Manán buat aat ho buat neʼebé diʼak

13, 14. (a) Tanbasá mak ita la hakfodak kuandu ema fó-terus mai ita? (b) Oinsá mak ita fó rahun-diʼak ba ema neʼebé fó-terus ita?

¹³ Lee Roma 12:14, 21. Kuandu ita fiar duni katak Maromak Jeová sei halaʼo ninia hakarak, ita sei hakaʼas an atu halo serbisu neʼebé nia fó mai ita, neʼe mak haklaken “iha mundu tomak” kona-ba “lia-foun reinu nian”. (Mt 24:14) Ita hatene katak serbisu haklaken sei halo ita-nia inimigu sira hirus ho ita, tanba Jesus fó avizu: “Povu hotu sei odi imi tan haʼu-nia naran.” (Mt 24:9) Tan neʼe, ita la hakfodak ka laran-tun kuandu ema fó-terus mai ita. Apóstolu Pedro hatete: “Doben sira, keta hakfodak kona-ba terus boot neʼebé mai hasoru imi atu koko imi, hanesan buat ruma neʼebé oin-seluk liu mosu ba imi. Maibé, haksolok bá, basá imi halo parte iha Kristu nia terus.”—1 Ped 4:12, 13.

15. Oinsá mak ita bele manán buat neʼebé aat ho buat neʼebé diʼak?

¹⁵ Nuneʼe, ema kristaun loos halo tuir konsellu husi versíkulu ikus husi Roma kapítulu 12: “Keta husik buat aat manán imi, maibé imi manán buat aat ho buat neʼebé diʼak.” Buat aat hotu nia hun mak mai husi Diabu Satanás. (Joao 8:44; 1 Joao 5:19) Iha apóstolu João nia vizaun, Jesus fó sai katak ninia alin kose-mina sira “manán [Satanás] hodi Bibi-Oan nia raan no ho sira-nia liafuan sasin nian”. (Apok 12:11) Ida-neʼe hatudu katak dalan diʼak liu hotu atu manán Satanás no buat aat iha mundu neʼe, neʼebé nia ukun, mak hodi halo buat neʼebé diʼak liuhusi haklaken lia-foun diʼak kona-ba Maromak nia Reinu.