Neutrál katak sá?

Jesus hanorin katak ninia dixípulu sira “laʼós mundu neʼe nian”. (João 15:19) Neʼe inklui sira mantein sira-nia pozisaun neutrál, katak la apoia buat polítiku ka funu. Dala ruma la fasil ba ita atu neutrál, no karik ema sei goza ita. Oinsá mak ita bele neutrál no laran-metin nafatin ba Maromak Jeová?

1. Ema Kristaun hanoin oinsá kona-ba ema nia governu?

Ema Kristaun sira hatudu respeitu ba governu. Hanesan Jesus hatete, ita “fó ba César buat neʼebé César nian”. Neʼe katak, ita halo tuir governu nia lei, inklui mós lei kona-ba selu taxa. (Marcos 12:17) Bíblia hanorin katak ema nia governu iha tanba Jeová mak husik sira ukun. (Roma 13:1) Tan neʼe, ita hatene katak ema nia governu nia kbiit mak limitadu, no Maromak nia pozisaun mak aas liu fali ema nia pozisaun. Ita fiar katak ita-nia Maromak no ninia Ukun iha lalehan mak sei rezolve problema hotu neʼebé ita hasoru.

2. Oinsá mak ita bele hatudu katak ita neutrál?

Hanesan Jesus, ita la envolve an iha polítika. Bainhira ema haree Jesus halo milagre no koko halo nia sai liurai iha mundu neʼe, nia lakohi simu. (João 6:15) Tanbasá? Liutiha tempu balu, nia hatete: “Haʼu-nia Ukun laʼós husi mundu neʼe.” (João 18:36) Nuʼudar Jesus nia dixípulu, ita mós hatudu katak ita neutrál iha dalan oioin. Porezemplu, ita la hola parte iha funu. (Lee Miqueias 4:3.) Ita respeitu símbolu nasaun nian hanesan bandeira, maibé ita la kontinénsia, tanba neʼe hanesan deʼit ho ita adora ida-neʼe. (1 João 5:21) Ita mós la apoia no la kontra partidu polítiku ka kandidatu sira. Liuhusi dalan hanesan neʼe no dalan seluk, ita hatudu katak ita laran-metin deʼit ba Maromak nia governu, ka ninia Ukun.

KEʼE KLEʼAN

3. Ema Kristaun neʼebé loos nafatin neutrál 

Jesus no ninia dixípulu sira hatudu ezemplu mai ita. Lee Roma 13:1, 5-7 no 1 Pedro 2:13, 14. Depois, loke VÍDEO no koʼalia hamutuk kona-ba pergunta tuirmai.

VÍDEO: Ema Kristaun neʼebé loos neutrál—Parte 1 (4:28)

• Tanbasá mak ita presiza hatudu respeitu ba autoridade sira?

• Oinsá mak ita bele hatudu katak ita hakruʼuk ba autoridade sira?

Iha tempu funu, maski nasaun balu fó sai katak sira neutrál, maibé sira nafatin apoia parte rua neʼe hotu neʼebé halo konflitu. Loloos neutrál katak sá? Lee João 17:16. Depois, loke VÍDEO no koʼalia hamutuk kona-ba pergunta tuirmai.

VÍDEO: Ema Kristaun neʼebé loos neutrál—Parte 2 (3:11)

• Neutrál katak sá?

Oinsá se autoridade sira haruka Ita atu halo buat neʼebé kontra Maromak nia ukun-fuan? Lee Apóstolu 5:28, 29. Depois, loke VÍDEO no koʼalia hamutuk kona-ba pergunta tuirmai.

VÍDEO: Ema Kristaun neʼebé loos neutrál—Parte 3 (1:18)

• Se ema nia lei ruma mak kontra Maromak nia ukun-fuan, ida-neʼebé mak ita presiza halo tuir?

• Tuir Ita-nia hanoin, iha situasaun hanesan saida mak ema Kristaun sei la halo tuir ema nia lei?

4. Neutrál liuhusi hanoin no hahalok

Lee 1 João 5:21. Depois, loke VÍDEO no koʼalia hamutuk kona-ba pergunta tuirmai.

VÍDEO: Tanbasá ema Kristaun loos presiza aten-brani—Atu nafatin neutrál (2:49)

• Iha vídeo neʼe, tanbasá mak Ayenge deside atu la hola parte iha partidu polítiku no la tuir serimónia nasionál hanesan kontinénsia ba bandeira?

• Tuir Ita-nia hanoin, desizaun neʼebé nia halo matenek ka lae?

Situasaun saida tan mak bele koko ita-nia pozisaun neutrál? Loke VÍDEO, depois koʼalia hamutuk kona-ba pergunta tuirmai.

VÍDEO: Lisaun sira husi Livru Haklaken—Mantein neutrál iha mundu neʼebé la iha unidade (5:16)

• Oinsá mak ita bele mantein neutrál bainhira haree desportu entre nasaun ida ho nasaun seluk?

• Oinsá mak ita bele mantein neutrál maski desizaun polítika ruma fó impaktu aat ka benefísiu mai ita?

• Oinsá mak notísias ka ema neʼebé ita ransu bele halo susar ba ita atu mantein neutrál?

PONTU IMPORTANTE

Ema Kristaun hakaʼas an atu neutrál nafatin kona-ba buat polítiku liuhusi sira-nia hanoin, liafuan no hahalok.

Rezumu

• Ema Kristaun presiza hatudu hahalok saida ba ema nia governu?

• Tanbasá mak ita neutrál nafatin kona-ba buat polítiku?

• Situasaun saida deʼit mak bele halo susar ba ita atu mantein neutrál?

BUKA-HATENE LIUTÁN

Karik ita presiza halo sakrifísiu saida deʼit hodi bele neutrál nafatin?

Jeová nunka husik ami mesak (3:14)

Família sira bele halo saida atu prepara nanis ba situasaun neʼebé halo susar ba sira atu mantein neutrál?

Mantein neutrál iha fatin hotu (4:25)

Ema barak hanoin katak defende sira-nia nasaun mak buat neʼebé halo sira sente orgullu liu. Maibé neʼe loos ka lae?

“Ba Maromak buat hotu bele deʼit” (5:19)

Hanoin toʼok oinsá atu hatudu katak ita laʼós mundu neʼe nian bainhira halo desizaun kona-ba serbisu.

“Ema ida-idak sei lori ninia todan rasik” (Livru Haklaken, 15 Marsu 2006)

Ema Kristaun hotu sei hasoru susar tanba ema kontra no fó-terus. Ita presiza taʼuk no hanoin barak ka lae?

1. Tanbasá mak ita la hakfodak kuandu ema fó-terus ita?

Bíblia hatete ho klaru: “Ema hotu neʼebé hakarak atu moris ho laran-metin ba Maromak nuʼudar Kristu Jesus nia dixípulu sei hetan mós terus.” (2 Timóteo 3:12) Ema fó-terus Jesus tanba nia laʼós parte husi Satanás nia mundu. Ita mós laʼós parte husi mundu neʼe, tan neʼe ita la hakfodak kuandu ema nia governu ka organizasaun relijiaun sira fó-terus ita.​—João 15:18, 19.

2. Oinsá mak ita bele prepara an?

Ita presiza hametin ita-nia fiar ba Jeová agora. Fahe tempu atu halo orasaun, lee ninia Liafuan loron-loron no tuir reuniaun beibeik. Buat sira-neʼe sei fó Ita forsa atu hatudu aten-brani hodi tahan hasoru susar naran deʼit neʼebé mai husi ema seluk, inklui husi Ita-nia família rasik. Apóstolu Paulo neʼebé sempre hetan terus husi ema, hakerek: “Jeová mak haʼu-nia ajuda-naʼin; haʼu sei nunka taʼuk.”​—Ebreu 13:6.

Ita mós bele haburas aten-brani hodi haklaken beibeik. Liuhusi haklaken, ita aprende atu tau fiar ba Jeová no manán sentimentu taʼuk ba ema. (Provérbios 29:25) Se Ita haburas aten-brani atu haklaken agora, Ita sei sai prontu atu kontinua haklaken maski governu koko hanetik ita-nia serbisu haklaken.​—1 Tesalónika 2:2.

3. Se Ita tahan terus, neʼe lori benefísiu saida?

Klaru katak ita la kontente kuandu ema fó-terus ita, maibé se ita tahan ho susesu, ita-nia fiar sei sai metin liután. Ita mós sei hakbesik liután ba Jeová tanba ita haree rasik oinsá nia ajuda ita kuandu ita-nia forsa la toʼo atu tahan. (Lee Tiago 1:2-4.) Jeová sente triste kuandu haree ita hetan terus, maibé nia kontente kuandu ita tahan terus neʼe. Bíblia hatete: “Se imi tahan terus tanba halo buat diʼak, Maromak kontente ho ida-neʼe.” (1 Pedro 2:20) Se ita laran-metin nafatin, Jeová sei fó mai ita moris ba nafatin iha mundu foun neʼebé la iha tan ema ida mak fó-terus ba Jeová nia povu.​—Mateus 24:13.

KEʼE KLEʼAN

4. Ita bele tahan maski família kontra

Jesus fó sai katak ita-nia família balu bele kontra ita-nia desizaun atu serbí Jeová. Lee Mateus 10:34-36, depois koʼalia hamutuk kona-ba pergunta tuirmai:

• Se ema ida deside atu serbí Jeová, karik ninia família sei halo saida?

VÍDEO: Jeová sempre ajuda ami (5:13)

• Se Ita-nia família ka belun ida mak koko hanetik Ita atu la serbí Jeová, Ita sei halo saida?

Lee Salmo 27:10 no Marcos 10:29, 30. Depois lee tiha eskritura ida-idak, koʼalia hamutuk kona-ba pergunta tuirmai:

• Oinsá mak promesa neʼe bele ajuda Ita kuandu família ka kolega mak kontra Ita?

5. Kontinua adora Jeová maski ema fó-terus

VÍDEO: Aten-brani maski ema fó-terus (6:27)

• Oinsá mak ezemplu sira iha vídeo neʼe hametin Ita-nia fiar?

Lee Apóstolu 5:27-29 no Ebreu 10:24, 25. Depois lee tiha eskritura ida-idak, koʼalia hamutuk kona-ba pergunta tuirmai:

• Tanbasá mak importante atu kontinua adora Jeová maski governu bandu ita atu tuir reuniaun ka haklaken?

6. Jeová sei ajuda Ita tahan

VÍDEO: Maromak Jeová sei fó forsa mai haʼu (3:40)

• Iha vídeo neʼe, saida mak ajuda Testemuña sira-neʼe atu tahan?

Lee Roma 8:35, 37-39 no Filipe 4:13. Depois lee tiha eskritura ida-idak, koʼalia hamutuk kona-ba pergunta tuirmai:

• Oinsá mak eskritura neʼe hametin Ita-nia fiar katak Ita bele tahan hasoru susar naran deʼit?

Lee Mateus 5:10-12, depois koʼalia hamutuk kona-ba pergunta tuirmai:

• Tanbasá mak Ita bele sente kontente maski ema fó-terus?

PONTU IMPORTANTE

Jeová hafolin ita-nia hakaʼas an atu serbí nia maski hetan terus. Ho ninia ajuda, ita bele tahan ho susesu!

Rezumu

• Tanbasá mak ema Kristaun la hakfodak kuandu ema fó-terus?

• Saida mak Ita bele halo agora atu prepara an ba susar neʼebé Ita sei hasoru?

• Saida mak bele ajuda Ita atu fiar metin katak Ita bele kontinua serbí Jeová maski hasoru susar naran deʼit?

BUKA-HATENE LIUTÁN

Haree irmaun joven ida neʼebé esplika oinsá mak Jeová ajuda nia atu tahan bainhira nia tama komarka tanba neutrál.

Kontinua tahan maski ema fó-terus (2:34)

Haree toʼok saida mak ajuda feen-laʼen ida atu serbí Jeová ho laran-metin ba tinan barak maski hasoru susar.

Serbí Jeová maski iha mudansa oioin (7:11)

Aprende oinsá mak Ita bele tahan ho aten-brani bainhira ema fó-terus ba Ita.

“Prepara an antes ema fó-terus” (Livru Haklaken, Jullu 2019)

Haree tanbasá ita la hakfodak kuandu família kontra ita, no oinsá ita bele haburas dame no kontinua serbí Jeová?

“Haʼu mai laʼós atu lori dame, maibé lori surik” (Livru Haklaken, Outubru 2017)