11, 12. Tanbasá mak Herodes fó-terus ba ema kristaun sira? Nia halo saida deʼit?

¹¹ Pedro rona ida-neʼe, no liutiha tinan balu, nia haree rasik oinsá mak orasaun neʼebé halo ho laran iha kbiit duni. (Lee Apostolu 12:1-6.) Versíkulu primeiru iha kapítulu 12 hatudu katak Herodes fó-terus ba ema kristaun sira tanba nia hakarak halo ema judeu sira kontente. Karik Herodes rona katak Tiago mak apóstolu ida neʼebé kolega besik ho Jesus. Tan neʼe, Herodes haruka oho Tiago “ho surik”. (Versíkulu 2) Kongregasaun lakon apóstolu doben ida. Ema kristaun sira hetan susar boot!

13, 14. (a) Saida mak kongregasaun halo ba Pedro? (b) Ita bele aprende saida husi Pedro nia maluk sira-nia ezemplu?

¹³ Kongregasaun hatene ho loloos saida mak sira bele halo. Versíkulu 5 dehan: “Nuneʼe, Pedro hela iha dadur laran, maibé kreda harohan ho laran-manas ba Maromak ba Pedro nia diʼak.” Loos duni, sira halo orasaun ba Maromak ho laran hodi husu ajuda ba Pedro. Maski Tiago mate ona, maibé sira la husik ida-neʼe halo sira triste demais, no sira mós la hanoin katak halo orasaun saugati deʼit. Sira hatene katak Maromak Jeová rona no hafolin tebes ema loos nia orasaun no nia hatán ba orasaun sira neʼebé tuir ninia hakarak.—Ebr 13:18, 19; Tgo 5:16.

¹⁴ Ita bele aprende saida husi Pedro nia maluk sira-nia ezemplu? Atu matan-moris nafatin, ita presiza halo orasaun laʼós ba ita-nia diʼak deʼit maibé mós ba ita-nia maluk kristaun sira. (Ef 6:18) Ita hatene maluk kristaun ruma neʼebé hasoru daudauk susar ka lae? Karik balu tahan hasoru susar hanesan ema fó-terus sira tanba sira-nia fiar, governu bandu sira, ka dezastre naturál ruma. Diʼak atu ita halo orasaun ba sira-nia diʼak, loos ka lae? Karik ita mós hatene maluk ruma neʼebé hasoru susar oioin neʼebé ema seluk la hatene, hanesan problema iha família laran, sente laran-tun, ka moras. Diʼak atu hanoin kona-ba irmaun-irmán neʼebé iha situasaun hirak-neʼe no temi sira-nia naran kuandu ita halo orasaun ba Jeová neʼebé “rona orasaun”.—Sal 65:2.