Informasaun atu uza hamutuk livru Moris Kristaun no Haklaken
6-12 NOVEMBRU
Keʼe no hetan buat murak husi Bíblia
w07 1/10 p. 14 par. 8
Pontu importante husi livru Joel no Amós
2:12. Ita labele halo pioneiru sira, katuas sira neʼebé iha knaar atu vizita kongregasaun, misionáriu sira ka ema Betel sai laran-tun hodi hatete katak sira presiza husik sira-nia serbisu tempu-tomak ba Maromak no moris hanesan ema seluk. Tuir loloos ita tenke fó laran-manas ba sira atu kontinua nafatin sira-nia serbisu diʼak neʼe.
w07 1/10 p. 14 par. 6
Pontu importante husi livru Joel no Amós
8:1, 2—“Raga neʼebé nakonu ho ai-fuan tempu bailoro nian” signifika saida? Neʼe hatudu katak Jeová nia loron besik ona. Ema baibain kuʼu ai-fuan tempu bailoro nian bainhira tempu koʼa nian besik ona atu ramata, neʼe mak besik iha tinan nia rohan. Bainhira Jeová husu Amós atu haree “raga neʼebé nakonu ho ai-fuan tempu bailoro nian”, neʼe katak ema Izraél besik ona sira-nia rohan. Tan neʼe mak Maromak dehan ba Amós: “Haʼu-nia povu Izraél nia tempu toʼo ona rohan. Haʼu sei la fó tan perdua ba sira.”
13-19 NOVEMBRU
OBADIAS (OBAJA) 1–JONAS (YUNUS) 4
Keʼe no hetan buat murak husi Bíblia
w07 1/11 p. 13 par. 5
Pontu importante husi livru Obadias, Jonas, no Miquéias
10—Oinsá mak Edom “lakon mohu ba nafatin”? Bíblia fó-hatene katak nasaun Edom, neʼebé iha ninia governu rasik no área neʼebé ninia povu sira hela, sei lakon mohu, no ida-neʼe akontese duni. Liurai husi Babilónia, Nabonido manán Edom maizumenus iha tinan 550 molok Kristu. Liutiha tinan 300 molok Kristu, ema nabateu okupa Edom nia rai, no ema Edom presiza hela fali iha Judeia nia parte súl, área Negebe neʼebé ikusmai bolu nuʼudar Idumeia. Bainhira ema Roma halakon Jeruzalein iha tinan 70, ema Edom la iha tan ona.
jd p. 112 par. 4-5
Haree ema seluk hanesan Maromak haree sira
4 Ita bele aprende lisaun kona-ba Maromak hirus ho ema Edom nia hahalok, rai neʼebé besik Izraél. Jeová dehan: “Ó labele kontente iha loron neʼebé buat aat kona ó-nia alin, Ó labele haksolok iha loron neʼebé povu Judá mate.” (Obadias 12) Maski ema Tiro no ema Izraél mak hanesan “maun-alin” tanba halo atividade negósiu nian hamutuk, maibé ema Edom mak loloos ema Izraél nia “maun” tanba sira mai husi Esaú, Jacob nia kaduak. Jeová mós bolu ema Edom no ema Izraél nuʼudar “maun-alin”. (Deuteronômio [Ulangan] 2:1-4) Tan neʼe, bainhira ema Edom kontente tanba ema judeu monu ba Babilónia nia liman, neʼe hatudu katak sira laran-aat duni.—Ezequiel (Yehezkiel) 25:12-14.
5 Maromak la gosta duni buat neʼebé Edom halo ba sira-nia alin ema judeu sira. Diʼak atu husu ba ita-nia an, ‘Maromak kontente ka lae, kona-ba oinsá haʼu haree haʼu-nia irmaun-irmán sira?’ Liuliu mak oinsá ita haree ita-nia maluk sira bainhira iha problema ruma. Porezemplu, hanoin toʼok, se ema kristaun ida halo Ita laran-kanek, ka nia iha problema ho Ita-nia família. Se ema ‘halo buat ruma hasoru Ita’, Ita sei rai hirus nafatin no la koko atu rezolve ka lae? (Koloso 3:13; Josué [Yosua] 22:9-30; Mateus 5:23, 24) Se Ita halo nuneʼe, neʼe bele kona dalan neʼebé Ita trata irmaun ka irmán neʼe. Porezemplu, karik Ita sei la ransu tan ho nia ka koʼalia aat kona-ba nia. No oinsá se irmaun ka irmán neʼe ikusmai halo sala no presiza hetan konsellu ka dixiplina husi katuas sira? (Galásia 6:1) Ita sei halo tuir ema Edom no sente kontente tanba buat neʼebé akontese ba nia ka lae? Iha situasaun hanesan neʼe, Maromak hakarak Ita atu halo saida?
20-26 NOVEMBRU
Keʼe no hetan buat murak husi Bíblia
w07 1/11 p. 15 par. 6
Pontu importante husi livru Obadias, Jonas, no Miquéias
2:12—Bainhira mak profesia kona-ba halibur “Izraél nia ema restu sira” sai loos? Profesia neʼe foufoun sai loos iha tinan 537 bainhira ema judeu restu sira sai husi dadur iha Babilónia no fila fali ba sira-nia rai. Iha tempu modernu, profesia neʼe sai loos iha “Izraél Maromak nian”. (Galásia 6:16) Husi tinan 1919, ema kristaun sira neʼebé iha esperansa atu bá lalehan, halibur sai hanesan “bibi-malae iha luhan laran”. Tanba “bibi seluk” neʼebé sai nuʼudar “ema-lubun boot” mak apoia sira, liuliu husi tinan 1935, ‘rai neʼe barullu ho ema barak’. (Apokalipse 7:9; João 10:16) Ho laran-manas, sira hotu habelar adorasaun neʼebé loos.
Saida mak Jeová hakarak husi ita?
20 Hetan Jeová nia bensaun book ita atu hatudu hahalok hanesan Miquéias nian. Miquéias hatete: “Haʼu sei hein ho pasiénsia ba Maromak neʼebé salva haʼu.” (Miquéias [Mikha] 7:7) Oinsá mak liafuan sira-neʼe iha ligasaun atu laʼo ho Maromak ho haraik-an? Se ita hein ho pasiénsia ba Maromak, neʼe sei ajuda ita atu la sente laran-tun tanba Maromak nia loron seidauk mai. (Provérbios [Amsal] 13:12) Ita hotu hein mundu aat neʼe nia rohan. Maibé, semana-semana, ema rihun ba rihun mak foin komesa atu laʼo ho Maromak. Hodi hatene ida-neʼe, ajuda ita atu hein ho pasiénsia. Kona-ba neʼe, Testemuña ida neʼebé kleur ona iha lia-loos hatete: “Haree fali ba tinan 55 iha serbisu haklaken, haʼu fiar metin katak haʼu la lakon buat ida hodi hein ba Jeová. Tuir loloos, neʼe ajuda haʼu hodi hasees an husi problema barak.” Ita mós iha esperiénsia hanesan neʼe ka lae?
27 NOVEMBRU–3 DEZEMBRU
Keʼe no hetan buat murak husi Bíblia
w07 15/11 p. 9 par. 2
Pontu importante husi livru Naum, Habacuque, no Sofonias
2:6—“Mota sira-nia portaun” neʼebé loke tiha katak sá? Portaun sira-neʼe refere ba Nínive nia moru sira neʼebé monu tanba Mota Tigre. Iha tinan 632 molok Kristu, bainhira ema Babilónia no ema Média serbisu hamutuk hodi ataka Nínive, ema iha Nínive la sente taʼuk. Sira sente seguru tanba iha moru boot neʼebé aas haleʼu sidade neʼe no sira hanoin katak ema sei la bele tama. Maibé, udan boot halo bee saʼe iha Mota Tigre. Tuir matenek-naʼin ida naran Diodoro, “bee saʼe toʼo tama sidade laran no mós sobu moru balu”. Nuneʼe mak mota nia portaun loke tiha no ema Babilónia no ema Média manán sidade Nínive lalais deʼit hanesan ahi han duʼut maran, no neʼe tuir buat neʼebé profesia hatete nanis.—Naum 1:8-10.
w07 15/11 p. 10 par. 10
Pontu importante husi livru Naum, Habacuque, no Sofonias
3:17-19. Maski ita sei monu ba susar antes Armajedón no durante Armajedón akontese, ita bele fiar metin katak Jeová sei fó ita “kbiit” nuʼudar ita kontinua serbí nia ho haksolok.
AMÓS
1 Tuirmai neʼe mak liafuan husi Amos, bibi-atan ida husi Tekoa; nia simu liafuan tuirmai neʼe kona-ba Izraél liuhusi vizaun. Nia simu vizaun neʼe tinan rua antes rai-nakdoko, katak durante Liurai Uzias husi Judá nia tempu, no durante Liurai Jeroboam husi Izraél, Joas nia oan-mane nia tempu. 2 Nia dehan:
“Jeová sei hakilar husi Siaun hanesan leaun,
No nia sei hasai nia lian husi Jeruzalein.
Rai neʼebé bibi sira han duʼut matak sei halerik,
No Foho Karmel nia tutun sei maran.”
3 “Jeová dehan nuneʼe:
‘“Damasku halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira hanehan Gilead.
4 Tan neʼe, haʼu sei haruka ahi ba Hazael nia uma,
No ahi neʼe sei han Ben-Hadad nia palásiu sira.
5 Haʼu sei harahun ai-lolon neʼebé xave Damasku nia portaun,
Haʼu sei halakon ema husi Bikat-Aven
Haʼu mós sei halakon ema neʼebé ukun Bet-Eden;
No povu husi Síria sei sai dadur iha Kir”, Jeová hatete nuneʼe.’
6 Jeová dehan nuneʼe:
‘“Gaza halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira lori ema barak nuʼudar dadur no entrega sira ba Edom.
7 Tan neʼe, haʼu sei haruka ahi ba Gaza nia moru,
No ahi neʼe sei han Gaza nia palásiu sira.
8 Haʼu sei halakon ema husi Asdod,
Haʼu mós sei halakon ema neʼebé ukun Askelon;
Haʼu sei foti liman hasoru Ekron,
No ema restu husi Filístia sei mate”, Jeová, Naʼi Ukun-Naʼin Boot Liu, hatete nuneʼe.’
9 Jeová dehan nuneʼe:
‘Tiro halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira entrega ema barak ba Edom nuʼudar dadur,
No tanba sira haluha tiha aliansa entre maun-alin.
10 Tan neʼe, haʼu sei haruka ahi ba Tiro nia moru,
No ahi neʼe sei han Tiro nia palásiu sira.’
11 Jeová dehan nuneʼe:
‘Edom halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk nia duni tuir ninia alin rasik ho surik,
No tanba nia lakohi hatudu laran-sadiʼa,
Ho hirus nia kontinua atu lees sira,
No nia kontinua sai hirus makaʼas ba sira.
12 Tan neʼe, haʼu sei haruka ahi ba Teman,
No ahi neʼe sei han Bozra nia palásiu sira.’
13 Jeová dehan nuneʼe:
‘“Ema Ammon halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira lees feto isin-rua nia kabun, katak feto sira husi Gilead, tanba hakarak haluan sira-nia rai.
14 Tan neʼe, haʼu sei sunu Rabá nia moru,
No ahi neʼe sei han Rabá nia palásiu sira,
Tropa sira hakilar lian funu nian iha loron neʼebé sira ataka sidade neʼe,
No sei iha anin-fuik.
15 No sira-nia liurai sei sai dadur hamutuk ho ninia ulun-naʼin sira”, Jeová hatete nuneʼe.’
2 “Jeová dehan nuneʼe:
‘“Moab halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk nia sunu liurai husi Edom nia ruin toʼo sai ahi-kadesan.
2 Tan neʼe, haʼu sei haruka ahi ba Moab,
No ahi neʼe sei han Keriot nia palásiu sira;
Moab sei mate bainhira funu-naʼin sira halo lian barullu,
Bainhira sira hakilar lian funu nian no huu dikur.
3 Haʼu sei hasai ukun-naʼin husi Moab nia leet
No haʼu sei oho ninia ulun-naʼin hotu hamutuk ho nia”, Jeová hatete nuneʼe.’
4 Jeová dehan nuneʼe:
‘Judá halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira la simu Jeová nia ukun-fuan,
No tanba sira la halo tuir ninia lei sira;
Maibé sira halo tuir lia-bosok neʼebé uluk sira-nia beiʼala sira halo tuir, no neʼe lori sira laʼo sala dalan.
5 Tan neʼe, haʼu sei haruka ahi ba Judá,
No ahi neʼe sei han Jeruzalein nia palásiu sira.’
6 Jeová dehan nuneʼe:
‘Izraél halo sala fila-fila, ba dala tolu, no ba dala haat, tan neʼe haʼu sei la dada fali haʼu-nia desizaun,
Tanba uluk sira faʼan ema laran-loos atu hetan osan-mutin,
No faʼan ema kiak atu hetan sandálias.
7 Sira sama ema kiʼik nia ulun ba rai,
No sira taka netik ema laran-maus nia dalan.
Mane ida no ninia aman halo relasaun seksuál ho feto neʼebé hanesan,
Hodi hafoʼer haʼu-nia naran neʼebé santu.
8 Sira foti ema nia roupa nuʼudar garantia ba buat neʼebé ema empresta, no nahe roupa neʼe iha altár sira-nia sorin-sorin hotu hodi toba;
Sira haruka ema atu selu multa, no uza osan neʼe atu sosa tua-uvas no hemu iha sira-nia maromak nia templu.’
9 ‘Maibé haʼu halakon ona ema Amoreu husi sira-nia oin;
Ema Amoreu neʼebé ain-aas hanesan ai-sedru no forte hanesan ai-karvallu;
Sira mak hanesan ai-hun, no haʼu estraga sira-nia fuan no abut.
10 Haʼu lori sai ona imi husi rai-Ejitu,
No haʼu halo imi laʼo iha rai-fuik ba tinan 40,
Atu bele foti ema Amoreu nia rai nuʼudar imi-nian.
11 Haʼu hili imi-nia oan-mane balu nuʼudar profeta
No imi-nia oan-mane joven balu nuʼudar ema Nazireu.
Oh povu Izraél, haʼu halo ona buat sira-neʼe ba imi, loos ka lae?’ Jeová hatete nuneʼe.
12 ‘Maibé imi kontinua fó tua-uvas ba ema Nazireu atu hemu,
No imi bandu profeta sira, hodi dehan: “Imi labele koʼalia nuʼudar profeta.”
13 Tan neʼe, haʼu sei sama rahun imi iha imi-nia fatin,
Hanesan karrosa neʼebé nakonu ho trigu foun sei sama rahun buat neʼebé iha ninia okos.
14 Ema neʼebé isin-moris sei la iha fatin atu halai,
Ema neʼebé forte sei lakon ninia kbiit,
No asuwaʼin labele salva ninia moris rasik.
15 Ema neʼebé hana rama-oan sei la hamriik metin iha ninia fatin,
Ema neʼebé halai lalais sei la salva ninia moris,
No ema neʼebé saʼe kuda labele salva ninia moris.
16 Mane neʼebé brani liu hotu iha asuwaʼin sira-nia leet,
Sei halai ho isin-tanan iha tempu neʼebá’, Jeová hatete nuneʼe.”
3 “Oh povu Izraél, rona ba Jeová nia liafuan tuirmai neʼebé nia koʼalia ba imi, kona-ba família hotu neʼebé nia lori sai husi rai-Ejitu:
2 ‘Husi família hotu iha rai, só imi deʼit mak haʼu koñese.
Tan neʼe haʼu sei tesi-lia ba imi tuir sala hotu neʼebé imi halo.
3 Ema naʼin-rua bele laʼo hamutuk se sira seidauk planu ka lae?
4 Leaun sei hasai lian iha ai-laran se la iha animál ida atu nia kaer ka lae?
Leaun sei hasai lian husi ninia subar-fatin se nia seidauk kaer buat ruma ka lae?
5 Manu ida bele tama ba lasu se ema seidauk tau lasu iha rai ka lae?
Lasu ida bele taka mesak deʼit se animál ruma la tama uluk ka lae?
6 Se ema huu dikur iha sidade, povu sei nakdedar, loos ka lae?
Se susar mosu iha sidade, Jeová mak lori susar neʼe, loos ka lae?
7 Tanba Jeová, Naʼi Ukun-Naʼin Boot Liu, sei la halo buat ida
Se nia la fó sai uluk ninia segredu ba ninia atan profeta sira.
8 Leaun ida hasai lian ona! Sé mak la sai taʼuk?
Jeová, Naʼi Ukun-Naʼin Boot Liu, koʼalia ona! Sé mak sei la fó sai ninia liafuan?’
9 Fó sai ida-neʼe husi Asdod nia palásiu sira
No husi rai-Ejitu nia palásiu sira.
Hatete nuneʼe bá: “Halibur hamutuk iha Samaria nia foho sira,
Haree ba susar sira neʼebé mosu iha ninia leet
No haree oinsá ema hamatak malu iha sidade laran.
10 Tanba sira la hatene oinsá atu halo buat neʼebé loos”, Jeová hatete nuneʼe,
“Sira rai rikusoin neʼebé sira hadau liuhusi violénsia iha sira-nia palásiu sira.”’
11 Tan neʼe, Jeová, Naʼi Ukun-Naʼin Boot Liu, dehan nuneʼe:
‘Inimigu ida sei haleʼu rai neʼe,
Nia sei halakon ó-nia kbiit,
No nia sei foti rikusoin hotu husi ó-nia palásiu sira.’
12 Jeová dehan nuneʼe:
‘Ema Izraél sira agora tuur iha kama furak nia leten no iha sofá neʼebé kapás iha Samaria,
Maibé, hanesan bibi-atan ida rasta sai bibi nia ain rua ka bibi nia tilun husi leaun nia ibun,
Nuneʼe mós ema Izraél balu deʼit mak sei halai sees husi inimigu nia liman.’
13 ‘Rona bá hodi fó avizu ba Jacob nia umakain’, Jeová, Naʼi Ukun-Naʼin Boot Liu, Maromak neʼebé ukun tropa lalehan nian, hatete nuneʼe.
14 ‘Iha loron neʼebé haʼu tesi-lia ba Izraél tanba ninia hahalok sala hotu,
Haʼu mós sei tesi-lia ba Betel nia altár sira,
Haʼu sei tesi altár sira-neʼe nia dikur no halo sira monu ba rai.
15 Haʼu sei sobu uma neʼebé sira hela durante tempu malirin no uma neʼebé sira hela durante tempu manas.’
‘Uma neʼebé halo husi marfín sei lakon mohu,
No uma boot sira sei la iha tan’, Jeová hatete nuneʼe.”
4 “Rona ba liafuan tuirmai neʼe, imi neʼebé hanesan karau-inan husi Basan,
Imi neʼebé hela iha foho Samaria nian,
Imi feto sira neʼebé hamatak ema kiʼik, no hanehan ema kiak,
Imi neʼebé hatete ba imi-nia laʼen: ‘Lori mai tua atu ami bele hemu!’
2 Jeová, Naʼi Ukun-Naʼin Boot Liu, Maromak neʼebé santu jura ona, hodi dehan:
‘“Haree bá! Loron sira sei toʼo mai bainhira inimigu sei hiʼit saʼe imi ho besi-kaʼit naʼan nian
No hiʼit saʼe imi sira seluk ho kail ikan nian.
3 Imi ida-idak sei laʼo loos ba oin liuhusi moru nia kuak sira;
No inimigu sei soe imi ba Harmon”, Jeová hatete nuneʼe.’
4 ‘Mai iha Betel no halo sala bá,
Bá iha Gilgal, no halo sala barak liután!
Iha dadeer lori imi-nia sakrifísiu,
No iha loron terseiru lori imi-nia porsentu sanulu.
5 Sunu paun neʼebé iha fermentu nuʼudar sakrifísiu agradese nian,
Fó avizu ho lian boot kona-ba imi-nia sakrifísiu neʼebé imi fó ho hakarak rasik!
Tanba imi gosta atu halo nuneʼe, oh povu Izraél’, Jeová, Naʼi Ukun-Naʼin Boot Liu, hatete nuneʼe.
6 ‘Haʼu, haʼu hasai ona ai-han husi imi-nia nehan iha imi-nia sidade sira hotu
No haʼu hamenus paun iha imi-nia uma hotu.
Maski nuneʼe, imi lakohi fila fali mai haʼu’, Jeová hatete nuneʼe.
7 ‘Haʼu mós hanetik ona udan atu labele tun ba imi ba fulan tolu antes tempu koʼa nian;
Haʼu halo udan tau iha sidade ida maibé la tau iha sidade seluk.
Haʼu hatún udan ba ema ida nia rai,
Maibé ema seluk nia rai la hetan udan, no sai maran hotu.
8 Povu husi sidade rua ka tolu hakaʼas an tebes atu laʼo ba sidade ida atu buka bee,
Maibé bee latoʼo ba sira atu hemu.
Maski nuneʼe, imi lakohi fila fali mai haʼu’, Jeová hatete nuneʼe.
9 ‘Haʼu lori rai-manas makaʼas no kulapur ba imi-nia toʼos.
Imi aumenta imi-nia toʼos no toʼos-uvas sira,
Maibé gafañotu han imi-nia ai-figeira no ai-oliveira.
Maski nuneʼe, imi lakohi nafatin fila fali mai haʼu’, Jeová hatete nuneʼe.
10 ‘Haʼu haruka moras ba imi-nia leet hanesan uluk haʼu halo iha rai-Ejitu.
Haʼu oho imi-nia mane joven ho surik no kaer imi-nia kuda.
Dois husi mate-isin nakonu iha imi-nia hela-fatin.
Maski nuneʼe, imi lakohi fila fali mai haʼu’, Jeová hatete nuneʼe.
11 ‘Haʼu estraga imi-nia rai
Hanesan haʼu estraga Sodoma no Gomorra.
Imi neʼebé hetan salvasaun mak hanesan ai neʼebé foti sai husi ahi neʼebé lakan hela.
Maski nuneʼe, imi lakohi fila fali mai haʼu’, Jeová hatete nuneʼe.
12 Entaun oh Izraél, haʼu sei fó kastigu fali ba imi.
Oh Izraél, sai prontu bá atu hasoru imi-nia Maromak,
Tanba haʼu sei fó kastigu ba imi.
13 Tanba nia mak Maromak neʼebé kria foho sira no anin,
Nia fó sai Ninia hanoin ba ema,
Nia halo rai-naroman sai fali nakukun,
Nia sama fatin aas sira iha rai,
Ninia naran mak Jeová, Maromak neʼebé ukun tropa lalehan nian.”
5 “Oh Izraél nia umakain, rona ba liafuan neʼebé haʼu fó sai ba imi nuʼudar knananuk triste nian:
2 ‘Izraél mak hanesan feto virjen neʼebé monu tiha ona,
Nia labele hamriik fali.
Ema hotu husik hela nia iha ninia rai rasik,
La iha ema ida atu ajuda nia hamriik fali.’
3 “Tanba Jeová, Naʼi Ukun-Naʼin Boot Liu, dehan nuneʼe:
‘Sidade neʼebé haruka ema naʼin-rihun ida atu bá funu sei hela deʼit ema naʼin-atus ida,
No sidade neʼebé haruka ema naʼin-atus ida atu bá funu sei hela deʼit ema naʼin-sanulu. Neʼe sei akontese ba umakain Izraél.’
4 “Tanba Jeová dehan nuneʼe ba umakain Izraél:
‘Buka haʼu hodi bele kontinua moris.
5 Keta buka Betel,
Keta bá Gilgal ka bá Beer-Seba,
Tanba Gilgal sei sai duni dadur,
No Betel sei lakon mohu.
6 Buka Jeová hodi bele kontinua moris,
Atu nuneʼe nia la sai hanesan ahi-lakan ba José nia umakain,
Hodi han mohu Betel, no la iha ema ida mak bele hamate ahi neʼe.
7 Imi halo justisa sai fali buat moruk,
No imi soe deʼit hahalok loos ba rai.
8 Maromak halo fitun-lubun Kima no fitun-lubun Kesil,
Maromak halo nakukun sai fali dadeer,
Maromak halo loron sai nakukun hanesan iha kalan,
Maromak halibur bee husi tasi laran
Atu bele fakar bee neʼe ba rai leten;
Ninia naran mak Jeová.
9 Nia sei halakon ema sira neʼebé forte,
No harahun uma boot sira neʼebé metin.
10 Sira odi ema sira neʼebé fó konsellu iha sidade nia portaun,
No sira hakribi ema neʼebé koʼalia sai buat neʼebé loos.
11 Imi haruka ema kiak atu selu imi hodi aluga toʼos sira
No imi foti ninia trigu nuʼudar impostu,
Tan neʼe, imi sei la hela nafatin iha uma neʼebé imi harii ho fatuk
No mós imi sei la hemu tua-uvas husi imi-nia toʼos-uvas neʼebé diʼak liu.
12 Tanba haʼu hatene sala sira neʼebé imi halo fila-fila
No hatene imi-nia sala sira mak boot;
Imi fó susar ba ema neʼebé laran-loos,
Imi simu osan hodi bobar lia-loos,
No imi nega ema kiak nia direitu iha sidade nia portaun.
13 Tan neʼe, iha tempu neʼebá, sira neʼebé matenek sei nonook deʼit,
Tanba tempu neʼebá mak susar tebes.
14 Buka ba buat neʼebé diʼak, laʼós buat neʼebé aat,
Atu nuneʼe imi bele kontinua moris.
Karik Jeová, Maromak neʼebé ukun tropa lalehan nian, sei hamutuk ho imi,
Hanesan imi hatete ona katak nia hamutuk ho imi.
15 Odi buat neʼebé aat, no hadomi buat neʼebé diʼak,
Halaʼo justisa iha imi-nia sidade nia portaun.
Karik Jeová, Maromak neʼebé ukun tropa lalehan nian,
Sei hatudu laran-diʼak ba ema restu husi José nia umakain.’
16 “Tan neʼe Jeová, Maromak neʼebé ukun tropa lalehan nian, Jeová dehan:
‘Ema sei tanis halerik iha sidade nia fatin públiku hotu,
No iha dalan hotu ema sei dehan: “Susar, susar!”
Sira sei haruka toʼos-naʼin atu tanis halerik
No sira sei selu ema atu lelir.’
17 ‘Ema sei tanis halerik iha toʼos-uvas hotu,
Tanba haʼu sei liu imi-nia leet atu fó kastigu’, Jeová hatete nuneʼe.
18 ‘Susar ba ema neʼebé hein namanas ba Jeová nia loron!
Saida mak sei akontese ba imi iha Jeová nia loron?
Iha loron neʼe sei iha nakukun, no naroman sei la iha.
19 Loron neʼe sei sai hanesan mane neʼebé halai husi leaun maibé ursu mak hasoru nia,
No bainhira nia tama ninia uma no tau nia liman ba didin, samea tata fali nia.
20 Iha Jeová nia loron sei iha nakukun, no naroman sei la iha;
Loron neʼe sei iha deʼit nakukun, no la iha naroman.
21 Haʼu odi, haʼu hakribi imi-nia festa sira,
Haʼu la kontente ho imi-nia sakrifísiu sira-nia morin neʼebé imi hasaʼe iha imi-nia reuniaun santu sira.
22 Maski imi hasaʼe ba haʼu sakrifísiu sunu nian no sakrifísiu seluk,
Haʼu sei la kontente ho buat sira-neʼe,
No haʼu sei la simu animál bokur neʼebé imi hasaʼe nuʼudar sakrifísiu dame nian.
23 Keta kanta imi-nia knananuk sira hodi halo barullu deʼit,
Haʼu lakohi rona lian husi imi-nia instrumentu sira neʼebé iha talin.
24 Halo justisa suli sai hanesan bee iha imi-nia rai,
No imi-nia hahalok loos suli sai hanesan mota neʼebé suli nafatin.
25 Oh povu Izraél, durante tinan 40 neʼebé imi iha rai-fuik,
Imi hasaʼe sakrifísiu no prezente sira mai haʼu ka lae?
26 Agora imi sei lori imi-nia Liurai Sakut no Kaivan hamutuk ho imi bainhira imi sai dadur,
Imi sei lori imi-nia estátua sira, imi-nia maromak fitun nian, neʼebé imi halo ba imi-nia an,
27 No haʼu sei haruka imi ba dadur iha rai neʼebé dook liu Damasku’, Maromak neʼebé naran Jeová, neʼebé ukun tropa lalehan nian, hatete nuneʼe.”
6 “Susar ba ema sira neʼebé fiar an demais iha Siaun,
Ba ema sira neʼebé sente seguru iha foho Samaria,
Ema-boot sira husi nasaun neʼebé boot liu,
Sira neʼebé umakain Izraél tau fiar!
2 Bá Kalne no haree.
Husi Kalne bá toʼo sidade boot Hamat,
No tun ba sidade Gat iha ema Filístia nia rai.
Sira-nia ukun mak diʼak liu fali imi-nian ka lae?
Ka sira-nia rai boot liu fali imi-nian ka lae?
3 Imi lakohi hanoin kona-ba loron susar neʼe ka?
No imi haburas violénsia iha imi-nia leet ka?
4 Imi toba iha kama husi marfín no sadere an iha sofá sira,
Imi han naʼan husi bibi-malae neʼebé diʼak liu iha bibi-lubun nia leet, no karau-oan neʼebé bokur.
5 Imi halo knananuk sira atu kanta hamutuk ho arpa,
No imi inventa instrumentu múzika nian hanesan David.
6 Imi hemu tua-uvas ho kopu boot
No kose mina neʼebé diʼak liu ba imi-nia an.
Maibé imi la hanoin kona-ba José nia susar.
7 Tan neʼe, imi sei sai dadur no laʼo uluk iha dadur sira seluk nia oin,
Imi-nia tempu festa no halimar sei remata.
8 ‘Jeová, Naʼi Ukun-Naʼin Boot Liu, jura hodi ninia an rasik’, Jeová, Maromak neʼebé ukun tropa lalehan nian, hatete nuneʼe:
‘“Haʼu odi Jacob nia hahalok foti an,
Haʼu hakribi ninia palásiu sira,
No haʼu sei entrega sidade neʼe no buat hotu neʼebé iha laran ba inimigu sira.
9 “‘“Se karik mane naʼin-sanulu moris hela iha uma ida nia laran, sira mós sei mate. 10 Sira-nia família ida sei mai atu lori sai sira ba uma nia liʼur no sunu sira ida-idak. Nia sei lori sira-nia ruin husi uma laran, tuirmai nia sei dehan ba ema iha uma laran: ‘Iha ema seluk tan hamutuk ho ó?’ No ema neʼe sei hatán: ‘La iha!’ Depois neʼe, nia sei dehan: ‘Nonook tiha! Tanba neʼe laʼós tempu atu temi naran Jeová.’”
11 Tanba Jeová mak fó mandamentu neʼe,
Nia sei baku rahun uma boot toʼo uut,
No baku rahun uma kiʼik toʼo uut.
12 Kuda sira sei halai iha fatuk laran ka lae?
Ema sei fila rai ho karau sira iha fatuk laran ka lae?
Imi troka ona justisa ho ai-horis neʼebé iha venenu,
No hahalok loos ho buat moruk.
13 Imi haksolok kona-ba buat neʼebé folin-laek,
No imi dehan: “Ita sai forte ona ho ita-nia kbiit rasik, loos ka lae?”
14 Tan neʼe, oh umakain Izraél, haʼu sei lori nasaun ida atu kontra imi,
No sira sei hanehan imi husi Lebo-Hamat toʼo rai-tetuk iha área Araba.’ Jeová, Maromak neʼebé ukun tropa lalehan nian, hatete nuneʼe.”
7 Jeová, Naʼi Ukun-Naʼin Boot Liu, hatudu buat tuirmai neʼe ba haʼu: Haree bá! Nia haruka gafañotu barak bainhira fini neʼebé kuda ikus komesa moris. Sira kuda fini neʼe bainhira ema tesi ona liurai nia duʼut. 2 Bainhira gafañotu han hotu ona ai-horis neʼebé iha rai neʼe, haʼu dehan: “Oh Jeová, Naʼi Ukun-Naʼin Boot Liu, favór ida, fó perdua ba sira! Oinsá mak Jacob bele tahan susar neʼe? Tanba nia mak fraku!”
3 Entaun Jeová hanoin fali kona-ba neʼe, no Jeová dehan: “Neʼe sei la akontese.”
4 Jeová, Naʼi Ukun-Naʼin Boot Liu, hatudu buat tuirmai neʼe ba haʼu: Haree bá! Jeová, Naʼi Ukun-Naʼin Boot Liu, haruka ahi hodi fó kastigu. Ahi neʼe han bee kleʼan sira, no han mós rai balu. 5 Tuirmai haʼu dehan: “Oh Jeová, Naʼi Ukun-Naʼin Boot Liu, favór ida, keta halo nuneʼe. Oinsá mak Jacob bele tahan susar neʼe? Tanba nia mak fraku!”
6 Entaun Jeová hanoin fali kona-ba neʼe, no Jeová, Naʼi Ukun-Naʼin Boot Liu, dehan: “Neʼe mós sei la akontese.”
7 Nia hatudu buat tuirmai neʼe ba haʼu: Haree bá! Jeová hamriik iha moru leten neʼebé sukat ho tali-prumu, no nia kaer tali-prumu iha ninia liman. 8 Tuirmai Jeová husu haʼu: “Amos, ó haree saida?” Haʼu hatán: “Tali-prumu.” Jeová hatete: “Haʼu sei tau tali-prumu iha haʼu-nia povu Izraél nia leet. Haʼu sei la fó perdua tan ba sira. 9 Isaac nia fatin aas sira sei rahun, no Izraél nia fatin santu sira sei estraga tiha, no haʼu sei bá kontra Jeroboam nia umakain ho surik.”
10 Amlulik Amazias husi Betel, haruka lia-menon tuirmai neʼe ba Liurai Jeroboam husi Izraél, hodi dehan: “Amos halo planu aat ba Ita-Boot iha umakain Izraél nia leet. Ema iha rai neʼe labele tahan ona ho buat hotu neʼebé nia koʼalia. 11 Tanba Amos hatete nuneʼe: ‘Jeroboam sei mate ho surik, no ema Izraél sei sai dadur duni iha rai seluk.’”
12 Tuirmai Amazias dehan ba Amos: “Ó neʼebé fó sai vizaun, sai husi neʼe, halai ba rai-Judá, no buka moris iha neʼebá. Iha fatin neʼebá mak ó bele fó sai Maromak nia liafuan. 13 Maibé ó labele fó sai tan Maromak nia liafuan iha Betel, tanba fatin neʼe mak liurai nia fatin santu no templu ba ninia ukun.”
14 Tuirmai Amos hatán ba Amazias, hodi dehan: “Uluk haʼu laʼós profeta ida no haʼu mós laʼós profeta nia oan, uluk haʼu bibi-atan ida, no haʼu serbisu atu tau matan ba ai-figeira sira. 15 Maibé Jeová hasai haʼu husi haʼu-nia serbisu nuʼudar bibi-atan no Jeová hatete ba haʼu: ‘Bá, fó sai haʼu-nia liafuan ba haʼu-nia povu Izraél.’ 16 Tan neʼe, rona ba Jeová nia liafuan: ‘Ó dehan: “Keta fó sai Maromak nia liafuan kontra Izraél, no keta fó sai liafuan kontra Isaac nia umakain.” 17 Tan neʼe, Jeová dehan nuneʼe: “Ó-nia feen sei sai feto-aat iha sidade laran; ó-nia oan-mane no oan-feto sira sei mate ho surik. Ema sei sukat ó-nia rai ho tali sukat nian no fahe rai neʼe ba malu, no kona-ba ó, ó sei mate iha rai seluk, no ema Izraél sei sai dadur duni iha rai seluk.”’”
8 Jeová, Naʼi Ukun-Naʼin Boot Liu, hatudu buat tuirmai neʼe ba haʼu: Haree bá! Iha raga neʼebé nakonu ho ai-fuan tempu bailoro nian. 2 Tuirmai nia husu: “Amos, ó haree saida?” Haʼu hatán: “Iha raga neʼebé nakonu ho ai-fuan tempu bailoro nian.” Entaun Jeová hatete ba haʼu: “Haʼu-nia povu Izraél nia tempu toʼo ona rohan. Haʼu sei la fó tan perdua ba sira. 3 ‘Knananuk sira iha templu sei sai fali halerik, no mate-isin barak sei lekar iha fatin hotu. Nonook deʼit!’ Jeová, Naʼi Ukun-Naʼin Boot Liu, hatete nuneʼe.
4 Rona bá, imi neʼebé hanehan ema kiak
No imi neʼebé halakon ema laran-maus husi rai neʼe,
5 Imi neʼebé dehan: ‘Bainhira mak festa fulan-foun nian sei remata, hodi ita bele faʼan ita-nia ai-han?
No mós bainhira mak loron Sábadu sei remata, hodi ita bele faʼan ita-nia ai-han?
Atu nuneʼe ita bele halo fatin sukat efa nian sai kiʼik liu
No halo dasin-fuan sai todan liu,
Hodi halo dasin neʼebé la loos;
6 Atu nuneʼe ita bele faʼan ai-han neʼebé aat ona
No sosa ema kiak ho osan-mutin,
No sosa ema kiʼik sira ho sandálias nia folin.’
7 Jeová jura hodi Jacob nia glória:
‘Haʼu sei nunka haluha sira-nia hahalok hotu.
8 Nuneʼe, rai neʼe sei nakdoko,
No ema hotu iha rai neʼe sei lelir.
Rai tomak sei sai hanesan bee neʼebé nakonu toʼo resin iha Mota Nilo,
No sira hotu sei sai hanesan bee neʼebé la hakmatek iha Mota Nilo iha rai-Ejitu durante tempu udan.’
9 Jeová, Naʼi Ukun-Naʼin Boot Liu, hatete nuneʼe: ‘Iha loron neʼebá,
Haʼu sei halo loro-matan tun maski meiudia hela,
No haʼu sei halo rai sai nakukun maski loro-matan fó naroman hela.
10 Haʼu sei halo imi-nia festa sira sai fali tempu triste nian
No imi-nia knananuk hotu sai fali knananuk triste nian.
Haʼu sei tau hena karón haleʼu ema hotu nia knotak no halo ema hotu sai ulun-molik,
Haʼu sei halo loron neʼe sai tempu triste hanesan tempu neʼebé ema tanis bainhira oan-mane mesak ida mate,
No loron neʼe nia rohan sei sai moruk tebes.’
11 Jeová, Naʼi Ukun-Naʼin Boot Liu, hatete nuneʼe: ‘Haree bá! Loron sira sei toʼo mai,
Bainhira haʼu halo hamlaha boot mosu iha rai neʼe,
Neʼe laʼós hamlaha ba paun ka hamrook ba bee,
Maibé hamlaha atu rona ba Jeová nia liafuan.
12 Sira sei laʼo ho nakdedar husi tasi ida ba tasi seluk
No husi parte norte ba parte leste.
Sira sei laʼo-lemo hodi buka Jeová nia liafuan, maibé sira sei la hetan.
13 Iha loron neʼebá, feto virjen sira neʼebé bonita sei dezmaia,
Nuneʼe mós ho mane joven sira, tanba sira hamrook.
14 Sira neʼebé jura hodi Samaria nia sala, no dehan:
“Oh Dan, haʼu jura hodi ó-nia maromak neʼebé moris!”
No, “Haʼu jura hodi dalan Beer-Seba nian!”
Sira sei monu, no sira sei la hamriik fali.’”
9 Haʼu haree Jeová hamriik iha altár leten, no nia dehan: “Baku uma riin sira-nia tutun, no sira-nia hun sei nakdoko. Tesi tiha uma riin sira-nia tutun, no haʼu sei halakon ema restu ho surik. La iha ema ida mak bele halai sees ka salva nia moris.
2 Se sira keʼe rai kleʼan hodi subar iha rate,
Haʼu-nia liman sei hasai sira husi neʼebá.
No se sira saʼe ba lalehan,
Haʼu sei lori tun sira husi neʼebá.
3 Se sira subar an iha Foho Karmel nia tutun,
Haʼu sei buka sira no lori tun sira husi neʼebá.
Se sira subar an husi haʼu iha tasi okos,
Haʼu sei haruka samea atu tata sira iha neʼebá.
4 Se sira-nia inimigu lori sira bá nuʼudar dadur,
Haʼu sei haruka surik atu oho sira iha neʼebá,
Haʼu sei hateke ba sira atu lori susar ba sira, laʼós halo buat neʼebé diʼak.
5 Jeová, Naʼi Ukun-Naʼin Boot Liu, Maromak neʼebé ukun tropa lalehan nian, mak kona rai neʼe,
No halo rai sai nabeen, no ema hotu neʼebé hela iha rai neʼe sei halerik.
Rai tomak sei sai hanesan bee neʼebé nakonu toʼo resin iha Mota Nilo,
No hanesan bee neʼebé la hakmatek iha Mota Nilo iha rai-Ejitu durante tempu udan.
6 Maromak neʼebé halo ninia eskada iha lalehan
No harii lalehan hanesan uma-kakuluk ba rai.
Maromak neʼebé bolu bee iha tasi,
Atu bele fakar fali bee neʼe ba rai;
Ninia naran mak Jeová.
7 Jeová hatete: ‘Oh povu Izraél, ba haʼu, imi hanesan deʼit ho ema Kus nia oan sira.
Haʼu mak lori sai ema Izraél husi rai-Ejitu, loos ka lae?
Haʼu mak lori sai ema Filístia husi Kreta no ema Síria husi Kir, loos ka lae?’
8 ‘Haree bá! Jeová, Naʼi Ukun-Naʼin Boot Liu, hateke ba nasaun neʼebé halo sala,
No haʼu sei halakon nasaun neʼe husi rai nia leten.
Maibé haʼu sei la halakon Jacob nia umakain toʼo hotu’, Jeová hatete nuneʼe.
9 ‘Tanba haʼu sei fó sai ona mandamentu,
Katak haʼu sei doko umakain Izraél iha nasaun hotu nia leet,
Hanesan ema peneira trigu,
Atu nuneʼe la iha fatuk musan ida mak monu ba rai.
10 Sala-naʼin hotu husi haʼu-nia povu nia leet sei mate ho surik,
Sira neʼebé dehan: “Susar neʼe sei la besik ita ka kona ita.”’
11 ‘Iha loron neʼebá haʼu sei harii fali David nia tenda neʼebé monu ona,
Haʼu sei hadiʼa moru nia kuak sira,
No haʼu sei harii fali buat neʼebé rahun ona.
Haʼu sei harii fali neʼe hanesan tempu uluk,
12 Atu nuneʼe sira bele foti buat restu husi Edom,
No husi nasaun sira hotu neʼebé lori haʼu-nia naran’, Jeová neʼebé halo buat sira-neʼe mak hatete nuneʼe.
13 Jeová hatutan tan: ‘Haree bá! Loron sira sei toʼo mai,
Bainhira ema neʼebé fila rai sei toman ema neʼebé koʼa trigu,
No ema neʼebé sama uvas-fuan sei toman ema neʼebé kari fini.
No tua-uvas midar sei suli iha foho sira,
No mós tua-uvas midar sei suli iha foho-oan hotu.
14 Haʼu sei halibur fali haʼu-nia povu Izraél husi dadur,
No sira sei harii fali sidade sira neʼebé mamuk no hela iha laran.
Sira sei kuda uvas iha toʼos no hemu tua-uvas,
No halo toʼos sira no han ai-fuan sira.’
15 ‘Haʼu sei kuda fali sira iha sira-nia rai,
No ema sei nunka fokit sai fali sira
Husi sira-nia rai neʼebé haʼu fó ona ba sira’, Jeová, ó-nia Maromak, hatete nuneʼe.”
OBADIAS
1 Tuirmai neʼe mak Obadias nia vizaun:
Jeová, Naʼi Ukun-Naʼin Boot Liu, dehan nuneʼe kona-ba Edom:
“Ami rona ona lia-menon husi Jeová,
Nia haruka ona ema ida atu lori lia-menon ba nasaun sira-nia leet, hodi dehan:
‘Hamriik bá, mai ita prepara an atu halo funu hasoru Edom.’”
2 “Haree bá! Haʼu halo ona ó sai kiʼik tebes iha nasaun sira-nia leet;
Sira hakribi tebes ó.
3 Ó-nia laran neʼebé loko an lohi ona ó,
Ó hela iha fatuk boot nia leet,
Ó hela iha fatin aas, no hanoin iha ó-nia laran:
‘Sé mak sei dada haʼu tun ba rai?’
4 Maski ó halo ó-nia hela-fatin aas hanesan manu-makikit nian,
Ka ó tau ó-nia knuuk iha fitun sira-nia leet,
Maibé haʼu sei dada ó tun husi neʼebá”, Jeová dehan.
5 “Se naʼok-teen sira mai iha kalan,
Sira sei naʼok deʼit buat neʼebé sira hakarak, loos ka lae?
Ka se ema sira neʼebé kuʼu uvas-fuan mai iha ó-nia leet,
Sira sei husik uvas-fuan balu ba ema seluk, loos ka lae?
Maibé kona-ba ó, ó-nia inimigu sei halakon ó toʼo mohu!
6 Maibé, oh Esau, ó-nia inimigu duni tuir ona ó!
Inimigu hadau ona ó-nia rikusoin neʼebé ó subar!
7 Sira obriga ó halai ba fronteira.
Sira hotu neʼebé halo aliansa ho ó mak lohi ona ó.
Ema sira neʼebé iha dame ho ó mak manán ona ó.
Sira neʼebé han paun hamutuk ho ó sei tau rede hodi lasu ó,
Maibé ó sei la hatene ida-neʼe.”
8 Jeová dehan: “Iha loron neʼebá,
Haʼu sei halakon matenek-naʼin sira husi Edom
No halakon ema sira neʼebé iha kbiit atu tetu didiʼak husi Esau nia área foho nian.
9 Oh Teman, ó-nia asuwaʼin sira sei sai taʼuk,
Tanba ema ida-idak iha Esau nia área foho nian sei mate.
10 Ó sei moe,
No sei lakon mohu ba nafatin,
Tanba ó halo violénsia ba ó-nia alin Jacob.
11 Iha loron neʼebé ema seluk lori ó-nia alin nia tropa sira nuʼudar dadur,
Loron neʼebé ema estranjeiru tama ninia portaun no dada sorteiu kona-ba Jeruzalein,
Ó hamriik hodi hateke deʼit,
Ó-nia hahalok aat hanesan sira.
12 Ó labele kontente iha loron neʼebé buat aat kona ó-nia alin,
Ó labele haksolok iha loron neʼebé povu Judá mate,
No ó labele koʼalia ho foti an iha loron neʼebé sira hetan susar.
13 Ó labele tama ba haʼu-nia povu nia portaun laran iha loron neʼebé sira hetan susar,
Ó labele gaba an iha loron neʼebé nia hetan susar,
No ó labele tau ó-nia liman ba ninia rikusoin iha loron neʼebé nia hetan susar.
14 Ó labele hamriik iha kruzamentu atu oho ninia ema sira neʼebé halai sai,
No ó labele entrega ninia ema sira neʼebé sei moris hela ba inimigu nia liman iha loron neʼebé sira hetan susar.
15 Tanba Jeová nia loron atu kontra nasaun hotu besik ona mai.
Nia sei halo ba ó tuir buat neʼebé ó halo ona.
Ema sei halo ba ó tuir buat neʼebé ó halo ona ba ema seluk.
16 Hanesan dalan neʼebé ó hemu tua-uvas iha haʼu-nia foho santu,
Nuneʼe mós nasaun sira hotu sei kontinua hemu haʼu-nia hirus hanesan hemu tua-uvas.
Sira sei hemu no tolan haʼu-nia hirus.
No sira sei sai hanesan buat neʼebé nunka iha.
17 Maibé ema neʼebé la mate sei fila fali ba Foho Siaun,
No foho neʼe sei sai santu;
Jacob nia umakain sei foti fali buat neʼebé sira-nian.
18 Jacob nia umakain sei sai hanesan ahi,
José nia umakain sei sai hanesan ahi neʼebé lakan,
No Esau nia umakain sei sai hanesan duʼut-maran;
Sira sei sunu no han mohu Esau nia umakain,
No la iha ema ida iha Esau nia umakain mak sei moris,
Tanba Jeová rasik mak fó sai ona kona-ba neʼe.
19 Sira sei foti área Negeb, foti Esau nia área foho nian,
Foti área Sefela, no mós ema Filístia nia rai nuʼudar sira-nian.
Sira sei foti rai-Efraim no rai-Samaria nuʼudar sira-nian,
No Benjamin sei foti Gilead nuʼudar ninian.
20 Povu Izraél neʼebé sai ona dadur tanba inimigu lori sira husi sidade neʼebé moru haleʼu,
Sira sei foti ema Kanán nia rai toʼo Sarepta nuʼudar sira-nian.
Povu Jeruzalein neʼebé sai ona dadur iha Sefarad, sei foti sidade sira iha área Negeb nuʼudar sira-nian.
21 Salvadór sira sei saʼe ba Foho Siaun
Atu tesi-lia ba Esau nia área foho nian,
No Jeová sei ukun nuʼudar liurai.”
JONAS
1 Jeová fó sai liafuan ba Amitai nia oan-mane Jonas, hodi dehan: 2 “Hamriik, bá sidade boot Nínive, no fó sai haʼu-nia tesi-lia hasoru sidade neʼe tanba haʼu haree ona sira-nia hahalok aat.”
3 Maibé Jonas hamriik no halai husi Jeová hodi bá Tarsis. Nia tun ba Jope no hetan ró neʼebé atu bá Tarsis. Nuneʼe nia selu no saʼe ró neʼe atu ba Tarsis hamutuk ho sira, hodi halai husi Jeová.
4 Tuirmai Jeová halo anin boot mosu iha tasi, no anin sai fuik tebes iha tasi toʼo ró besik atu rahun. 5 Tanba ró-naʼin sira sai taʼuk tebes, sira komesa bolu sira ida-idak nia maromak atu husu ajuda. Sira hahú soe sasán sira iha ró neʼe ba tasi hodi halo ró neʼe sai kmaan. Maibé Jonas tama ona ba ró laran, no iha fatin neʼe nia toba-dukur loos. 6 Tuirmai kapitaun ba ró neʼe hakbesik ba Jonas no hatete: “Tanbasá mak ó toba-dukur nafatin? Hadeer bá, bolu ó-nia maromak. Karik Maromak loos sei hanoin ita no ita sei la mate.”
7 Tuirmai sira hatete ba malu: “Mai ita dada sorteiu hodi hatene sé mak lori susar neʼe ba ita.” Entaun sira dada sorteiu no neʼe monu ba Jonas. 8 Nuneʼe sira dehan ba nia: “Favór ida, fó-hatene mai ami, sé mak lori susar neʼe ba ami? Ó-nia serbisu saida? Ó mai husi neʼebé? Ó husi rai neʼebé? No ó-nia povu mak sé?”
9 Nia hatán: “Haʼu mak ema Ebreu, no haʼu adora Jeová, Maromak lalehan nian, neʼebé halo tasi no rai maran.”
10 Ho ida-neʼe, mane sira-neʼe sai taʼuk liután tanba Jonas fó-hatene sira katak nia halai husi Jeová, no sira husu ba nia: “Tanbasá mak ó halo nuneʼe?” 11 Entaun sira husu ba nia: “Saida mak ami tenke halo ba ó hodi tasi bele sai hakmatek fali?” Tanba tasi kontinua sai boot no siʼak liután. 12 Nia hatán: “Foti haʼu no soe haʼu ba tasi, no tasi sei sai hakmatek fali; haʼu hatene katak anin-fuik neʼe mosu ba imi tanba haʼu.” 13 Maibé mane sira-neʼe hean makaʼas hodi koko lori ró neʼe ba rai maran, maski nuneʼe sira labele, tanba tasi kontinua sai boot no siʼak liután.
14 Tuirmai sira bolu Jeová, hodi dehan: “Oh Jeová, favór ida, keta husik ami mate tanba mane neʼe! Keta fó-sala ba ami tanba ami oho ema laran-moos neʼe, tanba ida-neʼe tuir Ita-nia hakarak, oh Jeová.” 15 Depois neʼe, sira foti Jonas no soe nia ba tasi laran, no tasi sai hakmatek fali. 16 Ho ida-neʼe, mane sira-neʼe sai taʼuk tebes ba Jeová, no sira hasaʼe sakrifísiu ba Jeová no jura atu serbí nia.
17 Jeová haruka ikan boot tolan Jonas, nuneʼe Jonas hela iha ikan neʼe nia kabun laran ba loron tolu no kalan tolu.
2 Tuirmai Jonas halo orasaun ba Jeová, ninia Maromak, iha ikan nia kabun laran, 2 hodi dehan:
“Iha haʼu-nia susar laran haʼu bolu Jeová, no nia hatán haʼu.
Husi rate laran haʼu halerik hodi husu ajuda.
Ita-Boot rona haʼu-nia lian.
3 Bainhira Ita soe haʼu ba tasi kleʼan, ba tasi nia okos,
Tasi nia korrente sira haleʼu haʼu.
Ita-nia laloran boot hotu taka tiha haʼu.
4 No haʼu dehan: ‘Ita duni sai ona haʼu husi Ita-nia oin!
Oinsá mak haʼu bele haree fali Ita-nia templu neʼebé santu?’
5 Bee halo mout haʼu toʼo haʼu besik atu mate,
Bee kleʼan taka tiha haʼu.
Duʼut tasi nian falun haʼu-nia ulun.
6 Haʼu mout toʼo tasi nia okos.
Rate nia portaun sira atu taka ona haʼu ba nafatin.
Maibé Ita foti sai haʼu husi rai-kuak, oh Jeová, haʼu-nia Maromak.
7 Bainhira haʼu-nia iis atu kotu, haʼu hanoin-hetan Jeová.
Tuirmai haʼu-nia orasaun toʼo ba Ita, no tama ba Ita-nia templu neʼebé santu.
8 Sira neʼebé adora estátua folin-laek, sira husik ona Ida neʼebé Hun ba domin neʼebé laran-metin.
9 Maibé kona-ba haʼu, haʼu sei hasaʼe sakrifísiu ho lian agradese nian.
Buat neʼebé haʼu jura, haʼu sei kumpre.
Salvasaun mai husi Jeová.”
10 Ikusmai Jeová haruka ikan neʼe muta sai Jonas ba rai maran.
3 Tuirmai Jeová fó sai liafuan ba Jonas ba dala segundu, hodi dehan: 2 “Hamriik, bá sidade boot Nínive no fó sai ba sidade neʼe liafuan neʼebé haʼu hatoʼo ba ó.”
3 Nuneʼe Jonas hamriik no bá Nínive hodi halo tuir Jeová nia liafuan. Nínive mak sidade neʼebé boot tebes, no atu laʼo haleʼu sidade neʼe presiza loron tolu. 4 Tuirmai Jonas tama ba sidade neʼe no laʼo ba loron ida hodi haklaken dehan: “Hela deʼit loron 40 no Nínive sei naksobu.”
5 Ho ida-neʼe, ema Nínive tau fiar ba Maromak; sira fó avizu ba ema hotu atu halo jejún no hatais hena karón, husi povu kiʼik toʼo ema-boot. 6 Bainhira liurai Nínive rona liafuan neʼe, nia hamriik husi ninia kadunan no hasai ninia roupa liurai nian, depois neʼe nia hatais fali hena karón no tuur iha ahi-kadesan. 7 Liután neʼe, liurai fó sai avizu iha sidade Nínive:
“Neʼe mak ukun-fuan husi liurai no ninia ema-boot sira: Ema no animál, karau no bibi, sira hotu labele han buat ida. Sira labele han ai-han no labele hemu bee. 8 Sira tenke hatais hena karón, ema no mós sira-nia animál. Sira tenke harohan ba Maromak ho laran no husik tiha sira-nia hahalok aat no violénsia neʼebé sira halo. 9 Sé mak hatene, karik Maromak neʼebé loos sei troka ninia hanoin kona-ba buat neʼebé nia atu halo no sei hatún ninia hirus makaʼas hasoru ita, nuneʼe ita sei la mate.”
10 Bainhira Maromak loos haree buat neʼebé sira halo, katak sira husik ona sira-nia hahalok aat, nia troka ninia hanoin kona-ba sira-nia kastigu neʼebé nia fó sai ona, no nia la halo ida-neʼe.
4 Maibé Jonas la kontente tebes kona-ba neʼe no sai hirus makaʼas. 2 Entaun nia halo orasaun ba Jeová, hodi dehan: “Aii Jeová, uluk bainhira haʼu sei iha haʼu-nia rai, haʼu hatene ona ida-neʼe sei akontese. Tan neʼe mak haʼu koko halai ba Tarsis, tanba haʼu hatene ona katak Ita mak Maromak neʼebé laran-diʼak no laran-sadiʼa, la hirus lalais, nakonu ho domin neʼebé laran-metin, no lakohi fó susar. 3 Agora oh Jeová, favór ida, hasai tiha haʼu-nia moris, tanba diʼak liu haʼu mate deʼit duké moris.”
4 Jeová husu: “Ó iha direitu atu sai hirus makaʼas ka?”
5 Tuirmai Jonas sai ba sidade nia liʼur no tuur iha parte leste husi sidade neʼe. Nia halo barraka ida ba nia an no tuur iha ninia mahon atu bele haree saida mak sei akontese ba sidade neʼe. 6 Maromak Jeová halo lakeru-hun ida buras, hodi fó mahon ba Jonas no halo nia sente kmaan. No Jonas kontente tebes ho lakeru-hun neʼe.
7 Maibé iha loron tuirmai bainhira rai-naroman, Maromak loos haruka ular, no ular neʼe estraga lakeru-hun neʼe toʼo sai namlaek. 8 Bainhira loro-matan saʼe ona hodi fó naroman, Maromak mós haruka anin manas husi parte leste, no loro-matan kona makaʼas Jonas nia ulun, toʼo nia besik atu dezmaia. Entaun nia kontinua husu atu mate deʼit, no nia dehan beibeik: “Diʼak liu haʼu mate duké moris.”
9 Maromak husu ba Jonas: “Ó iha direitu atu sai hirus makaʼas kona-ba lakeru-hun neʼe ka?” Ho ida-neʼe, Jonas hatán: “Sin, haʼu iha direitu duni atu sai hirus, haʼu hirus toʼo hakarak atu mate deʼit.” 10 Maibé Jeová dehan: “Ó sente hanoin ba lakeru-hun neʼe, maski laʼós ó mak kuda ka halo moris; lakeru-hun neʼe moris iha kalan ida deʼit no mate iha kalan ida deʼit. 11 Sá tan sidade boot Nínive neʼebé iha ema naʼin–120.000 neʼebé la hatene saida mak loos no saida mak sala, hamutuk ho sira-nia animál neʼebé barak. Haʼu labele hanoin sira ka?”
MIQUEIAS
1 Jeová fó sai liafuan ba Mikeas husi Moreset, iha tempu neʼebé Liurai Jotam, Akaz no Ezekias mak ukun rai-Judá. Mikeas simu liafuan tuirmai neʼe kona-ba Samaria no Jeruzalein liuhusi vizaun ida:
2 “Oh imi povu hotu, rona bá!
Oh rai no buat hotu neʼebé iha laran, see tilun didiʼak bá,
Jeová iha ninia templu santu.
Jeová, Naʼi Ukun-Naʼin Boot Liu, mak sei sai sasin neʼebé kontra imi.
3 Tanba haree bá! Jeová sai husi ninia fatin;
Nia sei tun mai no sama fatin aas sira iha rai.
4 Foho sira sei nabeen iha ninia ain okos,
No foho-leet sira sei nakfera
Hanesan lilin neʼebé tau besik ahi,
Hanesan bee neʼebé fakar tun ba rai-lolon neʼebé kleʼan.
5 Buat hotu neʼe akontese tanba Jacob nia hahalok kontra,
Tanba umakain Izraél nia sala sira.
Sé mak simu sala kona-ba Jacob nia hahalok kontra?
Neʼe mak ema Samaria, loos ka lae?
No sé mak simu sala kona-ba fatin aas sira iha Judá?
Neʼe mak ema Jeruzalein, loos ka lae?
6 Haʼu sei halo sidade Samaria sai fatin neʼebé rahun,
No sai fatin atu halo toʼos-uvas;
Haʼu sei soe tiha ninia fatuk sira ba foho-leet,
No haʼu sei harahun tiha sidade neʼe toʼo ninia hun.
7 Ninia estátua hotu sei harahun tiha,
No prezente hotu neʼebé nia simu tanba nia halo relasaun seksuál ho ema seluk, sei sunu tiha iha ahi.
Haʼu sei estraga ninia estátua hotu.
Ema sei lori prezente hotu neʼebé Samaria simu hodi hatudu hahalok feto-aat nian,
Atu selu feto-aat iha fatin seluk.”
8 Tan neʼe mak haʼu sei tanis no halerik;
Haʼu sei laʼo ho ain-tanan no isin-tanan.
Haʼu sei tanis hanesan asu-fuik,
No haʼu sei hasai lian triste hanesan manu-avestrús.
9 Tanba Samaria nia kanek labele kura;
No kanek neʼe toʼo ona iha Judá.
Moras neʼe habelar toʼo haʼu-nia povu nia portaun, toʼo Jeruzalein.
10 “Imi keta fó sai kona-ba neʼe iha Gat;
Imi labele tanis.
Imi duir an bá iha rai-rahun laran iha Bet-Afra.
11 Oh imi neʼebé hela iha Safir, sai husi imi-nia rai ho isin-tanan no moe.
Ema neʼebé hela iha Zaanan seidauk sai mai.
Ema sei halerik iha Bet-Ezel, no sidade neʼe sei la apoia tan imi.
12 Tanba ema neʼebé hela iha Marot hein ba buat diʼak,
Maibé buat neʼebé aat mak tun husi Jeová ba Jeruzalein nia portaun.
13 Oh imi neʼebé hela iha Lakis, kesi metin kuda-karreta ba kuda sira.
Siaun nia oan-feto nia sala mai husi imi;
Haʼu haree ona povu Izraél nia hahalok kontra iha Siaun.
14 Tan neʼe, Siaun nia oan-feto, ó sei fó prezente hodi fó adeus ba Moreset-Gat.
Akzib nia uma sira mak sai hanesan buat neʼebé lohi ona liurai sira husi Izraél.
15 Oh imi neʼebé hela iha Maresa, haʼu sei lori ema ida ba imi no nia sei manán imi.
Izraél nia glória sei toʼo iha Adulam.
16 Tesi no koir tiha imi-nia fuuk tanba imi-nia oan sira neʼebé imi hadomi.
Halo imi-nia ulun-molik hanesan manu-makikit,
Tanba ema lori ona imi-nia oan sira-neʼe nuʼudar dadur.”
2 “Susar ba ema sira neʼebé halo planu aat,
Sira neʼebé halo planu iha sira-nia kama leten atu halo hahalok aat!
Bainhira naroman ona iha dadeer, sira kumpre sira-nia planu,
Tanba sira iha kbiit atu halo ida-neʼe.
2 Sira kaan ema nia toʼos no hadau toʼos sira-neʼe;
Sira mós kaan ema nia uma no hadau uma sira-neʼe;
Sira bosok atu hadau ema nia uma,
Hodi hadau ema nia liman-rohan.
3 Tan neʼe, Jeová dehan nuneʼe:
‘Haʼu halo daudaun planu ida hodi lori susar ba família neʼe, no imi sei labele halai sees husi ida-neʼe.
Imi sei la laʼo tan ho foti an, tanba neʼe mak tempu susar nian.
4 Iha tempu neʼebá, ema sei temi lia-dadolin kona-ba imi,
No sira sei tanis halerik tanba imi.
Sira sei dehan: “Ami lakon mohu ona!
Nia entrega ona haʼu-nia povu nia rai ba ema seluk, sin, ami-nia liman-rohan lakon mohu ona!
Nia entrega ona ami-nia rai ba nasaun neʼebé la hatudu laran-metin.”
5 Tan neʼe, la iha ema ida husi Jeová nia kongregasaun neʼebé sei uza tali sukat nian
Atu sukat rai neʼebé fahe ona ba sira.
6 Sira fó sai, hodi dehan: “Para haklaken!
Sira labele haklaken kona-ba buat sira-neʼe;
Moe sei la kaer-toman ita!”
7 Oh umakain Jacob, imi rona ema dehan:
“Jeová nia espíritu la iha ona pasiénsia ka?
Neʼe mak ninia hahalok sira ka?”
Haʼu-nia liafuan lori diʼak ba ema sira neʼebé laʼo ho laran-loos.
8 Maibé foin lalais neʼe, haʼu-nia povu hamriik nuʼudar inimigu ida.
Imi hadau buat murak sira hamutuk ho unuk iha ema nia oin,
Imi hadau neʼe husi ema sira neʼebé laʼo liu ho fiar an hanesan sira neʼebé fila daudaun husi funu.
9 Imi duni sai feto sira husi sira-nia uma neʼebé furak, feto sira-neʼe mak husi haʼu-nia povu nia leet;
Imi foti tiha haʼu-nia bensaun kmanek husi sira-nia oan ba nafatin.
10 Hamriik no laʼo bá, tanba neʼe laʼós fatin atu deskansa.
Ema harahun rai neʼe tanba rai neʼe la moos.
11 Se ema ida laʼo tuir anin no lia-bosok, no fó sai lia-bosok tuirmai neʼe:
“Haʼu sei haklaken ba ó kona-ba tua-uvas no tua sira seluk”,
Nuneʼe nia sei sai haklaken-naʼin neʼebé halo kontente povu neʼe!
12 Oh Jacob, haʼu sei halibur duni imi hotu;
Haʼu sei halibur duni Izraél nia ema restu sira.
Haʼu sei tau sira hamutuk ho unidade, hanesan bibi-malae iha luhan laran,
Hanesan bibi-lubun iha rai-luan;
Rai neʼe sei barullu ho ema barak.’
13 Ida neʼebé sobu portaun sei laʼo iha sira-nia oin;
Sira sei sai no laʼo liuhusi portaun neʼe.
Sira-nia liurai sei laʼo liu portaun neʼe iha sira-nia oin,
Hamutuk ho Jeová iha sira-nia oin.”
3 Haʼu hatete: “Oh ulun-naʼin sira husi umakain Jacob
No ukun-naʼin sira husi umakain Izraél, favór ida, rona lai.
Imi tenke hatene oinsá atu halo buat neʼebé tuir justisa, loos ka lae?
2 Maibé imi odi buat neʼebé loos no hadomi buat neʼebé aat;
Imi hasai tiha haʼu-nia povu nia kulit no hasai tiha isin husi sira-nia ruin.
3 Imi mós han haʼu-nia povu nia isin
No hasai tiha sira-nia kulit,
Imi harahun sira-nia ruin, harahun sira ba pedasuk,
Hanesan naʼan isin no naʼan ruin neʼebé iha sanan ida nia laran.
4 Iha tempu neʼebá, sira sei bolu Jeová atu husu ajuda,
Maibé nia sei la hatán ba sira.
Iha tempu neʼebá, nia sei subar ninia oin husi sira,
Tanba sira-nia hahalok neʼebé aat.
5 Profeta sira lori haʼu-nia povu laʼo sala dalan,
Sira dehan: ‘Dame!’ bainhira sira tata hela buat ruma ho sira-nia nehan,
Maibé sira prepara an atu bá funu hasoru ema neʼebé la tau buat ida iha sira-nia ibun.
Tan neʼe, Jeová dehan nuneʼe hasoru profeta sira:
6 ‘Imi sei toba iha kalan; maibé imi la haree vizaun;
Imi sei haree deʼit nakukun, no la siʼik tan futuru.
Loro-matan sei tun ba profeta sira-neʼe,
No loron sei sai fali nakukun ba sira.
7 Ema neʼebé haree vizaun sei hetan moe,
No ema neʼebé siʼik futuru sei sai laran-triste.
Sira hotu sei taka sira-nia ibun,
Tanba Maromak la hatán ba sira.’”
8 Kona-ba haʼu, haʼu nakonu ho kbiit tanba Jeová nia espíritu,
No nakonu ho justisa no forsa,
Atu fó sai ba Jacob kona-ba ninia hahalok kontra no ba Izraél kona-ba ninia sala.
9 Favór ida, rona lai, oh ulun-naʼin sira husi umakain Jacob
No ukun-naʼin sira husi umakain Izraél,
Imi hakribi justisa no halo kleʼuk buat hotu neʼebé loos,
10 Imi harii Siaun iha raan nia leten no harii Jeruzalein ho hahalok aat.
11 Sidade neʼe nia ulun-naʼin sira tesi-lia tanba simu osan,
Ninia amlulik sira hanorin tanba simu kolen,
No ninia profeta sira siʼik futuru tanba osan.
Maski nuneʼe, sira sadere ba Jeová, hodi dehan:
“Jeová hamutuk ho ita, loos ka lae?
La iha susar ida mak sei kona ita.”
12 Tanba imi,
Siaun sei harahun tiha hanesan ema fila rai iha toʼos,
Sidade Jeruzalein sei sai fatin neʼebé rahun,
No foho neʼebé iha Maromak nia templu sei sai hanesan ai-laran iha fatin sira neʼebé aas.
4 Iha loron ikus sira,
Foho neʼebé Jeová nia uma harii bá
Sei sai metin no aas liu foho-tutun sira seluk,
No foho neʼe sei sai aas liu foho-oan sira,
No ema sei laʼo nadodon ba neʼebá.
2 Nasaun barak sei bá no dehan:
“Mai, mai ita saʼe ba Jeová nia foho
No bá Jacob nia Maromak nia uma.
Nia sei hanorin ita kona-ba ninia dalan sira,
No ita sei laʼo iha ninia dalan sira.”
Tanba ukun-fuan fó sai husi Siaun,
No Jeová nia liafuan sei fó sai husi Jeruzalein.
3 Nia sei sai juis iha ema barak nia leet
No nia sei korrije buat hotu kona-ba nasaun sira neʼebé kbiit boot no dook.
Sira sei tuku sira-nia surik hodi sai xarrua
No tuku sira-nia diman sai tudik.
Nasaun sei la foti tan surik hasoru nasaun seluk,
No sira sei la aprende tan funu.
4 Sira ida-idak sei tuur iha sira-nia uvas-hun okos, no iha sira-nia ai-figeira hun okos,
No la iha ema ida neʼebé sei halo sira taʼuk,
Tanba Jeová neʼebé ukun tropa lalehan nian, mak fó sai ona kona-ba neʼe.
5 Tanba ema hotu sei laʼo tuir sira ida-idak nia maromak,
Maibé ita sei laʼo tuir Jeová, ita-nia Maromak, ba nafatin.
6 Jeová dehan: “Iha loron neʼebá,
Haʼu sei halibur ema neʼebé laʼo kudeʼik,
No halibur ema neʼebé namkari,
Hamutuk ho sira neʼebé haʼu hakanek ona.
7 Haʼu sei halibur fali ema restu husi povu neʼebé laʼo kudeʼik,
No halo povu neʼebé sai dadur ona iha fatin dook hodi sai nasaun forte ida;
No Jeová sei ukun nuʼudar liurai ba sira iha Foho Siaun,
Husi agora no ba nafatin.
8 Kona-ba ó, oh uma aas ba bibi-atan sira,
Foho-oan husi Siaun nia oan-feto,
Ukun uluk nian sei fila fali ba ó, sin, fila fali ba ó,
Ukun neʼe mak Jeruzalein nia oan-feto nian.
9 Tanbasá mak agora ó hakilar ho lian makaʼas?
Neʼe tanba ó la iha liurai ida ka?
Ó-nia konsellu-naʼin mate ona ka?
Tanbasá mak ó sente moras hanesan feto neʼebé atu tuur-ahi?
10 Oh Siaun nia oan-feto, ó sei hasoru terus boot
Hanesan feto neʼebé atu tuur-ahi,
Tanba agora ó sei sai husi sidade no hela iha rai-luan.
Ó sei laʼo dook toʼo rai-Babilónia,
No iha neʼebá mak ó sei hetan salvasaun;
Iha neʼebá mak Jeová sei sosa fali ó husi inimigu nia liman.
11 Agora nasaun barak sei halibur hamutuk hodi kontra ó;
Sira sei dehan: ‘Husik Siaun hetan moe,
No husik ita-nia matan haree neʼe akontese ba Siaun.’
12 Maibé sira la hatene Jeová nia hanoin,
Sira la komprende ninia hakarak;
Tanba nia sei halibur sira hanesan trigu-futun neʼebé ema foin koʼa no lori ba fatin sama trigu nian.
13 Oh Siaun nia oan-feto, hamriik no sama trigu bá;
Tanba haʼu sei troka ó-nia dikur ho besi,
No haʼu sei troka ó-nia ain-kukun ho riti,
No ó sei harahun ema barak.
Ó sei entrega ba Jeová buat neʼebé sira hetan ho laran-makerek,
No entrega sira-nia rikusoin ba Maromak loos, Naʼi ba mundu tomak.”
5 “Oh sidade neʼebé ema ataka daudaun,
Agora imi hakanek imi-nia an;
Inimigu haleʼu ona ita atu ataka.
Sira uza ai-tonka hodi baku Izraél nia juis nia hasan.
2 Kona-ba ó, oh Belein Efrata,
Ó mak sidade neʼebé kiʼik liu entre Judá nia sidade rihun ba rihun,
Maibé husi ó mak sei mosu ba haʼu ida neʼebé sei ukun Izraél,
Ninia hun mak husi tempu antigu, husi tempu uluk kedas.
3 Nuneʼe, Maromak sei husik hela sira
Toʼo tempu feto neʼebé atu tuur-ahi fó moris ona ba ninia oan.
No ukun-naʼin neʼe nia maun-alin sira seluk sei fila fali ba povu Izraél.
4 Nia sei hamriik no tau matan ba bibi sira hodi Jeová nia kbiit,
Hodi ninia Maromak Jeová nia naran neʼebé aas liu.
No sira sei moris ho hakmatek,
Tanba agora ninia naran-boot sei toʼo mundu nia rohan.
5 No nia sei lori dame.
Se ema Asíria ataka ita-nia rai no harahun ita-nia uma aas sira neʼebé seguru,
Ita sei foti bibi-atan naʼin-hitu, sin, ema naʼin-ualu neʼebé sei sai ulun-naʼin, hodi kontra sira.
6 Sira sei kastigu rai-Asíria ho surik,
No kastigu Nimrod nia rai iha ninia fronteira sira.
Ukun-naʼin neʼe sei salva ita husi ema Asíria,
Bainhira sira mai ataka ita-nia rai no harahun ita-nia rai.
7 Ema restu husi Jacob nia umakain sei hela iha povu barak nia leet
Hanesan mahobeen husi Jeová,
Hanesan udan neʼebé tun ba ai-horis sira
Neʼebé la tau esperansa ba ema
Ka la hein ba ema nia oan-mane sira.
8 Ema restu husi Jacob nia umakain sei hela iha nasaun sira-nia leet,
Iha povu barak nia leet,
Hanesan leaun ida entre animál fuik sira iha ai-laran,
Hanesan leaun iha bibi-malae lubun nia leet,
Neʼebé laʼo liu hodi ataka no lees tiha animál pedasuk ba pedasuk;
No la iha ema ida atu salva sira.
9 Imi sei hiʼit imi-nia liman tanba manán imi-nia inimigu sira,
No imi-nia inimigu sira hotu sei lakon mohu.”
10 Jeová dehan: “Iha loron neʼebá,
Haʼu sei halakon imi-nia kuda sira husi imi-nia leet no harahun imi-nia kuda-karreta sira.
11 Haʼu sei halakon sidade sira iha imi-nia rai
No harahun imi-nia fatin hotu neʼebé seguru.
12 Haʼu sei hapara imi-nia hahalok matan-dook,
No sei la iha tan ema matan-dook ida iha imi-nia leet.
13 Haʼu sei harahun imi-nia estátua neʼebé bahat ona no imi-nia fatuk lulik sira husi imi-nia leet,
No imi sei la hakruʼuk tan ba buat neʼebé imi halo ho imi-nia liman.
14 Haʼu sei fokit sai imi-nia ai-riin lulik sira husi imi-nia leet
No halakon imi-nia sidade sira.
15 Ho hirus no laran-nakali mak haʼu sei fó kastigu
Ba nasaun sira neʼebé la halo tuir haʼu.”
6 Oh imi povu sira, favór ida, rona ba buat neʼebé Jeová hatete.
Hamriik bá, fó sai imi-nia kazu iha foho sira-nia oin,
No husik foho-oan sira rona imi-nia lian.
2 Oh imi foho sira,
Oh imi rai nia hun sira neʼebé metin, rona ba Jeová nia kazu,
Tanba Jeová iha kazu ida ho ninia povu;
Nia sei foti kazu kontra Izraél, hodi dehan:
3 “Haʼu-nia povu, haʼu halo sala saida ba imi?
Iha dalan saida mak haʼu halo imi sai kole?
Fó sasin hasoru haʼu.
4 Tanba uluk haʼu lori imi sai husi rai-Ejitu,
Haʼu sosa fali imi husi uma atan nian;
Haʼu haruka Moisés, Arão no Miriam ba imi.
5 Haʼu-nia povu, favór ida, hanoin-hetan Liurai Balak husi Moab nia planu,
No buat neʼebé Beor nia oan-mane Balám hatán ba nia,
Hanoin-hetan buat neʼebé akontese husi Sitim toʼo Gilgal,
Atu nuneʼe imi bele hatene Jeová nia hahalok loos sira.”
6 Haʼu sei lori saida mai iha Jeová nia oin?
Haʼu sei lori saida hodi hakruʼuk an ba Maromak neʼebé hela iha fatin aas?
Haʼu sei mai iha ninia oin hodi lori sakrifísiu sunu nian neʼebé hasaʼe tomak ka?
Haʼu sei lori karau-oan sira neʼebé tinan ida ka?
7 Jeová sei kontente ho bibi-malae aman rihun ba rihun ka lae?
Nia sei kontente ho mina barak hanesan mota ka lae?
Haʼu sei entrega haʼu-nia oan-mane primeiru atu taka haʼu-nia hahalok kontra ka?
Haʼu sei hasaʼe haʼu-nia oan rasik nuʼudar sakrifísiu atu taka haʼu-nia sala ka?
8 Oh ema sira, nia fó-hatene ona ba imi buat neʼebé diʼak.
Saida mak Jeová husu ba imi atu halo?
Neʼe mak atu imi hatudu hahalok justisa, hafolin hahalok laran-metin,
No atu laʼo hamutuk ho imi-nia Maromak ho haraik-an!
9 Jeová koʼalia ba sidade neʼe;
Sira neʼebé matenek sei hamtaʼuk Ita-nia naran.
See tilun didiʼak ba naʼi neʼebé kaer rota kastigu iha ninia liman.
10 Ema aat nia uma sei iha rikusoin neʼebé nia hetan husi hahalok aat ka lae?
No sei iha fatin sukat nian neʼebé la loos, neʼebé ema hakribi ka lae?
11 Se haʼu uza dasin neʼebé la loos, haʼu bele moos nafatin ka lae?
Se haʼu-nia pasta iha dasin-fuan neʼebé la loos, haʼu bele moos nafatin ka lae?
12 Tanba ema riku iha sidade neʼe sempre halo violénsia,
No ninia povu koʼalia lia-bosok;
Sira-nia nanál mak nakonu ho lohi.
13 “Tan neʼe, haʼu sei baku ó hodi hakanek ó,
No halo ó sai mamuk tanba ó-nia sala sira.
14 Ó sei han maibé la sai bosu;
Ó-nia kabun sei mamuk.
Ó sei foti sasán sira atu rai didiʼak, maibé ó labele rai hela ida-neʼe,
No buat neʼebé ó lori, haʼu sei entrega ba surik.
15 Ó sei kuda fini, maibé ó sei la koʼa.
Ó sei sama oliveira-fuan, maibé ó sei la uza ninia mina;
No ó sei halo tua-uvas foun, maibé ó sei la hemu tua-uvas.
16 Ó halo tuir Onri nia ukun-fuan sira no halo tuir umakain Acab nia hahalok sira,
No ó laʼo tuir sira-nia konsellu.
Tan neʼe mak haʼu sei halo ó sai buat neʼebé halo ema taʼuk
No ó-nia ema sira sei sai buat neʼebé ema goza;
No ema sei kontinua hatún ó.”
7 Susar ba haʼu! Haʼu sai hanesan ema
Neʼebé la hetan uvas-fuan atu han
No la hetan ai-figeira fuan gostu neʼebé haʼu hakarak,
Bainhira tempu koʼa uvas-fuan nian liutiha ona
No ema halibur ona ai-fuan tempu bailoro nian.
2 Ema laran-metin sira lakon ona husi rai;
Iha ema nia leet la iha ema ida mak laran-loos.
Sira hotu hein subasubar atu ataka hodi fakar ema nia raan.
Sira ida-idak lasu sira-nia maun-alin rasik ho rede.
3 Sira-nia liman prontu atu halo buat neʼebé aat;
Ulun-naʼin sira obriga ema,
Juis sira husu kolen,
Ema naran-boot sira fó sai sira-nia hakarak,
No sira serbisu hamutuk hodi kumpre sira-nia planu.
4 Ema neʼebé diʼak liu iha sira-nia leet mós hanesan ai-tarak,
Ema neʼebé laran-loos liu iha sira-nia leet mós aat liu fali lutu husi ai-tarak.
Loron neʼebé imi-nia guarda sira fó sai ona no loron tesi-lia nian ba imi sei toʼo mai.
Agora imi sei taʼuk tebes.
5 Keta tau fiar ba ó-nia maluk
Ka tau fiar ba ó-nia belun diʼak.
Kuidadu kona-ba liafuan neʼebé ó koʼalia ba ida neʼebé sadere ba ó-nia hirus-matan.
6 Tanba oan-mane hakribi ninia aman,
Oan-feto hamriik hodi kontra ninia inan,
No feto-foun kontra ninia banin-feto;
Ema nia inimigu mak husi ninia umakain rasik.
7 Maibé kona-ba haʼu, haʼu sei kontinua hein ba Jeová.
Haʼu sei hein ho pasiénsia ba Maromak neʼebé salva haʼu.
Haʼu-nia Maromak sei rona haʼu.
8 Oh haʼu-nia inimigu, keta haksolok kona-ba haʼu.
Maski haʼu monu ona, haʼu sei hamriik fali;
Maski haʼu hela iha nakukun laran, Jeová sei sai haʼu-nia naroman.
9 Haʼu tenke tahan Jeová nia hirus,
Tanba haʼu halo ona sala hasoru nia,
Toʼo nia defende haʼu-nia kazu no lori justisa ba haʼu.
Nia sei lori haʼu ba naroman;
Haʼu sei haree ninia hahalok loos.
10 Haʼu-nia inimigu mós sei haree,
No moe mak sei taka ema neʼebé dehan ba haʼu:
“Jeová, ó-nia Maromak, iha neʼebé?”
Haʼu-nia matan sei hateke ba inimigu neʼe.
Agora ema sei sama nia hanesan tahu iha dalan.
11 Iha loron neʼe, ó sei harii ó-nia moru fatuk;
Iha loron neʼe, ó-nia fronteira sei aumenta.
12 Iha loron neʼe, sira sei mai toʼo ba ó,
Sira sei mai husi rai-Asíria no husi rai-Ejitu nia sidade sira,
Sira neʼebé mai mak husi rai-Ejitu toʼo Mota Eufrates;
Husi tasi toʼo tasi no husi foho toʼo foho.
13 No rai sei sai mamuk tanba ema sira neʼebé hela iha laran,
Tanba buat neʼebé sira halo ona.
14 Favór ida, dirije Ita-nia povu ho Ita-nia ai-tonka, sira mak bibi-lubun neʼebé nuʼudar Ita-nia liman-rohan,
Sira hela mesak deʼit iha ai-laran, hela iha toʼos ai-fuan nia klaran.
Husik sira han iha Basan no Gilead hanesan tempu uluk.
15 “Haʼu sei hatudu buat kmanek ba sira,
Hanesan tempu neʼebé sira sai husi rai-Ejitu.
16 Nasaun sira sei haree no sai moe maski sira iha kbiit boot.
Sira sei taka sira-nia ibun ho sira-nia liman;
Sira-nia tilun sei diuk.
17 Sira sei lambe rai-rahun hanesan samea;
Hanesan animál neʼebé dolar iha rai, sira sei sai mai ho nakdedar husi sira-nia fatin seguru.
Sira sei laʼo ba Jeová, ita-nia Maromak, ho nakdedar,
No sira sei sai taʼuk ba Ita.”
18 Maromak ida-neʼebé mak hanesan Ita?
Ita fó perdua ba sala no la hanoin tan hahalok kontra husi ema restu sira husi Ita-nia povu.
Ita sei la kaer metin Ita-nia hirus ba nafatin,
Tanba Ita haksolok ho domin neʼebé laran-metin.
19 Ita sei hatudu fali laran-sadiʼa ba ami; Ita sei sama ami-nia sala sira.
Ita sei soe tiha ami-nia sala hotu ba tasi kleʼan.
20 Ita sei hatudu laran-metin ba Jacob,
No hatudu domin neʼebé laran-metin ba Abraão,
Hanesan Ita jura ona ba ami-nia beiʼala sira iha tempu uluk.
NAUM
1 Tuirmai neʼe mak liafuan kastigu nian hasoru Nínive. Neʼe mak livru neʼebé fó sai kona-ba vizaun husi Naum, ema Elkos:
2 Jeová mak Maromak neʼebé hakarak ema atu adora nia mesak deʼit, Maromak neʼebé selu fali ninia inimigu sira-nia hahalok aat;
Jeová sei selu fali no nia prontu ona atu hatudu sai ninia laran-nakali.
Jeová sei selu fali ba ninia inimigu sira,
No nia rai hirus hasoru ninia inimigu sira.
3 Jeová la hirus lalais no iha kbiit boot,
Maibé Jeová sei la hanetik kastigu ba ema neʼebé merese hetan kastigu.
Bainhira nia laʼo, anin-fuik huu makaʼas,
No kalohan sira mak rai-rahun husi ninia ain.
4 Nia siʼak tasi, no nia hamaran tasi;
Nia halo mota sira hotu sai maran.
Basan no Karmel sai namlaek,
No ai-funan iha Líbanu mós sai namlaek.
5 Foho sira nakdoko tanba nia,
No foho-oan sira nabeen.
Rai sei nakdoko tanba ninia oin,
Nuneʼe mós ho mundu no sira hotu neʼebé hela iha laran.
6 Sé mak bele tahan ninia laran-nakali?
Sé mak bele tahan ninia hirus neʼebé lakan makaʼas?
Ninia hirus sei fakar sai hanesan ahi,
No fatuk boot sira sei rahun tanba nia.
7 Jeová mak diʼak, nia mak fatin seguru iha tempu susar.
Nia hanoin sira neʼebé buka protesaun husi nia.
8 Nia sei halakon hotu Nínive ho bee neʼebé suli makaʼas,
No nakukun sei duni tuir ninia inimigu sira.
9 Planu aat saida mak imi sei halo hasoru Jeová?
Nia sei halakon imi toʼo mohu.
Susar sei la mosu tan ba dala segundu.
10 Tanba sira bobar hamutuk hanesan ai-tarak,
No sira mak hanesan ema neʼebé lanu ho serveja;
Maibé sira sei lakon tiha hanesan ahi han duʼut-kain maran.
11 Husi ó mak sei mosu ema ida neʼebé halo planu aat kontra Jeová,
No fó konsellu neʼebé la iha folin.
12 Jeová dehan nuneʼe:
“Maski sira forte loos no barak,
Maibé, sira sei mate no lakon mohu.
Haʼu fó terus ona ba ó, maibé haʼu sei la fó terus tan ba ó.
13 Haʼu sei halo tohar inimigu nia ai atu lori naha todan neʼebé nia tau ba ó-nia leten,
No haʼu sei halo kotu ba rua korrente neʼebé kesi ó.
14 Jeová fó sai ona mandamentu kona-ba ó, hodi dehan:
‘Ó-nia naran sei la iha tan.
Haʼu sei halakon tiha estátua neʼebé bahat ona hamutuk ho estátua besi husi ó-nia maromak sira-nia templu.
Haʼu sei halo rate ida ba ó, tanba haʼu hakribi ó.’
15 Haree bá! Ema neʼebé lori liafuan diʼak mai daudaun iha foho leten,
Nia haklaken kona-ba dame.
Oh Judá, selebra ó-nia festa sira, kumpre ó-nia juramentu sira,
Tanba ema folin-laek sira sei nunka ataka tan ó.
Sira sei lakon mohu.”
2 Inimigu neʼebé sei halo ó-nia povu namkari mai ona hodi ataka ó.
Defende ó-nia moru neʼebé metin.
Haree didiʼak ó-nia dalan.
Halo prontu ó-nia an no uza ó-nia forsa tomak.
2 Tanba Jeová sei fó fali Jacob nia glória,
No mós Izraél nia glória,
Tanba inimigu neʼebé harahun, halakon ona sira;
No inimigu harahun ona sira-nia uvas sanak.
3 Ninia mane kbiit boot sira-nia eskudu pinta kór-mean,
Ninia asuwaʼin sira hatais hena mean.
Besi sira iha ninia kuda-karreta funu nian nabilan hanesan ahi
Iha loron neʼebé nia sai prontu ba funu,
No mane sira kaer diman neʼebé halo husi ai-junipero.
4 Kuda-karreta funu nian halai makaʼas loos iha dalan sira.
Sira halai bá-mai iha fatin públiku sira.
Sira nabilan hanesan ahi-oan neʼebé lakan makaʼas no hanesan rai-lakan.
5 Nia sei bolu ninia ulun-naʼin sira.
Sira sei sidi nuʼudar sira halai ba oin.
Sira sei halai lalais ba sidade nia moru;
Sira harii metin ai atu taka netik dalan.
6 Mota sira-nia portaun sei loke tiha,
No palásiu sei rahun hotu.
7 Desizaun neʼe fó sai ona: Sidade neʼe hanesan liurai-feto neʼebé sei hetan moe,
Ema sei lori nia ba dadur, no ninia atan-feto sira tanis halerik;
Sira-nia lian hanesan manu-pombu nuʼudar sira baku sira-nia hirus-matan.
8 Husi tempu uluk kedas ema Nínive mak hanesan kolan ida,
Maibé agora sira halai daudaun.
“Hamriik metin bá! Hamriik metin bá!”
Maibé la iha ema ida mak fila fali.
9 Hadau osan-mutin, hadau osan-mean bá!
Rikusoin sira la iha rohan.
Sidade neʼe nakonu ho sasán folin-boot oioin.
10 Sidade neʼe mamuk, rahun, no sai fuik ona!
Sira-nia laran sai taʼuk loos, sira-nia ain-tuur no knotak nakdedar;
Sira hotu nia oin hatudu neon-susar.
11 Leaun nia hela-fatin iha neʼebé? Uluk leaun sira han iha neʼebá,
Iha neʼebá leaun lori ninia oan sira,
No la iha ema ida mak bele halo sira taʼuk.
12 Leaun-aman lees animál pedasuk ba pedasuk atu fó han ninia oan sira toʼo bosu
No nia buti mate animál atu fó ba leaun-inan sira.
Nia halo nakonu ninia hela-fatin ho animál neʼebé nia kasa,
No halo nakonu ninia hela-fatin ho animál sira neʼebé nia lees tiha.
13 Jeová neʼebé ukun tropa lalehan nian, dehan: “Haree bá! Haʼu sei kontra hasoru ó,
Haʼu sei sunu ó-nia kuda-karreta funu nian,
No surik sei tolan tiha ó-nia leaun sira.
Haʼu sei hapara ó atu la kasa tan ema iha rai tomak,
No ema sei la rona tan lian husi ema sira neʼebé lori ó-nia lia-menon.”
3 Susar ba sidade neʼebé sempre fakar ema nia raan!
Nia nakonu ho lia-bosok no naʼok.
Nia la para atu hadau sasán!
2 Haʼu rona lian husi xikote no roda sira,
Haʼu haree kuda no kuda-karreta halai makaʼas,
3 Tropa neʼebé saʼe kuda, surik no diman neʼebé nabilan,
Ema barak mate no mate-isin butuk malu,
Mate-isin barak loos toʼo labele sura.
Ema laʼo la diʼak tanba mate-isin barak.
4 Neʼe akontese tanba nia hanesan feto-aat neʼebé halo hahalok aat barak,
Feto neʼe oin-kapás no dada ema, nia halo hahalok matan-dook nian,
Nia lasu nasaun sira liuhusi ninia hahalok hanesan feto-aat no lohi família sira liuhusi ninia hahalok matan-dook nian.
5 Jeová neʼebé ukun tropa lalehan nian, dehan: “Haree bá! Haʼu sei kontra hasoru ó,
Haʼu sei hiʼit saʼe ó-nia saia hodi taka ó-nia oin;
Haʼu sei halo nasaun sira haree ó-nia isin-tanan,
No halo nasaun sira haree ó-nia moe.
6 Haʼu sei soe foʼer ba ó
No hamoe ó;
Haʼu sei halo ema hakribi ó bainhira sira haree ó.
7 Ema hotu neʼebé haree ó sei halai husi ó no dehan:
‘Nínive naksobu ona!
Sé mak sei hanoin sidade neʼe?’
Iha neʼebé mak haʼu bele hetan ema atu fó kmaan ba ó?
8 Ó diʼak liu fali Nó-Amon, neʼebé besik Mota Nilo nia bee-dalan sira ka?
Uluk bee mak haleʼu sidade neʼe;
Ninia rikusoin mak tasi no ninia moru mak tasi.
9 Rai-Etiópia no mós rai-Ejitu mak hun ba ninia forsa boot.
Put no ema Líbia mak ninia ajuda-naʼin.
10 Maibé Nó-Amon sai nuʼudar dadur;
Sidade neʼe mós laʼo ona ba dadur.
Ema harahun ona ninia oan sira pedasuk ba pedasuk iha dalan sikun hotu.
Sira dada sorteiu kona-ba ninia mane sira neʼebé naran-boot,
No sira kesi ona ninia ema-boot hotu ho korrente.
11 Ó mós sei sai lanu;
Ó sei subar an.
Ó sei buka protesaun husi inimigu.
12 Ó-nia fatin seguru hotu mak hanesan ai-figeira nia fuan primeiru;
Se inimigu doko sira, sira sei monu tama ba inimigu nia ibun.
13 Haree bá! Ó-nia tropa sira sei sai fraku hanesan feto.
Portaun sira iha ó-nia rai sei loke luan ba ó-nia inimigu sira.
Ahi sei han mohu tiha ai-lolon neʼebé xave ó-nia portaun sira.
14 Kuru bee no prepara ba tempu neʼebé inimigu haleʼu ó!
Halo metin ó-nia moru neʼebé seguru.
Tama ba tahu laran no sama rai-mean;
No halo bloku sira.
15 Maski nuneʼe ahi sei han ó.
Surik ida sei tesi kotu tiha ó.
Buat sira-neʼe sei han ó hanesan gafañotu sira han ai-tahan.
Halo ó-nia an sai barak hanesan gafañotu!
Sin, halo ó-nia an sai barak hanesan gafañotu!
16 Ó halo ó-nia negósiu-naʼin sai barak liu fali fitun sira iha lalehan.
Gafañotu troka ninia kulit no semo tiha.
17 Ó-nia guarda sira mak hanesan gafañotu,
No ó-nia ulun-naʼin sira mak hanesan gafañotu barak.
Durante loron neʼebé malirin, sira hela iha luhan neʼebé halo husi fatuk,
Maibé kuandu loro-matan naroman, sira semo lakon;
No la iha ema ida mak hatene sira iha neʼebé.
18 Oh liurai Asíria, ó-nia bibi-atan sira matan-dukur;
Ó-nia ema-boot sira hela deʼit iha sira-nia uma.
Ó-nia povu namkari ona iha foho sira,
No la iha ema ida mak halibur fali sira.
19 Ó sei la livre husi ó-nia dezastre boot.
Ó-nia kanek labele kura ona.
Ema hotu neʼebé rona kona-ba ó sei basa liman;
Tanba ó-nia hahalok aat neʼebé ó halo beibeik haterus ona ema barak.”
HABACUQUE
1 Tuirmai neʼe mak liafuan neʼebé profeta Habacuque simu liuhusi vizaun ida:
2 Oh Jeová, toʼo bainhira mak haʼu tenke halerik atu husu ajuda, maibé Ita la rona?
Toʼo bainhira mak haʼu tenke husu ajuda tanba violénsia, maibé Ita la salva ami?
3 Tanbasá mak Ita halo haʼu haree hahalok aat?
Tanbasá mak Ita husik deʼit ema haterus malu?
Tanbasá mak iha naʼok no violénsia iha haʼu-nia oin?
Tanbasá mak mosu haksesuk malu no problema barak?
4 Tan neʼe mak ukun-fuan la iha ona kbiit,
No ema nunka kumpre justisa.
Tanba ema aat mak haleʼu ema laran-loos;
Tan neʼe mak la iha justisa.
5 “Hateke ba nasaun sira no haree didiʼak!
Hateke ho hakfodak;
Tanba buat ruma sei akontese iha ó-nia tempu
No ó sei la fiar maski ema ruma fó-hatene ba ó.
6 Tanba haʼu sei uza ema Kaldeia,
Nasaun neʼebé laran-aat no hirus lalais.
Sira bá atu domina rai barak
Hodi hadau uma sira neʼebé laʼós sira-nian.
7 Sira siʼak no halo ema taʼuk.
Sira halo sira-nia lei rasik no hametin sira-nia kbiit.
8 Sira-nia kuda halai lalais liu fali leopardu,
No sira siʼak liu fali asu-fuik iha kalan.
Sira-nia kuda funu nian halai ba oin;
Sira-nia kuda mai husi fatin neʼebé dook.
Sira hanesan manu-makikit neʼebé semo tun lalais atu han animál ruma.
9 Sira hotu mai ho hakarak atu halo deʼit violénsia.
Bainhira sira halibur hamutuk atu ataka, sira hanesan anin husi parte leste,
No sira halibur ema dadur hanesan suru rai-henek.
10 Sira goza liurai sira
No hamnasa kona-ba ulun-naʼin sira.
Sira hamnasa kona-ba fatin hotu neʼebé seguru;
Sira ateru rai aas hodi bele tama no manán fatin sira-neʼe.
11 Tuirmai sira laʼo ba oin no laʼo liu hanesan anin,
Maibé sira rasik sei hetan sala,
Tanba sira fó glória ba sira-nia maromak kona-ba sira-nia kbiit.”
12 Oh Jeová, Ita-Boot mak iha ona horiuluk kedas, loos ka lae?
Oh haʼu-nia Maromak neʼebé Santu, Ita nunka mate.
Oh Jeová, Ita hili sira atu halaʼo Ita-nia tesi-lia;
Oh haʼu-nia Fatuk Boot, Ita hili sira atu fó kastigu ami.
13 Ita-nia matan mak santu liu atu hateke ba buat neʼebé aat,
No Ita la simu hahalok aat.
Entaun tanbasá mak Ita husik deʼit ema laran-makerek
No kontinua nonook deʼit bainhira ema aat sira tolan tiha ema neʼebé laran-loos liu fali sira?
14 Tanbasá mak Ita husik ema sai hanesan ikan iha tasi
No hanesan animál sira neʼebé dolar, neʼebé la iha ukun-naʼin ida?
15 Nia kaer sira hotu ho kail.
Nia kaer sira iha rede laran,
No nia halibur sira iha ninia rede.
Tan neʼe mak nia haksolok tebetebes.
16 Tan neʼe mak nia hasaʼe sakrifísiu ba ninia rede
No sunu insensu ba ninia rede;
Tanba ho ninia rede mak nia iha ai-han sira neʼebé diʼak no gostu.
17 Entaun tanbasá mak Ita husik nia kontinua loke ninia rede?
Tanbasá mak Ita husik nia kontinua oho nasaun sira la ho laran-sadiʼa?
2 Haʼu sei kontinua hamriik iha fatin neʼebé haʼu hein nuʼudar guarda,
No haʼu sei hamriik iha moru leten.
Haʼu sei hein nafatin atu haree saida mak nia hakarak koʼalia liuhusi haʼu
No saida mak haʼu sei hatán bainhira nia korrije haʼu.
2 Depois neʼe, Jeová hatán mai haʼu:
“Hakerek vizaun neʼe, no bahat ho momoos iha fatuk-belar sira,
Atu nuneʼe fasil ba ema atu lee ida-neʼe ho lian makaʼas.
3 Vizaun neʼe sei kumpre tuir tempu neʼebé hili tiha ona,
Neʼe halai lalais toʼo ninia rohan, no laʼós lia-bosok.
Maski vizaun neʼe demora karik, hein nafatin bá!
Tanba vizaun neʼe sei kumpre duni.
Neʼe sei la tarde!
4 Haree ba ema neʼebé foti an;
Nia laʼós ema laran-loos.
Maibé ema laran-loos sei moris tanba ninia laran-metin.
5 Tuir loloos, tua-uvas bele lohi ema,
Tan neʼe, ema foti an sei la kumpre ninia planu.
Nia kaan-teen hanesan rate;
Nia mak hanesan mate neʼebé nunka sente bosu.
Nia kontinua halibur nasaun sira hotu
No halibur povu sira hotu ba ninia an.
6 Sira hotu sei koʼalia lia-dadolin, ai-knanoik, no ai-sasiʼik kontra nia, loos ka lae?
Sira sei dehan:
‘Susar ba nia neʼebé halibur buat neʼebé laʼós ninian
No neʼebé aumenta tan ninia debe!
Nia sei halo nuneʼe toʼo bainhira?
7 Ema sira neʼebé fó debe ba ó sei hamriik derrepente deʼit, loos ka lae?
Sira sei hadeer no doko makaʼas ó,
No sira sei hadau ó-nia sasán.
8 Ema restu hotu husi nasaun barak sei hadau ó-nia sasán sira,
Tanba ó hadau ona sira-nia sasán,
Tanba ó fakar ema nia raan
No tanba violénsia neʼebé ó halo hodi estraga rai,
Sidade sira no mós ema neʼebé hela iha sidade laran.
9 Susar ba nia neʼebé halo hahalok aat atu manán rikusoin ba ninia uma,
Hodi halo ninia knuuk iha fatin aas,
Atu susar labele kona nia!
10 Ó halo ona planu neʼebé lori moe ba ó-nia uma.
Ó halo sala kontra ó-nia an tanba ó halakon ema barak.
11 Tanba fatuk ida iha didin laran sei halerik,
No ai ida husi uma-kakuluk sei hatán ba nia.
12 Susar ba nia neʼebé fakar ema nia raan hodi harii sidade ida,
No hametin sidade neʼe ho hahalok aat!
13 Haree bá! Ema serbisu makaʼas ba buat neʼebé ahi sei han tiha,
No nasaun sira sai kole maibé la hetan buat ida; neʼe husi Jeová neʼebé ukun tropa lalehan nian.
14 Tanba ema hotu iha mundu tomak sei hatene kona-ba Jeová nia glória
Hanesan bee taka tasi tomak.
15 Susar ba nia neʼebé fó buat ruma ba nia belun sira atu hemu,
Hodi kahur neʼe ho laran-nakali no hirus, no halo sira lanu,
Atu nuneʼe bele hateke ba sira-nia isin-tanan!
16 Ó sei hetan moe boot duké hetan glória.
Ó mós tenke hemu no hatudu sai katak ó seidauk hetan sirkunsizaun.
Kopu neʼebé iha Jeová nia liman-loos sei mai toʼo ó,
No moe sei taka tiha ó-nia glória;
17 Tanba violénsia neʼebé ó halo ba Líbanu sei kona fali ó,
No ó-nia hahalok aat neʼebé hataʼuk animál fuik sira sei kona fali ó,
Tanba ó fakar ema nia raan
No tanba violénsia neʼebé ó halo hodi estraga rai,
Estraga sidade sira no ema neʼebé hela iha sidade laran.
18 Ema tau fiar ba estátua neʼebé sira halo,
Neʼebé halo husi ai, besi no fatuk.
Maibé konsellu husi sira mak lia-bosok.
Maromak folin-laek sira-neʼe labele koʼalia,
Nuneʼe buat diʼak saida mak ema neʼebé halo estátua sira-neʼe hetan?
19 Susar ba nia neʼebé dehan ba ai-pedasuk ida: “Hadeer bá!”
Ka dehan ba fatuk neʼebé labele koʼalia: “Hadeer bá! Hanorin ami bá!”
Haree bá! Ema taka buat sira-neʼe ho osan-mean no osan-mutin,
No la iha iis iha sira-nia laran.
20 Maibé Jeová iha ninia templu santu.
Oh mundu tomak, nonook bá iha ninia oin!’”
3 Tuirmai neʼe mak profeta Habakuk nia orasaun, ho knananuk triste nian:
2 Oh Jeová, haʼu rona ona istória kona-ba Ita.
Oh Jeová, haʼu hakfodak kona-ba Ita-nia serbisu neʼebé kmanek.
Favór ida, halaʼo fali Ita-nia serbisu sira iha tempu neʼebé loos!
Halo ema hatene Ita-nia serbisu sira iha tempu neʼebé loos,
Favór ida, hanoin-hetan atu hatudu laran-sadiʼa durante tempu susar!
3 Maromak mai husi Teman,
Maromak neʼebé Santu mai husi Foho Paran. (Sela)
Ninia glória taka lalehan;
Rai nakonu ho hahiʼi ba nia.
4 Ninia nabilan mak hanesan loron.
Naroman rua sai husi ninia liman,
Fatin neʼebé ninia kbiit subar.
5 Moras aat laʼo uluk iha ninia oin,
No isin-manas makaʼas laʼo tuir nia.
6 Nia hamriik metin no halo rai nakdoko.
Nia hateke dala ida, halo nasaun sira haksoit.
Foho sira neʼebé iha husi tempu uluk sai rahun tiha,
Foho-oan sira neʼebé iha husi tempu uluk hakruʼuk tiha.
Neʼe mak ninia hahalok sira husi tempu uluk kedas.
7 Haʼu haree ema Kus nia tenda sai laran-susar.
Hena tenda nian husi rai-Midian sai nakdedar.
8 Oh Jeová, Ita sai hirus hasoru mota sira ka?
Ita la kontente ho sira ka?
Ita sai laran-nakali hasoru tasi ka?
Tanba Ita saʼe Ita-nia kuda sira;
Ita-nia kuda-karreta sira lori salvasaun.
9 Ita hasai rama no prontu ona atu hana.
Ai-tonka sira prontu ona atu kumpre sira-nia knaar tuir juramentu ida. (Sela)
Ita fahe rai hodi uza mota sira.
10 Foho sira book an ho moras tanba haree Ita.
Udan-boot lori lakon tiha buat hotu.
Tasi kleʼan halo lian makaʼas.
Tasi hiʼit aas ninia liman.
11 Loro-matan no fulan hamriik metin iha sira-nia hela-fatin neʼebé aas.
Ita tiru sai Ita-nia rama-oan sira neʼebé nabilan.
Ita-nia diman naroman hanesan rai-lakan.
12 Ita laʼo liu mundu tomak ho laran-nakali.
Ita sama nasaun sira ho hirus.
13 Ita sai mai atu salva Ita-nia povu, atu salva ema neʼebé Ita hili ona.
Ita harahun ulun-naʼin husi ema aat nia uma.
Ita hatudu sai hotu uma neʼe nia fundasaun. (Sela)
14 Uluk ninia asuwaʼin sira kontente tebes atu tolan subasubar ema sira neʼebé hetan terus.
Bainhira sira sai mai hanesan anin-fuik atu halo ami namkari,
Ita sona borus ninia asuwaʼin sira-nia ulun ho ninia armas.
15 Ita halai liu tasi ho Ita-nia kuda sira,
Ita liu tasi boot sira.
16 Haʼu rona no haʼu-nia laran nakdedar;
Mensajen neʼe halo haʼu-nia ibun nakdedar.
Haʼu-nia ruin sira sai dodok;
Haʼu-nia ain sira nakdedar.
Maibé haʼu hein ho pasiénsia ba loron susar nian,
Tanba loron neʼe sei toʼo mai ba ema neʼebé ataka ami.
17 Maski ai-figeira la funan tan,
No uvas-hun la fó fuan;
Maski ai-oliveira la fó fuan tan,
No toʼos sira la fó ai-han;
Maski bibi sira lakon husi sira-nia luhan,
No karau nia luhan sai mamuk;
18 Maibé kona-ba haʼu, haʼu sei haksolok tanba Jeová;
Haʼu sei haksolok tebes tanba Maromak, haʼu-nia Salvadór.
19 Jeová, Naʼi Ukun-Naʼin Boot Liu, mak haʼu-nia kbiit;
Nia sei halo haʼu-nia ain sai hanesan bibi-rusa nian
No halo haʼu laʼo iha fatin aas sira.
Ba dirijente; múzika neʼe atu akompaña ho haʼu-nia instrumentu neʼebé iha talin.