, no tempu sorin balu neʼebé deside tiha ona. Bainhira sira remata ona atu harahun povu santu sira-nia kbiit, buat sira-neʼe hotu sei remata.”
8 Kona-ba haʼu, haʼu rona, maibé haʼu la komprende; nuneʼe haʼu dehan: “Oh haʼu-nia naʼi, saida mak rezultadu husi buat sira-neʼe?”
9 Tuirmai nia dehan: “Laʼo bá, Daniel, tanba liafuan sira-neʼe tenke rai nuʼudar segredu no taka tiha ho selus toʼo tempu nia rohan. 10 Ema barak sei hamoos sira-nia an no halo mutin sira-nia an no hetan koko. No ema aat sei hatudu hahalok aat, no la iha ema aat ida mak sei komprende; maibé sira neʼebé matenek mak sei komprende.
11 “No husi tempu neʼebé ema hapara tiha sakrifísiu neʼebé hasaʼe beibeik no tau buat foʼer neʼebé hamosu susar, sei iha loron 1.290.
12 “Ksolok ba ema neʼebé hein nafatin toʼo loron 1.335!
13 “Maibé kona-ba ó, tahan bá toʼo rohan. Ó sei deskansa, maibé ó sei hamriik atu simu ó-nia parte iha loron sira-neʼe nia rohan.”
OSEAS
1 Jeová fó sai mensajen ba Beeri nia oan-mane Oseas, iha tempu neʼebé Liurai Uzias, Jotam, Akaz, no Ezekias, ukun rai-Judá, no iha tempu neʼebé Joas nia oan-mane Liurai Jeroboam ukun rai-Izraél. 2 Bainhira Jeová komesa fó sai ninia liafuan liuhusi Oseas, Jeová hatete ba Oseas: “Bá, kaben ho feto ida neʼebé sei sai feto-aat no nia sei iha oan liuhusi sala seksuál, tanba liuhusi sala seksuál mak ema sira iha rai neʼe fila kotuk hodi la laʼo tuir tan Jeová.”
3 Entaun nia bá no kaben ho Gomer, Diblaim nia oan-feto, no feto neʼe sai isin-rua no tuur ahi oan-mane ida ba nia.
4 Tuirmai Jeová dehan ba nia: “Hanaran oan neʼe Jezreel, tanba lakleur tan haʼu sei tesi lia ba umakain Jeú nian tanba raan neʼebé fakar iha Jezreel, no haʼu sei hakotu liurai nia ukun husi Izraél. 5 Iha loron neʼebá, haʼu sei halo tohar Izraél nia rama iha Foho-Leet Jezreel nian.”
6 Gomer sai isin-rua dala ida tan no tuur ahi oan-feto ida. No Maromak hatete ba Oseas: “Hanaran labarik feto neʼe Lo-Ruama, tanba haʼu sei la hatudu tan laran-sadiʼa ba umakain Izraél, no haʼu sei duni sai sira. 7 Maibé haʼu sei hatudu laran-sadiʼa ba umakain Judá, haʼu Jeová mak sira-nia Maromak no haʼu sei salva sira; haʼu sei la salva sira liuhusi rama, surik, funu, kuda sira, ka liuhusi tropa neʼebé saʼe kuda.”
8 Bainhira Lo-Ruama haketak ona susu, nia inan sai isin-rua tan no tuur-ahi oan-mane ida. 9 Tuirmai Maromak hatete: “Hanaran labarik neʼe Lo-Ammi, tanba imi laʼós haʼu-nia povu no haʼu sei la sai imi-nia Maromak.
10 “No povu Izraél sei sai barak hanesan rai-henek iha tasi, neʼebé la bele sukat ka sura. No iha fatin neʼebé uluk haʼu dehan ba sira: ‘Imi laʼós haʼu-nia povu’, mak haʼu sei dehan fali: ‘Imi mak oan-mane sira husi Maromak neʼebé moris.’ 11 No haʼu sei halibur hamutuk povu husi Judá no Izraél hodi iha unidade no sira sei hili ulun-naʼin ida no sira sei sai husi rai neʼe, tanba loron neʼe sei kmanek tebes ba Jezreel.
2 “Hatete ba imi-nia maun-alin sira: ‘Haʼu-nia povu!’
No hatete ba imi-nia feton sira: ‘Oh feto neʼebé simu laran-sadiʼa!’
2 Foti kazu hasoru imi-nia inan; foti kazu hasoru nia,
Tanba nia laʼós haʼu-nia feen no haʼu laʼós ninia laʼen.
Nia tenke husik tiha ninia hahalok nuʼudar feto-aat
No nia tenke husik tiha ninia hahalok sala seksuál,
3 Se lae, haʼu sei kolu ninia roupa no halo nia molik hanesan loron neʼebé nia moris mai,
Halo nia sai hanesan rai-fuik,
No halo nia sai hanesan rai neʼebé la iha bee,
No nia sei mate hamrook.
4 Haʼu sei la hatudu laran-sadiʼa ba ninia oan-mane sira,
Tanba oan sira-neʼe moris mai husi sala seksuál.
5 Tanba sira-nia inan halo ona sala seksuál.
Nia sai isin-rua ba oan sira-neʼe ho hahalok neʼebé la iha moe, tanba nia dehan:
‘Haʼu sei duni tuir haʼu-nia doben sira neʼebé halo ona relasaun ho haʼu,
Sira neʼebé fó paun no bee ba haʼu,
Fó bibi-malae fulun no hena-liñu, fó mina no tua-uvas ba haʼu.’
6 Entaun haʼu sei taka ninia dalan ho lutu husi ai-tarak;
No haʼu sei harii moru fatuk,
Atu nuneʼe nia labele hetan ninia dalan sira.
7 Nia sei duni tuir ninia doben sira neʼebé halo ona relasaun ho nia, maibé nia sei la toman sira;
Nia sei buka sira, maibé nia la hetan sira.
Tuirmai nia sei dehan: ‘Haʼu sei fila fali ba haʼu-nia laʼen ida primeiru,
Tanba haʼu-nia moris diʼak liu iha tempu neʼebá duké agora.’
8 Nia la rekoñese katak haʼu mak ida neʼebé fó ai-han, tua-uvas foun, no mina ba nia,
No haʼu mak fó osan-mutin barak ba nia
No mós osan-mean, neʼebé ema uza atu adora Baal.
9 ‘Tan neʼe, haʼu sei fila no foti fali haʼu-nia ai-han sira iha tempu koʼa nian
No foti haʼu-nia tua-uvas foun iha tempu tua nian,
No haʼu sei hadau haʼu-nia bibi-malae fulun no haʼu-nia hena-liñu neʼebé taka ninia isin-tanan.
10 Agora haʼu sei hatudu sai ninia oin-lulik ba ninia doben sira neʼebé halo ona relasaun ho nia,
No la iha mane ida sei salva nia husi haʼu-nia liman.
11 Haʼu sei halo nia la haksolok tan,
No haʼu sei hapara ninia festa sira, ninia festa fulan foun nian, ninia loron Sábadu, no ninia tempu festa nian hotu.
12 No haʼu sei estraga ninia uvas-hun no ai-figeira sira, neʼebé uluk nia dehan:
“Buat sira-neʼe mak kolen neʼebé haʼu-nia doben sira fó ba haʼu”,
Haʼu sei halo buat sira-neʼe sai fali ai-laran,
No animál fuik sira husi rai-luan sei tolan tiha buat sira-neʼe.
13 Haʼu sei tesi-lia ba nia kona-ba loron sira neʼebé nia hasaʼe sakrifísiu ba estátua Baal sira,
Tempu neʼebé nia hafurak an ho kadeli no buat murak sira no duni tuir ninia doben sira neʼebé halo ona relasaun ho nia,
No nia haluha tiha haʼu’, Jeová dehan.
14 ‘Entaun haʼu sei book nia atu rona haʼu,
No haʼu sei lori nia ba rai-fuik,
No haʼu sei koʼalia hodi book fali ninia laran.
15 Husi tempu neʼe ba oin, haʼu sei fó fali ninia toʼos-uvas,
No Foho-Leet Akor nian sei sai nuʼudar portaun ba esperansa;
Iha neʼebá mak nia sei hatán ba haʼu hanesan iha ninia tempu joven,
Hanesan tempu neʼebé nia sai husi rai-Ejitu.
16 No iha loron neʼebá’, Jeová dehan,
‘Ó sei bolu haʼu nuʼudar Haʼu-nia laʼen, no ó sei la bolu tan haʼu nuʼudar Haʼu-nia naʼi.’
17 ‘Haʼu sei la husik nia atu temi tan estátua Baal sira-nia naran
No ema sei la hanoin-hetan tan sira-nia naran.
18 Iha loron neʼebá, haʼu sei halo aliansa ho animál fuik sira iha rai-luan,
Ho manu sira iha lalehan no ho animál sira neʼebé dolar iha rai, ba haʼu-nia povu sira-nia diʼak;
Haʼu sei hasai tiha rama, surik, no funu husi rai neʼe,
No haʼu sei halo sira moris ho seguru.
19 Haʼu sei hili ó nuʼudar haʼu-nia noiva ba nafatin;
No haʼu sei hili ó nuʼudar haʼu-nia noiva ho haʼu-nia hahalok loos no justisa,
No ho haʼu-nia domin neʼebé laran-metin no laran-sadiʼa.
20 Ho laran-metin haʼu sei hili ó nuʼudar noiva,
No ó sei hatene duni Jeová.’
21 Jeová dehan: ‘Iha loron neʼebá, haʼu sei hatán,
Haʼu sei hatán ba lalehan,
No lalehan sei hatán ba rai;
22 No rai sei hatán ba trigu, tua-uvas foun no mina;
No sira sei hatán ba Jezreel.
23 Haʼu sei kuda nia hanesan kuda fini iha rai ba haʼu-nia an rasik,
No haʼu sei hatudu laran-sadiʼa ba nia neʼebé uluk la simu laran-sadiʼa;
Haʼu sei hatete ba sira neʼebé laʼós haʼu-nia povu: “Imi mak haʼu-nia povu”,
No sira sei dehan: “Ita mak ami-nia Maromak.”’”
3 Tuirmai Jeová hatete ba haʼu: “Dala ida tan, bá, hadomi fali feto neʼebé mane seluk hadomi ona no neʼebé halo daudaun sala seksuál, tanba neʼe hanesan Jeová mós hadomi ninia povu Izraél maski sira fila hodi adora maromak sira seluk no gosta tebes dose neʼebé halo husi uvas-maran.”
2 Entaun haʼu sosa nia ho osan-mutin 15 no ho sevada omer isin ida ho balu. 3 Tuirmai haʼu hatete ba nia: “Ó sei kontinua sai haʼu-nian ba tempu naruk. Ó labele sai hanesan feto-aat, no ó labele halo relasaun seksuál ho mane seluk, no haʼu mós sei la halo relasaun seksuál ho ó.”
4 Tanba durante tempu naruk povu Izraél sei moris la ho liurai ida, no la iha ulun-naʼin ida, la iha sakrifísiu, la iha fatuk lulik, no la iha efod no la iha estátua terafin. 5 Depois neʼe, iha loron sira-neʼe nia rohan, povu Izraél sei fila fali no buka Jeová, sira-nia Maromak, no buka David, sira-nia liurai, no sira sei mai iha Jeová nia oin ho nakdedar, atu sira bele simu ninia laran-diʼak.
4 Oh povu Izraél, rona ba Jeová nia liafuan,
Tanba Jeová iha kazu hasoru ema iha rai neʼe,
Nia halo neʼe tanba la iha lia-loos no la iha domin neʼebé laran-metin no ema la hatene kona-ba Maromak iha rai neʼe.
2 Jura falsu, bosok, oho ema,
Naʼok no sala seksuál mak sai barak loos,
No ema fakar ema seluk nia raan beibeik.
3 Tan neʼe mak rai neʼe sei lelir
No ema hotu neʼebé hela iha rai neʼe sei lakon mohu;
Animál fuik sira iha rai-luan no manu sira iha lalehan,
No mós ikan sira iha tasi sei lakon mohu.
4 “Maibé, ema ida labele fó konsellu ba imi,
Tanba imi ulun-toos hanesan sira neʼebé kontra hasoru amlulik ida.
5 Tan neʼe mak imi sei sidi maski iha loron,
No profeta sei sidi hamutuk ho imi, hanesan iha kalan.
No haʼu sei halakon imi-nia inan.
6 Haʼu-nia povu sei lakon, tanba la iha koñesimentu.
Haʼu sei la simu tan imi atu serbí nuʼudar haʼu-nia amlulik,
Tanba imi lakohi simu koñesimentu;
Haʼu sei haluha imi-nia oan-mane sira
Tanba imi haluha ona ukun-fuan husi imi-nia Maromak.
7 Bainhira amlulik sira sai barak, sira mós halo sala barak liután hasoru haʼu.
Haʼu sei troka sira-nia glória sai fali buat neʼebé lori moe.
8 Sira-nia ai-han mak haʼu-nia povu nia sala,
No sira kaan haʼu-nia povu nia hahalok aat.
9 Haʼu sei halo buat neʼebé hanesan ba povu no amlulik sira;
Haʼu sei tesi-lia ba sira hotu tuir sira-nia hahalok,
No haʼu sei lori kastigu ba sira tanba buat neʼebé sira halo.
10 Sira sei han maibé la sai bosu.
Sira sei halo sala seksuál, maibé sira sei la iha oan,
Tanba sira la rona ba Jeová.
11 Sala seksuál, tua-uvas, no tua-uvas foun
Mak halakon ema nia hakarak atu halo buat neʼebé loos.
12 Haʼu-nia povu buka matadalan husi sira-nia estátua neʼebé halo husi ai,
No sira halo tuir buat neʼebé sira-nia ai-tonka hatudu ba sira;
Tanba hakarak foʼer halo sira laʼo sala dalan,
No tanba sira-nia hahalok sala seksuál mak sira lakohi hakruʼuk an ba sira-nia Maromak.
13 Sira hasaʼe sakrifísiu iha foho-tutun sira,
No sira mós sunu sira-nia sakrifísiu hodi halo suar iha foho-oan sira-nia leten,
Sira hasaʼe sakrifísiu iha ai-karvallu hun no ai-estorak hun no ai-hun boot hotu nia okos,
Tanba ai-hun sira-neʼe nia mahon mak diʼak.
Tan neʼe mak imi-nia oan-feto sira sai nuʼudar feto-aat
No imi-nia feto-foun sira halo sala seksuál.
14 Haʼu sei la fó kastigu ba imi-nia oan-feto sira tanba sira sai nuʼudar feto-aat,
No la kastigu imi-nia feto-foun tanba sira halo sala seksuál.
Tanba mane sira mós bá ona hamutuk ho feto-aat
No hasaʼe sakrifísiu hamutuk ho feto-aat templu nian;
Povu sira hanesan neʼe neʼebé la iha kbiit atu komprende sei halakon tiha.
15 Oh Izraél, maski ó halo sala seksuál,
Maibé Judá labele halo sala neʼebé hanesan.
Keta laʼo ba Gilgal ka Bet-Aven,
No keta jura dehan: ‘Hodi Jeová neʼebé moris!’
16 Tanba hanesan karau neʼebé ulun-toos, Izraél sai ulun-toos ona.
Entaun Jeová sei tau matan ba nia hanesan bibi-atan tau matan ba bibi-oan iha rai-luan ka lae?
17 Efraim entrega ona ninia an ba estátua sira.
Husik nia halo nuneʼe bá!
18 Bainhira nia hemu hotu ona ninia serveja,
Nia halo sala seksuál barak.
No ninia ukun-naʼin sira gosta tebes buat neʼebé lori moe.
19 Anin sei lori sai tiha nia,
No nia sei sai moe kona-ba ninia sakrifísiu sira.”
5 “Oh amlulik sira, rona ida-neʼe bá,
Oh umakain Izraél, see tilun didiʼak bá,
Oh liurai nia umakain, rona bá;
Tanba tesi-lia neʼe kona-ba imi;
Tanba imi mak lasu ba Mizpa,
No rede neʼebé soe ba Tabor nia leten.
2 Sira neʼebé kontra haʼu, sira envolve an hodi oho ema barak,
Agora haʼu fó avizu ba sira hotu.
3 Haʼu hatene Efraim,
No Izraél la bele subar husi haʼu.
Tanba agora, oh Efraim, ó halo ona sala seksuál;
Izraél hafoʼer ona ninia an.
4 Sira-nia hahalok la husik sira atu fila fali ba sira-nia Maromak,
Tanba hakarak foʼer mak iha sira-nia leet;
No sira la rekoñese Jeová.
5 Izraél nia hahalok foti an mak fó sasin hasoru nia an;
Izraél no Efraim sidi ona tanba sira-nia sala rasik,
No Judá mós sidi ona hamutuk ho sira.
6 Sira lori sira-nia karau-lubun no bibi-lubun atu bá buka Jeová,
Maibé sira la hetan nia.
Nia hadook an ona husi sira.
7 Sira la laran-metin ba Jeová,
Tanba sira sai aman ba oan-mane estranjeiru sira.
Sira no sira-nia rai sei lakon iha fulan ida deʼit nia laran.
8 Huu dikur bá iha Gibea, huu trombeta bá iha Ramá!
Hakilar lian funu nian bá iha Bet-Aven! Oh Benjamin, ami sei laʼo tuir ó!
9 Oh Efraim, iha loron kastigu nian ó sei sai hanesan buat neʼebé halo ema taʼuk.
Haʼu fó sai ona kona-ba buat neʼebé sei akontese duni iha Izraél nia suku sira-nia leet.
10 Judá nia ulun-naʼin sira mak hanesan ema sira neʼebé muda rai nia baliza.
Haʼu sei fakar sai haʼu-nia hirus ba sira hanesan bee.
11 Efraim iha terus laran, no nia rahun ona tanba justisa,
Neʼe tanba nia deside ona atu laʼo tuir ninia inimigu.
12 Entaun haʼu sai hanesan ular kiʼik ba Efraim
No hanesan buat neʼebé dodok ba umakain Judá.
13 Bainhira Efraim haree ninia moras, no Judá haree ninia kanek,
Efraim laʼo ba rai-Asíria, no haruka ema atu lori lia-menon ba liurai boot ida.
Maibé nia la bele kura imi,
Nia la iha kbiit atu kura imi-nia kanek.
14 Tanba haʼu sei sai hanesan leaun ida ba Efraim,
No hanesan leaun neʼebé forte ba umakain Judá.
Haʼu rasik sei lees sira ba pedasuk no tuirmai haʼu bá;
Haʼu sei lori sira, no la iha ema ida sei salva sira.
15 Haʼu sei bá no fila fali ba haʼu-nia fatin toʼo sira simu tiha kastigu tanba sira-nia sala,
No tuirmai sira sei buka atu haʼu simu fali sira.
Sin, bainhira sira iha terus laran, sira sei buka fali haʼu.”
6 “Mai, mai ita fila fali ba Jeová,
Tanba nia lees ona ita ba pedasuk, maibé nia sei kura fali ita.
Nia baku ona ita, maibé nia sei falun ita-nia kanek.
2 Liutiha loron rua nia sei fó moris fali ba ita.
Iha loron terseiru nia sei halo ita hamriik fali,
No ita sei moris iha ninia oin.
3 Ita sei hatene, no ita sei hakaʼas an hodi buka-hatene kona-ba Jeová.
Nia sei mai hanesan rai-naroman neʼebé sempre mosu;
Nia sei toʼo mai ita hanesan udan,
Hanesan udan ikus neʼebé habokon rai.”
4 “Haʼu tenke halo saida ba imi, oh Efraim?
Haʼu tenke halo saida ba imi, oh Judá?
Tanba imi-nia domin ho laran-metin mak hanesan kalohan iha dadeer,
Hanesan mahobeen neʼebé lakon lalais deʼit.
5 Tan neʼe mak liuhusi haʼu-nia profeta sira, haʼu sei tesi sai imi;
Haʼu sei oho imi ho liafuan husi haʼu-nia ibun.
No haʼu-nia tesi-lia ba imi sei sai hanesan naroman neʼebé nabilan.
6 Tanba haʼu haksolok ho domin neʼebé laran-metin, laʼós ho sakrifísiu,
No haʼu haksolok ho koñesimentu kona-ba Maromak, laʼós ho sakrifísiu sunu nian neʼebé hasaʼe tomak.
7 Maibé haʼu-nia povu, sira hanesan ema sala-naʼin, sira kontra ona haʼu-nia aliansa.
Sira la laran-metin ba haʼu iha sira-nia rai.
8 Jilead mak sidade ba ema aat sira,
No nakonu ho sira neʼebé fakar ema nia raan.
9 Grupu amlulik nian mak hanesan naʼok-teen sira neʼebé subar an atu ataka ema ida.
Sira oho ema iha dalan Sikem nian,
Tanba sira-nia hahalok rasik mak lori moe boot.
10 Haʼu haree ona buat aat tebes iha umakain Izraél.
Iha neʼebá mak Efraim halo hahalok hanesan feto-aat;
Izraél hafoʼer ona ninia an.
11 Oh Judá, haʼu hili ona tempu koʼa nian ba imi,
Tempu atu halibur fali haʼu-nia povu sira neʼebé sai dadur.”
7 “Iha tempu neʼebé haʼu hakarak kura Izraél,
Haʼu mós hatudu sai Efraim nia sala,
No hatudu sai Samaria nia hahalok aat.
Tanba sira toman atu bosok;
Sira tama uma hodi naʼok no sira hadau sasán iha uma liʼur.
2 Maibé sira haluha katak haʼu sei hanoin-hetan sira-nia hahalok aat hotu.
Agora sira-nia hahalok aat haleʼu sira;
Buat sira-neʼe iha kedas haʼu-nia oin.
3 Sira halo liurai haksolok ho sira-nia hahalok aat,
No halo ulun-naʼin sira haksolok ho sira-nia lia-bosok.
4 Sira hotu halo sala seksuál,
Sira halo sira-nia laran lakan makaʼas hanesan fornu neʼebé ema halakan ona atu tunu paun,
Fornu neʼebé kontinua manas nuʼudar ema masa hela trigu no hein toʼo masa neʼe saʼe.
5 Iha ita-nia liurai nia loron festa nian, ulun-naʼin sira sai moras ona,
Sira sai hirus tanba tua-uvas.
Nia lolo ona ninia liman ba ema gozadór sira.
6 Tanba sira-nia laran lakan hanesan fornu.
Kalan tomak ema neʼebé tunu paun toba tiha;
Iha dadeer fornu neʼe sei lakan boot.
7 Sira hotu mak manas hanesan fornu,
No sira tolan tiha sira-nia ukun-naʼin.
Sira-nia liurai hotu monu ona;
Sira ida mós la bolu haʼu.
8 Efraim ransu ona ho nasaun seluk.
Efraim hanesan dose kabuar neʼebé ema tunu maibé la fila ninia sorin.
9 Ema estranjeiru tolan ona ninia kbiit, maibé nia la hatene ida-neʼe.
No ninia fuuk sai mutin ona, maibé nia la haree.
10 Izraél nia hahalok foti an mak fó sasin hasoru nia an;
Maibé sira seidauk fila fali ba Jeová, sira-nia Maromak,
No sira seidauk buka nia maski buat hotu neʼe kona ona sira.
11 Efraim mak hanesan manu-pombu neʼebé beik, la iha kbiit atu tetu didiʼak.
Sira husu ajuda ba rai-Ejitu; sira buka ajuda husi rai-Asíria.
12 Fatin naran deʼit neʼebé sira bá, haʼu sei soe haʼu-nia rede ba sira-nia leten.
Haʼu sei halo sira monu tun hanesan ema uza rede hodi halo manu sira monu husi lalehan.
Haʼu sei fó dixiplina sira tuir avizu neʼebé haʼu fó sai ona ba povu neʼe.
13 Susar ba sira, tanba sira halai ona husi haʼu!
Terus ba sira, tanba sira halo sala ona hasoru haʼu!
Haʼu prontu atu sosa fali sira, maibé sira koʼalia ona lia-bosok kontra haʼu.
14 Maski sira kontinua tanis iha sira-nia toba-fatin,
Maibé sira la husu ajuda ba haʼu ho sira-nia laran.
Sira koʼa kanek sira-nia an hodi husu hahán no tua-uvas foun;
Sira kontra ona haʼu.
15 Maski haʼu fó dixiplina ba sira no hametin sira-nia liman,
Maibé sira kontra haʼu, no halo planu neʼebé aat.
16 Sira troka sira-nia dalan, maibé laʼós ba dalan neʼebé kmanek liu;
Haʼu labele tau fiar ba sira tanba sira hanesan rama tali neʼebé la metin.
Sira-nia ulun-naʼin sira sei monu ho surik tanba sira-nia nanál neʼebé kontra.
Tan neʼe mak ema sei goza sira iha rai-Ejitu.”
8 “Tau dikur ida iha ó-nia ibun no huu bá!
Inimigu mai hanesan manu-makikit hodi kontra Jeová nia umakain,
Tanba sira kontra ona haʼu-nia aliansa no kontra haʼu-nia ukun-fuan.
2 Sira bolu haʼu, hodi dehan: ‘Oh ami-nia Maromak, ami ema Izraél hatene Ita!’
3 Ema Izraél lakohi simu buat neʼebé diʼak.
Husik inimigu ida duni tuir sira.
4 Sira foti ona liurai, maibé la liuhusi haʼu.
Sira foti ona ulun-naʼin, maibé haʼu la hatene ulun-naʼin sira-neʼe.
Sira halo estátua hodi uza sira-nia osan-mutin no osan-mean,
No buat sira-neʼe sei lori sira ba mate.
5 Oh Samaria, haʼu la simu ó-nia estátua karau-oan.
Haʼu-nia hirus lakan makaʼas hasoru sira.
Toʼo bainhira mak sira kontinua la hatene hamoos an husi sala neʼe?
6 Estátua neʼe mai husi Izraél.
Badain ida mak halo, no neʼe laʼós Maromak;
Samaria nia estátua karau-oan sei harahun tiha toʼo sai uut.
7 Tanba sira kontinua kuda anin,
No sira sei koʼa anin-boot.
La iha trigu kain ida mak sei fó trigu musan neʼebé tasak;
Buat neʼebé buras sei la fó trigu musan.
Maski iha trigu musan, ema estranjeiru mak sei tolan tiha ida-neʼe.
8 Inimigu sei tolan ema Izraél.
No sira sei hela iha nasaun sira-nia leet,
Hanesan manko neʼebé ema la gosta ona.
9 Tanba sira laʼo ona ba rai-Asíria, hanesan kuda-burru fuik ida neʼebé mesak deʼit.
Efraim selu ona feto-aat sira atu sai ninia doben.
10 Maski Efraim selu feto-aat husi nasaun sira,
Maibé haʼu sei halibur fali sira;
Sira sei hetan terus tanba naha todan neʼebé liurai no ulun-naʼin sira tau iha sira-nia leten.
11 Tanba Efraim aumenta ona altár sira atu halo sala.
Nia uza ninia altár sira-neʼe atu halo sala.
12 Haʼu hakerek ona ukun-fuan barak ba Efraim,
Maibé nia lakohi hanoin kona-ba neʼe.
13 Sira hasaʼe sakrifísiu animál nuʼudar prezente ba haʼu, no sira han naʼan neʼe,
Maibé Jeová la kontente ho buat sira-neʼe.
Agora nia sei hanoin-hetan sira-nia sala no fó-kastigu ba sira tanba sira-nia sala.
Sira fila fali ona ba rai-Ejitu.
14 Izraél haluha ona ninia Kriadór no harii ona templu sira,
No Judá aumenta ona ninia sidade sira neʼebé seguru.
Maibé haʼu sei haruka ahi ba sidade sira-neʼe,
No ahi neʼe sei han uma aas sira iha sidade ida-idak.”
9 “Oh ema Izraél, keta sai kontente,
Keta haksolok hanesan nasaun sira seluk.
Tanba imi-nia hahalok mak hanesan feto-aat, no neʼe lori imi sees husi imi-nia Maromak.
Imi hadomi kolen neʼebé imi hetan tanba halo sala seksuál iha fatin sama trigu nian hotu.
2 Maibé fatin sama trigu nian no fatin sama uvas nian sei la halo imi sai bosu,
No tua-uvas foun sei la iha tan.
3 Sira sei la hela tan iha Jeová nia rai;
Maibé Efraim sei fila fali ba rai-Ejitu,
Sira sei han buat neʼebé la moos iha rai-Asíria.
4 Sira sei la fui tan tua-uvas hodi hasaʼe nuʼudar sakrifísiu ba Jeová;
Sira-nia sakrifísiu sei la halo nia kontente.
Sira-nia sakrifísiu mak hanesan paun triste nian;
Ema hotu neʼebé han ida-neʼe sei sai la moos.
Tanba paun neʼe mak ba sira deʼit;
Paun neʼe sei la lori tama ba Jeová nia templu.
5 Saida mak imi sei halo bainhira loron toʼo ona atu halibur hamutuk
Ka atu selebra festa ba Jeová?
6 Haree bá! sira tenke halai tanba inimigu sei mai halakon sira.
Ejitu sei halibur sira hamutuk, no Menfis sei hakoi sira.
Duʼut aat sei hadau sira-nia sasán folin-boot neʼebé halo husi osan-mutin,
No ai-tarak sei moris iha sira-nia tenda laran.
7 Loron kastigu nian sei toʼo mai,
Tempu atu selu fali hahalok aat sei toʼo mai,
No ema Izraél sei hatene kona-ba neʼe.
Sira-nia profeta sei sai beik, no ema neʼebé dehan katak nia koʼalia hodi reprezenta Maromak sei sai bulak;
Tanba imi-nia sala sira mak barak tebes, Maromak odi tebes imi.”
8 Uluk Efraim nia guarda laran-metin ba haʼu-nia Maromak.
Maibé agora ninia profeta sira-nia hahalok hotu mak hanesan lasu husi ema neʼebé kasa manu;
Iha hahalok odi malu iha ninia Maromak nia uma.
9 Sira envolve an makaʼas iha buat neʼebé lori susar, hanesan tempu uluk iha Gibea.
Nia sei hanoin-hetan sira-nia sala no fó kastigu ba sira-nia sala.
10 “Uluk haʼu hetan Izraél hanesan hetan uvas-fuan iha rai-fuik.
Uluk haʼu haree imi-nia beiʼala hanesan haree fuan primeiru iha ai-figeira hun.
Maibé sira laʼo ba Baal husi Peor;
Sira dedika an ba buat neʼebé lori moe,
No sira sai foʼer tebes hanesan buat neʼebé sira hadomi.
11 Efraim nia glória semo lakon tiha hanesan manu ida;
Sira la sai isin-rua no la iha oan.
12 Maski sira haboot oan,
Maibé haʼu sei halakon sira-nia oan toʼo la iha mane ida mak moris;
Sin, susar ba sira bainhira haʼu fila kotuk ba sira!
13 Ba haʼu, Efraim mak hanesan Tiro, no haʼu kuda Efraim iha fatin neʼebé kapás;
Maibé agora Efraim tenke lori sai ninia oan atu inimigu sira oho.”
14 Oh Jeová, fó ba sira buat neʼebé Ita tenke fó ba sira;
Fó ba sira oan-fatin neʼebé halo abortu oan sira no susun neʼebé maran.
15 “Sira halo hahalok aat hotu iha Gilgal, no iha neʼebá mak haʼu odi sira.
Haʼu sei duni sai sira husi haʼu-nia uma tanba sira-nia hahalok aat.
Haʼu sei la hadomi tan sira;
Sira-nia ulun-naʼin hotu mak ulun-toos duni.
16 Haʼu sei baku monu Efraim.
Sira-nia abut sei maran, no sira sei la fó fuan.
Maski sira iha oan, haʼu sei oho sira-nia oan neʼebé sira hadomi.”
17 Haʼu-nia Maromak sei la simu sira,
Tanba sira la rona ba nia,
No sira sei sai refujiadu iha nasaun sira-nia leet.
10 “Izraél mak uvas-hun aat neʼebé fó fuan.
Bainhira ninia fuan aumenta liután, ninia altár sira mós aumenta;
Bainhira ninia rai fó fuan diʼak liután, ninia fatuk lulik sira mós sai furak liu.
2 Sira-nia laran mak makerek;
Agora sira tenke hatán ba sira-nia sala.
Iha ida neʼebé sei harahun sira-nia altár no halo tohar sira-nia fatuk lulik.
3 Agora sira sei dehan: ‘Ami la iha liurai, tanba ami la taʼuk ba Jeová.
No buat diʼak saida mak liurai ida bele halo ba ami?’
4 Sira koʼalia liafuan mamuk, jura falsu, no halo aliansa sira;
Entaun sira tesi-lia la tuir justisa no neʼe hanesan duʼut neʼebé iha venenu, neʼebé buras iha toʼos laran.
5 Ema neʼebé hela iha Samaria sei sai taʼuk tanba buat neʼebé atu mosu ba estátua karau-oan iha Bet-Aven,
Ema neʼebé adora estátua neʼe sei triste tanba estátua neʼe,
Nuneʼe mós ho amlulik ba maromak falsu neʼebé uluk haksolok tanba estátua neʼe no ninia glória,
Tanba ema sei lori estátua neʼe nuʼudar dadur hodi dook husi sira.
6 Estátua neʼe sei lori tiha ba rai-Asíria nuʼudar prezente ba liurai boot.
Efraim sei sai moe,
No ema Izraél sei sai moe tanba konsellu neʼebé sira halo tuir ona.
7 Samaria no ninia liurai sei halakon tiha,
Hanesan ai-sanak neʼebé ema silu ona no soe iha bee leten.
8 Fatin aas sira iha Bet-Aven, neʼebé halo ema Izraél monu ba sala, sei halakon tiha.
Ai-tarak no duʼut aat sei moris iha sira-nia altár leten.
Ema sei dehan ba foho sira: ‘Taka ami bá!’
No dehan ba foho-oan sira: ‘Monu iha ami-nia leten bá!’
9 Oh ema Izraél, husi tempu neʼebé imi halo sala iha Gibea, imi kontinua halo sala.
Povu nafatin halo sala neʼebé hanesan.
Funu iha Gibea la halakon ema laran-aat hotu.
10 Haʼu mós sei fó dixiplina ba sira kuandu haʼu hakarak.
Haʼu sei halo sira lori todan ba sira-nia sala rua neʼe,
No ema sira sei halibur hamutuk atu kontra sira.
11 Efraim mak karau-inan neʼebé treinu ona no gosta sama trigu,
Entaun haʼu la tau naha todan ba nia kanuruk neʼebé furak.
Maibé agora, haʼu sei halo ema ida kontrola Efraim atu fila rai.
Judá sei fila rai; no Jacob mós sei serbisu ba nia iha toʼos.
12 Agora sei iha tempu atu buka Jeová,
Tan neʼe, fila rai bá iha fatin neʼebé diʼak,
Kuda fini bá ho hahalok loos no koʼa domin neʼebé laran-metin;
Toʼo tempu neʼebé nia mai no hanorin imi ho hahalok loos.
13 Maibé imi kuda ona hahalok aat,
Imi koʼa ona hahalok la loos,
No imi han ona fuan husi lia-bosok neʼebé imi kuda;
Tanba imi tau fiar ba imi-nia dalan rasik,
Tau fiar ba imi-nia asuwaʼin sira neʼebé barak.
14 Lian funu nian sei mosu hasoru ó-nia povu,
No ó-nia sidade hotu neʼebé metin sei rahun,
Hanesan Salman harahun Bet-Arbel,
Iha loron funu nian bainhira nia harahun inan hamutuk ho oan sira ba pedasuk.
15 Oh Betel, neʼe mak buat neʼebé ema sei halo ba imi tanba imi-nia hahalok aat tebes.
Bainhira rai-naroman, ema sei halakon tiha liurai Izraél nian.”
11 “Bainhira Izraél sei labarik hela, haʼu hadomi nia,
No husi rai-Ejitu mak haʼu bolu haʼu-nia oan-mane.
2 Bainhira sira bolu povu neʼe beibeik,
Povu neʼe hadook an liután.
Sira kontinua hasaʼe sakrifísiu ba estátua Baal
No hasaʼe sakrifísiu ba estátua neʼebé bahat ona.
3 Maibé haʼu mak hanorin Efraim atu laʼo, haʼu koʼus sira iha haʼu-nia liman;
No sira la rekoñese katak haʼu mak kura ona sira.
4 Haʼu uza tali laran-diʼak no tali domin nian hodi dada sira ba haʼu;
No ba sira, haʼu mak hanesan ida neʼebé hiʼit sai tiha naha todan husi sira-nia kabaas,
Haʼu lori ai-han ba sira ida-idak ho laran-diʼak.
5 Sira sei la fila fali ba rai-Ejitu, maibé Asíria mak sei sai sira-nia liurai,
Tanba sira lakohi fila fali ba haʼu.
6 No surik ida sei tun hasoru ninia sidade sira
No harahun ai-lolon neʼebé xave sidade nia portaun no tolan sira tanba sira-nia planu aat.
7 Haʼu-nia povu lakohi atu hatudu laran-metin ba haʼu.
Maski sira bolu povu neʼe atu fila, maibé la iha ema ida mak hamriik.
8 Oh Efraim, oinsá mak haʼu bele entrega ó ba inimigu?
Oh Izraél, oinsá mak haʼu bele fó ó ba inimigu?
Oinsá mak haʼu bele halo ba ó hanesan Adma?
Oinsá mak haʼu bele halo ba ó hanesan Zeboim?
Haʼu troka ona haʼu-nia hanoin;
No iha tempu hanesan haʼu-nia laran-sadiʼa book ona haʼu.
9 Haʼu sei la hatudu sai haʼu-nia hirus makaʼas.
Haʼu sei la halakon fali Efraim,
Tanba haʼu mak Maromak, haʼu laʼós ema,
Haʼu mak Maromak neʼebé Santu iha imi-nia leet;
No haʼu sei la mai kontra imi ho laran-nakali.
10 Sira sei laʼo tuir Jeová, no nia sei hasai lian hanesan leaun ida;
Bainhira nia hasai lian, ninia oan-mane sira sei mai husi parte oeste ho nakdedar.
11 Bainhira sira sai husi rai-Ejitu, sira sei nakdedar hanesan manu ida,
No bainhira sira sai husi rai-Asíria, sira sei nakdedar hanesan manu-pombu ida;
No haʼu sei lori sira hodi hela iha sira-nia uma”, Jeová dehan.
12 “Efraim haleʼu haʼu ho lia-bosok,
No umakain Izraél nian haleʼu haʼu ho lohi.
Maibé Judá kontinua laʼo ho Maromak,
No nia laran-metin ba Maromak neʼebé Santu Liu Hotu.”
12 “Efraim han deʼit anin.
Loron tomak nia duni tuir anin husi parte leste.
Nia aumenta ninia lia-bosok no violénsia.
Nia halo aliansa ho rai-Asíria no lori mina ba rai-Ejitu.
2 Jeová iha kazu hasoru Judá;
Nia sei tesi-lia ba Jacob tuir Jacob nia hahalok sira,
No nia sei selu fali Jacob tuir Jacob nia hahalok sira.
3 Iha ninia inan nia kabun, Jacob kaer metin ninia maun nia ain-tuban,
No ho ninia kbiit tomak nia luta ho Maromak.
4 Nia kontinua luta ho anju ida no manán.
Nia tanis no husu ho laran atu Maromak fó bensaun ba nia.”
Maromak hetan nia iha Betel, no iha neʼebá Maromak koʼalia kona-ba ita,
5 Jeová, Maromak neʼebé ukun tropa lalehan nian,
Povu tenke hanoin-hetan katak ninia naran mak Jeová.
6 “Entaun fila fali ba imi-nia Maromak,
Hatudu nafatin domin neʼebé laran-metin no justisa,
No tau esperansa nafatin ba imi-nia Maromak.
7 Maibé ema neʼebé halo negósiu lori dasin neʼebé la loos iha ninia liman;
Nia gosta tebes atu hamatak ema.
8 Efraim kontinua dehan: ‘Tuir loloos, haʼu sai riku ona;
Haʼu hetan ona rikusoin.
No iha haʼu-nia serbisu makaʼas hotu, sira la bele hetan sala neʼebé boot.’
9 Maibé haʼu mak Jeová, imi-nia Maromak, husi tempu neʼebé imi hela iha rai-Ejitu.
Haʼu sei halo imi hela fali iha tenda sira
Hanesan loron sira iha tempu festa nian.
10 Haʼu koʼalia ona ba profeta sira,
Haʼu aumenta sira-nia vizaun,
No haʼu koʼalia ona ai-knanoik liuhusi profeta sira.
11 Sira lohi no koʼalia ona lia-bosok iha Jilead.
Sira hasaʼe karau-aman nuʼudar sakrifísiu iha Gilgal,
No sira-nia altár mak hanesan fatuk butuk iha toʼos laran neʼebé ninia rai fila tiha ona.
12 Jacob halai tiha ba área Aram nian;
Izraél halo serbisu iha neʼebá hodi hola feto ida,
No nia tau matan ba bibi-malae sira hodi hola feto ida.
13 Liuhusi profeta ida mak Jeová lori Izraél sai husi rai-Ejitu,
No liuhusi profeta ida mak nia proteje Izraél.
14 Efraim hakanek duni Maromak nia laran;
Ninia hahalok neʼebé fakar raan sei nafatin iha ninia leten;
Ninia Naʼi sei selu fali ba nia tanba moe neʼebé nia lori ba nia Naʼi.”
13 “Bainhira Efraim koʼalia, ema sai nakdedar;
Nia naran-boot iha Izraél.
Maibé nia halo sala tanba adora Baal no mate ona.
2 Agora sira aumenta tan sira-nia sala
No sira halo estátua besi hodi uza sira-nia osan-mutin;
Sira-nia badain halo estátua sira ho matenek.
Sira dehan: ‘Ema neʼebé hasaʼe sakrifísiu, reʼi estátua karau-oan bá.’
3 Tan neʼe, sira sei sai hanesan kalohan iha dadeer,
Hanesan mahobeen neʼebé lakon lalais deʼit,
Hanesan trigu kulit husi fatin sama trigu nian neʼebé anin-boot huu sai tiha,
No hanesan suar neʼebé sai husi kuak iha uma-kakuluk.
4 Maibé haʼu mak Jeová, ó-nia Maromak, husi tempu neʼebé sira hela iha rai-Ejitu;
Ó la hatene Maromak seluk só haʼu deʼit,
No la iha salvadór ida seluk só haʼu deʼit.
5 Haʼu koñese ó iha rai-fuik, iha rai neʼebé maran-dekor.
6 Sira han ho kontente iha sira-nia rai-luan,
Sira sai bosu no sira-nia laran sai foti-an.
No tan neʼe sira haluha haʼu.
7 Haʼu sei sai hanesan leaun ida ba sira,
Hanesan leopardu neʼebé hein iha dalan atu ataka sira.
8 Haʼu sei ataka sira hanesan ursu neʼebé lakon ninia oan,
Haʼu sei tata lees sira-nia hirus-matan.
Iha neʼebá mak haʼu sei tolan sira hanesan leaun ida;
Animál fuik ida husi rai-luan sei lees tiha sira ba pedasuk.
9 Oh Izraél, neʼe sei halakon imi,
Tanba imi kontra hasoru haʼu, sin, imi kontra imi-nia ajuda-naʼin.
10 Entaun, imi-nia liurai iha neʼebé, atu nuneʼe nia bele salva imi iha imi-nia sidade sira hotu?
No imi-nia ukun-naʼin sira iha neʼebé? Tanba imi dehan:
‘Fó ba ami liurai ida no ulun-naʼin sira.’
11 Ho hirus haʼu fó ona liurai ida ba imi,
No haʼu sei hasai nia ho haʼu-nia laran-nakali.
12 Efraim nia sala falun metin ona;
Ninia sala rai didiʼak ona.
13 Nia sei sente moras hanesan feto neʼebé atu tuur-ahi.
Maibé nia mak oan neʼebé beik;
Nia lakohi sai husi ninia inan nia knotak kuandu tempu toʼo ona atu nia moris.
14 Haʼu sei sosa fali sira husi rate nia kbiit;
Haʼu sei halo sira moris fali husi mate.
Oh Mate, ó-nia venenu iha neʼebé?
Oh Rate, ó-nia kbiit atu halakon ema iha neʼebé?
Haʼu sei la hatudu laran-sadiʼa.
15 Maski nia sai buras hanesan duʼut iha mota ninin,
Maibé anin husi parte leste sei mai, anin husi Jeová,
Anin neʼe sei mai husi rai-fuik maran, atu halo maran ninia bee-posu no ninia bee-matan.
Ema ida sei hadau tiha ninia sasán folin-boot sira hotu.
16 Samaria sei hatán ba ninia sala, tanba nia kontra ona ninia Maromak.
Sira sei monu tanba surik,
Inimigu sei harahun tiha sira-nia oan sira ba pedasuk,
No sei lees feto sira neʼebé isin-rua.”
14 “Oh ema Izraél, fila fali ba Jeová, imi-nia Maromak,
Tanba imi-nia sala halo ona imi sidi.
2 Fila fali ba Jeová, no dehan ba nia:
‘Favór ida, perdua ami-nia sala no simu buat neʼebé diʼak husi ami,
No ami sei hasaʼe sakrifísiu hahiʼi nian ho ami-nia ibun hanesan ami hasaʼe karau-aman nuʼudar sakrifísiu.
3 Asíria sei la salva ami.
Ami sei la saʼe kuda,
No ami sei la temi tan liafuan: “Oh ami-nia Maromak!” ba buat neʼebé ami halo ho ami-nia liman,
Tanba Ita mak hatudu laran-sadiʼa ba oan-kiak sira.’
4 Haʼu sei kura sira, no sira labele hatudu fali tan hahalok la laran-metin,
Haʼu sei hadomi sira ho haʼu-nia hakarak rasik,
Tanba haʼu hadook tiha ona haʼu-nia hirus husi sira.
5 Haʼu sei sai hanesan mahobeen ba Izraél;
Nia sei buras hanesan ai-funan líriu
No ninia abut sei naruk hanesan ai-hun sira iha Líbanu.
6 Ninia sanak sira sei sai boot,
Ninia furak sei sai hanesan ai-oliveira hun,
No ninia morin sei sai hanesan ai sira iha Líbanu.
7 Sira sei hela fali iha ninia mahon okos.
Sira sei kuda fini no sai buras hanesan uvas-hun.
Ninia naran-boot sei sai hanesan tua-uvas husi Líbanu.
8 Efraim sei dehan: ‘Haʼu la iha tan ligasaun ho estátua sira.’
Haʼu sei rona no tau matan ba nia.
Haʼu sei sai hanesan ai-junipero hun neʼebé buras.
Haʼu mak ida neʼebé sei fó ai-fuan ba ó.”
9 Sé mak matenek? Husik nia komprende buat sira-neʼe bá.
Sé mak iha kbiit atu komprende? Husik nia hatene buat sira-neʼe bá.
Tanba Jeová nia dalan sira mak loos,
No ema laran-loos sei laʼo iha dalan sira-neʼe;
Maibé ema neʼebé halo sala sei sidi iha dalan sira-neʼe.
JOEL
1 Jeová fó sai liafuan tuirmai neʼe ba Petuel nia oan-mane Joel:
2 “Imi katuas sira, rona bá,
Imi hotu neʼebé hela iha rai neʼe, see tilun bá.
Buat ida hanesan neʼe akontese ona iha imi-nia tempu
Ka iha imi-nia beiʼala sira-nia tempu ka lae?
3 Konta ida-neʼe ba imi-nia oan sira,
No imi-nia oan sira sei konta tutan ba sira-nia oan,
No sira-nia oan sei konta tutan ba jerasaun tuirmai.
4 Ai-horis neʼebé gafañotu neʼebé hamlaha la han, gafañotu boot mak sei han,
Buat neʼebé gafañotu boot la han, gafañotu oan neʼebé la iha liras mak sei han,
No buat neʼebé gafañotu oan la han, gafañotu neʼebé kaan-teen mak sei han.
5 Imi lanu-teen sira, hadeer no tanis bá!
Imi hotu neʼebé hemu tua-uvas, tanis hakilar bá,
Tanba tua-uvas midar hasai tiha husi imi-nia ibun.
6 Tanba nasaun ida tama ona ba haʼu-nia rai, nia mak forte no ninia tropa labele sura.
Nia nehan no hasan-ruin hanesan leaun nian.
7 Nasaun neʼe estraga ona haʼu-nia uvas-hun no tesi ona haʼu-nia ai-figeira,
Sira hasai ai nia kulit hotu no soe tiha,
No sira la husik ai kulit ida iha ninia sanak sira.
8 Tanis bá hanesan feto virjen neʼebé hatais hena karón
Hodi tanis ba ninia noivu neʼebé mate.
9 Ema la hasaʼe tan sakrifísiu fini nian no sakrifísiu hemu nian iha Jeová nia templu;
Amlulik sira neʼebé serbí Jeová sei triste hela.
10 Ai-horis iha toʼos estraga ona, rai neʼe halerik,
Ai-han estraga ona, tua-uvas foun sai maran ona, no mina la iha tan ona.
11 Toʼos-naʼin sente laran-taridu, toʼos-uvas nia naʼin sira halerik
Tanba trigu no sevada;
Ai-han sira iha toʼos lakon tiha ona.
12 Uvas-hun sai maran ona,
Ai-figeira namlaek ona.
Romaun, ai-palmeira, no masán,
Ai-hun hotu iha rai-luan maran ona;
No ksolok sai fali moe iha povu nia leet.
13 Imi amlulik sira, hatais hena karón no tanis bá,
Imi neʼebé halo serbisu iha Maromak nia altár, halerik bá.
Imi neʼebé serbí haʼu-nia Maromak, hatais hena karón no tama mai hodi hela kalan ida iha neʼe,
Tanba ema la hasaʼe tan sakrifísiu fini nian no sakrifísiu hemu nian iha imi-nia Maromak nia templu.
14 Fó sai tempu jejún; bolu povu hodi halaʼo reuniaun santu ida.
Halibur katuas sira no ema hotu husi rai neʼe,
Halibur sira iha imi-nia Maromak Jeová nia uma, no halerik ba Jeová hodi husu ajuda.
15 Susar boot, tanba loron neʼe mai daudaun!
Tanba Jeová nia loron besik ona,
No loron neʼe sei mai bainhira Maromak Kbiit Boot Liu Hotu halakon buat barak!
16 Haksolok no kontente lakon ona husi ita-nia Maromak nia templu,
No ai-han la iha tan.
17 Fini neʼebé sira kuda sai maran ona.
Armazén sai mamuk ona.
Sira sobu ona armazén tanba fini sira namlaek ona.
18 Animál-hakiak mós halerik!
Karau sira laʼo bilán, tanba duʼut matak la iha,
No bibi-lubun sira mós hetan susar tanba kastigu neʼe.
19 Oh Jeová, haʼu sei bolu Ita,
Tanba ahi han tiha duʼut iha rai-fuik,
No ahi han ona ai hotu iha rai-luan.
20 Animál fuik mós hein namanas ba Ita-nia ajuda,
Tanba mota sira sai maran ona
No ahi han mohu tiha duʼut iha rai-fuik.”
2 “Huu dikur bá iha Siaun!
Hakilar ho lian funu nian iha haʼu-nia foho santu.
Ema hotu iha rai neʼe sei nakdedar,
Tanba Jeová nia loron mai daudaun! Loron neʼe besik ona!
2 Loron neʼe sei nakukun tebes,
Loron neʼe sei iha kalohan metan,
Hanesan rai-naroman nia naroman neʼebé foho sira taka netik.
Povu neʼebé barak no forte sei mai,
Husi tempu uluk kedas la iha povu ida hanesan neʼe,
No sei la mosu tan iha futuru
Husi jerasaun ba jerasaun.
3 Ahi han buat hotu iha sira-nia oin,
No han buat hotu iha sira-nia kotuk.
Rai neʼebé iha sira-nia oin hanesan ho jardín Eden,
Maibé iha sira-nia kotuk rai sai fuik no mamuk,
No la iha buat ida neʼebé bele halai-sees.
4 Sira haree hanesan kuda,
No sira halai hanesan kuda funu nian.
5 Bainhira sira halai iha foho-tutun sira, sira halo tarutu hanesan kuda-karreta funu nian,
Hanesan tarutu husi ahi boot neʼebé han duʼut maran.
Sira hanesan tropa forte neʼebé forma hodi prontu ba funu.
6 Ema sei sai laran-taridu tanba sira.
Ema hotu nia oin sei sai taʼuk.
7 Sira halai ba oin hanesan funu-naʼin sira,
Sira saʼe moru hanesan tropa sira,
Sira ida-idak laʼo loos tuir sira-nia dalan,
No sira la sees husi sira-nia dalan.
8 Sira la dudu malu,
Mane ida-idak laʼo ba oin tuir sira-nia dalan.
Se rama-oan halo sira balu monu,
Sira seluk la sees husi sira-nia dalan.
9 Sira tama lalais ba sidade laran, sira halai iha moru leten.
Sira saʼe ba uma leten, no tama uma liuhusi janela hanesan naʼok-teen.
10 Rai nakdedar no lalehan nakdoko iha sira-nia oin.
Loro-matan no fulan sai nakukun,
No fitun sira la nabilan tan.
11 Jeová sei koʼalia ho lian boot iha ninia tropa sira-nia oin, tanba ninia tropa sira mak barak tebes.
Nia neʼebé kumpre Ninia liafuan mak iha kbiit boot;
Jeová nia loron mak boot no kmanek liu.
Sé mak bele tahan loron neʼe?”
12 Jeová dehan: “Maski nuneʼe, agora kedas, fila fali mai haʼu ho imi-nia laran tomak,
Ho jejún, tanis no halerik.
13 Lees imi-nia fuan, laʼós imi-nia roupa,
No fila fali ba Jeová, imi-nia Maromak,
Tanba nia laran-diʼak no laran-sadiʼa, la hirus lalais no nakonu ho domin neʼebé laran-metin,
Nia sei troka ninia hanoin kona-ba susar boot neʼe.
14 Sé mak hatene karik nia sei hatún ninia hirus no troka ninia hanoin
No haraik bensaun ba imi,
Atu nuneʼe imi bele hasaʼe sakrifísiu fini nian no sakrifísiu hemu nian ba Jeová, imi-nia Maromak.
15 Huu dikur bá iha Siaun!
Fó sai tempu jejún, bolu povu sira hodi halaʼo reuniaun santu.
16 Halibur povu bá, no halo santu kongregasaun neʼe.
Halibur katuas sira, labarik sira no bebé sira neʼebé sei susu hela.
Noivu tenke sai husi ninia kuartu, no noiva mós tenke sai husi ninia kuartu laran.
17 Husik amlulik sira neʼebé serbí Jeová, tanis
Iha varanda no altár nia leet, hodi dehan:
‘Oh Jeová, favór ida hanoin Ita-nia povu,
Keta husik ema goza Ita-nia povu,
Keta husik nasaun sira ukun Ita-nia povu.
Keta husik ema dehan: “Sira-nia Maromak iha neʼebé?”’
18 Tuirmai Jeová sei hatudu katak nia hadomi ninia rai
No hatudu laran-diʼak ba ninia povu.
19 Jeová sei hatán ba ninia povu, hodi dehan:
‘Haʼu sei haruka ai-han, tua-uvas foun no mina ba imi.
Imi sei sai bosu loos,
No haʼu sei la husik tan ema atu goza imi iha nasaun sira-nia leet.
20 Haʼu sei duni sira neʼebé mai husi parte norte, hodi dook husi imi,
Haʼu sei halo sira namkari ba rai neʼebé maran no mamuk,
Tropa sira neʼebé iha oin sei namkari ba tasi iha parte leste,
Tropa sira neʼebé iha kotuk sei namkari ba tasi iha parte oeste.
Sira-nia iis dois sei saʼe ba leten,
Sira-nia mate-isin nia dois sei kontinua saʼe ba leten;
Tanba Maromak sei halo buat neʼebé kmanek tebes.
21 Oh rai, keta sai taʼuk.
Sai kontente no haksolok bá, tanba Jeová sei halo buat neʼebé kmanek tebes.
22 Animál sira iha rai-luan, keta sai taʼuk,
Tanba duʼut iha rai-fuik sei sai matak,
No ai-horis sira sei fó fuan;
Ai-figeira no uvas-hun sei fó fuan barak.
23 Siaun nia oan-mane sira, sai kontente no haksolok tanba Jeová, imi-nia Maromak,
Tanba nia sei fó ba imi udan neʼebé natoon iha tempu fila rai nian,
No nia sei haruka udan barak ba imi,
Tinan-tinan udan sei tun hanesan uluk, udan primeiru no udan ikus.
24 Fatin sama trigu nian sei sai nakonu ho trigu neʼebé diʼak,
No imi-nia fatin atu halo tua-uvas foun no mina sei nakonu toʼo resin.
25 Haʼu sei selu fali ba imi tuir tinan sira
Neʼebé gafañotu boot, gafañotu oan neʼebé la iha liras, gafañotu neʼebé kaan-teen, no gafañotu neʼebé hamlaha han ai-han iha imi-nia toʼos,
Sira mak haʼu-nia tropa boot neʼebé haʼu haruka ba imi-nia leet.
26 Imi sei han toʼo bosu duni,
No imi sei hahiʼi Jeová, imi-nia Maromak, nia naran,
Neʼebé halo buat kmanek ba imi;
Haʼu-nia povu sei nunka sente moe tan.
27 Nuneʼe imi sei hatene duni katak haʼu mak iha ema Izraél nia leet
No haʼu mak Jeová, imi-nia Maromak, no la iha Maromak seluk!
Haʼu-nia povu sei nunka sente moe tan.
28 Depois neʼe, haʼu sei fakar haʼu-nia espíritu ba ema oioin,
Imi-nia oan-mane no oan-feto sira sei koʼalia nuʼudar profeta,
Imi-nia katuas sira sei hetan mehi,
No imi-nia mane joven sira sei haree vizaun.
29 Iha tempu neʼebá haʼu mós sei fakar haʼu-nia espíritu
Ba haʼu-nia atan-mane no atan-feto.
30 Haʼu sei hatudu sai sinál sira iha lalehan no iha rai,
Sei iha raan, ahi no suar barak neʼebé saʼe ba leten.
31 Loro-matan sei sai nakukun no fulan sei sai raan
Antes Jeová nia loron neʼebé boot no kmanek liu toʼo mai.
32 Ema hotu neʼebé bolu Jeová nia naran sei hetan salvasaun;
Tanba iha Foho Siaun no iha Jeruzalein sei iha ema neʼebé hetan salvasaun, hodi tuir buat neʼebé Jeová hatete ona,
Sira mak ema neʼebé Jeová bolu atu hetan salvasaun.”
3 “Haree bá! Iha loron sira iha tempu neʼebá,
Haʼu sei lori fila ema Judá no ema Jeruzalein neʼebé sai nuʼudar dadur,
2 Haʼu mós sei halibur nasaun hotu hamutuk
No lori sira ba Foho-Leet Jeosafát.
Haʼu sei tesi-lia ba sira iha neʼebá
Hodi apoia haʼu-nia povu Izraél neʼebé nuʼudar haʼu-nia liman-rohan;
Tanba nasaun sira-neʼe halo haʼu-nia povu laʼo namkari iha sira-nia leet,
No sira fahe haʼu-nia rai ba malu.
3 Sira dada sorteiu atu fahe haʼu-nia povu,
Sira faʼan labarik-mane atu selu feto-aat
No faʼan labarik-feto atu sosa tua-uvas hodi hemu.
4 Tiro, Sidon, no área Filístia tomak,
Tansá mak imi halo nuneʼe mai haʼu?
Imi selu aat ba haʼu tanba haʼu halo aat ba imi ka?
Se imi selu aat ba haʼu,
Haʼu mós sei selu fali kedas ba imi tuir buat neʼebé imi halo.
5 Tanba imi foti ona haʼu-nia osan-mutin no osan-mean,
No imi lori haʼu-nia rikusoin neʼebé diʼak liu no tau iha imi-nia templu sira,
6 Imi faʼan ema Judá no Jeruzalein ba ema Gregu,
Atu nuneʼe sira bá dook husi sira-nia rai.
7 Haʼu sei lori fila sira husi fatin neʼebé imi faʼan sira,
No haʼu sei selu fali imi-nia hahalok aat sira-neʼe.
8 Haʼu sei faʼan imi-nia oan-mane no oan-feto sira ba ema Judá nia liman,
No ema Judá sei faʼan fali sira ba ema husi Sabá, ba nasaun ida neʼebé dook liu;
Tanba Jeová rasik mak fó sai ona ida-neʼe.
9 Fó sai liafuan tuirmai neʼe iha nasaun sira-nia leet:
‘Sai prontu bá atu halo funu! Bolu funu-naʼin sira!
Tropa hotu tenke hakbesik no ataka!
10 Tuku imi-nia xarrua sai fali surik no imi-nia tudik sai fali diman.
Ema neʼebé fraku tenke dehan: “Haʼu mak forte.”
11 Mai no ajuda malu bá, imi nasaun sira hotu iha sorin-sorin, halibur an hamutuk!’”
Oh Jeová, lori Ita-nia funu-naʼin sira neʼebé kbiit boot ba fatin neʼe.
12 “Nasaun sira sei halibur hamutuk no bá Foho-Leet Jeosafát,
Tanba haʼu sei tuur iha neʼebá atu tesi-lia ba nasaun sira hotu neʼebé haleʼu.
13 Lolo tudik bá, tanba toʼos prontu ona atu koʼa.
Tun mai no sama uvas, tanba fatin atu halo tua-uvas sai nakonu ona.
Tua-uvas fatin sai nakonu toʼo resin, tanba sira-nia hahalok aat sai barak tebes ona.
14 Ema barak tebes iha foho-leet tesi-lia nian,
Tanba loron neʼebé Jeová tesi-lia ba sira iha neʼebá besik ona.
15 Loro-matan no fulan sei sai nakukun,
No fitun sira sei la nabilan tan.
16 Jeová sei hakilar husi Siaun hanesan leaun,
Nia sei hasai nia lian husi Jeruzalein.
Lalehan no rai sei nakdoko,
Maibé Jeová sei sai fatin protesaun ba ninia povu,
Sai uma neʼebé seguru ba povu Izraél.
17 Imi sei hatene duni katak haʼu mak Jeová, imi-nia Maromak, neʼebé hela iha Siaun, haʼu-nia foho santu.
Jeruzalein sei sai fatin neʼebé santu,
No ema estranjeiru sei la sama tan fatin neʼe.
18 Iha loron neʼebá foho sira sei nakonu ho tua-uvas neʼebé midar,
Foho-oan sira sei suli ho susubeen,
No mota hotu iha Judá sei suli.
Bee-matan ida sei suli husi Jeová nia uma,
No bee neʼe sei suli ba Foho-Leet Ai-Akásia.
19 Maibé rai-Ejitu sei sai mamuk,
No Edom sei sai rai-fuik neʼebé mamuk,
Tanba sira halo violénsia hasoru povu Judá,
No fakar ema laran-moos nia raan iha povu Judá nia rai.
20 Maibé ema sei hela nafatin iha rai-Judá,
No ema sei hela iha Jeruzalein husi jerasaun ba jerasaun.
21 Haʼu sei hamoos sira-nia sala uluk nian kona-ba ema nia raan,
No Jeová sei hela iha Siaun.”