7, 8. Oinsá mak dalan neʼebé Adão no Jesus halaʼo sira-nia moris lori rezultadu neʼebé la hanesan?

⁷ Maromak Jeová ho domin loke dalan atu ema hotu bele sai livre husi sala neʼebé sira hetan husi Adão. Paulo esplika katak ida-neʼe bele akontese liuhusi ema ida neʼebé perfeitu ka la iha sala, nia hanesan Adão segundu. (1 Kor 15:45) Maibé, dalan neʼebé ema naʼin-rua neʼe halaʼo sira-nia moris lori rezultadu neʼebé la hanesan duni. Oinsá?—Lee Roma 5:15, 16.

⁸ Paulo hatete: “Prezente laʼós hanesan sala.” Adão mak halo sala neʼe, nuneʼe nia merese duni atu hetan kastigu-mate. Maibé, laʼós nia deʼit mak mate. Bíblia hatete: “Tan ema ida deʼit nia sala . . . mak ema barak mate.” Tanba Adão hetan kastigu-mate, ida-neʼe mós monu ba Adão nia oan no bei-oan sira neʼebé sala-naʼin, inklui mós ita. Maski nuneʼe, ita bele sente kmaan hodi hatene katak Jesus neʼebé la iha sala bele lori rezultadu oin-seluk. Saida mak rezultadu neʼe? Apóstolu Paulo hatán hodi dehan katak “perdaun no moris mosu ba ema hotu” neʼebé “sai ema loos”.—Rom 5:18, 19.

9. Tuir Roma 5:16, 18, saida mak Maromak halo?

⁹ Liafuan gregu neʼebé tradús nuʼudar “ema barak sei sai loos” no hetan “fali perdua”, iha arti saida loos? Ema ida neʼebé tradús Bíblia hatete katak liafuan sira-neʼe hanesan liafuan neʼebé uza iha tribunál. Nia mós hatete katak liafuan sira-neʼe hatudu katak ema sira-nia situasaun troka iha Maromak nia oin, laʼós katak ema troka sira-nia hahalok. Ida-neʼe bele kompara Maromak ho juis ida neʼebé tesi lia ba ema ida neʼebé hetan duun kona-ba sala ruma. Maibé, Maromak perdua nia no halo nia sai livre husi sala.

14, 15. Bensaun saida mak sira neʼebé Maromak halo sai ema loos bele hetan? Maibé, sira tenke kontinua atu halo saida?

¹⁴ Hanoin toʼok kona-ba prezente kapás neʼebé Maromak Forsa Boot Liu Hotu fó hodi perdua sala neʼebé ema hetan husi Adão no mós sala ruma neʼebé ema halo! Maski ita la bele sura sala hira mak ema halo antes sira sai ema kristaun, maibé tanba Jesus nia moris nuʼudar sakrifísiu Maromak bele perdua sala sira-neʼe. Paulo hatete: “Prezente neʼe, liu tiha sala barak, lori fali perdua.” (Rom 5:16) Apóstolu sira no ema seluk neʼebé simu prezente neʼe (katak Maromak halo ema sai loos) tenke kontinua nafatin atu adora Maromak neʼebé loos ho fiar. Iha futuru, sira sei hetan bensaun saida? Bíblia hatete: “Sira neʼebé simu grasa waʼin ba waʼin no prezente atu sai ema loos sei ukun iha moris tan ema ida, Jesus Kristu.” Loos duni, prezente atu sai ema loos la lori mate, maibé lori moris.—Rom 5:17; lee Lucas 22:28-30.