Lakleur tan Maromak Jeová sei uza ninia Ukun atu halakon hotu ita-nia problema sira. Ema hotu presiza hatene kona-ba liafuan diʼak neʼe, no Jesus hakarak ninia dixípulu sira atu fahe liafuan neʼe ba ema hotu! (Mateus 28:19, 20) Oinsá mak Testemuña ba Jeová halo tuir Jesus nia mandamentu neʼe?

1. Oinsá mak Mateus 24:14 sai loos ohin loron?

Jesus hatete: “Ema sei haklaken liafuan diʼak kona-ba Maromak nia Ukun iha mundu tomak.” (Mateus 24:14) Testemuña ba Jeová kontente atu halo knaar importante neʼe. Ami haklaken liafuan diʼak iha mundu tomak iha língua 1.000 liu! Atu halaʼo serbisu boot neʼe presiza duni hakaʼas an no organiza ho didiʼak. Serbisu neʼe labele halaʼo se la ho Jeová nia ajuda.

2. Saida mak ami halo atu bele haklaken ba ema?

Ami haklaken iha fatin naran deʼit neʼebé ema iha. Hanesan ema Kristaun iha apóstolu sira-nia tempu, ami mós haklaken “husi uma ba uma”. (Apóstolu 5:42) Liuhusi dalan neʼe mak tinan-tinan ami bele haklaken ba ema rihun ba rihun. Ami mós haklaken iha fatin públiku tanba dala ruma ami labele hasoru ema iha sira-nia uma. Ami sempre buka oportunidade atu koʼalia ba ema seluk kona-ba Maromak Jeová no ninia promesa sira.

3. Sé mak iha responsabilidade atu haklaken liafuan diʼak?

Ema Kristaun neʼebé loos, sira hotu iha responsabilidade atu haklaken liafuan diʼak ba ema seluk. Ami haree responsabilidade neʼe nuʼudar buat neʼebé sériu. Ami halo buat hotu neʼebé ami bele hodi haklaken tanba ami hatene katak ida-neʼe bele salva ema seluk nia moris. (Lee 1 Timóteo 4:16.) Ami la hetan osan atu halo serbisu neʼe, tanba Bíblia hatete: “Imi simu hodi la selu, tan neʼe fó mós hodi la hein atu ema selu imi.” (Mateus 10:7, 8) Maski laʼós ema hotu hakarak rona ba liafuan diʼak neʼe, maibé ami nafatin haklaken tanba neʼe parte ba ami-nia adorasaun no neʼe halo Jeová kontente.

KEʼE KLEʼAN

4. Ami hakaʼas an atu bele haklaken ba ema hotu

VÍDEO: Haklaken “toʼo rai nia rohan” (7:33)

• Saida mak Ita gosta husi dalan neʼebé Testemuña ba Jeová halaʼo serbisu haklaken?

Lee Mateus 22:39 no Roma 10:13-15, depois koʼalia hamutuk kona-ba pergunta tuirmai:

• Oinsá mak ami-nia serbisu haklaken hatudu katak ami hadomi ema seluk?

• Jeová sente oinsá kona-ba ema neʼebé haklaken liafuan diʼak?​—Haree versíkulu 15.

5. Ita mak Maromak nia maluk serbisu-naʼin

Esperiénsia barak hatudu katak Jeová mak dirije ami-nia serbisu haklaken. Porezemplu, iha Novazelándia irmaun ida naran Paul hasoru feto ida kuandu nia haklaken husi uma ba uma iha meiudia. Antes neʼe iha dadeer-saan, feto neʼe halo orasaun ba Maromak hodi uza naran Jeová, no husu atu ema ida mai vizita nia. Irmaun Paul hatete: “Liu oras tolu deʼit, haʼu toʼo iha ninia odamatan oin.”

Lee 1 Korinto 3:9, depois koʼalia hamutuk kona-ba pergunta tuirmai:

• Oinsá mak esperiénsia hanesan akontese iha Novazelándia hatudu katak Jeová mak dirije serbisu haklaken?

Lee Apóstolu 1:8, depois koʼalia hamutuk kona-ba pergunta tuirmai:

• Tanbasá mak ami presiza Jeová nia ajuda atu bele halaʼo serbisu haklaken?

Ita hatene ka lae?

Semana-semana iha ami-nia reuniaun loron baileet nian, ami simu treinu neʼebé ajuda ami atu halaʼo serbisu haklaken. Se Ita tuir ona reuniaun sira-neʼe ida, Ita hanoin oinsá kona-ba treinu sira-neʼe?

6. Ita halo tuir Maromak nia mandamentu atu haklaken

Iha apóstolu sira-nia tempu, kontradór sira koko atu hapara Jesus nia dixípulu sira-nia serbisu haklaken. Ema Kristaun iha tempu uluk defende sira-nia direitu atu haklaken “liafuan diʼak tuir lei”. (Filipe 1:7) Ohin loron mós Testemuña ba Jeová halo hanesan neʼe.a

VÍDEO: Defende liafuan diʼak liuhusi dalan legál (2:28)

Lee Apóstolu 5:27-42, depois koʼalia hamutuk kona-ba pergunta tuirmai:

• Tanbasá ami labele para haklaken?​—Haree versíkulu 29, 38 no 39.

PONTU IMPORTANTE

Jesus haruka ninia dixípulu sira atu haklaken liafuan diʼak ba nasaun hotu. Jeová ajuda ninia povu atu halaʼo serbisu neʼe.

Rezumu

• Oinsá mak liafuan diʼak haklaken daudaun iha mundu tomak?

• Oinsá mak ami-nia serbisu haklaken hatudu katak ami hadomi ema seluk?

• Ita hanoin serbisu haklaken bele lori kontente mai ita ka lae? Tanbasá?

BUKA-HATENE LIUTÁN

Haree oinsá Testemuña ba Jeová sira haklaken iha sidade boot.

Haklaken públiku espesiál iha sidade boot París (5:11)

Saida mak Testemuña ba Jeová sira halo atu ajuda refujiadu sira?

Fahe liafuan diʼak ba refujiadu sira (5:59)

Haree oinsá ema ida sente kontente tanba uza ninia tempu atu haklaken.

Haʼu kontente tanba hili serbisu neʼebé diʼak liu (6:29)

Lee kona-ba desizaun husi kazu importante balu neʼebé ajuda Testemuña ba Jeová atu halaʼo serbisu haklaken kona-ba liafuan diʼak.

“Haklaken-naʼin kona-ba Maromak nia Ukun lori kazu ba tribunál” (Maromak nia Ukun hahú ona!, kapítulu 13)

Jesus dehan katak ema Kristaun neʼebé loos tenke hetan batizmu. (Lee Mateus 28:19, 20.) Maibé batizmu katak sá? No ita presiza halo saida atu hetan batizmu?

1. Batizmu katak sá?

Liafuan “batizmu” foti husi liafuan Gregu neʼebé iha signifikadu “hatama” ba bee laran. Bainhira Jesus hetan batizmu iha Mota Jordaun, ninia isin-lolon tomak tama ba bee laran, no tuirmai nia “sai . . . husi bee laran”. (Marcos 1:9, 10) Nuneʼe mós, ema Kristaun neʼebé loos hetan batizmu hodi hatama sira-nia isin-lolon tomak ba bee laran.

2. Batizmu hatudu sai saida?

Ema neʼebé hetan batizmu hatudu katak nia dedika ona ninia an ba Maromak Jeová. Oinsá mak ema ida halo dedikasaun? Antes hetan batizmu, ema neʼe fó sai ba Jeová liuhusi orasaun ida katak nia hakarak serbí Jeová ba nafatin. Nia promete atu adora deʼit Jeová no halo tuir Jeová nia hakarak nuʼudar buat neʼebé importante liu iha ninia moris. Nia hili atu “nega ninia an no . . . kontinua laʼo tuir” Jesus nia hanorin no ezemplu. (Mateus 16:24) Ninia dedikasaun no batizmu loke dalan ba nia atu iha relasaun neʼebé besik ho Jeová no maluk fiar-naʼin seluk.

3. Antes hetan batizmu ita presiza halo saida?

Ita bele prepara an ba batizmu hodi aprende kona-ba Jeová no haburas fiar ba nia. (Lee Ebreu 11:6.) Nuʼudar Ita-nia koñesimentu no fiar sai buras, Ita-nia domin ba Jeová mós sei sai buras. Tuirmai Ita mós sei hakarak atu haklaken kona-ba nia no moris tuir ninia dalan sira. (2 Timóteo 4:2; 1 João 5:3) Bainhira ema ida “moris ho loloos iha Jeová nia oin hodi halo nia kontente iha buat hotu”, nia rasik sei deside atu dedika ninia moris ba Maromak no hetan batizmu.​—Koloso 1:9, 10.a

KEʼE KLEʼAN

4. Ita bele aprende husi Jesus nia batizmu

Lee Mateus 3:13-17 atu hatene diʼak liután kona-ba Jesus nia batizmu. Depois koʼalia hamutuk kona-ba pergunta tuirmai:

• Jesus hetan batizmu bainhira nia sei bebé ka lae?

• Jesus batizmu iha dalan oinsá? João fui deʼit bee ba Jesus nia ulun ka lae?

Jesus hahú halaʼo serbisu espesiál husi ninia Aman kuandu nia hetan tiha batizmu. Lee Lucas 3:21-23 no João 6:38, depois koʼalia hamutuk kona-ba pergunta tuirmai:

• Depois Jesus hetan tiha batizmu, nia tau uluk serbisu saida iha ninia moris?

5. Batizmu mak planu ida neʼebé Ita bele kumpre

Karik Ita dada an uitoan kuandu hanoin kona-ba dedikasaun no batizmu. Maibé, Ita bele kontinua aprende toʼo tempu neʼebé Ita sente prontu ona atu halo desizaun importante neʼe. Atu haree ema balu neʼebé halo ida-neʼe ona, loke VÍDEO.

VÍDEO: Haburas relasaun ho Jeová (1:11)

Lee João 17:3 no Tiago 1:5, depois koʼalia hamutuk kona-ba pergunta tuirmai:

• Saida mak bele ajuda Ita atu sai prontu hodi hetan batizmu?

1. Ita dedika ita-nia an ba Jeová hodi fó sai katak ita hakarak serbí nia ba nafatin

2. Liuhusi batizmu ita hatudu ba ema seluk katak ita dedika ona ita-nia an ba Jeová

6. Bainhira ita hetan batizmu, ita sai parte ba Jeová nia família

Bainhira hetan tiha batizmu, ita sai parte ba família boot ida iha mundu tomak neʼebé unidade. Maski ita mai husi rai no situasaun la hanesan, ita hotu iha fiar neʼebé hanesan no moris tuir morál neʼebé hanesan. Lee Salmo 25:14 no 1 Pedro 2:17, depois koʼalia hamutuk kona-ba pergunta tuirmai:

• Oinsá mak batizmu kona Ita-nia relasaun ho Jeová no ema neʼebé adora Jeová?

PONTU IMPORTANTE

Jesus hanorin katak ema Kristaun neʼebé loos presiza hetan batizmu. Atu kumpre ida-neʼe, ita tenke haburas fiar neʼebé metin ba Jeová, moris tuir Ninia dalan sira, no dedika ita-nia an ba Nia.

Rezumu

• Batizmu katak sá, no tanbasá neʼe importante?

• Oinsá mak dedikasaun no batizmu liga malu?

• Saida deʼit mak ita presiza halo antes atu halo dedikasaun no hetan batizmu?

BUKA-HATENE LIUTÁN

Aprende batizmu katak sá.

“Batizmu katak sá?” (Informasaun iha jw.org/tdt)

Haree kona-ba hakat sira neʼebé ita presiza halo atu hetan batizmu.

“Domin no agradese book ita atu hetan batizmu” (Livru Haklaken, Marsu 2020)

Lee kona-ba saida mak book mane ida atu hetan batizmu.

“Sira hakarak haʼu atu buka-hatene saida mak Bíblia hanorin” (Informasaun husi Livru Haklaken)

Haree tanbasá batizmu mak planu neʼebé diʼak no oinsá mak ita bele kumpre ida-neʼe.

“Haʼu presiza hetan batizmu ka lae?” (Pergunta Husi Joven Sira—Resposta neʼebé bele ajuda, Volume 2, kapítulu 37)