Saida mak Maromak nia reinu?

“Lia-foun [“lia-foun diʼak”, Tradusaun Mundu Foun] reinu nian neʼe . . .”—MATEUS 24:14.

KUANDU Jesus hatoʼo diskursu iha foho ida, nia hanorin ninia dixípulu sira atu halo orasaun ba Maromak hodi inklui liafuan neʼe: “Halo Ita-nia reinu toʼo mai ami.” Ema rihun ba rihun dekór no repete beibeik orasaun neʼe. Livru ensiklopédia ida hatete katak ida-neʼe mak “orasaun importante liu neʼebé ema kristaun hotu temi”. Maibé, ema barak neʼebé repete orasaun neʼe ladún hatene saida mak reinu neʼe no reinu neʼe sei halo saida bainhira nia toʼo mai.—Mateus 6:9, 10.

Ita la hakfodak ho ida-neʼe tanba ulun-naʼin relijiaun kristaun sira esplika kona-ba reinu neʼe iha dalan neʼebé halo ema bilán no susar atu komprende. Sira ida hakerek katak Maromak nia reinu mak “sentimentu iha ema nia laran neʼebé liga ho Maromak neʼebé moris . . . , buat ida neʼebé ema sente kona-ba Maromak bainhira sira hetan salvasaun”. Ema ida tan esplika evanjellu kona-ba reinu nuʼudar “hanorin kona-ba kreda”. No livru Haʼu Fiar—Katesismu Katoliku Kiik Ida hatete: “Maromak nia reinu . . . katak laran loos no dame no ksolok iha Espíritu Santu.”

Entaun, saida mak Maromak nia reinu? Reinu neʼe mak Maromak nia ukun iha lalehan neʼebé lakleur tan sei halakon buat aat hotu no sei halo mundu tomak sai hanesan jardín furak. Mai ita haree oinsá mak Bíblia hatudu katak Maromak nia reinu mak ukun ida.

Sira neʼebé sei ukun mundu tomak

Liafuan reinu iha arti povu no mós iha arti ukun ida neʼebé iha liurai. Kuandu Bíblia temi liafuan “reinu”, dala barak neʼe katak ukun ida neʼebé iha liurai. Liurai husi Maromak nia Ukun mak Jesus Kristu, neʼebé moris hiʼas ona. Iha profeta Daniel nia vizaun, nia haree Jesus sai Liurai iha lalehan. Nia hakerek: “Haʼu haree nafatin iha haʼu-nia vizaun iha kalan, no, haree iha neʼebá! Ema ida hanesan oan-mane [Jesus] mai iha kalohan iha lalehan; no nia hetan lisensa atu hasoru Ida neʼebé Idade Boot Liu [Maromak Jeová], no sira lori nia ba iha Nia oin. No ba nia [Jesus] entrega tiha kbiit no hahiʼi no ukun, hodi povu sira, no ema husi nasaun no língua oioin serbí nia. Ninia ukun sei metin ba tempu neʼebé la bele sura, neʼebé sei la liu, no ninia ukun mak ukun neʼebé sei la lakon.”—Daniel 7:13, 14.

Livru Daniel mós hatudu katak ukun neʼe sei sai metin no nunka lakon, no ukun neʼe sei halakon ema nia ukun hotu iha mundu. Daniel kapítulu 2 esplika kona-ba mehi neʼebé Maromak fó ba liurai Babilónia. Nia haree estátua boot neʼebé reprezenta nasaun sira neʼebé ukun tuituir malu. Profeta Daniel esplika mehi neʼe. Nia hatete: “Iha parte ikus husi loron sira-neʼe, . . . Maromak lalehan nian sei harii ukun ida neʼebé sei nunka lakon. Ukun neʼe rasik sei la entrega ba ema seluk. Ukun neʼe sei harahun no halakon ukun sira-neʼe hotu, no ukun neʼe rasik sei hamriik ba tempu neʼebé la bele sura.”—Daniel 2:28, 44.

Maibé Liurai ba Maromak nia Ukun sei la ukun mesak. Kuandu Jesus sei halaʼo nia serbisu iha mundu, nia fó fiar ba ninia apóstolu sira neʼebé laran-metin katak sira no ema seluk mós sei simu moris-hiʼas iha lalehan no sei tuur iha kadunan iha ninia reinu, ka ukun. (Lucas 22:28-30) Jesus la koʼalia kona-ba kadunan neʼebé ema bele haree tanba Jesus koʼalia kona-ba Maromak nia Ukun iha lalehan. Bíblia hatudu katak ukun-naʼin sira-neʼe sei mai “husi rasa, lia, povu no nasaun sira hotu”, no sira sei “ukun raiklaran tomak”.—Apokalipse 5:9, 10.

Tansá lia-foun reinu nian mak diʼak

Hanesan temi tiha ona, Kristu Jesus sei ukun “ema husi nasaun no língua oioin” no sira neʼebé hamutuk ho nia sei “ukun raiklaran tomak”. Nuneʼe, sé deʼit mak atu sai povu ba ukun, ka reinu neʼe? Sira neʼebé simu lia-foun diʼak neʼebé ema haklaken ohin loron, no ema neʼebé moris hiʼas iha mundu iha futuru mós iha oportunidade atu moris ba nafatin.

Ho liafuan furak Bíblia esplika kona-ba bensaun sira neʼebé ema sei hetan iha Maromak nia Ukun. Hanoin toʼok kona-ba bensaun balu tuirmai neʼe:

“Nia sei hapara funu toʼo rai nia rohan. Nia halo tohar rama no tesi rahun diman; nia sunu kuda-karreta sira ho ahi.”—Salmo (Mazmur) 46:9.

“Sira sei harii duni uma no hela, sira sei kuda toʼos-uvas no han nia fuan. Sira sei la harii uma no ema seluk mak hela, sira sei la kuda no ema seluk mak han.”—Isaías (Yesaya) 65:21, 22.

“[Maromak] sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian liu tiha ona.”—Apokalipse 21:3, 4.

“Tempu neʼebá, matan-delek sira-nia matan sei loke, no tilun-diuk sira-nia tilun sei nakloke duni. Iha tempu neʼebá, ema kudeʼik sei laʼo hanesan bibi-rusa, ema monok nia nanál sei haklalak ho ksolok.”—Isaías (Yesaya) 35:5, 6.

“Oras toʼo daudaun wainhira sira hotu neʼebé iha rate laran sei rona [Jesus] nia lia, no sira neʼebé halo diʼak, sei saʼe ba moris-hiʼas moris nian.”—Joao 5:28, 29.

“Ema laran-maus sei simu rai, no sira sei haksolok tebes ho dame neʼebé la iha rohan.”—Salmo (Mazmur) 37:11.

Buat sira-neʼe hotu mak lia-foun diʼak! Liután neʼe, buat neʼebé akontese daudauk tuir Bíblia nia liafuan neʼebé hatete nanis ona hatudu katak tempu besik ona ba Maromak nia reinu atu ukun mundu tomak.

Lia-foun diʼak neʼe kona-ba saida?

“Lia-foun [“lia-foun diʼak”, MF] . . .”—MATEUS 24:14.

EMA kristaun tenke haklaken “lia-foun diʼak reinu nian neʼe” ba ema seluk, hodi esplika katak Maromak nia ukun sei halakon buat aat iha mundu tomak. Maibé dala ruma Bíblia mós uza “lia-foun diʼak” kona-ba buat seluk. Porezemplu, Bíblia uza liafuan hanesan “lia-foun diʼak kona-ba salvasaun” (Salmo [Mazmur] 96:2); “Maromak nia liafuan diʼak” (Marcos 1:14); no “liafuan diʼak nian kona-ba Jesus Kristu”.—Marcos 1:1.

Lia-foun diʼak neʼe inklui Jesus nia hanorin kona-ba lia-loos hotu neʼebé ninia dixípulu sira hakerek. Antes Jesus atu saʼe ba lalehan, nia haruka nia dixípulu sira: “Neʼe duni, laʼo bá, hanorin nasaun hotu-hotu; sarani sira hodi Aman, Oan no espíritu santu nia naran, hanorin sira atu halo tuir buat hotu neʼebé haʼu haruka imi.” (Mateus 28:19, 20) Tan neʼe, ema kristaun neʼebé loos nia knaar laʼós atu fó-hatene deʼit kona-ba Maromak nia reinu, ka ukun, maibé sira mós tenke hanorin ema atu halo tuir Jesus.

Relijiaun kristaun halo ida-neʼe ka lae? Sira barak la hatene saida mak Maromak nia ukun, tan neʼe sira la bele hanorin ema seluk iha dalan neʼebé loos. Duké koʼalia kona-ba Maromak nia ukun, sira hatoʼo diskursu neʼebé halo ema sente diʼak hodi koʼalia kona-ba simu perdua no tau fiar ba Jesus. Sira mós koko atu dada ema tama sira-nia relijiaun hodi halaʼo programa atu ajuda ema nia moris, ka harii ospitál, eskola no uma ba ema kiak. Karik atividade sira-neʼe aumenta membru ba sira-nia igreja, maibé ida-neʼe la ajuda membru sira-neʼe atu sai ema kristaun loos neʼebé hakarak atu moris tuir buat neʼebé Jesus hanorin.

Profesór ida kona-ba teolojia hakerek: “Matenek-naʼin sira no ulun-naʼin relijiaun kristaun sira hatene katak ita tenke halo ema sai Jesus nia dixípulu no hanorin sira atu halo buat hotu neʼebé Jesus hatete. . . . Tuir loloos, Jesus hatete ho klaru buat neʼebé ita tenke halo. Maibé ita la halo tuir. Ita la hakaʼas an atu halo ida-neʼe. No mós, ita la hatene oinsá atu halo ida-neʼe.”

Hanesan neʼe mós, livru U.S Catholic neʼebé halo relatóriu ida kona-ba ema katólika iha rai-Estadus Unidus hatete katak ema porsentu 95 hanoin katak haklaken lia-foun diʼak mak parte importante ba sira-nia adorasaun. Maski nuneʼe, sira barak sente katak dalan diʼak liu atu halo ida-neʼe mak laʼós hodi koʼalia kona-ba lia-foun diʼak ba ema, maibé hodi halaʼo sira-nia moris nuʼudar ezemplu diʼak ba ema seluk. Sira ida hatete: “Haklaken laʼós katak koʼalia lia-foun diʼak ba ema seluk. Importante mak ita rasik sai lia-foun diʼak ba ema.” Livru neʼe hatete katak ema barak la gosta atu fahe sira-nia fiar tanba sira sente moe kona-ba igreja nia ulun-naʼin sira neʼebé halo sala-foʼer, no mós tanba igreja nia hanorin sira neʼebé halo ema konfuzaun.”

Ulun-naʼin ida husi igreja Metodista mós dehan katak ninia membru sira iha konfuzaun no la iha unidade, sira la brani atu haklaken no sira-nia morál hanesan deʼit ho ema iha liʼur. Nia halerik hodi dehan: “Sé mak sei haklaken lia-foun diʼak kona-ba reinu?”

Ulun-naʼin neʼe la iha resposta ba ninia pergunta. Maibé resposta iha duni. Ita sei hetan resposta iha informasaun tuirmai neʼe.

[Liafuan ne’ebé foti husi pájina 6]

Lia-foun diʼak mak kona-ba Maromak nia Ukun no mós kona-ba hetan salvasaun hodi tau fiar ba Jesus Kristu