Bíblia nia mensajen neʼebé importante liu mak kona-ba Maromak nia Ukun, neʼebé ema barak temi nuʼudar Maromak nia Reinu. Jeová sei uza Ukun neʼe atu kumpre ninia hakarak ba mundu tuir ninia planu husi tempu uluk kedas. Maibé saida mak Maromak nia Ukun? Oinsá mak ita bele hatene katak Ukun neʼe hahú ona? Saida deʼit mak Ukun neʼe halo ona? No saida mak Ukun neʼe sei halo iha futuru? Ita bele hetan resposta ba pergunta sira-neʼe iha lisaun neʼe no lisaun tuirmai.

1. Saida mak Maromak nia Ukun? Sé mak liurai ba Ukun neʼe?

Maromak nia Ukun mak governu ida neʼebé Maromak Jeová mak harii. Liurai ba Ukun neʼe mak Jesus Kristu, no nia sei ukun husi lalehan. (Mateus 4:17; João 18:36) Bíblia hatete katak Jesus “sei ukun nuʼudar Liurai . . . ba nafatin”. (Lucas 1:32, 33) Nuʼudar Liurai ba Maromak nia Ukun, Jesus sei ukun ema hotu iha mundu.

2. Sé mak ukun hamutuk ho Jesus?

Jesus la ukun mesak. Ema husi “suku, língua, povu no nasaun hotu . . . sei ukun nuʼudar liurai ba mundu tomak”. (Apokalipse 5:9, 10) Ema naʼin-hira mak sei ukun hamutuk ho Kristu? Husi tempu neʼebé Jesus mai iha mundu, ema millaun ba millaun sai ona Jesus nia dixípulu. Maibé ema naʼin-144.000 deʼit husi ema Kristaun sira-neʼe mak bá lalehan atu ukun hamutuk ho Jesus. (Lee Apokalipse 14:1-4.) Ema Kristaun seluk iha mundu sei sai povu ba Maromak nia Ukun.​—Salmo 37:29.

3. Tanbasá Maromak nia Ukun mak diʼak liu fali ema nia governu?

Maski ukun-naʼin balu hakaʼas an atu halo buat diʼak oioin, maibé sira-nia kbiit la toʼo atu kumpre buat hotu tuir sira-nia hakarak. No tuirmai ukun-naʼin seluk mak troka sira-nia pozisaun no karik ukun-naʼin foun neʼe ladún hanoin kona-ba povu nia diʼak. Maibé Jesus, Liurai ba Maromak nia Ukun, sei la entrega fali ninia pozisaun ba ukun-naʼin seluk. Maromak harii ona “ukun ida neʼebé sei nunka lakon”. (Daniel 2:44) Jesus sei ukun mundu tomak, no nia la todan ba sorin. Nia mak ukun-naʼin neʼebé hatudu domin, laran-diʼak no justisa, no nia mós sei hanorin ema atu hatudu hahalok hanesan neʼe ba malu hodi tuir ninia ezemplu.​—Lee Isaias 11:9.

4. Governu neʼebé iha kbiit boot mak sei ukun mundu tomak

Jesus Kristu iha kbiit boot liu fali ukun-naʼin hotu iha ema nia istória. Lee Mateus 28:18, depois koʼalia hamutuk kona-ba pergunta tuirmai:

• Saida mak diferensa entre Jesus nia kbiit atu ukun ho ema nia kbiit atu ukun?

Ema nia governu troka beibeik, no governu ida-idak ukun deʼit sira-nia área iha mundu. Oinsá ho Maromak nia Ukun? Lee Daniel 7:14, depois koʼalia hamutuk kona-ba pergunta tuirmai:

• Maromak nia governu “sei nunka lakon”, tanbasá neʼe diʼak?

• Maromak nia governu sei ukun mundu tomak, tanbasá neʼe diʼak?

5. Ema nia ukun tenke troka duni

Tanbasá mak ema nia ukun tenke troka duni ho Maromak nia Ukun? Loke VÍDEO, depois koʼalia hamutuk kona-ba pergunta tuirmai.

VÍDEO: Saida mak Maromak nia Ukun?​—Vídeo badak (1:41)

• Ema nia ukun lori rezultadu saida?

Lee Eclesiastes 8:9, depois koʼalia hamutuk kona-ba pergunta tuirmai:

• Tuir Ita-nia hanoin, Maromak nia Ukun tenke troka ema nia governu ka lae? Tanbasá?

6. Liurai sira iha Maromak nia Ukun komprende ita

Tanba ita-nia Liurai Jesus uluk moris ona nuʼudar ema, nia bele “komprende ita-nia fraku sira”. (Ebreu 4:15) Oinsá ho ema naʼin-144.000 neʼebé ukun hamutuk ho Jesus? Sira mak mane no feto laran-metin neʼebé Jeová hili “husi suku, língua, povu no nasaun hotu”.​—Apokalipse 5:9.

• Hodi hatene katak Jesus no ninia maluk ukun-naʼin hotu komprende ita-nia situasaun moris, neʼe halo Ita sente kmaan ka lae? Tanbasá?

7. Maromak nia Ukun iha lei sira neʼebé diʼak liu

Governu sira halo lei oioin atu fó benefísiu no protesaun ba povu. Maromak nia Ukun mós iha lei, ka ukun-fuan oioin neʼebé ninia povu tenke halo tuir. Lee 1 Korinto 6:9-11, depois koʼalia hamutuk kona-ba pergunta tuirmai:

• Tuir Ita-nia hanoin, mundu nia situasaun sei sai oinsá kuandu ema hotu halo tuir Maromak nia ukun-fuan kona-ba morál?a

• Jeová hakarak povu husi ninia Ukun atu halo tuir ninia ukun-fuan sira, tuir Ita-nia hanoin neʼe lójiku ka lae? Tanbasá?

• Saida mak hatudu katak ema neʼebé seidauk halo tuir ukun-fuan sira-neʼe mós bele troka sira-nia hahalok?​—Haree versíkulu 11.

PONTU IMPORTANTE

Maromak nia Ukun mak governu ida iha lalehan neʼebé sei ukun mundu tomak.

Rezumu

• Sé-sé deʼit mak sai liurai iha Maromak nia Ukun?

• Tanbasá Maromak nia Ukun mak diʼak liu fali ema nia governu?

• Jeová hakarak povu husi ninia Ukun atu halo saida?

BUKA-HATENE LIUTÁN

Buka-hatene saida mak Jesus hanorin kona-ba Maromak nia Ukun iha neʼebé.

“Maromak nia Reinu iha Ita-nia laran ka lae?” (Informasaun iha jw.org/tdt)

Tanbasá mak Testemuña ba Jeová hili atu laran-metin liu ba Maromak nia Ukun duké ba ema nia governu?

Laran-metin ba Maromak nia Ukun (1:43)

Buka-hatene saida mak Bíblia hatete kona-ba ema naʼin-144.000 neʼebé Jeová hili atu ukun hamutuk ho Jesus.

“Sé mak sei bá lalehan?” (Informasaun iha jw.org/tdt)

Oinsá mak feto ida neʼebé iha prizaun bele fiar-metin katak só Maromak deʼit mak bele lori justisa ba mundu?

“Haʼu hetan solusaun ba situasaun neʼebé la justisa” (Matan-moris bá!, Novembru 2011)

Jesus hanorin katak ninia dixípulu sira “laʼós mundu neʼe nian”. (João 15:19) Neʼe inklui sira mantein sira-nia pozisaun neutrál, katak la apoia buat polítiku ka funu. Dala ruma la fasil ba ita atu neutrál, no karik ema sei goza ita. Oinsá mak ita bele neutrál no laran-metin nafatin ba Maromak Jeová?

1. Ema Kristaun hanoin oinsá kona-ba ema nia governu?

Ema Kristaun sira hatudu respeitu ba governu. Hanesan Jesus hatete, ita “fó ba César buat neʼebé César nian”. Neʼe katak, ita halo tuir governu nia lei, inklui mós lei kona-ba selu taxa. (Marcos 12:17) Bíblia hanorin katak ema nia governu iha tanba Jeová mak husik sira ukun. (Roma 13:1) Tan neʼe, ita hatene katak ema nia governu nia kbiit mak limitadu, no Maromak nia pozisaun mak aas liu fali ema nia pozisaun. Ita fiar katak ita-nia Maromak no ninia Ukun iha lalehan mak sei rezolve problema hotu neʼebé ita hasoru.

2. Oinsá mak ita bele hatudu katak ita neutrál?

Hanesan Jesus, ita la envolve an iha polítika. Bainhira ema haree Jesus halo milagre no koko halo nia sai liurai iha mundu neʼe, nia lakohi simu. (João 6:15) Tanbasá? Liutiha tempu balu, nia hatete: “Haʼu-nia Ukun laʼós husi mundu neʼe.” (João 18:36) Nuʼudar Jesus nia dixípulu, ita mós hatudu katak ita neutrál iha dalan oioin. Porezemplu, ita la hola parte iha funu. (Lee Miqueias 4:3.) Ita respeitu símbolu nasaun nian hanesan bandeira, maibé ita la kontinénsia, tanba neʼe hanesan deʼit ho ita adora ida-neʼe. (1 João 5:21) Ita mós la apoia no la kontra partidu polítiku ka kandidatu sira. Liuhusi dalan hanesan neʼe no dalan seluk, ita hatudu katak ita laran-metin deʼit ba Maromak nia governu, ka ninia Ukun.

KEʼE KLEʼAN

3. Ema Kristaun neʼebé loos nafatin neutrál 

Jesus no ninia dixípulu sira hatudu ezemplu mai ita. Lee Roma 13:1, 5-7 no 1 Pedro 2:13, 14. Depois, loke VÍDEO no koʼalia hamutuk kona-ba pergunta tuirmai.

VÍDEO: Ema Kristaun neʼebé loos neutrál—Parte 1 (4:28)

• Tanbasá mak ita presiza hatudu respeitu ba autoridade sira?

• Oinsá mak ita bele hatudu katak ita hakruʼuk ba autoridade sira?

Iha tempu funu, maski nasaun balu fó sai katak sira neutrál, maibé sira nafatin apoia parte rua neʼe hotu neʼebé halo konflitu. Loloos neutrál katak sá? Lee João 17:16. Depois, loke VÍDEO no koʼalia hamutuk kona-ba pergunta tuirmai.

VÍDEO: Ema Kristaun neʼebé loos neutrál—Parte 2 (3:11)

• Neutrál katak sá?

Oinsá se autoridade sira haruka Ita atu halo buat neʼebé kontra Maromak nia ukun-fuan? Lee Apóstolu 5:28, 29. Depois, loke VÍDEO no koʼalia hamutuk kona-ba pergunta tuirmai.

VÍDEO: Ema Kristaun neʼebé loos neutrál—Parte 3 (1:18)

• Se ema nia lei ruma mak kontra Maromak nia ukun-fuan, ida-neʼebé mak ita presiza halo tuir?

• Tuir Ita-nia hanoin, iha situasaun hanesan saida mak ema Kristaun sei la halo tuir ema nia lei?

4. Neutrál liuhusi hanoin no hahalok

Lee 1 João 5:21. Depois, loke VÍDEO no koʼalia hamutuk kona-ba pergunta tuirmai.

VÍDEO: Tanbasá ema Kristaun loos presiza aten-brani—Atu nafatin neutrál (2:49)

• Iha vídeo neʼe, tanbasá mak Ayenge deside atu la hola parte iha partidu polítiku no la tuir serimónia nasionál hanesan kontinénsia ba bandeira?

• Tuir Ita-nia hanoin, desizaun neʼebé nia halo matenek ka lae?

Situasaun saida tan mak bele koko ita-nia pozisaun neutrál? Loke VÍDEO, depois koʼalia hamutuk kona-ba pergunta tuirmai.

VÍDEO: Lisaun sira husi Livru Haklaken—Mantein neutrál iha mundu neʼebé la iha unidade (5:16)

• Oinsá mak ita bele mantein neutrál bainhira haree desportu entre nasaun ida ho nasaun seluk?

• Oinsá mak ita bele mantein neutrál maski desizaun polítika ruma fó impaktu aat ka benefísiu mai ita?

• Oinsá mak notísias ka ema neʼebé ita ransu bele halo susar ba ita atu mantein neutrál?

PONTU IMPORTANTE

Ema Kristaun hakaʼas an atu neutrál nafatin kona-ba buat polítiku liuhusi sira-nia hanoin, liafuan no hahalok.

Rezumu

• Ema Kristaun presiza hatudu hahalok saida ba ema nia governu?

• Tanbasá mak ita neutrál nafatin kona-ba buat polítiku?

• Situasaun saida deʼit mak bele halo susar ba ita atu mantein neutrál?

BUKA-HATENE LIUTÁN

Karik ita presiza halo sakrifísiu saida deʼit hodi bele neutrál nafatin?

Jeová nunka husik ami mesak (3:14)

Família sira bele halo saida atu prepara nanis ba situasaun neʼebé halo susar ba sira atu mantein neutrál?

Mantein neutrál iha fatin hotu (4:25)

Ema barak hanoin katak defende sira-nia nasaun mak buat neʼebé halo sira sente orgullu liu. Maibé neʼe loos ka lae?

“Ba Maromak buat hotu bele deʼit” (5:19)

Hanoin toʼok oinsá atu hatudu katak ita laʼós mundu neʼe nian bainhira halo desizaun kona-ba serbisu.

“Ema ida-idak sei lori ninia todan rasik” (Livru Haklaken, 15 Marsu 2006)