LISAUN 49
Oinsá atu halaʼo moris família neʼebé kontente?—Parte 1
Feen-laʼen neʼebé foin kaben espera katak ksolok neʼebé sira sente iha loron kazamentu bele dura ba nafatin. No neʼe bele. Ema Kristaun barak neʼebé kaben kleur ona sente kontente duni tanba hakaʼas an atu aplika Bíblia nia matadalan.
1. Bíblia fó matadalan saida ba laʼen sira?
Jeová fó knaar ba laʼen atu sai família nia ulun. (Lee Éfeso 5:23.) Jeová hakarak laʼen sira atu halo desizaun neʼebé lori diʼak ba família. Bíblia haruka laʼen sira atu ‘kontinua hadomi sira-nia feen’. (Éfeso 5:25) Neʼe katak sá? Laʼen neʼebé domin hatudu laran-diʼak ba ninia feen iha uma laran no mós iha ema seluk nia oin. Nia proteje ninia feen no hakaʼas an atu tau matan ba feen nia presiza iha dalan fíziku no emosaun. (1 Timóteo 5:8) No importante liu mak, nia ajuda ninia feen atu hametin relasaun diʼak ho Maromak. (Mateus 4:4) Porezemplu, nia bele halo orasaun no lee Bíblia hamutuk ho ninia feen. Kuandu laʼen ida tau matan ninia feen ho domin, nia bele iha relasaun diʼak ho Jeová nuʼudar belun.—Lee 1 Pedro 3:7.
2. Bíblia fó matadalan saida ba feen sira?
Maromak nia Liafuan hatete katak feen “tenke hatudu respeitu kleʼan ba ninia laʼen”. (Éfeso 5:33) Oinsá mak nia bele halo nuneʼe? Nia bele hanoin kona-ba laʼen nia hahalok diʼak no ninia hakaʼas an atu tau matan ba nia no oan sira. Nia mós bele hatudu respeitu hodi apoia ninia laʼen nia desizaun, koʼalia ho laran-diʼak no koʼalia kona-ba laʼen nia hahalok diʼak maski laʼen la serbí Jeová.
3. Oinsá mak feen-laʼen bele hametin sira-nia relasaun?
Kona-ba feen-laʼen, Bíblia hatete: “Sira naʼin-rua sei sai isin ida deʼit.” (Mateus 19:5) Neʼe katak sira presiza luta hasoru buat naran deʼit neʼebé halo sira-nia domin ba malu sai fraku. Sira halo nuneʼe hodi gasta tempu hamutuk beibeik, no koʼalia nakloke ba malu ho domin hodi fó sai sira-nia hanoin no sentimentu. Sira tau uluk Jeová, no mós la husik buat naran deʼit ka ema seluk sai importante liu fali sira-nia pár. Sira mós kuidadu atu la haburas sentimentu romántiku ba ema seluk.
KEʼE KLEʼAN
Haree toʼok Bíblia nia prinsípiu saida mak bele ajuda Ita atu hametin Ita-nia moris kaben.
4. Laʼen sira, hadomi no tau matan didiʼak ba imi-nia feen
Bíblia hatete: “Laʼen sira tenke hadomi sira-nia feen hanesan sira-nia isin rasik.” (Éfeso 5:28, 29) Neʼe katak sá? Loke VÍDEO, depois koʼalia hamutuk kona-ba pergunta tuirmai.
Iha dalan saida deʼit mak laʼen bele hatudu katak nia hadomi no tau matan ninia feen?
Lee Koloso 3:12, depois koʼalia hamutuk kona-ba pergunta tuirmai:
Oinsá mak laʼen bele hatudu hahalok sira-neʼe iha ninia moris kaben?
5. Feen sira, hadomi no respeitu imi-nia laʼen
Bíblia anima feen atu respeitu ninia laʼen maski laʼen serbí ka la serbí Jeová. Lee 1 Pedro 3:1, 2, depois koʼalia hamutuk kona-ba pergunta tuirmai:
Se Ita-nia laʼen fiar la hanesan ho Ita, klaru katak Ita hakarak nia mós adora Jeová. Tuir Ita-nia hanoin ida-neʼebé mak diʼak liu, haklaken ba nia la para ka sempre hatudu hahalok diʼak no respeitu? Tanbasá?
Feen-laʼen bele halo desizaun diʼak hamutuk. Maibé dala ruma feen nia hanoin la hanesan ho laʼen. Se ida-neʼe akontese, feen bele fó sai ninia hanoin ho kalma no respeitu. Maibé feen tenke rekoñese katak Jeová fó responsabilidade ba laʼen atu foti desizaun neʼebé diʼak liu ba família, no feen presiza hakaʼas an atu apoia laʼen nia desizaun. Hodi halo nuneʼe, feen bele ajuda ninia família moris kontente. Lee 1 Pedro 3:3-5, depois koʼalia hamutuk kona-ba pergunta tuirmai:
Jeová sente oinsá bainhira feen hatudu respeitu ba ninia laʼen?
6. Ita bele rezolve problema iha moris kaben
La iha moris kaben ida mak perfeitu. Tan neʼe, feen-laʼen presiza apoia malu atu rezolve problema oioin. Loke VÍDEO, depois koʼalia hamutuk kona-ba pergunta tuirmai.
Iha vídeo neʼe, saida deʼit mak hatudu katak feen-laʼen neʼe ladún besik ba malu tan?
Saida deʼit mak sira halo atu hametin fali sira-nia relasaun?
Lee 1 Korinto 10:24 no Koloso 3:13. Depois lee tiha eskritura ida-idak, koʼalia hamutuk kona-ba pergunta tuirmai:
Oinsá mak aplika konsellu neʼe bele ajuda feen-laʼen atu hametin sira-nia moris kaben?
Bíblia hatete katak ita tenke hatudu respeitu ba malu. Hatudu respeitu inklui mós hatudu laran-diʼak ba malu. Lee Roma 12:10, depois koʼalia hamutuk kona-ba pergunta tuirmai:
Ita bele hein deʼit ba Ita-nia kaben atu hatudu uluk respeitu ba Ita ka lae? Tanbasá?
EMA BALU DEHAN: “Haʼu ho haʼu-nia kaben ladún besik malu ona hanesan uluk.”
Oinsá mak Ita bele esplika katak Bíblia bele ajuda sira?
PONTU IMPORTANTE
Feen-laʼen bele moris kontente kuandu sira hadomi malu, respeitu malu, no aplika Bíblia nia prinsípiu sira.
Rezumu
Saida mak laʼen bele halo atu iha moris kaben neʼebé kontente?
Saida mak feen bele halo atu iha moris kaben neʼebé kontente?
Se Ita mak kaben-naʼin, Bíblia nia prinsípiu saida mak bele ajuda hametin Ita-nia moris kaben?
BUKA-HATENE LIUTÁN
Buka-hatene sujestaun sira neʼebé bele ajuda Ita atu moris kontente nuʼudar família.
Haree toʼok vídeo múzika neʼebé hatudu bensaun oioin neʼebé ita bele simu kuandu aplika konsellu husi Maromak kona-ba moris kaben.
Buka-hatene feen hakruʼuk ba laʼen nuʼudar ulun katak sá.
“Feto sira, tansá mak imi hakruʼuk ba ulun sira?” (Livru Haklaken, 15 Maiu 2010)
Oinsá mak feen-la’en ida manán hasoru problema sériu oioin, inklui divórsiu?
Ho Maromak nia ajuda ami harii fali ami-nia moris kaben (5:14)