• Ita sei sidi tanba Jesus ka lae?
    Livru Haklaken (Estudu)—2021 | Maiu

    • (3) JESUS LA HALO TUIR EMA JUDEU NIA TRADISAUN BARAK

      Ema barak sidi tanba Jesus lakohi halo tuir tradisaun balu. Oinsá buat sira-neʼe bele halo ema sidi ohin loron? (Haree parágrafu 13)e

      13. Tanbasá ema barak la simu Jesus?

      13 Iha Jesus nia tempu, João Batista nia dixípulu sira sente konfuzaun tanba Jesus nia dixípulu la halo jejún. Jesus esplika ba sira katak la iha razaun atu halo jejún kuandu nia moris hela. (Mt 9:14-17) Maski nuneʼe, ema Farizeu sira no kontradór sira hatete aat Jesus tanba nia la halo tuir kostume no mós tradisaun sira. Sira sai hirus bainhira nia kura ema iha loron Sábadu. (Mc 3:1-6; João 9:16) Sira hatete katak sira halo tuir loron Sábadu, maibé sira la sente sala atu halo negósiu iha templu. Sira sai hirus loos bainhira Jesus korrije sira. (Mt 21:12, 13, 15) Jesus nia rona-naʼin sira iha sinagoga iha Nazaré sai hirus bainhira Jesus uza ezemplu kona-ba ema Izraél nia istória atu hatudu ba sira katak sira mak ema neʼebé hanoin an deʼit no la iha fiar. (Lc 4:16, 25-30) Ema barak la simu Jesus tanba Jesus nia hahalok la hanesan ho buat neʼebé sira espera.—Mt 11:16-19.

      14. Tanbasá Jesus korrije tradisaun sira neʼebé la bazeia ba Bíblia?

      14 Saida mak Bíblia hanorin? Jeová hatete liuhusi profeta Isaias: “Povu neʼe hakbesik ba haʼu ho sira-nia ibun deʼit no sira respeitu haʼu ho ibun-tutun deʼit, maibé sira-nia laran dook husi haʼu; no sira hamtaʼuk haʼu tan deʼit ema nia ukun-fuan neʼebé hanorin ona ba sira.” (Isa 29:13) Jesus la halo sala bainhira nia korrije tradisaun sira neʼebé la bazeia ba Bíblia. Bainhira ema sira-neʼe hanoin katak ema nia ukun-fuan no tradisaun sira mak importante liu fali Bíblia, neʼe hatudu katak sira la simu Jeová no ida neʼebé Jeová haruka mai nuʼudar Mesias.

  • Ita sei sidi tanba Jesus ka lae?
    Livru Haklaken (Estudu)—2021 | Maiu

    • (4) JESUS LA KOKO ATU TROKA SISTEMA POLÍTIKU

      Ema barak sidi tanba Jesus la interese ho sistema polítiku. Oinsá buat sira-neʼe bele halo ema sidi ohin loron? (Haree parágrafu 17)f

      17. Ema barak iha Jesus nia tempu hein Mesias atu halo saida?

      17 Ema balu iha Jesus nia tempu hakarak atu troka kedas sistema polítiku. Sira hein Mesias atu halo livre sira husi Roma nia ukun. Tan neʼe, sira koko atu halo Jesus sai nuʼudar sira-nia liurai, maibé Jesus lakohi. (João 6:14, 15) Ema seluk no mós amlulik sira taʼuk katak Jesus sei troka sistema polítiku, tanba ida-neʼe sei halo ema Roma hirus no hadau fali kbiit neʼebé sira fó ona ba amlulik sira. Ema Judeu barak sidi tanba hanoin barak kona-ba buat polítiku nian.

      18. Ema barak la interese kona-ba profesia saida deʼit?

      18 Saida mak Bíblia hanorin? Maski profesia barak fó-hatene nanis katak ikusmai Mesias sei sai Liurai neʼebé manán funu, maibé profesia sira seluk hatudu katak nia presiza mate uluk ba ita-nia sala. (Isa 53:9, 12) Entaun, tanbasá sira hanoin sala kona-ba Mesias? Ema barak iha Jesus nia tempu la interese ho profesia sira neʼebé la promete atu rezolve kedas sira-nia problema.—João 6:26, 27.