10, 11. (a) Bibi seluk iha esperansa saida? (b) Bainhira mak esperansa ba bibi seluk sei sai loos?

¹⁰ Apóstolu Paulo hakerek ba “Maromak nia oan sira” neʼebé kose-mina kona-ba sira-nia esperansa furak atu sai “liman-rohan naʼin hamutuk ho Kristu”. Tuirmai, nia mós hakerek kona-ba esperansa neʼebé Jeová fó ba bibi seluk neʼebé sura labele, hodi dehan: “Mundu tomak hein manamanas tempu wainhira sei hatudu Maromak nia oan sira [ema kose-mina sira], basá mundu tomak sai tiha folin-laek, laʼós tan nia rasik hakarak, maibé tanba Ida neʼebé halo nia sai nuneʼe nia hakarak iha esperansa; basá mundu neʼe sei sai husi situasaun atan nian neʼebé sei dodok, hodi halo parte, nuʼudar Maromak nia oan, iha ema neʼebé laʼós atan nia kmanek.”—Rom 8:14-21.

12. Bensaun saida deʼit mak ema kose-mina sira sei lori ba ema hotu?

¹² Kristu nia Ukun ba Tinan Rihun Ida sei lori kmaan ba ema iha “mundu tomak”! Iha tempu neʼebá, Jeová mós sei hatudu sai “Maromak nia oan sira” bainhira sira serbisu hamutuk ho Kristu nuʼudar amlulik sira no fó bensaun ba ema hotu liuhusi Jesus nia sakrifísiu. Ema neʼebé hakruʼuk an ba Kristu nia Ukun, neineik-neineik sira sei “sai husi situasaun atan nian neʼebé sei dodok” ka sai livre husi rezultadu aat hotu husi sala no mate. Sira neʼebé laran-metin nafatin ba Jeová durante Jesus nia Ukun ba Tinan Rihun Ida no laran-metin nafatin kuandu Maromak husik Satanás atu koko ema ba dala ikus, sira-nia naran sei hakerek ba nafatin iha “livru moris nian”. Iha tempu neʼebá, sira sei haksolok ‘nuʼudar Maromak nia oan neʼebé laʼós atan tan’. (Apok 20:7, 8, 11, 12) Ida-neʼe mak esperansa neʼebé furak tebes!